Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Vinakati Mera Papitaiso na Lotu vaKarisito

Vinakati Mera Papitaiso na Lotu vaKarisito

“Ena vakabulai kemuni tale ga . . . na papitaiso.”​—1 PITA 3:21.

SERE: 52, 41

1, 2. (a) Na cava era cakava eso na itubutubu nira sa via papitaiso na luvedra? (b) Cava era tarogi kina na via papitaiso ke ra sa yalataki ira oti vei Jiova? (Raica na imatai ni iyaloyalo.)

RAU vakaraica toka e dua na itubutubu na luvedrau yalewa eda na vakatoka me o Maria, ni sa duri tu kei ira na vakarau papitaiso. E sauma vakadomoilevu e rua na taro e taroga o koya e vunau. Ni oti ga qori sa papitaiso sara.

2 Rau marautaka na itubutubu i Maria na nona vakatulewa me yalataki koya vakatabakidua vei Jiova me papitaiso. Ia so na taro a veinanuyaka taumada o tinana. A vakataroga: ‘E dodonu me papitaiso ni se gone? E kila na bibi ni nona vakatulewa qo? Vakacava, ena vinaka me wawa tale mada me se kua ni papitaiso?’ Qori eso na taro era dau vaqaqa na itubutubu ni sa via papitaiso na luvedra. (Dauv. 5:5) Na yalayala kei na papitaiso e ikalawa bibi duadua ena nona bula na lotu vaKarisito.—Raica na kato “ O sa Yalataki Iko Vei Jiova?

3, 4. (a) E vakamacalataka vakacava o Pita na bibi ni papitaiso? (b) Cava e vakatauvatani kina na papitaiso ena nona ta waqa o Noa?

 3 Ni vakamacalataka na papitaiso na yapositolo o Pita, e vakatauvatana kei na nona ta waqa o Noa: “Na ka e yaco ya e tiko na kena ivakatakarakara ena vakabulai kemuni tale ga, ya na papitaiso.” (Wilika 1 Pita 3:20, 21.) Na waqa e taya o Noa e ivakadinadina matata ni nona vakayacora ena yalodina na loma ni Kalou. E vakayacora vinaka na ka e lesi koya kina o Jiova. Na nona ivakaraitaki tale ga ni vakabauta e vakabulai kina nona vuvale ena Waluvu. Ia na cava e vakavulica tiko o Pita ena ivakatautauvata qori?

4 Me vaka ga ni vakadinadinataki na vakabauta i Noa ena nona taya na waqa, na papitaiso tale ga e matanalevu e ivakadinadina vinaka vei ira eso tale. Ena sala cava? Qo na nona sa yalataki koya e dua na tisaipeli vaKarisito vei Jiova ni vakabauti Karisito sa vakaturi oti. Me vakataki Noa, o ira na tisaipeli era sa yalataki ira oti era talairawarawa ni vakayacora na cakacaka e lesi ira kina na Kalou. Me vaka ga nona vakabulai o Noa ena Waluvu, era na vakabulai tale ga o ira yadua na papitaiso ena yalodina ena icavacava ni vuravura ca qo. (Mari. 13:10; Vkta. 7:9, 10) Qo na vuna e bibi kina na yalayala kei na papitaiso. O koya e vakabera na nona papitaiso e tarova tiko na nona rawata na bula tawamudu.

5. Na cava eda na dikeva ena ulutaga qo?

5 Me baleta na bibi ni papitaiso, e vinaka meda taroga e tolu na taro. Na cava e kaya na iVolatabu me baleta na papitaiso? Na cava me cakava e dua ni bera ni papitaiso? Na cava me matata kina vua na qasenivuli na bibi ni  papitaiso ni vakavulici luvena tiko se dua tale na vuli iVolatabu?

PAPITAISO ENA IVOLATABU

6, 7. (a) Vakamacalataka na vuna e duatani kina na veipapitaisotaki i Joni. (b) E vakasakiti vakacava e dua na papitaiso a vakayacora o Joni?

6 Na imatai ni gauna eda wilika kina na papitaiso ena iVolatabu, oya na nona veipapitaisotaki o Joni. (Maciu 3:1-6) O ira e papitaisotaka o Joni era vakadinadinataka nira sa veivutunitaka nodra beca na Lawa e vola o Mosese. Ia e vakasakiti e dua na papitaiso a vakayacora o koya baleta ni sega na ka me veivutunitaka o koya e papitaiso. E nona ilesilesi dokai o Joni me papitaisotaka na turaga uasivi o Jisu, na Luve ni Kalou. (Maciu 3:13-17) E sega nona ivalavala ca o Jisu, sega gona na ka me veivutunitaka. (1 Pita 2:22) Ia na nona papitaiso e dusia tiko ga ni sa solia nona bula me vakayacora na loma ni Kalou.—Iper. 10:7.

7 Eratou veipapitaisotaki tale ga na tisaipeli Jisu donuya nona cakacaka vakaitalatala e vuravura. (Joni 3:22; 4:1, 2) Me vaka ga na veipapitaisotaki i Joni, na nodra papitaiso ena gauna ya e dusia nodra veivutunitaka nodra beca na Lawa e vola o Mosese. Ia ni mate o Jisu vaka kina nona vakaturi, sa duidui sara na ibalebale ni papitaiso vei ira na nona imuri.

8. (a) Na cava e vakaroti ira kina nona imuri o Jisu ni sa vakaturi? (b) Vakamacalataka na bibi ni papitaiso.

8 Ena 33 G.V. ni sa vakaturi o Jisu, e rairai vei ira na 500 vakacaca na tagane, yalewa, kei ira mada ga na gone. De gauna sara ga qori e tukuna kina: “O koya gona, ni lako moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.” (Maciu 28:19, 20; 1 Kor. 15:6) Io, kena irairai nira a tiko e kea e drau vakacaca na nona imuri ena gauna e lesi ira kina mera tisaipeli. E vakaraitaka gona o Jisu ni bibi mera papitaiso o ira na cola na ivua ni lotu vaKarisito mera veivakatisaipelitaki. (Maciu 11:29, 30) Ke dua e via qarava na Kalou me vakadonui tale ga, e bibi me kila qai ciqoma na itavi i Jisu ena kena vakayacori na loma i Jiova. Ke sa matata tiko vua qori, sa rawa ni papitaiso. Qori ga na papitaiso ena vakadonuya na Kalou. E vakadinadinataki ena levu na itukutuku vakaivolatabu nodra kila na tisaipeli vou i Karisito na bibi ni papitaiso. Era sega kina ni lokuyara.—Caka. 2:41; 9:18; 16:14, 15, 32, 33.

KUA NI LOKUYARA

9, 10. Na cava eda vulica ena nona papitaiso na turaga ni Iciopea e tavuki ina lotu Jiu kei na yapositolo o Paula?

9 Wilika Cakacaka 8:35,36. Vakasamataka na ivakaraitaki ni turaga ni Iciopea a tavuki ina lotu vakaJiu ni lesu tiko mai na sokalou e Jerusalemi me gole i vale. E uqeti Filipi na agilosi i Jiova, mani torova na turaga qori me “tukuna vua na itukutuku vinaka me baleti Jisu.” Na cava e kaya na turaga ni Iciopea? Na ka e cakava tarava e vakadinadinataka nona taleitaka mai vu ni lomana na ka dina e vulica. E vinakata kina me muria na ituvatuva i Jiova, mani sega ni tu suka me papitaiso.

10 Na ikarua ni ivakaraitaki e baleta tiko e dua na Jiu e dau saqati ira na lotu vaKarisito. A sucu ena matanitu e yalataki vua na Kalou. Ka ni rarawa nira sa muduka koso na Jiu na nodra veiwekani talei kei Jiova. Na turaga qo e dau  gumatuataka na nodra ivakavuvuli na Jiu, ia e vulica e dua tale na ka e vinaka sara. E vunau vua ena dua na sala vakasakiti o Jisu Karisito sa vakaturi, e vakalagilagi tale ga. Cava e cakava na turaga qori? E marautaka nona veivuke na tisaipeli lotu vaKarisito o Ananaiasa. E kaya na iVolatabu me baleti koya: “Oti ya e tucake sa qai papitaiso.” (Caka. 9:17, 18; Kala. 1:14) O na kila sara ga na turaga qo, e qai kilai me yapositolo o Paula. Ia vakasamataka mada qo, ni gauna ga e ciqoma kina na ka dina me baleta na itavi i Jisu ena caka ni loma ni Kalou, e yavala sara ga. E papitaiso, sega ni lokuyara tale.—Wilika Cakacaka 22:12-16.

11. (a) Na cava e uqeti ira na vuli iVolatabu mera papitaiso? (b) E dau vakacava noda rai me baleti ira na yalataki ira mera papitaiso?

11 E tautauvata vinaka sara ga qori kei ira na vuli iVolatabu nikua, se ra mani gone se qase. O ira na vakabauta, ra taleitaka tale ga mai vu ni lomadra na ka dina vakaivolatabu era saga mera yalataki ira mera papitaiso. Na ivunau ni papitaiso e dau namaki vakalevu ena soqo ni tabacakacaka kei na soqo ni veiwasewase. Era marau na iVakadinadina i Jiova nira ciqoma na ka dina na gonevuli ni iVolatabu, ra toso sara mera papitaiso. Era dau marau sara ga na itubutubu lotu vaKarisito nira raici ira na luvedra kei ira na tisaipeli vou nira sa papitaiso. Ena yabaki vakacakacaka ni 2017, era yalataki ira vei Jiova mera papitaiso e sivia ni 284,000 “na yalomalumalumu.” (Caka. 13:48) E matata kina ni o ira na tisaipeli vou qo era kila ni dodonu mera papitaiso na lotu vaKarisito. Na cava era cakava mera papitaiso kina?

12. Na cava me cakava e dua na vuli iVolatabu ni bera ni papitaiso?

12 Ni bera ni dua na gonevuli e papitaiso, me bucina na vakabauta e yavutaki ena kilaka dodonu me baleta na Kalou, nona inaki, kei na nona ituvatuva me rawati kina na bula. (1 Tim. 2:3-6) Na vakabauta va qori e uqeti ira na gonevuli mera biuta na veika e cata na Kalou, mera muria na ivakatagedegede dodonu i Jiova. (Caka. 3:19) Ia ena sega ni vakaibalebale nona yalataki koya vua na Kalou ke se vakayacora tiko ga eso na itovo ena sega kina ni rawata na bula ena Matanitu ni Kalou. (1 Kor. 6:9, 10) E levu tale na ka e vinakati me muri kina na ivakatagedegede cecere i Jiova me baleta na itovo savasava. O koya e vakasaqara tiko na veika dodonu ena tiko wasoma ena soqoni, ena vakaitavi tale ga vakalevu ena cakacaka ni veivakatisaipelitaki. E kaya o Jisu ni cakacaka qo era na cakava na nona tisaipeli dina. (Caka. 1:8) Nona cakava qori sa na rawa kina vua na tisaipeli vou me yalataki koya vei Jiova ena nona masu qai papitaiso e matanalevu.

ISAUSAU NEI GONEVULI

O dau vakasamataka na bibi ni papitaiso, qai saga me kila nomu gonevuli? (Raica na parakaravu 13)

13. Na cava e bibi kina mera nanuma tiko na qasenivuli ni vinakati mera papitaiso na lotu vaKarisito?

13 Nida vukei ira tiko na luveda kei na so tale na vuli iVolatabu mera toso, me nanumi ni veivakatisaipelitaki dina e vauci kina na papitaiso. Ke matata vei keda qori eda na veivosakitaka vakavinaka kei ira na gonevuli. Eda na sega ni tu suka ena gauna veiganiti meda vakamacalataka na bibi ni yalayala kei na papitaiso. Io, eda vinakata mera toso na luveda kei ira na vuli iVolatabu mera papitaiso!

14. Na cava meda kua ni vakasaurarataka kina e dua me papitaiso?

14 Me kua ni dua na itubutubu, qasenivuli  ni iVolatabu, se dua tale ena ivavakoso me vakasaurarataka e dua me papitaiso. E sega ni vinakata qori o Jiova. (1 Joni 4:8) Ia nida tuberi ira tiko, meda vukei ira mera kila ni bibi nodra vaqaqacotaka nodra veiwekani kei na Kalou. Ena uqeti gonevuli me papitaiso na nona taleitaka mai vu ni lomana na ka dina kei na nona via cola na ivua ni lotu vaKarisito me veivakatisaipelitaki.—2 Kor. 5:14, 15.

15, 16. (a) E tiko na yabaki me qai papitaiso kina e dua? Vakamacalataka. (b) Na cava me papitaiso kina e dua na gonevuli me iVakadinadina i Jiova ke sa papitaiso oti ena dua tale na lotu?

15 E sega ni vakatututaki e dua na yabaki me papitaiso kina e dua. E duidui nodra toso vakayalo kei na nodra matua na gonevuli yadua. Levu era papitaiso nira se gone, era yalodina tiko ga vei Jiova. Ia so tale era raica ni bibi mera papitaiso nira sa uabula sara—so mada ga nira sa yabaki 100 vakacaca!

16 Dua na vuli iVolatabu itabaqase e tarogi nona qasenivuli ke vinakati me papitaiso tale ni sa papitaiso oti ena vica na lotu e lewena tu ena veiyabaki sa sivi. Rau vulica vata eso na tikinivolatabu veiganiti. E kila sara ni qori na ka e vakarota na iVolatabu, sega ni dede sa papitaiso sara. Sa yabaki 70 vakacaca, ia e kila ni se veiganiti tiko ga me papitaiso. Io e rawa ga ni qai papitaiso e dua ni yavutaka qori ena kilaka dodonu me baleta na loma i Jiova. Mera na papitaiso gona na tisaipeli vou, ke ra sa papitaiso oti mada ga ena dua tale na lotu.—Wilika Cakacaka 19:3-5.

17. Na cava me vakasamataka vakatitobu e dua ena siga ni nona papitaiso?

17 E siga marautaki dina na nona papitaiso e dua. Ena vakasamataka tale ga na veika me cakava ena nona bula. Ena vinakati na gumatua me dina tiko ga ina nona yalayala. Qori na vuna e vakatauvatana kina o Jisu noda veivakatisaipelitaki na lotu vaKarisito ina cola ivua. O ira na tisaipeli i Jisu ‘mera kua ni bula ga ena vukudra, mera bula ga ena vuku i koya e mate ena vukudra, qai vakaturi cake.’—2 Kor. 5:15; Maciu 16:24.

18. Na taro cava ena veivosakitaki ena ulutaga e tarava?

18 A vakasamataka tiko qori na tina i Maria ena gauna e taroga kina na taro eda dikeva ena itekivu ni ulutaga qo. Ke o itubutubu, de o sa rairai taroga: ‘Sa ganiti luvequ me papitaiso? Sa levu na ka e kila me yalataki koya kina? Vakacava nona vuli kei na cakacaka? Vakacava ke papitaiso qai sikalutu ina ivalavala ca?’ Ena veivosakitaki qori ena ulutaga e tarava, kei na ka mera cakava na itubutubu me donu tiko ga kina nodra rai me baleta na papitaiso.