Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Bibi Meda Veivakavulici

Bibi Meda Veivakavulici

“[Au] na solia vei kemuni na ivakavuvuli vinaka.”—VKAI. 4:2.

SERE: 93, 96

1, 2. Na cava meda vakavulica kina eso mera veiqaravi?

E BIBI dina vei Jisu na nona vunautaka na Matanitu ni Kalou. Ia levu tale ga na gauna e vakavulici ira kina eso mera ivakatawa ra qai qasenivuli. (Maciu 10:5-7) E dau ogaoga ena vunau o Filipi, ia e vukei ratou na va na luvena yalewa me dau laulau nodratou wasea na ka dina. (Caka. 21:8, 9) Na cava e bibi kina na veivakavulici va qori nikua?

2 E tubu tiko ga na iwiliwili ni tamata era sa ciqoma na itukutuku vinaka e veiyasa i vuravura. E vinakati vei ira na se bera ni papitaiso mera raica vakabibi na nodra vuli vakataki ira. Mera tuberi tale ga ena vunau kei na nodra vakavulica eso. Mera uqeti na tacida tagane ena ivavakoso mera cakacaka vakaukaua mera rawata na itavi ni dauveiqaravi kei na qase. Nira vakayagataka na “ivakavuvuli vinaka” na lotu vaKarisito matua, era na vukei ira kina na ka vou mera toso vakayalo.—Vkai. 4:2.

 VUKEI IRA NA KA VOU ME YAGA VEI IRA NA VOSA NI KALOU

3, 4. (a) E sema vakacava o Paula na vulici ni iVolatabu ina laulau ni noda cakacaka vakaitalatala? (b) Na cava meda cakava ni bera nida uqeti ira noda gonevuli mera vuli vakataki ira?

3 Na cava e bibi kina noda vulica vakataki keda na iVolatabu? Na kena isau e tiko ena ka e vola na yapositolo o Paula vei ira nona itokani vaKarisito mai Kolosa, e tukuna kina: “Keitou sega ni cegu ni masulaki kemuni kei na neitou kerea moni vakasinaiti ena kilaka dodonu me baleta na nona inaki [na Kalou], me soli vei kemuni na vuku dina, moni kila na veika vakayalo, me rawa ni rakorako vei Jiova na nomuni itovo, moni vakamarautaki koya vakalevu ena nomuni vua ena cakacaka vinaka kece kei na nomuni vakalevutaka tiko ga na kilaka dodonu me baleta na Kalou.” (Kolo. 1:9, 10) Ni tiko vei ira na lotu vaKarisito mai Kolosa na kilaka dodonu va qori, ena ‘rakorako kina vei Jiova na nodra itovo mera vakamarautaki koya vakalevu.’ Qo era na “vua” tiko ga “ena cakacaka vinaka kece,” vakabibi na vunautaki ni itukutuku vinaka. Me vinaka noda veiqaravi, e bibi meda muria noda ituvatuva ni vuli iVolatabu. Qori na ka eda na vakabibitaka vei ira na vuli iVolatabu.

4 Ni bera nida vukea e dua me yaga vua nona vuli vakataki koya, e bibi meda vakadeitaka mada e liu ni sa yaga tiko vei keda. E dodonu mada ga me vinaka noda ivakarau ni vuli iVolatabu. O rawa gona ni taroga: ‘Nira tukuna na itaukeinivale na ka e veisaqasaqa kei na iVolatabu se ra taroga na taro dredre, vakacava e dau yavutaki vakaivolatabu noqu isaunitaro? Niu wilika na nodratou vosota ena cakacaka vakaitalatala o Jisu, Paula kei na so tale, au dau vakasamataka vakabibi se na yaga vakacava na nodratou vosota ena noqu sokalou?’ Eda vinakata kece meda rawata na kilaka kei na ivakasala mai na Vosa ni Kalou. Nida tukuna vei ira eso tale na yaga ni noda vuli vakataki keda, eda na rawa ni uqeti ira mera rawata tale ga qori nira guta na vulici ni iVolatabu.

5. Vakamacalataka na sala o rawa ni vukei ira kina na ka vou me dua nodra ituvatuva ni vuli.

5 O na rairai taroga, ‘Au na vakavulici noqu gonevuli vakacava me vulica wasoma na iVolatabu?’ Ena vinaka mo vakaraitaka mada vua na sala me dau vakarautaka kina nomudrau vuli. O rawa ni tukuna vua me wilika eso na tikina mai na ikuri ni ivola Na Cava Mada e Kaya na iVolatabu? kei na kena tikinivolatabu sega ni lavetaki. Vukei koya me vakavakarau ena soqoni me rawa ni vakaitavi. Uqeti koya me wilika na ilavelave kece ni Vale ni Vakatawa kei na Yadra! Ke tiko nona Watchtower Library se LAIBRI ENA  INTERNET, o rawa ni vakaraitaka vua na sala me raica kina na isaunitaro vakaivolatabu. Qori ena rawa ni marautaka kina o gonevuli nona vulica vakataki koya na Vosa ni Kalou.

6. (a) O na vukei gonevuli vakacava me bucina e lomana me taleitaka na iVolatabu? (b) Na cava ena rawa ni cakava o gonevuli ke sa taleitaka dina na iVolatabu?

6 Eda na sega ni vakasaurarataka e dua me wilika qai vulica na iVolatabu. Eda na vakayagataka ga na ka sa vakarautaka na isoqosoqo i Jiova mera vukei kina na gonevuli mera taleitaka vakalevu na iVolatabu. De dua ni toso na gauna, na gonevuli gugumatua ena qai duavata kei na daunisame ni seretaka: “E vinaka noqu toro voleka vua na Kalou. Au sa vakaruru ga vei Jiova na Turaga Cecere Duadua.” (Same 73:28) Na yalo tabu i Jiova ena uqeta na gonevuli dau vakavinavinaka qai gugumatua.

TUBERI IRA MERA VUNAU, MERA VEIVAKAVULICI

7. E veivakavulici vakacava o Jisu ena cakacaka vakavunau? (Raica na imatai ni iyaloyalo.)

7 Ena Maciu wase 10, eda raica kina nona vakavulici ratou nona 12 na yapositolo o Jisu. E sega ni vosa raraba, e vakabibitaka eso na ka. [1] Eratou vakatudaliga na yapositolo ni vakavulici ratou tiko o Jisu ena sala me laulau kina nodratou vunau. Oti eratou sa qai gole ena yalava. Nodratou vulica na tisaipeli na iwalewale i Jisu, sega ni bera ratou sa matau sara ena vunautaki ni ka dina. (Maciu 11:1) Eda rawa ni vakavulici ira noda gonevuli mera dautukutuku maqosa. Meda veivosakitaka mada qo e rua na sala e rawa ni caka kina qori.

8, 9. (a) E torovi ira vakacava na tamata o Jisu ena cakacaka vakaitalatala? (b) Eda na vukei ira vakacava na dautukutuku vou mera vakatotomuria na iwalewale ni nona dauveivosaki o Jisu?

8 Veivosaki kei ira na tamata. O Jisu e sega ni dau vunautaka tu ga na Matanitu ni Kalou vei ira na ilala levu. Kena ivakaraitaki, ena toevu nei Jekope volekata na koro o Saika, a bulabula qai laulau nona veitalanoa o Jisu kei na dua na yalewa. (Joni 4:5-30) E veivosaki tale ga kei Maciu Livai na daukumuni vakacavacava. E sega ni levu sara na ka e volatukutukutaki ena Kosipeli me baleta na veivosaki ya, ia e ciqoma o Maciu na veisureti i Jisu me nona imuri. Ena dua na gauna a caka ena vale i Maciu na kana, qai vakarogoci Jisu tiko kina o Maciu kei na so tale.—Maciu 9:9; Luke 5:27-39.

9 Ena dua tale na gauna, o Jisu e vosa vakayalovinaka vei Nacanieli, e dua e dau beci ira mai Nasareci. Ia a qai veisau nona rai. A vakatulewataka me kila e levu tale na ka e vakavulica o Jisu mai Nasareci. (Joni 1:46-51) E tiko gona na vuna vinaka meda vakavulici ira kina na dautukutuku vou mera vosa vakayalovinaka vei ira na tamata, me rawarawa tale ga. [2] Nida vukei ira va qo, de dua era na raica na sala era vakatudaliga kina na yalomalumalumu ena noda veikauaitaki kei na vosa vakayalovinaka.

10-12. (a) E uqeti ira vakacava na tataleitaki o Jisu? (b) Eda na vakavulici ira vakacava na dautukutuku vou mera maqosa tiko ga ena veivakavulici?

10 Uqeta na tataleitaki. E lekaleka ga na gauna ni nona cakacaka vakaitalatala o Jisu. Ia e vakayagataka nona gauna me uqeta kina na nodra tataleitaki na tamata. Kena ivakaraitaki, dua na siga a vakayagataka o Jisu na waqa me vunau kina vei ira na ilala levu. Qori tale ga na gauna e cakamana kina, oya ni qoliva rawa kina o Pita e levu na ika, oti qai kaya vua: “Me tekivu qo o sa na qolivi ira na tamata.” Na cava e qai yaco? Eratou “kauta i vanua na waqa ruarua” o Pita kei ratou na nona itokani “ratou biuta tu mai  na ka kece, ratou qai muri [Jisu].” Luke 5:1-11.

11 A taleitaka tale ga na veivakavulici i Jisu o Nikotimo, e lewe ni Sanadrini. Dua na ka nona via kila e levu tale na ka, ia e lomaleqataka na ka era na kaya eso ke ra raica ni vosa vei Jisu. A yalorawarawa qai lomasoli o Jisu me sotavi Nikotimo ga ena bogi. (Joni 3:1, 2) Na cava eda vulica? E solia nona gauna na Luve ni Kalou me uqeta kina nodra vakabauta eso. Meda makutu mada ga ni veisikovi lesu kei na noda caka vuli iVolatabu kei ira na tataleitaki.

12 Era na maqosa tiko ga ena nodra veivakavulici na dautukutuku vou ke da cakacaka vata ena yalava. Eda rawa ni vukei ira mera kila ke dua e tataleitaki. Eda rawa ni sureti ira na dautukutuku vou mera tomani keda ena veisikovi lesu kei na caka vuli iVolatabu. Nira kunea gona e dua na tataleitaki, era na rawa ni uqeti koya ra qai veivakavulici sara ena iVolatabu. Era na vulica tale ga mera kua ni soro totolo ra qai vosovoso ena cakacaka vakaitalatala.—Kala. 5:22; raica na kato “ Bibi na Vosovoso.”

VAKAVULICI IRA MERA NANUMI IRA NA TACIDRA VAKAYALO

13, 14. (a) Na cava o nanuma ena nodra vakuai ira na volatukutukutaki tu ena iVolatabu? (b) Sala cava o rawa ni vakavulici ira kina na dautukutuku vou kei ira na gone mera dau lomani ira na tacidra?

13 E volatukutukutaki tu ena iVolatabu na noda dau “veilomani vakaveitacini” kei na noda veiqaravi. (Wilika 1 Pita 1:22; Luke 22:24-27.) E soli koya na Luve ni Kalou me veiqaravi, okati kina nona bula. (Maciu 20:28) O Tokasa e “dau cakacaka qai dau soli iloloma.” (Caka. 9:36, 39) O Meri na lotu vaKarisito mai Roma e “dau ogaoga” ena vuku ni ivavakoso. (Roma 16:6) Eda na vukei ira vakacava na ka vou mera raica vakabibi nodra vukei na tacidra vakayalo?

Vakavulici ira na ka vou mera lomani ira na tacidra vakayalo (Raica na parakaravu 13, 14)

14 Nida sikovi ira na tauvimate kei na itabaqase, eda rawa ni sureti ira na ka vou mera tomani keda. O ira na gone era rawa ni tomani nodra itubutubu ena veisiko va qori ke veiganiti. O ira na qase ni ivavakoso era rawa ni cakacaka kei na so ena nodra raici na itabaqase ena ka e vauca na kakana kei na vakavinakataki ni nodra vale. Ni caka qo, era na vulica na gone kei ira na ka vou na sala mera daucaka vinaka kina. Ni vunau tiko e dua na qase ni ivavakoso ena nona yalava, e rawa ni lai vakabula vei ira na iVakadinadina era tiko e kea. Qori ena vulica kina na tacida cauravou e dau tomani koya ni bibi mera vakila na lewe ni ivavakoso nira lomani.—Roma 12:10.

15. Na cava e bibi kina vei ira na qase mera kauaitaka nodra toso na tagane ena ivavakoso?

15 O Jiova e vakayagataki ira na tacida tagane mera veivakavulici ena ivavakoso, e bibi kina mera vulica mera maqosa ena vunau. Ke o qase ni ivavakoso, vakacava o rawa ni vakarogoca nona vakatovotovotaka e dua na dauveiqaravi nona itavi? De dua ena nomu veivuke, ena rawa kina vua me maqosa tiko ga ena nona veivakavulici ena Vosa ni Kalou.—Niem. 8:8. [3]

16, 17. (a) Na cava e kauaitaka o Paula me baleta nona toso o Timoci? (b) Na cava mera cakava na qase me yaga kina nodra vakavulici na ivakatawa era na muri mai?

16 Dua na ka na kena vinakati vakalevu na ivakatawa ena ivavakoso, ena vinakati gona mera vakavulici tiko ga o ira era na qarava na itavi qo. E vakamacalataka vakalekaleka o Paula na iwalewale ni veivakavulici me caka ni tukuna vei Timoci: “Luvequ, mo vakaukauataki tiko mada ga ena loloma soli wale e tu vei Karisito Jisu, vaka tale ga kina na ka o rogoca vei au me  vaka era vakadinadinataka e levu, mo tukuna qo vei ira na tagane yalodina me rawa ni ganiti ira mera vakavulica vei ira eso tale.” (2 Tim. 2:1, 2) E dua toka na itaba o Paula, dua na ka na levu ni ka e vulica vua o Timoci. E muria o Timoci na iwalewale e vakayagataka o Paula ena cakacaka vakaitalatala kei na so tale na veiqaravi tabu.—2 Tim. 3:10-12.

17 E sega ni vakaweleweletaka o Paula na nona vakavulici o Timoci. E dau vinakata me rau veitomani. (Caka. 16:1-5) Mera vakatotomuria na ivakaraitaki i Paula na qase ni ivavakoso nira dau kauti ira na dauveiqaravi ena veivakatawani ke veiganiti. Qori e rawa kina vei ira mera vulica na ka e vinakati vua e dua na ivakatawa vaKarisito, oya me veivakavulici, vakabauta, vosovoso ra qai dau loloma. Na iwalewale qo ena vukei ira na ivakatawa ni “qelenisipi ni Kalou” era na muri mai.—1 Pita 5:2.

BIBI MEDA DAU VEIVAKAVULICI

18. Na cava meda raica kina vakabibi nodra vakavulici eso ena nodra qaravi Jiova?

18 Levu era vinakata mera qaravi Jiova, e bibi kina na veivakavulici. E se yaga tiko ga na ivakaraitaki ni veivakavulici i Jisu kei Paula. E vinakata o Jiova meda vakavulici vinaka na nona dauveiqaravi nikua ena noda itavi lesi vakalou. E vakayagataki keda o Jiova meda vukei ira na dautukutuku vou mera vulica mera qarava rawa nodra itavi ena ivavakoso. Sa qai torosobu tiko ga na vuravura qo, levu tale ga na sala eda rawa ni vunau kina, e bibi qai vinakati vakatotolo meda veivakavulici.

19. Na cava mo nuidei kina ni na yaga nomu gumatua ni vakavulica eso mera qaravi Jiova?

19 E vinakati dina na gauna kei na sasaga ena veivakavulici. Ia ena tokoni keda o Jiova kei na Luvena duabau ni rau solia na vuku meda veivakavulici kina. Eda na marau nida raici ira eda vukea nira sa ‘cakacaka tiko vakaukaua, ra qai gumatua.’ (1 Tim. 4:10) Meda kua tale ga ni cegu ena noda toso vakayalo nida qaravi Jiova tiko.

^ [1] (parakaravu 7) Qo eso na tikina e vakabibitaka o Jisu: (1) Me donu na itukutuku e vunautaki. (2) Lomavakacegu ena ka sa vakarautaka na Kalou. (3) Kua ni veiba kei itaukeinivale. (4) Nida tusaqati, nuitaka na Kalou. (5) Kua ni rere.

^ [2] (parakaravu 9) E tiko ena ivola Me Yaga Nomu Curu ena Koronivuli ni Vuli Vunau, t. 62-64 eso na vakatutu yaga ena sala meda veivosaki kina kei ira na tamata ena cakacaka vakaitalatala.

^ [3] (parakaravu 15) E vakamacalataki ena ivola Me Yaga Nomu Curu ena Koronivuli ni Vuli Vunau, t. 52-61, na ka e vinakati vua e dua me maqosa ena vunau e matanalevu.