Raica sara na lewena

Raica na lewenivola

 ULUTAGA NI VULI 10

Na Cava e Tarova na Noqu Papitaiso?

Na Cava e Tarova na Noqu Papitaiso?

“Rau sobu ruarua i wai o Filipi kei na matanivanua, sa qai papitaisotaki koya o Filipi.”—CAKA. 8:38.

SERE 52 Yalayala vaKarisito

KA ENA VULICI *

1. Na cava na itinitini ni nodrau vakatulewa o Atama kei Ivi?

O CEI e dodonu me lewa na ivakatagedegede ni ka e donu kei na ka e cala? Nodrau kana o Atama kei Ivi mai na vunikau e kilai kina na ka vinaka kei na ka ca e dusia e dua na ka: Erau sega ni nuitaki Jiova kei na nona ivakatagedegede. Erau digia me rau lewa ga na ka e donu kei na ka e cala. (Vkte. 3:22) Vakasamataka mada na itinitini ni nodrau vakatulewa. Erau sa sega ni qai veitokani kei Jiova. Erau sega tale ga ni bula tawamudu, rau vakadewa ga na ivalavala ca kei na mate vei ira na nodrau kawa. (Roma 5:12) Na nodrau vakatulewa e vakavu rarawa dina.

Ni vakabauti Jisu na matanivanua ni Iciopea, e sega tale ni lokuyara me papitaiso (Raica na parakaravu e 2-3)

2-3. (a) Na cava e cakava na matanivanua ni Iciopea ni vunau vua o Filipi? (b) Eda vakalougatataki vakacava nida papitaiso? Na taro cava eda na dikeva?

2 Ni vakatauvatani kei rau o Atama kei Ivi, e duatani sara na ka e cakava na matanivanua ni Iciopea ni vunau vua o Filipi. E vakavinavinakataka na matanivanua na ka erau cakava vua o Jiova kei Jisu, e sega tale ni lokuyara me papitaiso. (Caka. 8:34-38) Nida yalataki keda vua na Kalou qai papitaiso me vakataki koya na matanivanua, qori e vakaraitaka nida vakavinavinakataka na ka erau cakava vei keda o Jiova kei Jisu. Eda nuitaki Jiova tale ga qai vakadinata ni dodonu me lewa na ivakatagedegede ni ka e donu kei na ka e cala.

3 Vakasamataka mada na noda vakalougatataki nida qaravi Jiova! Kena ivakaraitaki, eda na marautaka na  ka kece rau vakayalia o Atama kei Ivi, okati kina na bula tawamudu. E vosoti noda ivalavala ca qai savasava noda lewaeloma nida vakabauti Jisu Karisito. (Maciu 20:28; Caka. 10:43) Eda vakadonui tale ga meda lewe ni vuvale i Jiova da qai nuitaka na veika totoka e yalataka tu. (Joni 10:14-16; Roma 8:20, 21) Dua na ka na levu ni veivakalougatataki, ia eso era mai kilai Jiova era lomalomarua mera vakatotomuria na matanivanua ni Iciopea. Na cava ena rairai vakadredretaka tiko mera papitaiso? Era na valuta vakacava?

KA E VAKADREDRETAKA NODRA PAPITAISO ESO

Veika dredre era sotava eso ni bera nira papitaiso

Sega ni Nuidei (Raica na parakaravu e 4-5) *

4-5. Na cava erau sotava o Avery kei Hannah?

4 Sega ni nuidei. Erau iVakadinadina i Jiova na itubutubu nei Avery, e dua na gonetagane. E kilai o tamana ni turaga yalovinaka, e qase gumatua tale ga. Ia e lomalomarua o Avery me papitaiso. Na vuna? E kaya: “Au sega ni rawa ni vakai Ta.” E nanuma o Avery ni na sega ni qarava rawa na itavi ena rairai lesi vua. E tomana: “Au leqataka de kerei meu masu e matanalevu, vunau ena ivavakoso, se liutaka na cakacaka vakavunau.”

5 O Hannah e goneyalewa yabaki 18, e sega ni dau nuidei. Erau qaravi Jiova na nona itubutubu. Ia e vakatitiqataka o Hannah ni na sega ni muria rawa na ivakatagedegede i Jiova. Na vuna? E dau beci koya. Eso na gauna e yalolailai sara ga, sa qai ikuri ga ni leqa nona dau vakamavoataki koya. E kaya: “Au sega vakadua ni bau tukuna vua e dua, vei rau mada ga noqu itubutubu.” E tomana: “Au nanuma ni na sega sara ga ni vinakata o Jiova meu nona dauveiqaravi baleta na ka au cakava tiko e yagoqu.”

Veirawai na iTokani (Raica na parakaravu e 6) *

6. Na cava e lomalomarua kina o Vannesa me papitaiso?

6 Nodra veirawai na itokani. E kaya o Vanessa e goneyalewa yabaki 22: “E tiko e dua noqu itokani sa dede sara neirau veikilai.” Ia e sega ni uqeti koya na itokani qori me sauva nona isausau me papitaiso. E rarawa sara ga o Vanessa, e kaya, “E dau dredre me dua noqu itokani, au leqataka gona ni na sega noqu itokani voleka keu tinia neirau veitokani.”

Rere de ra Cala Bibi (Raica na parakaravu e 7) *

7. Na cava e rerevaka o Makayla? Na vuna?

7 Rere de ra cala bibi. Ni se qai yabaki lima o Makayla e dua na goneyalewa, sa vakasivoi o ganena. Ni tubu tiko, e raica sara ga nodrau rarawataka na nona  itubutubu na ka e cakava o ganena. E kaya o Makayla: “Au rere sara ga deu na cala bibi niu papitaiso oti qai vakasivoi, rau na rarawa kina vakalevu na noqu itubutubu.”

Rerevaka na Veitusaqati (Raica na parakaravu e 8) *

8. Na cava e rerevaka o Miles?

8 Rerevaka na veitusaqati. Dua na gonetagane o Miles, e qaravi Jiova o tamana kei tinana vakacabecabe. Ia o tinana dina e sega ni qaravi Jiova. E kaya o Miles: “Sa 18 na yabaki noqu tu vata kei Na, au rere meu tukuna vua niu sa via papitaiso. Gauna e mai iVakadinadina i Jiova kina o Ta, e cudru sara ga o Na. Au rere gona de tusaqati au.”

VALUTA NA KA E VAKADREDRETAKA MO PAPITAISO

9. Na cava ena yaco ni o vulica na vosovoso kei na loloma i Jiova?

9 Erau sega ni via qaravi Jiova o Atama kei Ivi ni rau sega ni bucina me rau lomani koya vakalevu. Ia e vakatara o Jiova me rau bula tiko, me rau vakaluveni qai lewa ga na ivakatagedegede mera tuberi kina. Na cava e yaco ena nodrau via lewai rau ga o Atama kei Ivi? E macala ni dua dina na vakatulewa lialia. E labati tacina na nodrau ulumatua, toso na gauna sa sinai o vuravura ena itovo kaukaua kei na tawaveinanumi. (Vkte. 4:8; 6:11-13) Ia e vakarautaka o Jiova na sala mera vakabulai kina na kawa i Atama kei Ivi era via qaravi koya. (Joni 6:38-40, 57, 58) Ni o vulica wasoma na ivakaraitaki ni vosovoso kei na loloma i Jiova, o na lomani koya vakalevu. O na sega ni via vakataki rau o Atama kei Ivi, o na yalataki iko tale ga vei Jiova.

O rawa ni valuta na ka e vakadredretaka mo papitaiso

(Raica na parakaravu e 9-10) *

10. Ni o vakasamataka vakatitobu na Same 19:7, ena uqeti iko vakacava mo qaravi Jiova?

10 Vulica tiko ga na veika me baleti Jiova. Ni o vulica e levu na ka me baleti Jiova, o na nuidei vakalevu ni o rawa ni qaravi koya. E kaya o Avery, sa cavuti oti mai: “Au nuidei vakalevu niu wilika qai vakasamataka vakatitobu na ka e yalataki ena Same 19:7.” (Wilika.) Ni raica o Avery na dina ni yalayala i Jiova,  sa qai lomani koya ga vakalevu. Na loloma e uqeti keda meda nuidei, e uqeti keda tale ga meda nanumi Jiova qai vakamarautaki koya. E kaya o Hannah sa cavuti oti mai: “Niu dau wili iVolatabu qai vuli vakataki au, au liaca ni na rarawa o Jiova keu vakamavoataki au.” (1 Pita 5:7) E “muria” sara o Hannah na vosa ni Kalou. (Jeme. 1:22) Cava e yaco? E kaya: “Niu vakasamataka na yaga ni noqu talairawarawa vei Jiova, au sa qai lomani koya ga. Au nuidei ni na dusimaki au tiko ga o Jiova ena gauna au vinakata kina nona veivuke.” E muduka o Hannah na nona dau vakamavoataki koya ga. E yalataki koya vei Jiova qai papitaiso.

(Raica na parakaravu e 11) *

11. E vakaitokani vinaka vakacava o Vanessa? Na cava eda vulica kina?

11 Digia vinaka nomu itokani. E qai liaca o Vanessa sa cavuti oti mai, ni a vakadredretaka tiko na nona itokani me qaravi Jiova. E mani tinia na veitokani qori. Dua tale na ka e sasagataka o Vanessa, oya me so nona itokani ena loma ni ivavakoso. E tukuna ni uqeti koya na ivakaraitaki i Noa kei na nona vuvale. E kaya: “Eratou bula maliwai ira na sega ni lomani Jiova, ia ratou vakailala ga vakataki ratou.” Ni papitaiso oti o Vanessa, e painia sara. E kaya: “Qori e vakarawarawataka meu vakaitokani vinaka ena noqu ivavakoso, vaka kina ena so tale na ivavakoso.” Ena levu tale ga nomu itokani vinaka ni o ogaoga ena itavi e lesia vei keda o Jiova.—Maciu 24:14.

(Raica na parakaravu e 12-15) *

12. Na mataqali rere cava a sega vei Atama kei Ivi? Cava kena itinitini?

12 Vulica na rere vinaka. Eso na mataqali rere e vinaka. Kena ivakaraitaki, eda rerevaka meda vakacudrui Jiova. (Same 111:10) Ke rau bucina o Atama kei Ivi na rere qori, rau na talairawarawa vei Jiova. Ia rau talaidredre vua qai rai na matadrau ni rau liaca ni rau sa valavala ca. Erau mani vakadewa na ivalavala ca kei na mate vei ira na nodrau kawa. Ni rau kila ni rau sa talaidredre vei Jiova, rau maduataka nodrau  luvawale, rau mani ubi rau.—Vkte. 3:7, 21.

13-14. (a) Me vaka e tukuni ena 1 Pita 3:21, na cava meda kua ni rerevaka kina vakalevu na mate? (b) Na cava meda lomani Jiova kina?

13 Nida rere ni vakacudrui Jiova, e sega ni dodonu meda rerevaka vakalevu na mate. E vakarautaka tu o Jiova na inuinui ni bula tawamudu. Ke da valavala ca qai veivutuni dina, ena vosoti keda nida vakabauta na isoro ni veivoli i Luvena. Dua na ivakaraitaki levu ni noda vakabauta, oya nida yalataki keda vua na Kalou da qai papitaiso.—Wilika 1 Pita 3:21.

14 E levu tu na vuna meda lomani Jiova kina. E vakarautaka na veika vinaka meda marautaka e veisiga, e vakavulici keda tale ga ena ka dina me baleti koya kei na nona inaki. (Joni 8:31, 32) E vakarautaka na ivavakoso vaKarisito meda lewena, me dusimaki keda qai tokoni keda. E vakaukauataki keda meda vosota, e vakarautaka tale ga noda inuinui totoka ena gauna se bera mai. (Same 68:19; Vkta. 21:3, 4) Nida vakasamataka na loloma i Jiova ena ka kece e cakava vei keda, eda na lomani koya vakalevu. Nida lomani Jiova, eda na bucina na rere e vinaka. Eda na rere gona ni vakacudrui koya nida lomani koya vakalevu.

15. E qai oti vakacava nona rerevaka o Makayla de cala bibi?

15 Ni matata vei Makayla sa cavuti oti mai ni dau veivosoti o Jiova, e oti sara ga nona rerevaka de cala bibi. E kaya: “Au kila nida sega ni uasivi, eda dau cala. Ia sa qai matata vei au ni lomani keda o Jiova, ena vosoti keda tale ga ena yavu ni isoro ni veivoli.” Na levu ni nona lomani Jiova e yalataki koya vua qai papitaiso.

(Raica na parakaravu e 16) *

16. E oti vakacava nona rerevaka o Miles na veitusaqati?

16 Vakacava o Miles na gonetagane a rerevaki tinana de saqata nona papitaiso? E taro ivakasala vua na ivakatawa ni tabacakacaka. E tukuna na ivakatawa ni tabacakacaka ni susu tale ga ena vuvale duidui lotu. E kaya o Miles: “E uqeti au meu vakasamataka na ka meu tukuna vei Na me kila ni noqu vakatulewa sara ga meu papitaiso, e sega ni vakasaurarataki au o Ta.” E cudru sara ga o tinana. Toso na gauna e biubiu mai vale, ia e dei tiko ga ena nona vakatulewa. E tomana: “E uqeti au sara ga niu vulica na veika vinaka e cakava vei au o Jiova. Niu vakasamataka vakatitobu na isoro ni veivoli i Jisu, au kila kina na levu ni nona lomani au o Jiova. Qori e uqeti au meu yalataki au vei Jiova qai papitaiso.”

 DEI ENA NOMU VAKATULEWA

Eda rawa ni vakaraitaka nida vakavinavinakataka na vinaka i Jiova (Raica na parakaravu e 17)

17. Na cava eda rawa ni vakaraitaka?

17 Ni kania o Ivi na vuanikau vakatabui ena were o Iteni, e dusia ni beci Tamana. Ni kania tale ga o Atama, e vakaraitaka ni sega ni vakavinavinakataka na veika vinaka e vakarautaka vua o Jiova. Vakacava o keda? Meda kua mada ga ni vakataki Atama kei Ivi, meda vakaraitaka ga nida vakavinavinakataka na vinaka i Jiova. Nida papitaiso, e dusia ni dodonu ga me lewa o Jiova na ivakatagedegede ni ka e donu kei na ka e cala. E kilai tale ga kina nida lomani Tamada qai nuitaki koya.

18. Ena toso vinaka vakacava nomu qaravi Jiova?

18 Na cava meda sasagataka nida papitaiso oti? Oya meda muria e veisiga na ivakatagedegede i Jiova, sega ni noda. E vica na milioni era cakava tiko qori e veiyabaki. O na cakava tale ga qori ni o vakatitobutaka nomu kila na Vosa ni Kalou na iVolatabu, maliwai ira wasoma na mataveitacini qai gumatua ni wasea na veika o vulica me baleta na Tamada dauloloma. (Iper. 10:24, 25) Ni o vakatulewa, muria na veidusimaki i Jiova ena nona Vosa kei na nona isoqosoqo. (Aisea 30:21) Ena toso vinaka tiko ga kina na nomu qaravi Jiova.—Vkai. 16:3, 20.

19. Na cava mo vakasamataka tiko ga? Na vuna?

19 Ni o vakasamataka tiko ga na yaga ni nomu muria na veidusimaki i Jiova, o na lomani koya vakalevu qai mareqeta nona ivakatagedegede. Ena sega tale ga ni rawai iko o Setani mo vakanadakui Jiova. Raitayaloyalotaki iko ena duanaudolu na yabaki mai qo. O na vakadinata ena gauna qori ni vakatulewa vinaka duadua o cakava oya na nomu papitaiso!

SERE 28 Mo iTokani i Jiova

^ para. 5 Na vakatulewa bibi duadua o na cakava oya mo papitaiso se kua. Cava e rui bibi kina? Ena saumi qori ena ulutaga qo. Ena yaga tale ga vei ira na lomalomarua mera valuta na ka e vakadredretaka nodra vakatulewa mera papitaiso.

^ para. 56 IVAKAMACALA NI IYALOYALO: Nuidei: E rere e dua na gonetagane me vakamacala.

^ para. 58 IVAKAMACALA NI IYALOYALO: iTokani: E vakailala ca e dua na goneyalewa iVakadinadina qai madua ni raica eso na tacida.

^ para. 60 IVAKAMACALA NI IYALOYALO: Cala bibi: Ni vakasivoi e dua na cauravou qai biubiu mai vale, e rere na ganena lailai de sotava tale ga qori.

^ para. 62 IVAKAMACALA NI IYALOYALO: Veitusaqati: E rere me masu e dua na gonetagane ni raici koya o tinana e sega ni tiko ena dina.

^ para. 65 IVAKAMACALA NI IYALOYALO: Nuidei: E dua na gonetagane e vakavinakataka nona vuli vakataki koya.

^ para. 67 IVAKAMACALA NI IYALOYALO: iTokani: E mani saga me sakitaka ni iVakadinadina i Jiova.

^ para. 69 IVAKAMACALA NI IYALOYALO: Cala bibi: Ia e mareqeta na ka dina qai papitaiso.

^ para. 71 IVAKAMACALA NI IYALOYALO: Veitusaqati: Ia e qai vakamacalataka vua na nona vakabauta.