Raica sara na lewena

Raica na lewenivola

Yalovinaka​—O na Vakaraitaka Vakacava?

Yalovinaka​—O na Vakaraitaka Vakacava?

EDA dau vinakata meda kilai nida tamata vinaka. Ia e ka ni sasaga meda vakaraitaka na yalovinaka ena vuravura qo. Na vuna? Ni levu era “sega ni vinakata na ka e dodonu.” (2 Tim. 3:3) Era na rairai muria ga na nodra ivakatagedegede ni ka e vinaka kei na ka ca, era na tukuna gona ni “vinaka na ca, e ca na vinaka.” (Aisea 5:20) E ka ni sasaga tale ga ni duidui na noda isususu da qai sega ni uasivi. Eda na rairai nanuma nida vakataki Anne, * sa vica vata na yabaki nona qaravi Jiova, ia e kaya, “E dredre meu vakabauta niu rawa ni dua na tamata vinaka.”

Eda marau nida rawa ni vakaraitaka na yalovinaka! Qo e dua na itovo e okati ena vua ni yalo tabu ni Kalou, e kaukaua sara mai na veivakamuai ni vuravura, noda ivalavala ca kei na noda isususu. Meda dikeva mada na itovo qori kei na sala meda vakaraitaka kina.

NA CAVA NA YALOVINAKA?

Na kena itukutukuni rawarawa ga, na nomu caka vinaka. E okati kina na itovo savasava kei na itovo kilikili, sega ni caka ca se veidabui. E dau laurai na yaga ni noda caka vinaka. Qo e dua na itovo vinaka e laurai kina na noda veivuke.

De dua o sa raica eso era dau yalorawarawa ni caka vinaka vei ira e vale kei na nodra itokani. Vakacava me sa yala ga e kea? E macala ni vakaiyalayala ga noda sasaga meda vakaraitaka na itovo qo, ni kaya na iVolatabu e “sega ni dua na tamata yalododonu e vuravura me vakayacora tiko ga na ka vinaka qai sega ni valavala ca.” (Dauv. 7:20) E tukuna vakadodonu na yapositolo o Paula: “Au kila ni sega ni dua na ka vinaka e tiko vei au, oya e yagoqu.” (Roma 7:18) Ke da via vakaraitaka gona na itovo qo, e ka vakayalomatua meda rai ga vua na iVurevure ni yalovinaka.

“SA VINAKA O JIOVA”

E vakarautaka na Kalou o Jiova na ivakatagedegede ni ka e vinaka. E kaya na iVolatabu me baleti koya: “Oni rui vinaka, e vinaka tale ga na nomuni cakacaka. Ni vakavulici au ena nomuni lawa.” (Same 119:68) Meda dikeva mada e rua na ivakaraitaki ni vinaka i Jiova e cavuti ena tikinivolatabu qo.

E vinaka o Jiova. E laurai ena ivakarau ni bula i Jiova na yalovinaka. Rogoca mada na ka e tukuna vei Mosese: “Au na cakava me tasivi e matamu na noqu vinaka kece.” Ni tasivi na lagilagi i Jiova wili kina na nona vinaka, e rogoca sara o Mosese: “O Jiova, o Jiova, na Kalou dauyalololoma qai dauveinanumi, e berabera ni cudru, qai vuabale ena loloma e dei kei na dina, e vakaraitaka ni dei na nona loloma vei ira na vica vata na udolu, e vosota na cala kei na talaidredre kei na ivalavala ca, ia ena totogitaki koya dina e cala.” (Lako 33:19; 34:6, 7) Koya gona e tiko na vuna vinaka meda kila kina ni dau vakaraitaka e veigauna o Jiova na yalovinaka. Eda kila ni dua tale ga na turaga yalovinaka o Jisu, ia e tukuna: “Sega tale ni dua e vinaka, na Kalou ga.”—Luke 18:19.

E kilai na yalovinaka i Jiova ena veika e bulia

 E vinaka na cakacaka kece i Jiova. Na ka kece e cakava o Jiova e vinaka. “Sa vinaka o Jiova vei ira kece ga, qai laurai na nona yalololoma ena nona cakacaka kece.” (Same 145:9) E sega ni veivakaduiduitaki o Jiova ena nona caka vinaka, e solia vei keda kece na bula kei na ka eda gadreva meda bula kina. (Caka. 14:17) E laurai tale ga na nona yalovinaka ni vosoti keda. E vola na daunisame: “O kemuni Jiova, oni vinaka qai tu vakarau moni veivosoti.” (Same 86:5) Eda vakadeitaka gona ni o “Jiova ena sega ni bureitaka e dua na ka vinaka vei ira na lako tiko ena yalodina.”—Same 84:11.

“VULICA NA CAKA VINAKA”

Eda buli meda ucuya na Kalou. Eda rawa gona ni vakataki koya ena noda caka vinaka, meda tamata vinaka tale ga. (Vkte. 1:27) Ia e uqeti keda na Vosa ni Kalou meda “vulica na caka vinaka.” (Aisea 1:17) Eda na bucina vakacava na itovo qo? Raica mada e tolu na sala.

Kena imatai, meda kerea na yalo tabu me vukei keda meda vakaraitaka na yalovinaka. (Kala. 5:22) Io, na yalo tabu ena vukei keda meda taleitaka na ka vinaka da qai cata na ka ca. (Roma 12:9) E vakaraitaka na iVolatabu ni o Jiova ena ‘vakataudeitaki keda ena cakacaka vinaka kece kei na vosa.’—2 Ces. 2:16, 17.

Kena ikarua, meda wilika na Vosa uqeti ni Kalou. Nida cakava qori, ena vakavulici keda o Jiova ena “ivalavala vinaka kece,” ena vakarautaki keda tale ga ena “cakacaka vinaka kece.” (Vkai. 2:9; 2 Tim. 3:17) Nida wilika na Vosa ni Kalou da qai vakasamataka vakatitobu, eda na tugana e lomada na veika vinaka me baleta na Kalou kei na nona inaki. Eda sa kuria tiko na noda lololo vakayalo ena qai yaga ena dua na gauna.—Luke 6:45; Efeso 5:9.

Kena ikatolu, meda saga vagumatua meda “vakatotomuria ga na ka vinaka.” (3 Joni 11) E tu ena iVolatabu e levu na ivakaraitaki meda vakatotomuria. E macala ga ni rau ivakaraitaki vinaka sara o Jiova kei Jisu. Meda dikeva tale ga na nodra ivakaraitaki eso era kilai nira yalovinaka. Eda rawa ni vakasamataki Tavaita kei Panapasa. (Caka. 9:36; 11:22-24) Ena yaga ni o dikeva na kedrau itukutuku kei na nodrau veivuke. Vakasamataka na sala mo vakaliuliu kina ni vukea eso ena nomu vuvale kei na ivavakoso. Dikeva tale ga na yaga ni nodrau caka vinaka, ena yaga vei iko ni o muria na nodrau ivakaraitaki.

Meda vakasamataka tale ga na nodra ivakaraitaki ni yalovinaka eso ena gauna qo, me  vakataki ira na qase ni ivavakoso gumatua era “vinakata na ka dodonu.” Mera kua tale ga ni guilecavi na tacida yalewa yalodina era “dau vakavulica na ka vinaka.” (Taito 1:8; 2:3) E kaya e dua na tacida yalewa o Roslyn: “E dau via veivuke na noqu itokani, e vakayaloqaqataki ira tale ga ena ivavakoso. E vakasamataka na kedra ituvaki qai soli iloloma vei ira, se veivuke ena so tale na sala. E dua dina na itokani vinaka.”

O Jiova e uqeti ira na nona tamata mera “vaqara na ka vinaka.” (Emosi 5:14) Nida cakava qori, eda na taleitaka na nona ivakatagedegede, ena uqeti keda tale ga meda caka vinaka.

Eda saga me vinaka na noda itovo, meda caka vinaka tale ga

Nida caka vinaka, e sega ni tukuni sara meda cakava eso na ka lelevu meda qoroi kina, se solia na iloloma saulevu. Meda vakatauvatana mada: Ni droini tiko e dua na daudroini, ena sega ni matailelevu tu ga na nona boroboro. Ena matailalai tale ga me qai dua kina nona droini. E va tale ga qori na noda caka vinaka, ena sega ni laurai ga ena ka lelevu eda cakava, ena ka lalai mada ga.

E uqeti keda na iVolatabu meda “vakarautaki” keda, meda “tu vakarau” tale ga ni caka vinaka. (2 Tim. 2:21; Taito 3:1) Nida kauaitaka na kedra ituvaki eso tale, eda na kila na sala meda nanumi ira kina ena ka e “yaga vei ira, me vakauqeti ira” tale ga. (Roma 15:2) Qori ena rairai vauci kina na noda wasea na ka e tu vei keda. (Vkai. 3:27) Eda rawa ni veisureti meda mai kana vata se veivakayaloqaqataki. Ke da kila ni tauvimate e dua, eda rawa ni volavola vua, sikovi koya, se qiri. Io, eda rawa ni qara na sala meda tukuna kina “na vosa ga e vinaka qai veivakayaloqaqataki ena kena gauna, me vinaka vei ira na rogoca.”—Efeso 4:29.

Me vakataki Jiova, eda saga meda dau caka vinaka vei ira na wekada. Eda na sega gona ni veivakaduiduitaki. Dua na sala vakasakiti oya nida wasea na itukutuku vinaka ni Matanitu ni Kalou vei ira kece na lewenivanua. E vakarota o Jisu meda qara na sala meda caka vinaka kina, vei ira mada ga na sega ni taleitaki keda. (Luke 6:27) E donu vinaka meda yalovinaka da qai caka vinaka, ni “sega na lawa e vakacala na ka kece qo.” (Kala. 5:22, 23) Nida vakatovolei se tusaqati, na noda itovo vinaka ena rawa ni uqeta eso mera taleitaka na ka dina qai vakalagilagi kina na Kalou.—1 Pita 3:16, 17.

ISAU NI CAKA VINAKA

“Na tamata vinaka ena tamusuka na isau ni nona ivalavala.” (Vkai. 14:14) Na cava na isau ni caka vinaka? Ena caka tale ga vei keda na ka vinaka. (Vkai. 14:22) Ke ra sega mada ga ni cakava qori eso, ena rawa ni veisautaka nodra rai mera yalomalumalumu ni vinaka tiko ga na noda itovo.—Roma 12:20, vmr.

Era vakadinata e levu ni yaga dina na nodra caka vinaka ra qai cata na ka ca. Dikeva mada na ivakaraitaki i Nancy. E kaya: “Niu tubucake tiko, au sega ni kauaitaka tale e dua, e vakasisila na noqu itovo, au dau veibeci. Ia niu vulica qai muria na ivakatagedegede ni Kalou me baleta na ka vinaka, au sa qai marau. Sa vinaka na noqu itovo ena gauna qo, au nuidei tale ga.”

Na vuna levu meda vakaraitaka kina na yalovinaka oya ni vakamarautaki Jiova. Ke ra sega mada ga ni raica qori eso, meda vakadeitaka ni kila vinaka o Jiova. E kila na ka vinaka kece eda cakava se vakasamataka. (Efeso 6:7, 8) Na cava na kena yaga? “Na tamata vinaka e vakadonuya o Jiova.” (Vkai. 12:2) Meda vakaraitaka tiko mada ga na yalovinaka. E yalataka o Jiova “na lagilagi, na vakarokoroko, kei na vakacegu, vei ira kece era cakava na ka vinaka.”—Roma 2:10.

^ para. 2 Sa veisau eso na yaca.