Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 13

Meda Dau Veikauaitaki ena Cakacaka Vakaitalatala

Meda Dau Veikauaitaki ena Cakacaka Vakaitalatala

“Dua na ka nona lomani ira . . . Mani vakavulici ira ena levu sara na ka.”—MARI. 6:34.

SERE 70 Qarai Ira na Ciqomi Keda kei na Noda iTukutuku

KA ENA VULICI *

1. Na itovo cava i Jisu e dau veivakacegui? Vakamacalataka.

E VEIVAKACEGUI ni kila vinaka o Jisu na noda leqa na tamata ivalavala ca. Ni bula e vuravura, e dau “marau vata kei ira era marau” e “tagi vata kei ira era tagi.” (Roma 12:15) Kena ivakaraitaki, dua na ka nodra marau na le 70 na nona tisaipeli nira lesu mai na vunau. E ‘marau tale ga vakalevu o Jisu, e sobuti koya na yalo tabu.’ (Luke 10:17-21) Ia ni raica na nodra rarawataka na itokani i Lasarusa na nona mate, e ‘vusolo na lomana.’—Joni 11:33.

2. Na cava e dau veikauaitaki kina o Jisu?

2 E uasivi o Jisu, ia dua na ka nona kauaitaki keda na tamata ivalavala ca, e lomani keda tale ga. Na vuna? E lomani ira vakalevu na tamata. Me vaka eda vulica ena ulutaga sa oti, e “taleitaki ira vakalevu na luve ni tamata.” (Vkai. 8:31) E uqeti koya na loloma me kila vinaka na ivakarau ni noda rai. E vola na yapositolo o Joni: “Ni kila vinaka na ka e tu e loma ni tamata.” (Joni 2:25) E dau veinanumi o Jisu. Era rogoca na lewenivanua na itukutuku vinaka nira vakila na nona loloma. Nida lomani ira tale ga vakalevu na lewenivanua, eda na vukei ira ena cakacaka vakavunau.—2 Tim. 4:5.

3-4. (a) Nida dau veikauaitaki, eda na raica vakacava na cakacaka vakaitalatala? (b) Na cava eda na dikeva ena ulutaga qo?

3 Me vaka na yapositolo o Paula, eda kila ni noda itavi meda vunau. (1 Kor. 9:16) Nida kauaitaki ira na lewenivanua, eda na sega ni cakava tu ga me rawa na noda cakacaka vakaitalatala. Ia eda via vukei ira dina nida lomani ira. Eda kila ni “marau vakalevu o koya e solia na ka,  vakalailai o koya e taura na ka.” (Caka. 20:35) Ni tiko vei keda na rai qori, eda na marautaka vakalevu na noda cakacaka vakaitalatala.

4 Eda na dikeva ena ulutaga qo na sala meda veikauaitaki kina ena cakacaka vakaitalatala. Eda na vulica e liu na nona dau veikauaitaki o Jisu. Oti, eda na qai dikeva e va na sala meda muria kina na nona ivakaraitaki.—1 Pita 2:21.

DAU VEIKAUAITAKI O JISU ENA CAKACAKA VAKAITALATALA

E vunautaka o Jisu na itukutuku veivakacegui ni dau veikauaitaki (Raica na parakaravu 5-6)

5-6. (a) E kauaitaki cei o Jisu? (b) Me vaka e parofisaitaki ena Aisea 61:1, 2, na cava e lomani ira kina?

5 Na cava e dua na ivakaraitaki ni nona dau veikauaitaki o Jisu? Dua na gauna, e wawale sara ga o Jisu kei ratou na nona tisaipeli ni ratou sega ni cegu ena vunau. E ‘sega mada ga na gauna galala me ratou kana kina.’ E mani kauti ratou vakatikitiki o Jisu ena “dua na vanua lala” me ratou “vakacegu mada vakalailai.” Ia dua na ilala levu era sa liu rawa ena vanua qori. Na cava e cakava o Jisu ni raici ira? “Dua na ka nona lomani * ira nira vaka na sipi e sega na kena ivakatawa. Mani vakavulici ira ena levu sara na ka.”—Mari. 6:30-34.

6 Na cava e lomani ira kina na ilala levu o Jisu qai kauaitaki ira? E raica “nira vaka na sipi e sega na kena ivakatawa.” De dua e raica o Jisu nira dravudravua eso, era cakacaka tale ga vakaukaua mera qarava nodra vuvale. So tale era rarawataka ni mate na wekadra lomani. Ke dina qori, ena kila vinaka o Jisu na kedra ituvaki. Eda vulica ena ulutaga sa oti ni sotava tale ga eso na ituvaki qori. E kauaitaki ira na lewenivanua o Jisu, e wasea kina vei ira na itukutuku veivakacegui.—Wilika Aisea 61:1, 2.

7. Eda na vakatotomuria vakacava na ivakaraitaki i Jisu?

 7 Na cava eda vulica ena ivakaraitaki i Jisu? Era tu tale ga nikua e levu era “vaka na sipi e sega na kena ivakatawa.” Era sotava e levu na veika dredre. Eda na vakacegui ira gona nida wasea vei ira na itukutuku vinaka ni Matanitu ni Kalou. (Vkta. 14:6) Meda vakatotomuria mada ga na noda Turaga da qai vunautaka na itukutuku vinaka nida “lomani ira na vakaloloma kei na dravudravua.” (Same 72:13) Eda lomani ira dina na lewenivanua, eda vinakata gona meda vukei ira.

VA NA SALA MEDA VEIKAUAITAKI KINA

Meda kauaitaka na ka era gadreva yadua (Raica na parakaravu 8-9)

8. Na cava na imatai ni sala eda na veikauaitaki kina ena cakacaka vakaitalatala? Vakatauvatana.

8 Na cava ena uqeti keda meda kauaitaki ira kina na tu ena yalava? Eda na biuti keda ena kedra ituvaki, da qai cakava na ka sara ga eda vinakata mera cakava vei keda. * (Maciu 7:12) Meda raica mada e va na sala meda cakava kina qori. Kena imatai, meda kauaitaka na ka era gadreva yadua. Nida lai vunau, eda na vaka na vuniwai. Na vuniwai vinaka ena kauaitaka na kedra ituvaki yadua na tauvimate. Ena tarogi koya, ena vakarorogo vinaka tale ga ni vakamacalataka tiko na kena mate kei na ka e vakila. Ena sega ni solia mada na wainimate, vakavo ke sa dikevi koya vinaka me kila na ka e ganiti koya. Ena va tale ga qori nida lai vunau, ena sega ni duadua tu ga na noda ivakamacala vei ira ena yalava. Meda kila vinaka mada na kedra ituvaki kei na nodra rai.

9. Na cava meda kua ni nanuma? Vakamacalataka.

9 Ni o sotava e dua ena cakacaka vakavunau, kua ni nanuma ni o sa kila vinaka tu na kena ituvaki, na ka e vakabauta kei na vuna. (Vkai. 18:13) Saga mo kila na ka me baleti koya kei na nona vakabauta ni o tarogi koya vakamaqosa. (Vkai. 20:5) Ke salavata kei na ivakarau ni nomu vanua, taroga na nona cakacaka, nona vuvale, na ka e sotava, kei na nona rai. Nida takiva mai na ka e tu e lomadra, eda na kila kina na kedra ituvaki. Ni matata qori, eda na vakatotomuri Jisu nida kauaitaka na ka era gadreva qai vukei ira.—Vakatauvatana 1 Korinica 9:19-23.

Mo vakasamataka na kena ituvaki o koya o vunau tiko vua (Raica na parakaravu 10-11)

10-11. Me vaka e tukuni ena 2 Korinica 4:7, 8, na cava na ikarua ni sala eda na veikauaitaki kina? Tukuna e dua na ivakaraitaki.

10 Kena ikarua, saga mo vakasamataka na kedra ituvaki. Ena so na gauna  eda rawa ni kila na kedra ituvaki nida dau sotava tale ga na leqa, da qai sega ni uasivi. (1 Kor. 10:13) Eda kila ni dredre na bula ena vuravura qo, eda vosota rawa ga ni tokoni keda o Jiova. (Wilika 2 Korinica 4:7, 8.) Ia qai vakasamataki ira na sega ni kilai Jiova. Ena dredre sara mera vosota na ituvaki ni vuravura qo nira sega ni vakila nona veitokoni. Me vakataki Jisu, nida nanumi ira, eda na tukuna vei ira “na itukutuku vinaka ni ka vinaka.”—Aisea 52:7.

11 Meda dikeva mada na ivakaraitaki nei Sergey e dua na tacida tagane. E dau mamadua qai galugalu ni bera ni vulica na iVolatabu. E dredre me vosa vei ira eso tale. E vulica sara na iVolatabu. E kaya: “Au vulica ena iVolatabu ni nodra itavi na lotu vaKarisito mera wasea na ka era vakabauta. Meu tukuna vakadodonu niu sega ni rawata qori.” Ia e vakasamataki ira vakalevu na se bera ni kila na ka dina, ena dredre sara na kedra ituvaki nira sega ni kilai Jiova. E tomana: “Au marau qai lomavakacegu ena veika vovou au vulica tiko ena gauna qori. Au kila ni bibi mera kila na ka dina eso tale.” Ni kauaitaki ira vakalevu na lewenivanua o Sergey, sa qai yaloqaqa me vunau. E kaya: “Au kurabui ni vakanuideitaki au na noqu wasea na ka e kaya na iVolatabu. E vakaukauataka tale ga na noqu vakabauta na veika vovou au sa vulica.” *

Ena taura na gauna me toso vakayalo e dua (Raica na parakaravu 12-13)

12-13. Na cava meda vosovoso kina nida veivakavulici? Vakatauvatana.

12 Kena ikatolu, mo vosovoso ni o veivakavulici. Nanuma tiko ni se bera sara ni matata vei ira na gonevuli eso na ka dina vakaivolatabu eda kila. Levu e dredre mera biuta na ka era vakabauta tu. De dua era nanuma ke ra biuta na nodra lotu, era sa na yawaki ira nodra lewenivuvale, ira ena itikotiko, era na sega tale ga ni okati ena ka  vakavanua. Eda na vukei ira vakacava?

13 Vakasamataka mada na ivakatautauvata qo: Na cava e dau caka ena wavu se ikawakawa makawa ni tara tale e dua na ka vou? Ena vakayagataki tiko ga me yacova ni sa oti na wavu vou. Ni sa vakarau dola na wavu vou, ena qai kau tani na wavu makawa. Ena va tale ga qori o ira noda gonevuli. Me rawa nira biuta na ivakavuvuli “makawa” era susugi kina, ena vinakati meda vakavulici ira mera kila na ivakavuvuli “vou,” mera taleitaka tale ga. Qori na ivakavuvuli vakaivolatabu era sega tu ni kila nira se qai tekivu vulica na iVolatabu. Nira kila vinaka, sa na rawarawa nira biuta na ivakavuvuli era susugi mai kina. Na veisau qori ena taura toka na gauna.—Roma 12:2.

14-15. Eda na vukea vakacava e dua e sega sara tu ga ni kila na inuinui ni bula tawamudu, se kila tu ga vakacaca? Tukuna e dua na ivakaraitaki.

14 Nida vosovoso vei ira ena yalava ni vunau, eda na sega ni namaka mera vakabauta se kila sara na ka dina ena imatai ni gauna era rogoca kina. Ia nida kauaitaki ira, eda na vukei ira mera vakasamataka vinaka na ka e tukuna na iVolatabu. Kena ivakaraitaki, eda na vukea vakacava e dua me kila na inuinui ni bula tawamudu e vuravura? Levu era sega sara tu ga ni kila na inuinui qo, se ra kila tu ga vakacaca. Era nanuma ni sega na nodra inuinui na mate. Se ra nanuma nira na lako kece i lomalagi na tamata vinaka. Eda na vukei ira vakacava?

15 Qo na iwalewale e vakayagataka e dua na tacida, e raica ni mana. E wilika e liu na Vakatekivu 1:28. Oti e tarogi itaukeinivale se i vei e vinakata na Kalou meda bula kina na kawatamata, na cava tale ga meda vakila. Levu era dau kaya, “E vuravura, meda mamarau tale ga.” Oti e wilika sara na tacida na Aisea 55:11, qai taroga ke se dei tiko ga na inaki ni Kalou. Vakalevu mera dau kaya na itaukeinivale ni se dei tiko ga. E wilika na tacida na Same 37:10, 11, qai taroga se cava ena yaco ena dua na gauna mai muri. Na iwalewale ni nona vakayagataka na iVolatabu na tacida qo, era mai kila kina e levu ni inaki ni Kalou mera bula tawamudu e vuravura na tamata vinaka.

Ena rairai nanumi ni sega soti ni bibi na vola ivola, ia e yaga vakalevu (Raica na parakaravu e 16-17)

16-17. Nida vakasamataka na Vosa Vakaibalebale 3:27, na cava eso na ka eda rawa ni cakava meda veikauaitaki kina? Tukuna e dua na ivakaraitaki.

16 Kena ikava, vakasamataka na ka mo cakava mera kila kina ni o kauaitaki ira. Kena ivakaraitaki, vakacava ke osooso o itaukeinivale? Eda rawa ni kere veivosoti da qai tukuna nida na lesuvi koya ena dua na gauna veiganiti. Vakacava ke vinakata me vukei ena dua na ka lailai ena nona vale? Se vinakata me  tala e dua ni sa dredre me veilakoyaki? Eda rawa ni veivuke ena ituvaki qori.—Wilika Vosa Vakaibalebale 3:27.

17 Qori na ka e cakava e dua na tacida yalewa. Ena nona veikauaitaki, e volavola kina ena dua na vuvale ni mate e dua vei ratou na gone. Ena rairai nanumi ni sega soti ni bibi na ivola qori, ia e yaga sara ga. E vola eso na tikinivolatabu veivakacegui. E uqeti ratou vakacava na vuvale qori na nona ivola? E kaya o tinadratou: “Au rarawa sara tu ga enanoa. E yaga vakalevu vei keitou na nomu ivola. Au vakavinavinakataka vakalevu na kena veivakacegui. Au wilika beka vaka20 enanoa. E tau vakayalovinaka, vakayalololoma qai veivakayaloqaqataki. Vinaka vakalevu.” E dau yaga dina nida biuti keda ena kedra ituvaki eso tale da qai vukei ira.

DONU NOMU RAI NI O VUNAU

18. Me vaka e tukuni ena 1 Korinica 3:6, 7, me vakacava na noda rai?

18 Eda vinakata me donu noda rai me baleta na noda itavi ni vunau. Eda na vukei ira na lewenivanua mera mai kilai Jiova da qai biuta vua na kena vo. (Wilika 1 Korinica 3:6, 7.) E nona itavi me vagolei ira mai. (Joni 6:44) Na nodra ciqoma na itukutuku vinaka se sega ena vakatau sara ga ena ivakarau ni lomadra. (Maciu 13:4-8) Vakasamataki Jisu mada! E Qasenivuli levu duadua me bau bula e vuravura, ia e levu era sega ni vakabauta na nona itukutuku! Meda kua gona ni yalolailai ke ra sega ni rogoca e levu na itukutuku vinaka.

19. Ena vuavuaivinaka vakacava na noda cakacaka vakaitalatala nida veikauaitaki?

19 Ena vuavuaivinaka na noda cakacaka vakaitalatala nida dau veikauaitaki. Eda na marautaka vakalevu na noda cakacaka vakavunau kei na soli ka. Era na rogoca tale ga na itukutuku vinaka o ira na “yalomalumalumu era muria na sala mera bula tawamudu kina.” (Caka. 13:48) Ni “se rawa, meda caka vinaka vei ira na tamata kece.” (Kala. 6:10) Eda na marau nida vakalagilagia na Tamada vakalomalagi.—Maciu 5:16.

SERE 64 Marautaka na Tatamusuki

^ para. 5 Eda na marautaka noda cakacaka vakavunau nida veikauaitaki, era na via rogoca tale ga e levu na noda itukutuku. Na vuna? Eda na vulica ena ulutaga qo na ivakaraitaki i Jisu, kei na va na sala meda kauaitaki ira kina ena yalava.

^ para. 5 IVAKAMACALA NI VOSA: Na ibalebale ni lomani ena ikotokoto qo oya na nomu nanuma e dua e rarawa se vakalolomataki. Ni tiko vei keda na rai qori, eda na solia noda vinaka taucoko meda veivuke.

^ para. 8 Raica na ulutaga “Muria na Vunau Koula ena Nomu Cakacaka Vakaitalatala” ena Vale ni Vakatawa ni ika15 ni Me, 2014.

^ para. 11 Raica Na Vale ni Vakatawa ni Okosita 1, 2011, t. 21-22.