Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Lagasere ena Marau!

Lagasere ena Marau!

“E vinaka meda sere ena vakacaucau vua na noda Kalou.”—SAME 147:1.

SERE: 10, 2

1. E yaga vakacava na lagasere?

E KAYA e dua na daunisere rogo: “Na vosa e uqeti keda meda vakasama. Na ivakatagi e uqeta na lomada. Ia na sere e kauta noda vakanananu.” E duatani sara na ka eda dau vakila nida vakacaucautaki Jiova na Tamada vakalomalagi, da qai vakaraitaka noda lomani koya. Sa rauta me bibi tale ga ena noda sokalou na lagasere, se da mani lagasere duadua se vakaivavakoso.

2, 3. (a) Na cava nodra rai eso me baleta na lagasere vakadomoilevu ena ivavakoso? (b) Taro cava eda na veivosakitaka?

2 Na cava na nomu rai me baleta na noda dau lagasere vakadomoilevu ena ivavakoso? O dau maduataka? E sega ni nodra ivakarau na tagane ena so na vanua mera lagasere e matanalevu. Ena rawa ni yaco tale ga qori ena ivavakoso nira vakawalena na tacida tagane era lesi, se ra cakava tale tiko eso na ka nira lagasere tiko na kena vo.—Same 30:12.

3 Ke da raica me bibi ena noda sokalou na lagasere, eda na sega ni curu i tuba se bera mai ena gauna qori. E vinaka meda dui taroga: ‘Au dau raica vakacava na lagasere ena gauna ni soqoni? Na cava o na cakava mo doudou kina ni lagasere ena marau? Na cava meu cakava me laurai kina  ena noqu lagasere na ivakarau ni yalo e vakavotui ena sere?’

BIBI NA LAGASERE ENA SOKALOU DINA

4, 5. E tuvanaki vakacava na lagasere nira sokalou e Isireli makawa?

4 Sa balavu sara nodra vakayagataka tiko na ivakatagi na dausokalou yalodina mera vakacaucautaki Jiova kina. Nira yalodina na Isireli mera qaravi Jiova, e laurai nira vakabibitaka na lagasere ena nodra sokalou. Kena ivakaraitaki, ni vakarautaki na veiqaravi ena valenisoro, e tuvanaka o Tui Tevita e 4,000 na Livai mera qiria na ivakatagi ni veivakacaucautaki. Era wili kina e 288 “era vakavulici mera sere vei Jiova, era kenadau kece.”—1 Vei. 23:5; 25:7.

5 Ni vakatabui na valenisoro, e vakayagataki vakalevu na ivakatagi kei na sere. E tukuni: “Ena gauna ga era domo vata kina na dau uvu biukila kei ira na daulagasere nira vakavinavinaka ra qai vakacaucautaki Jiova, ni rogolevu na biukila, na sibali, kei na iyaya ni vakatagi tale eso nira vakacaucautaki Jiova, . . . [e] solega na vale ni Kalou dina na lagilagi i Jiova.” E dau veivakayaloqaqataki sara ga qori!​—2 Vei. 5:13, 14; 7:6.

6. Vakamacalataka na ituvatuva ni lagasere ena gauna e kovana tiko kina e Jerusalemi o Niemaia.

6 E liutaki ira na Isireli yalodina o Niemaia mera tara tale na bai kei Jerusalemi, e tuvanaki ira tale ga na Livai daulagasere kei na nodra iyaya ni vakatagi kece. Na gauna e vakatabui kina na bai qori, era marautaka dina na ivakatagi era rogoca. E “rua na matasere lelevu ni vakavinavinaka.” Rau yadua na yasa ni bai na matasere qo, rau taubale me yacova na bai e volekata na valenisoro me rau lai tu kina vakadua, me rogo yawa sara na domodra. (Niem. 12:27, 28, 31, 38, 40, 43) E marautaka o Jiova me rogoci ira nona dauveiqaravi nira sere ni vakacaucau vua ena yalogu.

7. E vakaraitaka vakacava o Jisu ni bibi na lagasere ena sokalou?

7 Ni tauyavutaki na ivavakoso lotu vaKarisito, se bibi tiko ga na lagasere ena sokalou dina. A tukuna tale ga o Jisu me ratou lagasere ena bogi vakairogorogo a tauyavutaki kina na iVakayakavi ni Turaga.—Wilika Maciu 26:30.

8. Era ivakaraitaki vinaka vakacava na lotu vaKarisito taumada nira dau lagasere?

8 Era ivakaraitaki vinaka na lotu vaKarisito taumada ena nodra lagasere mera vakacaucautaka na Kalou. Era dau soqoni ga ena nodra vale na mataveitacini, e vale vakarauta ga qai sega ni vakalatilati ena nodra yalogu ni lagasere vei Jiova. E uqeti vakalou na yapositolo o Paula me dusimaki ira na tacina lotu vaKarisito: “Ni veivakavulici, ni veivakayaloqaqataki tiko ga ena same, ena sere ni vakacaucau vua na Kalou, ena sere vakayalo e salavata kei na vakavinavinaka, ni sere vei Jiova mai vu ni lomamuni.” (Kolo. 3:16) Na sere ena noda ivolanisere era “sere vakayalo e salavata kei na vakavinavinaka.” E okati tale tiko ga qori me kakana vakayalo e vakarautaka “na dauveiqaravi yalodina e vuku.”—Maciu 24:45.

 KUA NI MADUA NA LAGASERE

9. (a) Na cava e dau vakalatilati ena nodra lagasere eso ena soqoni se noda soqo lelevu? (b) Cava mo cakava ni o lagasere, o cei me liu kina? (Raica na imatai ni iyaloyalo.)

9 Vakacava ke sega ni kena ivakarau ena nomu vuvale se nomu vanua na lagasere? Ni sa tu vakarawarawa nikua na iyaya vakalivaliva, de dua o na marautaka na rogoci ira na kenadau ena lagasere. O na rairai madualaka na domomu ni o vakatauvatana kei na domodra na dau lagasere rogo nikua. Ia kua ni yalolailai, ni vinakati me rogo na domomu ni o vakacaucautaki Jiova. Mo taura cake nomu ivolanisere, rai vakadodonu qai lagasere mai vu ni lomamu! (Esera 3:11; wilika Same 147:1.) E levu na Vale ni Soqoni nikua sa tu kina na tivi (screen) e rawa ni laurai kina na qaqanisere nida lagasere. E talei tale ga ni okati ena ka era vulica na qase ena Koronivuli ni Cakacaka Vakaitalatala ni Matanitu na lagasere ni Matanitu. E vakabibitaki kina ni nodra itavi na qase mera liu sara ga ena lagasere ena ivavakoso.

10. Na cava meda kua kina ni rere na lagasere?

10 Dua na ka e dau vakavuna nodra sega ni lagasere eso oya nira rere. De dua era leqataka nira domo vela. Meda nanuma tiko nida “dau tarabe kece” ena gauna eda vosa kina. (Jeme. 3:2) E sega ni kena ibalebale qori meda sa na galu tu ga. Ia me kua ni tarova noda vakacaucautaki Jiova nida domo vela.

11, 12. Na cava eso na vakatutu me vinaka kina noda lagasere?

11 De dua eda lomaleqataka nida sega ni kila vinaka na lagasere. Ia eda rawa ni vakavinakataka nida muria e vica na vakatutu rawarawa qo. *

 12 O rawa ni vulica me kaukaua qai rogolevu na nomu lagasere ena nomu cegu vakavinaka. Me vaka na kena waqa na matanicina ena kaukaua ni livaliva, ena taladrodro nomu vosa kei na nomu lagasere ni o cegu vakavinaka. Dodonu mo lagasere sara vakadomoilevu me vaka ga na rorogo ni domomu ni o vosa tiko se me sivia sara. (Raica na vakatutu ena Koronivuli ni Vuli Vunau, tabana 181 to 184, ena ulutaga lailai “Maninitaka na Cagi o Ceguva.”) Ena so na gauna era uqeti tale ga ena iVolatabu na dauveiqaravi ni Kalou mera “kaila ena marau.”—Same 33:1-3.

13. Vakamacalataka na sala eda na nuidei kina nida lagasere.

13 Ni o sokalou vakavuvale se o tiko taudua ga, tovolea e vica na ka qo: Digia e dua na sere o dau taleitaka ena noda ivolanisere. Wilika vakadomoilevu na qaqana, mo nuidei tale ga. Na rorogo ni domomu vata ga qori, saga mo cavuta yadua na vosa ena dua na qaqana ni o taura tiko nomu icegu. Vakayagataka na domo vata ga qori ena qaqanisere o lagata tiko. (Aisea 24:14) Ena tadola vinaka kina na domomu qai taleitaki. Kua ni rere se lomaleqataka!

14. (a) Ena yaga vakacava ena nomu lagasere ni o dalaga vakalevu? (Raica na kato “ Me Rogo Vinaka na Domomu.”) (b) E yaga vakacava vei iko eso na vakatutu ni lagasere?

14 Ena sega ni rogo vinaka nomu lagasere ke o sega ni dalaga vakalevu. Dua tale na vakatutu mo dolava vakalevu na gusumu. Vakacava ke rogo lailai na domomu, wakiki se watatagi? Ena rawa ni vukei iko na ivola Koronivuli ni Vuli Vunau, tabana 184, ena kato “iWali ni so na Leqa ni Domo.”

LAGASERE MAI VU NI LOMAMU

15. (a) Na cava e kacivaki ena bose vakayabaki ni 2016? (b) Cava na inaki ni ivolanisere vou?

15 Dua na ka na kena marautaki nona kacivaka o Brother Stephen Lett, e  lewe ni iLawalawa Dauvakatulewa, ena bose vakayabaki ni isoqosoqo ena 2016 nida sa vakarau vakayagataka ena soqoni na ivolanisere vou Sere ena Marau’ vei Jiova. E vakamacalataka o Brother Lett ni kena inaki me tautauvata na qaqanisere kei na veisau sa vakayacori ena New World Translation. E okati kina na kena boko se veisau na matavosa sa sega ni tiko ena New World Translation a vakavoutaki ena 2013. E lewe tale ga ni noda sere vou na noda cakacaka vakavunau kei na noda vakavinavinakataka na ivoli. Ni bibi ena noda sokalou na lagasere, e vinakata na iLawalawa Dauvakatulewa me tabaki na kena ivola me tautauvata ga na New World Translation na waqana.

16, 17. Na cava e veisautaki ena noda ivolanisere vou?

16 Me rawarawa noda vakayagataka na ‘Sere ena Marau’ Vei Jiova, era tuvai vakaiulutaga na sere. Kena ivakaraitaki, na imatai ni 12 na sere e baleti Jiova, na 8 na sere e tarava e baleti Jisu, na ivoli, kei na so tale. E tiko tale ga e dua na idusidusi rawarawa me digitaki kina na ulutaga ni ivunau soqovi levu.

17 Eda uqeti kece meda lagasere mai vu ni lomada ni so na qaqana sa vakavoutaki me matata na kena ibalebale, boko tale ga na vosa sa sega ni dau vakayagataki nikua. Kena ivakaraitaki na ulutaga ni sere “Vosota Vakadede,” sa veisau me “Vakaraitaka na Vosota,” qai veisautaki na qaqana. Na sere “Taqomaka na Lomamu” sa veisau me “Taqomaka na Lomada.” Na vuna? Ena sega ni rogo matau nira lagata tiko na tataleitaki, ira na ka vovou kei ira na tacida yalewa ena soqoni kei na noda soqo lelevu na ka mera cakava eso tale. E veisautaki gona na ulutaga ni sere kei na qaqana.

Vakatovotovo ena lagasere ni dou sokalou vakavuvale (Raica na parakaravu 18)

18. Na cava meda kila kina na noda sere vovou? (Raica na ivakamacala e ra.)

18 E levu ga na sere ena noda ivolanisere vou qori e okati kina na masu. Eda uqeti kina meda talaucaka na lomada vei Jiova. Eso tale na sere ena ‘uqeti keda ena loloma kei na caka vinaka.’ (Iper. 10:24) Eda na via kila vinaka sara ga na kena ivakatagi kei na qaqana. O rawa ni cakava qori ena nomu vakarorogo ena kena sa katoni oti tu ena jw.org. Ni o vakatovotovotaka e vale, o na rawa ni lagasere ena nuidei, e vu tale ga mai lomamu. *

19. Era na vakaitavi vakacava na lewe kece ni ivavakoso mera sokaloutaki Jiova?

19 Mo nanuma tiko ni bibi ena noda sokalou na lagasere. E sala vinaka meda vakaraitaka kina noda lomani Jiova, da vakavinavinakataki koya tale ga. (Wilika Aisea 12:5.) Ni o lagasere ena marau, o sa uqeti ira tiko eso tale mera doudou ni lagasere. Ena rawa kina nira tomani keda ena sokalou vei Jiova na gone, qase, kei ira na tataleitaki. Kua gona ni tu suka mo lagasere mai vu ni lomamu. Mo talairawarawa ena ivakasala e uqeti kina vakalou na daunisame me vola ‘Ni sere Vei Jiova!’ Io, sere ena marau!​—Same 96:1.

^ para. 11 Me ikuri ni vakamacala me baleta na vakavinakataki ni domoda nida lagasere, raica na porokaramu vakavalagi ni JW Broadcasting ni Tiseba 2014 (rai ena FROM OUR STUDIO).

^ para. 18 Meda tu vakarau ni lagasere ena noda soqo ni veiwasewase kei na soqo lelevu, e dau tekivu na porokaramu ena ivakatagi e tini na miniti. E kena inaki me vakarautaka na lomada kei na noda vakasama ena porokaramu eda na rogoca. Eda uqeti meda sa dabe da qai vakarogoca vinaka na ivakatagi.