Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Loloma—Na iTovo Talei

Loloma—Na iTovo Talei

E UQETI vakalou na yapositolo o Paula me vola na ciwa na itovo e vu mai na veiuqeti ni yalo tabu. (Kala. 5:22, 23) E vakamacalataka ni itovo talei qori e okati kece ena “vua ni yalo tabu.” * Na itovo qo e kilai me “itovo vou.” (Kolo. 3:10) Me vaka ga na kena vua e dua na vunikau ni qaravi vinaka, eda na vakaraitaka tale ga na vua ni yalo tabu ke sega ni tarovi na kena cakacaka ena noda bula.—Same 1:1-3.

Na imatai ni itovo talei e okati ena vua ni yalo tabu, na loloma. Na vuna? E tukuna o Paula ke sega ni dau loloma, ena “sega ni dua na ka” o koya. (1 Kor. 13:2) Ia na cava mada na loloma, eda na bucina da qai vakaitovotaka vakacava e veisiga?

E VAKARAITAKI VAKACAVA NA LOLOMA?

E sega ni dua na vosa me vakamacalataka rawa na ibalebale ni loloma, ia e vakamacalataka na iVolatabu na sala e rawa ni vakaraitaki kina. Kena ivakaraitaki, eda wilika ni loloma e “vosovoso qai yalovinaka.” E “marautaka” tale ga “na dina,” e “ubia na ka kece, e vakabauta na ka kece, e nuitaka na ka kece, e vosota na ka kece.” E okati tale ga ena loloma na noda veikauaitaki vakalevu, noda veinanumi dina, kei na noda veivolekati. Ena yasana adua, na lailai ni loloma ena laurai ena vuvu, dokadoka, ivalavala tawakilikili, kocokoco, dauveisausaumi, kei na sega ni dauveivosoti. Na loloma “e sega ni kauaitaka ga na ka e baleti koya,” e duidui vei ira na itovo e laurai kina na tawaveinanumi.—1 Kor. 13:4-8.

NODRAU LOLOMA O JIOVA KEI JISU

Na “Kalou ga na loloma.” Io, o Jiova e vatuka sara ga ni loloma. (1 Joni 4:8) Na ka kece e cakava e laurai kina nona loloma. Na ivakaraitaki levu ni nona lomani keda na kawatamata, nona talai Jisu mai me vakararawataki qai mate. E tukuna na yapositolo o Joni: “E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura, meda vakabulai kina ena vukuna. Na loloma qo e sega ni vakatau ena noda lomana na Kalou, o koya ga e lomani keda qai tala mai na Luvena me isoro ni noda ivalavala ca meda veiyaloni kina kei koya.” (1 Joni 4:9, 10) Ena loloma ni Kalou, eda rawa kina ni vosoti, eda rawata tale ga na inuinui kei na bula.

E vakaraitaka o Jisu nona lomani keda na kawatamata ena nona yalorawarawa me cakava na loma ni Kalou. E vola o Paula: “[E] kaya [o Jisu]: ‘Raica! Au lako mai meu cakava na lomamuni.’ . . . Ena ‘inaki’ ya eda sa vakasavasavataki kina ena kena cabori vakadua ga na yago i Jisu Karisito.” (Iper. 10:9, 10) Sega tale ni dua me vakaraitaka na loloma  levu va qori. E kaya o Jisu: “E sega ni dua na loloma e sivia na loloma qo, me dua e solia nona bula ena vukudra na nona itokani.” (Joni 15:13) Vakacava eda rawa ni vakatotomuria na tamata ivalavala ca na nodrau loloma vakaveitamani? Io! Meda dikeva mada na sala eda rawa ni cakava kina qori.

“VEILOMANI TIKO GA”

E vakamasuti keda o Paula: “Moni vakatotomuria na Kalou ni oni luvena lomani, moni veilomani tiko ga me vaka nona lomani keda na Karisito ni a soli koya ena vukuda.” (Efeso 5:1, 2) Eda na “veilomani tiko ga” nida vakaitovotaka qori e veisiga. E kilai qori ena ka eda cakava, sega ni ka ga eda tukuna. E vola o Joni: “Ragone, meda kua ni loloma ga e gusu se na vosa, me vakavotukana, me dina na noda loloma.” (1 Joni 3:18) Kena ivakaraitaki, nida lomana na Kalou kei ira na wekada, eda na uqeti meda wasea vei ira na “itukutuku vinaka” ni “Matanitu ni Kalou.” (Maciu 24:14; Luke 10:27) Eda vakaraitaka tale ga noda loloma nida vosovoso, yalovinaka qai dauveivosoti. E vakaroti keda na iVolatabu: “Moni dau veivosoti me vaka ga na nona vosoti kemuni vakarawarawa o Jiova.”—Kolo. 3:13.

Meda kua ni nanuma ni loloma qori e salavata kei na veivakademeni. Kena ivakaraitaki, ni via vakadula na gone e dua na itubutubu dau veivakademeni, ena solia na ka kece e tagica. Ia na itubutubu e lomani gone dina, ena dei ena gauna e vinakati kina. Na Kalou tale ga e dau loloma, ia “o koya e lomana o Jiova e vakavulica.” (Iper. 12:6) Nida dau loloma, eda na veivakadodonutaki ena gauna veiganiti. (Vkai. 3:11, 12) Ia meda nanuma tiko nida sega ni uasivi, eda rawa tale ga ni cakava eso na ka e sega ni yavutaki ena loloma. Koya gona, o keda kece e tiko na ka meda vakavinakataka nida vakaraitaka na loloma. Eda na cakava vakacava qori? Meda dikeva mada e tolu na sala.

MEDA BUCINA VAKACAVA NA LOLOMA?

Kena imatai, kerea vua na Kalou na veivuke ni yalona tabu, ni rawati kina na loloma. E kaya o Jisu ni na solia o Jiova na “yalo tabu vei ira era kerea vua.” (Luke 11:13) Ke da kerea na veivuke ni yalona tabu da qai saga meda “lako tiko ga ena yalo tabu,” na ka eda na cakava ena laurai kina vakalevu na loloma. (Kala. 5:16) Kena ivakaraitaki, ke o qase ni ivavakoso, o rawa ni kerea na yalo tabu me dusimaki iko mo veivakasalataki ena loloma mai na iVolatabu. Ke o itubutubu, o na kerea na yalo tabu ni Kalou me dusimaki iko mo vakavulici luvemu ena dela ni loloma, sega ena cudru.

Kena ikarua, vakasamataka na sala e vakaraitaka kina o Jisu na loloma ni vakacudrui. (1 Pita 2:21, 23) Meda vakasamataka nona ivakaraitaki nida vakacudrui se caka vei keda eso na ka tawadodonu. Ena gauna va qori, e vinaka meda tarogi keda, ‘Na cava ena cakava o Jisu?’ Dua na tacida yalewa o Leigh e vukei koya nona vakasamataka qori ni bera ni cakava e dua na ka. E kaya: “A vakau imeli e dua e valenicakacaka vua e dua tale keitou cakacaka vata, e vakaucacataki au kina kei na noqu cakacaka. Dua na ka na kena mosi. Ia au qai tarogi au, ‘Au na vakatotomuri Jisu vakacava ena ka au na cakava vua?’ Niu vakasamataka na ka ena cakava o Jisu, au vakatulewataka meu kua ni kauaitaka, meu guilecava. E muri au qai kila ni noqu itokani vakacakacaka ya e tauvi koya tiko e dua na mate bibi, dua na ka nona lomaocaoca. Au kila ni sega ni nakita na ka e vola ya. Noqu vakasamataka na ivakaraitaki i Jisu ena noda dau loloma ena gauna mada ga e vakacudrui kina, e uqeti au qori meu lomani koya tale ga noqu itokani vakacakacaka.” Ke da vakatotomuri Jisu, eda na dau loloma.

Kena ikatolu, meda bucina na loloma ni vakuai keda, ni keda ivakatakilakila na lotu vaKarisito dina. (Joni 13:34, 35) Ena tikina  qo, e uqeti keda na iVolatabu meda bucina na “ivakarau ni rai” i Jisu. Ni biuti lomalagi mai, e “vakadravudravuataki koya” ena vukuda, “me yacova sara na mate.” (Fpai. 2:5-8) Nida vakatotomuria na yalo ni nona vakuai koya, ena laurai qori ena ivakarau ni noda vakasama kei na lomada, ena uqeti keda meda veivakaliuci. Na cava tale na yaga ni noda dau bucina na loloma?

YAGA NI NODA DAU LOLOMA

E yaga vakalevu na noda dau loloma. Dikeva mada e rua na kena ivakaraitaki:

E yaga vakacava nida dau loloma?

  • MATAVEITACINI E VURAVURA RARABA: Nida veilomani, se mani ivavakoso cava eda gole kina e veiyasa i vuravura, era na dau kauaitaki keda na mataveitacini. E ka ni veivakalougatataki mera lomani keda na ‘tacida kece e vuravura’! (1 Pita 5:9) E vei tale eda na kunea kina na loloma va qo?

  • VEIYALONI: ‘Ni laurai na noda loloma ena noda dauveivosoti’ eda na marautaka kina na “veiyaloni.” (Efeso 4:2, 3) Eda dau vakadinata qori ena noda soqoni, soqo ni tabacakacaka, kei na soqo ni veiwasewase. Macala ga nida na kaya ni vakasakiti dina na noda duavata ena vuravura duiyaloyalo qo. (Same 119:165; Aisea 54:13) Nida saga na veiyaloni, eda vakaraitaka kina na titobu ni noda lomani ira na tacida, ni marautaka qori na Tamada vakalomalagi.—Same 133:1-3; Maciu 5:9.

“NA LOLOMA E VEIUQETI”

E vola o Paula: “Na loloma e veiuqeti.” (1 Kor. 8:1) E rawa vakacava qori? Ena ika13 ni wase ni imatai ni ivola i Paula vei ira e Korinica, e vakatokai me “Same ni Loloma”—e vakamacalataka na yapositolo na sala meda veilomani kina. Kena ivakaraitaki, eda na qara na ka ena yaga vei ira tale eso. (1 Kor. 10:24; 13:5) Kena ikuri, ni dau veinanumi na loloma, e vosovoso qai yalovinaka, ena vukei ira na vuvale mera veilomani, ena vakaduavatataka tale ga na ivavakoso.—Kolo. 3:14.

Na noda lomana na Kalou e iloloma uasivi duadua. Eda na veiyaloni kina kei ira na tamata e duidui na vanua era cavutu mai kina, matatamata, duivosavosa, meda veimaliwai kina ena marau nida qaravi Jiova “ena duavata.” (Sefa. 3:9) Meda vakadeitaka mada ga meda vakaitovotaka e veisiga na itovo talei qo e okati ena vua ni yalo tabu.

^ para. 2 Qo na imatai ni ulutaga e wase vakaciwa ena veivosakitaki kina na itovo yadua se itovo e okati ena vua ni yalo tabu.