Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O na Vakamatauni Iko Vakacava ena Nomu iVavakoso Vou?

O na Vakamatauni Iko Vakacava ena Nomu iVavakoso Vou?

“AU LOMALEQA niu toki mai ke. Au sega ni kila ena so noqu itokani vou seu na taleitaki,” e kaya o Amini. * E saga tiko o Amini me matau ena nona ivavakoso vou, e sivia ni 1,400 na kilomita mai na nona vanua.

O na rairai lomaleqa tale ga ni o toki ina dua na ivavakoso vou. O na vakamatauni iko vakacava? Na cava mo cakava ke dredre vei iko na veisau? Ia ke o sega ni toki, o na vukei ira vakacava na toki yani?

SALA MO MATAU KINA QAI TOSO VINAKA

Vakasamataka mada na ivakatautauvata qo: Na gauna e tala kina e dua na vunikau, ena sega ni bulabula. Ni cavu, ena lauta eso na wakana me rawarawa na kena usani. Ni tei tale, ena totolo wale ga ni bula eso na wakana vou. E via tautauvata qori kei na gauna o toki kina ena dua na ivavakoso vou. Ena nomu ivavakoso makawa, sa tubu na “wakamu” ni levu kina nomu veikilai, e dei tale ga nomu ituvatuva vakayalo. Ia qo ena vinakati me so tale na wakamu vou mo rawa ni bula ena vanua vou. Ena vukei iko eso na ivakavuvuli vakaivolatabu. Meda dikeva mada qo eso.

O koya e wilika wasoma na Vosa ni Kalou e “vaka na vunikau e tei ena bati ni uciwai, na vunikau e vuataka na vuana ena kena gauna, na drauna e sega ni malai. Kei na ka kece e cakava ena vuavuaivinaka.”Same 1:1-3.

E bulabula na kau ni gunu wasoma, e kaukaua vakayalo tale ga na lotu vaKarisito ni kania wasoma na vosa ni Kalou. Mo tomana gona nomu dau wili iVolatabu e veisiga kei na nomu tiko wasoma ena soqoni. Muria tiko ga nomu ituvatuva vinaka ni sokalou vakavuvale kei na nomu dau vuli vakataki iko. Na nomu ituvatuva vakayalo ena nomu itikotiko makawa ena vukei iko tale ga ena vanua o toki kina.

“O koya e veivakacegui ena vakacegui tale ga.”Vkai. 11:25.

O na vakayaloqaqataki qai matau totolo ke o vakaitavi vakalevu ena cakacaka vakaitalatala. E kaya e dua na qase ni ivavakoso o Peni: “E vukei keirau vakaveiwatini na neirau painia veivuke ena gauna ga keirau toki yani kina ina ivavakoso. Totolo neirau kilai ira na mataveitacini, ira na painia kei na yalava ni vunau.” E kaya o Roko, e toki ena dua na vanua e sivia na 1,600 na kilomita, “Nomu cakacaka vakavunau vakalevu e sala vinaka duadua mo matau kina ina nomu ivavakoso vou. Mera kila tale ga na qase ni o tu vakarau mo veivuke, me vaka na samaki ni Vale ni Soqoni, veisosomitaki ena so na itavi se vakavodoka yani e dua ina soqoni. Nira raica na mataveitacini e dua e vakuai koya va qori, era na taleitaka sara ga.”

“Moni lomasavu”2 Kor. 6:13.

Mo lomasavu ni lomani ira na mataveitacini. Ratou saga sara ga na vuvale i Melaia me so nodratou itokani vou ena gauna ratou toki yani kina ena ivavakoso. E kaya, “Keitou dau veimaliwai ni se bera na soqoni vaka kina ni sa oti. E rawa kina ni keitou veitalanoa vinaka, sega ni  kidavaki ira ga.” Eratou kila totolo kina na yacadra na mataveitacini. Ratou lomasavu tale ga ni veisureti ena nodratou vale, bucini kina na veitokani dredre kei ira. E tomana o Melaia: “Keitou solia na neitou naba ni talevoni, me rawarawa ni keitou okati ena ituvatuva vakayalo kei na so tale na ka.”

Qo e vica na ka lalai o rawa ni cakava ke o lomaleqataka nomu sotavi ira vakadua eso tale. Kena ivakaraitaki, nomu dau matadredredre ia e sega sara tu ga ni lomamu. Ke da dau matadredredre eda na taleitaki. Ni “mata mamarau e vakamarautaka na lomada.” (Vkai. 15:30) E kaya o Raijeli, e toki vakayawa sara mai na vanua a susu kina, “Au dau mamadua. Eso na gauna, au dau saga meu vosa vei ira na tacida. Au na qara e dua e dabe galugalu tiko, de mamadua tale ga vakataki au.” Vakacava me nomu isausau mo vosa vua e dua se qai lako vou yani ni se bera na soqoni vaka kina ni sa oti.

Ena yasana adua, de o marautaka nomu sotavi ira na ka vou ena imatai ni vica na macawa. E rawa ni veisau ni toso na gauna. Ke yaco qori, ena vinakati mo saga tiko ga me so nomu itokani vou.

Na gauna e tala kina e dua na vunikau, ena sega ni bulabula, ia ena tubu na wakana ni tei tale.

VINAKATI NA GAUNA

So na kau e taura na gauna me qai dei na wakadra ena dua na vanua vou. E va tale ga qori nida saga meda matau ena dua na ivavakoso vou. Ke sa dede nomu toki, ia se dredre tiko ga mo vakamatauni iko, e rawa ni vukei iko eso na ivakavuvuli vakaivolatabu qo:

“Meda kua gona ni soro ena caka vinaka, nida na tamusuka ena kena gauna ke da sega ni vakacauoca”Kala. 6:9.

Kua ni namaka me totolo nomu matau ena dua na vanua, ena taura na gauna. Kena ivakaraitaki, era na tiko na daukaulotu era vuli oti mai Kiliati me vica na yabaki ena vanua era lesi kina, oti ra qai gade ina nodra vanua. Era veikilai vinaka kina kei ira na mataveitacini, ra vakamatauni ira tale ga ena itovo ni vanua era lesi kina.

Sa toki vakavica o Alipate, e kila tale ga ni taura na gauna me qai matau. E kaya: “Na iotioti ni gauna au toki kina e kaya o watiqu, ‘Era tiko kece na noqu itokani ena noqu ivavakoso makawa!’” E tukuna vua o Alipate ni a va tale ga qori na nona rai ena rua na yabaki sa oti, ena iotioti ni gauna rau toki kina. Ia ni vakaraitaka o watina na nona veikauaitaki ena loma ni rua na yabaki, eso tale kina nodrau itokani dredre.

“Mo kua ni kaya, ‘Na cava e vinaka kina na gauna sa oti mai na gauna qo?’ ni sega ni vukutaki mo taroga qo.” Dauv. 7:10.

Kua ni vakatauvatana na nomu ivavakoso vou kei na nomu ivavakoso makawa. De sega ni matau vei iko na nodra dau mamadua se ra karakivosa. Kauaitaka ga na nodra itovo vinaka me vaka ga o vinakata mera cakava vei iko. Era uqeti kina eso era toki vou mera taroga, ‘Au lomani ira dina “na mataveitacini kece”?’—1 Pita 2:17.

 “Dou kerekere tiko ga, ena qai soli vei kemudou.”Luke 11:9.

Mo kerea tiko ga na veivuke ena masu. E kaya o Tevita e dua na qase ni ivavakoso, “Kua ni saga duadua tiko mo vosota. Eda dau via cakava e levu na ka, ia ena rawa ga ena veivuke i Jiova. Mo masulaka gona.” E kaya o Raijeli sa cavuti oti: “Ke keirau vakila vakaveiwatini ni keirau yawaki ira ena ivavakoso, keirau na masu va qo vei Jiova, ‘Yalovinaka ni vakatakila mai se cava keirau cakava tiko e vakavuna me yaco qori.’ Oti keirau na saga me keirau maliwai ira vakalevu na mataveitacini.”

Ra itubutubu, ke dredre mera veimaliwai na luvemuni, ni masulaka vata kei ira qori. Dau sureta yani eso me rawa ni levu kina nodra itokani.

VUKEI IRA NA KA VOU

O na vukei ira vakacava na toki vou yani ina nomu ivavakoso? Saga moni veitokani dredre ni oni se qai sota ga. Mo rawa ni cakava qori, vakasamataka na ka o na taleitaka ke o toki vou, cakava sara qori. (Maciu 7:12) Vakacava, rawa ni o sureti ira ena nomudou sokalou vakavuvale se dou sarava vata e dua na porokaramu ni JW Broadcasting? Rawa ni o tomani ira ena cakacaka vakaitalatala se kana vata? Ratou na sega ni guilecava na nomu veikauaitaki ke o veisureti mo dou vakayagataka vata e dua na kakana lailai. Cava tale o rawa ni vukei ira kina na toki vou yani?

E kaya o Kali, “Ni keirau toki yani, e tukuna vei keirau e dua na tacida yalewa e vica na sitoa e sau rawarawa kina na ka. E yaga sara ga qori.” O ira na toki mai na vanua e duatani na kena draki era na marautaka nida vukei ira ena isulusulu me ganita na draki. O rawa tale ga ni vukei ira me vuavuaivinaka nodra cakacaka vakaitalatala ni o vakamacalataka na veika e kilai kina na itikotiko ya, se na lotu era lewena.

YAGA NIDA SAGA MEDA VEISAU

O Amini e vakamacalataki ena imatai ni parakaravu sa sivia e dua na yabaki na nona lewena tiko nona ivavakoso vou. E vakasamataka lesu: “Niu se qai tekivu, au saga meu veikilai kei ira na mataveitacini. Ia qo au marautaka nira sa vaka ga na lewe ni noqu vuvale.” A vakila o Amini ni sega sara ga ni galili ni sa toki, baleta ni so tale na nona itokani dredre.

^ para. 2 Sa veisau eso na yaca.