Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Eda Tuvanaki me Salavata kei na iVola ni Kalou

Eda Tuvanaki me Salavata kei na iVola ni Kalou

“E tauyavutaki vuravura o Jiova ena nona vuku. E vakataudeitaki lomalagi ena nona yalomatua.”—VKAI. 3:19.

SERE: 6, 24

1, 2. (a) Na cava era kaya eso nira rogoca ni tiko nona isoqosoqo na Kalou? (b) Cava eda na veivosakitaka ena ulutaga qo?

VAKACAVA e tiko nona isoqosoqo na Kalou? Eso era rairai kaya: “Sega ni gadrevi mo lewena e dua na isoqosoqo me dusimaki iko. Bibi ga mo drau veiwekani voleka kei na Kalou.” Vakacava e donu na rai qori? Na cava e kilai ena ivakadinadina e tu nikua?

2 Eda na veivosakitaka ena ulutaga qo na ivakadinadina ni o Jiova e Kalou ni ituvatuvanaki qai sega ni vakatauvatani rawa. Eda na dikeva tale ga na ka meda cakava ni dusimaki keda na isoqosoqo i Jiova. (1 Kor. 14:33, 40) Ena imatai ni senitiuri G.V., kei na noda gauna, na iVolatabu e dusimaki ira voli na isoqosoqo i Jiova e vuravura ena vunautaki ni itukutuku vinaka e veivanua. Nida muria na iVolatabu kei na veidusimaki ni isoqosoqo, eda sa uqeta sara tiko ga na savasava, veiyaloni, kei na duavata ni ivavakoso kece.

KALOU NI ITUVATUVANAKI QAI SEGA NI VAKATAUVATANI RAWA

3. Na cava o vakabauta kina ni o Jiova e Kalou ni ituvatuvanaki qai sega ni vakatauvatani rawa?

3 E laurai ena veikabuli ni o Jiova e Kalou ni ituvatuvanaki qai sega ni vakatauvatani rawa. E kaya na iVolatabu: “E  tauyavutaki vuravura o Jiova ena nona vuku. E vakataudeitaki lomalagi ena nona yalomatua.” (Vkai. 3:19) E ‘lailai sara na ka’ eda kila ‘me baleta na nona ivalavala,’ na ka tale ga “e rogoci me baleti koya e vakasolokakana lailai sara.” (Jope 26:14) Ia na ka lalai mada ga eda kila me baleta na vuravura, kalokalo kei na maliwalala, eda vakadeitaka kina nira tuvanaki vakamaqosa na ibulibuli vakalomalagi. (Same 8:3, 4) Era veitosoyaki tu ena maliwalala e vica vata na milioni na kalokalo, ra qai tuvanaki vakamaqosa. E veiraurau mada ga na kena sowiri wavolita na matanisiga na noda vuravura, vaka ga e muria tiko na lawa ni veitosoyaki! Io, na veivakurabuitaki ni kena tuvanaki vakamatau na maliwalala, e vakavotuya ni o Jiova e “bulia vakamaqosa na lomalagi” kei na vuravura, qai uqeti keda meda vakacaucautaki koya, meda yalodina qai sokalou vua.—Same 136:1, 5-9.

4. Na cava e dredre kina ni saumi e levu na taro ena ivakavuvuli vakasaenisi?

4 E levu na ka e vakatakila na saenisi me baleta na maliwalala kei na vuravura, e yaga sara vakalevu vei keda. Ia e sega ni sauma rawa na saenisi e levu na vakatataro. Kena ivakaraitaki: Era sega ni vakamacalataka rawa na daunikalokalo se basika vakacava na maliwalala se na vuna eda tiko kina e vuravura qo. Era sega tale ga ni vakamacalataka e levu se cava e gu kina na lomada meda bula tu ga. (Dauv. 3:11.) Na cava e sega ni saumi rawa kina e levu na taro bibi? Baleta ni levu na saenitisi kei na so tale era uqeta na vakasama e sega ni vakalou ra qai tokona na ivakavuvuli ni bula vakaidewadewa. Ia e tiko ena iVola i Jiova na isaunitaro kece e dau lomatarotarotaki ena veivanua.

5. Tukuna se sala cava e vakatau kina na noda bula ena lawa ni veikabula.

5 E vakatau ena noda bula na lawa tudei qai nuitaki e virikotora o Jiova ena veikabula. O ira na daunilivaliva, ira na dauvakavinakataki paipo, idinia, pailate, dauniveisele—era vakatautaka nodra cakacaka ena lawa qori. Kena ivakaraitaki, era nuidei na dauniveisele ni sega ni veiveisau na keda ibulibuli. Ni veisele e kila vinaka na vanua e tiko kina na uto. Eda dau doka kece na lawa ni veikabula, ia ke da saga meda vorata, ena rairai vakaleqai kina noda bula!

TUVANAKA NA KALOU

6. Na cava meda namaka kina nira na tuvanaki vakamatau na dauveiqaravi i Jiova?

6 E vakatubuqoroqoro na kena tuvanaki na maliwalala. Eda namaka gona ni o Jiova e vinakata mera tuvanaki vakamatau nona dauveiqaravi. Oya na vuna e vakarautaka kina na iVolatabu me dusimaki keda. Ke sega ni dusimaki keda nona isoqosoqo kei na nona ivakatagedegede, ena vakavu rarawa kei na yalolailai.

7. Eda kila vakacava ni volai vakamatau na iVolatabu?

7 Na iVolatabu e sega ni baleti ira ga na Jiu se nodra ivola na lotu vaKarisito. E volai vakamatau qai uqeti vakalou. Era veisemati vinaka na ivola kece ena iVolatabu. Me tekivu ena iVakatekivu ina Vakatakila, e usutu ni iVolatabu na vakacerecerei ni veiliutaki i Jiova kei na vakayacori ni nona inaki e vuravura ena vuku ni Matanitu e liutaka o Karisito na “kawa” yalataki.—Wilika Vakatekivu 3:15; Maciu 6:10; Vakatakila 11:15.

8. Eda kila vakacava nira tuvanaki vinaka na Isireli?

8 O ira na Isireli ena gauna makawa era ivakaraitaki vinaka ni tuvatuvanaki vakamaqosa.  Ena Lawa a soli vei Mosese, e vakamacalataki ni o ira “na yalewa era lesi mera veiqaravi ena icurucuru ni valelaca ni veitavaki.” (Lako 38:8) E tuvanaki vakamatau na nodra toki na Isireli kei na valeniveitavaki. E muri e tuvanaki ira vakamatau qai wasewasei ira na Livai kei ira na bete o Tui Tevita. (1 Vei. 23:1-6; 24:1-3) Nira talairawarawa na Isireli vei Jiova, era vakalougatataki nira liutaki vakamatau, e vakilai kina na sautu kei na duavata.—Vkru. 11:26, 27; 28:1-14.

9. Eda kila vakacava nira tuvanaki vakamatau na lotu vaKarisito ena imatai ni senitiuri?

9 Era tuvanaki vinaka na ivavakoso vaKarisito ena imatai ni senitiuri, era vakadinata ni yaga nodra muria na veidusimaki ni ilawalawa dauvakatulewa, era lewena taumada na yapositolo. (Caka. 6:1-6) E muri eso tale na tagane era qai lewe ni ilawalawa dauvakatulewa. (Caka. 15:6) O ira na tagane era lewe ni ilawalawa dauvakatulewa ena imatai ni senitiuri se nodra itokani, era uqeti vakalou mera vakarautaka na ivakasala kei na veidusimaki. (1 Tim. 3:1-13; Taito 1:5-9) E yaga vakacava vei ira na ivavakoso nodra muria na veidusimaki ni ilawalawa dauvakatulewa?

10. Na cava e yaco nira muria na ivavakoso taumada na ivakaro ni ilawalawa dauvakatulewa? (Raica na imatai ni iyaloyalo.)

10 Wilika Cakacaka 16:4, 5. Eso na tacida era veilakoyaki nira matataka na ilawalawa dauvakatulewa mera vakatakila na “ivakaro era sa vakadonuya na yapositolo kei ira na qase era tiko mai Jerusalemi.” Nira talairawarawa na ivavakoso, e “vakadeitaki nodra vakabauta . . . qai tubu tiko ga e veisiga na kedra iwiliwili.” Eda na vakatotomuria vakacava nodra ivakaraitaki nida lewena nikua na isoqosoqo i Jiova?

O DAU MURIA NA VEIDUSIMAKI?

11. Na cava mera cakava na tagane era lesi nira ciqoma na veidusimaki ni isoqosoqo i Jiova?

11 Na cava me cakava na Komiti ni Tabana se Komiti ni Vanua, ivakatawa ni tabacakacaka, kei ira na qase ni ivavakoso nira ciqoma na veidusimaki ni isoqosoqo i Jiova nikua? Na iVola i Jiova e dusimaki keda kece meda dau talairawarawa qai vakamalumalumu. (Vkru. 30:16; Iper. 13:7, 17) Sega na nodra tikina ena isoqosoqo i Jiova na dauvakalelewa kei ira na dauveivorati, ni na vakaleqa na veiyaloni, veilomani kei na duavata ni ivavakoso. Macala ga nira na sega ni via vakatotomuria na lotu vaKarisito yalodina na veibeci kei na tawayalodina i Tiotirifi. (Wilika 3 Joni 9, 10.) E vinaka meda taroga: ‘Niu maliwai ira eso, vakacava au dau veivakayaloqaqataki vakayalo? Au dau totolo ni ciqoma qai tokona na veidusimaki era vakarautaka na tacida era liutaki keda?’

12. Na veisau cava e caka ena nodra lesi na qase kei na dauveiqaravi ni ivavakoso?

12 Vakasamataka mada e dua na vakatulewa sa qai tauca oti ga na iLawalawa Dauvakatulewa. E vakamacalataki ena “Taro na Dauwiliwili” ena Vale ni Vakatawa ni Noveba 15, 2014, ni sa veisau na ivakarau ni nodra lesi na qase kei na dauveiqaravi ni ivavakoso. E tukuni ena ulutaga qori ni ilawalawa dauvakatulewa ena imatai ni senitiuri e vakadonuya mera veilesi na ivakatawa dauveilakoyaki. Me salavata kei na ivakarau qori, me tekivu ena Seviteba 1, 2014, era sa lesi ira na qase kei na dauveiqaravi ni ivavakoso na ivakatawa ni tabacakacaka. Taumada era na saga na ivakatawa ni tabacakacaka mera kilai ira vinaka na tagane era vakatututaki. De dua era na cakacaka vakavunau vata. Ena dikeva tale ga na nona vuvale o koya e vakatututaki. (1 Tim. 3:4, 5) Era na  cakacaka vakavoleka na ilawalawa qase kei na ivakatawa ni tabacakacaka nira dikeva vinaka na ivakatagedegede vakaivolatabu me laurai vei ira na dauveiqaravi kei na qase ni ivavakoso.—1 Tim. 3:1-10, 12, 13; 1 Pita 5:1-3.

13. Eda na tokona vakacava na nodra veidusimaki na qase ni ivavakoso?

13 Bibi meda muria nodra veidusimaki vakaivolatabu na qase ni ivavakoso. O ira na ivakatawa yalodina qo era dusimaki ena “ivakasala yaga” e yavutaki ena nona iVola na Kalou. (1 Tim. 6:3) Vakasamataka lesu na ivakasala i Paula me baleti ira e vakaveitalia tu nodra bula. Eso na lotu vaKarisito era sa “sega sara ga ni cakacaka, ra qai siova na ka e sega ni nodra.” Era vakasalataki vei ira na qase, ia era beca tiko ga. Na cava me cakava na ivavakoso vei ira qori? E vakarota o Paula: “Ni vakatakilakilataki koya, ni muduka nomuni veitokani vata kei koya.” Ia na ivakaro qori e salavata kei na ivakasala meda kua ni okati koya me keda meca. (2 Ces. 3:11-15) Nikua, era na rairai veivakaroti na qase nira vunau ena ivavakoso, vakabibi ke dua e tomana tiko ga na ivalavala e rogorogo ca kina na ivavakoso, me vaka na veibuku kei na dua e sega ni vakabauta. (1 Kor. 7:39) Cava o na cakava ni o rogoca na ivunau qori? Ke o kila na ituvaki e vakamacalataki ena vunau, vakacava o na qarauna mo kua ni veimaliwai kei koya e cala? Na nomu kauai kei na nomu yalodina ena uqeti koya e butucala me biuta nona ivalavala. [1]

UQETA TIKO GA NA SAVASAVA, VEIYALONI KEI NA DUAVATA

14. Eda na tokona vakacava na savasava ni ivavakoso?

14 Eda na tokona na savasava vakayalo ni ivavakoso nida muria na veidusimaki ni Vosa ni Kalou. Dikeva mada na ka e yaco e Korinica makawa. E gumatua o Paula ni vunau ena vanua qori, e lomani ira tale ga na nona itokani “yalosavasava” era tiko kina. (1 Kor. 1:1, 2) Ia dua na ka nona rarawa ni vakamacalataka na veiyacovi tawadodonu e vakatarai tiko ena ivavakoso! E mani dusimaki ira na qase ni ivavakoso o Paula mera solia na tamata vakasisila qori vei Setani—se mera vakasivoi koya. Me savasava tiko ga na ivavakoso, ena vinakati vei ira na qase mera kauta laivi na “leveni.” (1 Kor. 5:1, 5-7, 12) Nida tokona nodra vakatulewa na qase ni ivavakoso mera vakasivoi na cakacala era sega ni veivutuni, eda sa tokona tiko na savasava ni ivavakoso, de dua ena uqeti ira tale ga mera veivutuni ra qai qara na veivosoti i Jiova.

15. Na cava meda cakava meda veiyaloni tiko ga ena ivavakoso?

15 Dua tale na leqa e dodonu mera kauaitaka e Korinica. Eso era kauti ira na tacidra vakayalo ena mataveilewai. E tarogi ira gona o Paula ena dua na taro bibi: “Vakacava moni vosota mada ga ke oni vakacalai?” (1 Kor. 6:1-8) Qori tale ga na ka e caka tiko nikua. So na gauna, e vakaleqai na veiyaloni ena ivavakoso ni sega ni toso vinaka na noda caka bisinisi kei ira na tacida, de dua lai tini sara ena veibeitaki ni cakacaka vakailawaki. Eso era veilewaitaki tacidra ena mataveilewai, ia na iVola i Jiova e uqeti keda ni vinaka cake meda vosota, me kua ga ni vakarogorogocataki na yaca ni Kalou se vakaleqai na veiyaloni ena ivavakoso. [2] Me wali na leqa se duidui e dau basika, me muri ga na ivakasala i Jisu. (Wilika Maciu 5:23, 24; 18:15-17.) Nida cakava qori, eda sa uqeta tiko na noda duavata na dauveiqaravi i Jiova.

16. Na cava meda namaka kina nira na duavata na dauveiqaravi ni Kalou?

 16 E volai sara ga ena iVola i Jiova na vuna meda namaka kina nira na duavata nona dauveiqaravi. E lagata na daunisame: “Raica! Sa dua na ka vinaka qai marautaki nira tiko ena duavata na veitacini!” (Same 133:1) Nira talairawarawa vei Jiova na Isireli, era liutaki vakamatau ra qai duavata. E parofisaitaka o Jiova na ka ena yacovi ira na nona dauveiqaravi: “Au na vakatikori ira ena duavata, me vaka na sipi ena kedra bai.” (Maika 2:12) E yalataka tale ga o Jiova ena vuku i Sefanaia: “Au na qai veisautaka na nodra vosa na lewe ni veivanua me vosa savasava [ni ka dina vakaivolatabu], mera masuta kece na yaca i Jiova, mera qaravi koya ena duavata.” (Sefa. 3:9) E ka dokai dina meda sokaloutaki Jiova ena duavata!

Era saga na qase mera vukei ira vakayalo na butucala (Raica na parakaravu 17)

17. Me duavata qai savasava tiko ga na ivavakoso, na cava mera cakava na qase ni cakacala e dua?

17 Me duavata qai savasava tiko ga na ivavakoso, bibi mera yavala totolo na qase ni ivavakoso mera qarava na kisi ni veilewai, me caka tale ga vakayalololoma. E kila o Paula ni sega ni yavutaki na loloma ni Kalou ena ka ga e vakila e lomana. E sega tale ga ni raica vakamamada o Jiova na cakacala. (Vkai. 15:3) Oya na vuna e vinakata sara ga kina o Paula me vola na iMatai ni Korinica, ni kaukaua qai tau vakayalovinaka na ka e vola. Ni oti e vica na vula sa qai vola na iKarua ni Korinica, e vakamacalataki kina na veisau e caka nira sa muria na qase ni ivavakoso na nona veidusimaki na yapositolo. Ke dua na lotu vaKarisito e sega ni liaca ni butucala tiko, era na saga na tagane era rawata na kena ivakatagedegede mera vukei koya ena yalomalua.—Kala. 6:1.

18. (a) E vukei ira vakacava na lotu vaKarisito ena imatai ni senitiuri na ivakasala ena Vosa ni Kalou? (b) Na cava ena veivosakitaki ena ulutaga tarava?

18 Macala gona ni ivakasala ena iVola ni Kalou e vukei ira na lotu vaKarisito ena imatai ni senitiuri e Korinica kei na veivanua me savasava tiko ga nodra ivavakoso, mera veiyaloni ra qai duavata. (1 Kor. 1:10; Efeso 4:11-13; 1 Pita 3:8) E vukei ira tale ga me vuavuaivinaka nodra cakacaka vakaitalatala. Oya na vuna e kaya kina o Paula ni sa ‘vunautaki na itukutuku vinaka vei ira na kabuli kece e ruku i lomalagi.’ (Kolo. 1:23) Nikua sa vunautaki ena veiyasa i vuravura na itukutuku vinaka ni inaki ni Kalou ena nodra gugumatua o ira na lewe ni isoqosoqo era duavata ena vunau. Ena veivosakitaki ena ulutaga tarava nodra doka vakalevu na iVolatabu, kei na nodra vakadeitaka mera rokova na Turaga Cecere o Jiova.—Same 71:15, 16.

^ [1] (parakaravu 13) Raica na iSoqosoqo e Cakava na Loma i Jiova, t. 134-136.

^ [2] (parakaravu 15) Me baleta na ituvaki ena rairai veilewaitaki tacina vakayalo kina e dua, raica na “Tiko ga ena Loloma ni Kalou,” t. 223, vmr.