Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Soqo ni veiwasewase ena dua na vanua mai Ukraine, o Nyzhnya Apsha, 2012

Levu na ka me Tamusuki!

Levu na ka me Tamusuki!

E PAROFISAITAKA o Jisu nira na marautaka na nona imuri e levu na tatamusuki ena icavacava qo. (Maciu 9:37; 24:14) Dikeva mada se dina vakacava qori ena dua na vanua mai Ukraine o Transcarpathia. Ena tolu na kena tauni voleka, e tiko kina e 50 na ivavakoso qai sivia na 5,400 na dautukutuku. * Vakasamataka mada, rauta ni 1 ina 4 na lewenivanua ena tolu na tauni qo era iVakadinadina i Jiova!

E vakacava tu na kena yalava? E kaya e dua na tacida tagane o Vasile: “Era doka na iVolatabu o ira na tiko ena yalava qo, era kauaitaka na veika dodonu, era dau veilomani vakavuvale, era dau veivukei tale ga.” E kuria: “Levu na gauna era sega ni duavata kei na noda vakabauta. Ia ni o wilika na iVolatabu, era na vakarorogo.”

Ni levu na dautukutuku ena vanua qo, e ka ni sasaga mera vunau ni lailai ga na tiko ena yalava. Kena ivakaraitaki, dua na ivavakoso e 134 na kena dautukutuku, ia e 50 ga na vale e tiko ena yalava ya! Na cava era na cakava na dautukutuku?

Levu na tacida era yalorawarawa ni vunau ena vanua e vinakati kina vakalevu na veivuke. E kaya e dua na tacida tagane o Ionash, e yabaki 90: “Au dau vunau ena koro, ia au sa sega ni cakava qori niu sa tautauvimate. Au dau lakova tale ga e 160 na kilomita ena yalava e sega ni lesi, meu vunau ena vosa vakaHungary.” Me rawa nira veiqaravi na dautukutuku ena so tale na yalava, ena vinakati mera vakuai ira. E kaya o Ionash: “Me rawa niu vodo ena sitimanivanua, au na yadra ena 4 na kaloko ena mataka, au na vunau me yacova na 6 na yakavi ni sa lesu i vale na sitima. Au cakava qori vakarua se vakatolu ena dua na macawa.” Vakacava e yaga na nona sasaga? E kaya: “Dua na ka noqu marautaka na iwalewale ni cakacaka vakaitalatala qo. Au marautaka niu rawa ni vukea e dua na vuvale ratou tu vakayawa me ratou mai kila na ka dina.”

Macala ga nira na sega ni lako kece ena yalava yawa na dautukutuku eke. Ia era saga mera tara vinaka na nodra yalava ni ivavakoso. Cava e rawati kina? Ena 2017, na kedra iwiliwili na tiko ena iVakananumi ena tolu na tauni qori e voleka ni vakaruataki tale na iwiliwili ni dautukutuku se veimama na iwiliwili ni lewenivanua. Koya gona, se mani vanua cava eda veiqaravi kina, se vinakati ga meda “vakaitavi vakalevu ena cakacaka ni Turaga.”—1 Kor. 15:58.

^ para. 2 Qo na yaca ni tauni, o Hlybokyy Potik, Serednye Vodyane, kei Nyzhnya Apsha.