Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Mo iTokani ni Basika na Duidui

Mo iTokani ni Basika na Duidui

Sa rauta ni 50 na yabaki na nodrau veitokani voleka o Gianni kei Maurizio. Dua na gauna e qai leqa na veitokani qori. E tukuna o Maurizio: “A mai leqa neirau veitokani niu cakava eso na cala bibi.” E kaya tale ga o Gianni: “E imatai ni noqu qasenivuli o Maurizio. E ivakaraitaki vinaka vakayalo vei au. Au sega gona ni namaka na ka e cakava. Niu kila ni keirau sa na vakarau veitalatala, e vaka ga e yali vei au e dua na ka levu. Vaka ga au sa biu taudua tu.”

EDA dau vakamareqeti ira na itokani vinaka, ia ena sega ni tu tu ga me dei na veitokani qori. Ke leqa na nodrau veitokani e rua, na cava me rau cakava me vinaka tale kina? Ena yaga vakalevu na nodra ivakaraitaki eso ena iVolatabu nira veitokani voleka ena dua na gauna, ia e qai yaco na veileqaleqati.

NI CALA E DUA NA ITOKANI

O Tevita e tui, e dua tale ga na ivakatawa qai tiko nona itokani vinaka. De dua o na vakasamataki Jonacani me dua vei ira na itokani qori. (1 Sam. 18:1) Ia e tiko eso tale nona itokani me vakataki koya na parofita o Necani. E sega ni tukuna vakamatailalai na iVolatabu na gauna rau tekivu veikilai kina. Ia ena dua na gauna e talaucaka na lomana vei Necani o Tevita me vaka ga nomu dau talaucaka na lomamu vua e dua na itokani. E vinakata o Tevita me tara na vale i Jiova. E rairai raica vakabibi o Tevita na ivakasala i Necani ni dua na itokani dina, ni dusimaki koya tale ga na yalo tabu i Jiova.​—2 Sam. 7:2, 3.

Ia dua na ka e qai vakaleqa na nodrau veitokani. E veibutakoci o Tui Tevita kei Pacisepa,  e labati watina tale ga o Uraia ena dua na gauna e muri. (2 Sam. 11:2-21) E yalodina tu vei Jiova o Tevita ena vica vata na yabaki, e tokona tale ga na ivalavala dodonu. Ia a qai cakava na ivalavala ca bibi ya! Na cava e veisau kina? Vakacava e sega ni bau vakasamataka na bibi ni cala e cakava? A nanuma ni na sega ni kila na Kalou na ka e cakava?

Na cava ena cakava o Necani? Ena tala tale e dua me vakaraitaka vua na tui nona cala? Eso tale ga era kila na nona tuvanaka o Tevita me vakamatei o Uraia. Ia na cava me mai takoso kina o Necani me vakaleqa nodrau veitokani ena dua na gauna balavu? Ena rivarivabitaki tale ga na bula i Necani ke vakaraitaka vakadodonu. Sa vakavuna o Tevita na mate i Uraia, e dua e sega nona cala.

Ia e vakayagataki Necani na Kalou me nona italai. Vakacava ke galuvaka tiko ga o koya na cala i Tevita? E kila o Necani ni vinaka cake me lai tukuna, ia e ca ga ni rau veitokani tiko qai ca nona lewaeloma. A kila tale ga ni cakava nona itokani e dua na ka ena sega ni vakadonui koya kina o Jiova. A vinakati me vukei o Tevita me vinaka tale nona bula vakayalo. Ena cakava qori na itokani dina o Necani. Ni vakatawanisipi tu e liu o Tevita, e vakayagataka o Necani e dua na vosa vakatautauvata me tara na lomana. E vakasavuya o Necani na itukutuku ni Kalou ena sala me rawarawa kina vei Tevita me kila na bibi ni nona cala, e uqeti koya tale ga me veivutuni.​—2 Sam. 12:1-14.

Na cava o na cakava ke cala bibi e dua nomu itokani? De dua o na kaya ni na vakaleqa nomudrau veikilai nomu tukuna vakadodonu na cala e cakava. Se o nanuma ni vakaraitaki ni liumuri ke o lai tukuna vei ratou na qase me vukei vakayalo. Cava o na cakava?

E kaya o Gianni e vakamacalataki mai cake: “Au liaca ni sa veisau o Maurizio. Sa sega ni dau talaucaka na lomana me vaka e liu. Au nanuma meu sa lai vosa vua, dina ni sega ni rawarawa toka. Au vakasamataka: ‘Na cava meu lai tukuna ni levu na ka sa kila rawa tu? De dua ena sega ni taleitaka!’ Niu vakasamataka lesu na ka keirau dau vulica, e uqeti au meu lai vosa vua. Qori ga na ka e dau cakava o Maurizio niu vinakata na veivuke. Au vinakata me dei tiko ga neirau veitokani, au via vukei koya tale ga niu kauaitaki koya dina.”

E tomana o Maurizio: “E vosa vakadodonu o Gianni, e donu tale ga na ka e tukuna. Au kila ni ka au sotava ena ca ni noqu vakatulewa e sega ni beitaki kina o koya se o Jiova. Au mani ciqoma na veivakadodonutaki, ni toso na gauna au sa qai toso tale vakayalo.”

NI SOTAVA NA LEQA E DUA NA ITOKANI

Era tiko tale eso na itokani i Tevita era yalodina ni tokoni koya ena gauna dredre mada ga. Dua vei ira o Usai, e vakatokai ena iVolatabu me “itokani i Tevita.” (2 Sam. 16:16; 1 Vei. 27:33) De dua e vakailesilesi o Usai qai veitokani vinaka kei na tui, ena so na gauna e qarava eso na itavi e sega ni dau vakatakilai.

E levu na Isireli era to vei Apisalomi ni kovea na idabedabe vakatui nei Tamana o Tevita. Ia e to tu ga e yasa i Tevita o Usai. Ni dro o Tevita, rau lako vata kei Usai. E rarawa sara ga o Tevita ni sega wale ga ni liumuritaki koya na luvena, ia eso tale e dau nuitaka. E yalodina tiko ga o Usai. E bolea me mate ni lesi ena dua na itavi me vakaseva na bukivere. E sega ni qarava na itavi qori me vaka e dua na vakailesilesi, e cakava ga me vaka ni dua na itokani dina.​—2 Sam. 15:13-17, 32-37; 16:15–17:16.

E veiuqeti dina noda raica nodra duavata na mataveitacini, ia na duavata qori e sega ni vakavuna ga na itavi eda qarava ena ivavakoso. Ni laurai ena ka eda dau cakava, e vaka ga eda kaya tiko, “Au nomuni itokani.  Sega niu cakava qori niu vakaroti kina, baleta ga ni oni ka talei vei au.”

E sotava tale ga qori e dua na tacida tagane o Federico. Ena nona veivuke o Antonio na nona itokani, e rawa kina ni vosota eso na ituvaki dredre. E kaya o Federico: “Ni se qai toki mai ena neitou ivavakoso o Antonio, keirau mai veitokani sara. Keirau dauveiqaravi ruarua ni ivavakoso, keirau marautaka tale ga me keirau cakacaka vata. Oti ga vakalailai e lesi me dua na qase ni ivavakoso. E sega wale ga ni noqu itokani, e ivakaraitaki vinaka tale ga vei au vakayalo.” Ia a qai butucala o Federico. E qara totolo na veivuke vakayalo, e vakacegui mai na cakacaka vakapainia, sa sega tale ga ni dauveiqaravi ena ivavakoso. Cava e qai cakava o Antonio?

Ni sotava o Federico na ituvaki dredre, e rogoci koya vinaka nona itokani o Antonio qai vakayaloqaqataki koya

E nanuma lesu o Federico: “Au raica ni vakila sara ga o Antonio na noqu rarawa. E saga ena nona vinaka taucoko me vukei au. E kauaitaka na noqu bula vakayalo, e sega tale ga ni biuti au. E uqeti au meu toso tale vakayalo, meu kua tale ga ni soro.” E kaya o Antonio: “Au dau vakayagataka e levu noqu gauna vei Federico. Au vinakata me talaucaka na lomana, na rarawa mada ga e vakila.” E marautaka ni sa kaukaua tale mai vakayalo o Federico, sa vakadonui tale me painia, me dauveiqaravi tale ga. E qai tinia o Antonio: “Duidui na ivavakoso keirau veiqaravi tiko kina, ia keirau sa qai veivolekati ga vakalevu.”

KUA NI NANUMA NI O LIUMURITAKI

Ena vakacava nomu rai ke dua nomu itokani e biuti iko ena gauna sara ga o vinakati koya kina? E tiko eso tale na ka e dau vakamosi yalo. Vakacava o na rawa ni vosoti koya? Ena qaqaco tiko ga nomudrau veitokani me vaka i liu?

Vakasamataka mada na ka e yaco vei Jisu ni sa vakarau cava nona bula e vuravura. E levu na gauna e dau vakayagataka vei ratou nona yapositolo yalodina, ratou mai veivolekati sara. Sa rauta me kacivi ratou me nona itokani. (Joni 15:15) Ia vakacava ena  gauna sa vesu kina? Ratou dui dro na yapositolo. A vakaraitaka vakadodonu o Pita ni na sega ni biuta nona Turaga. Ia ena bogi ga ya, e cakitaki Jisu tale o Pita!​—Maciu 26:31-33, 56, 69-75.

Sa kila rawa tu o Jisu ni na sotava duadua na iotioti ni veivakatovolei. E tiko tale ga na vuna vinaka me rarawa se me cudru kina. Ia ni oti e vica na siga nona vakaturi, e laurai ena ivakarau ni veitalanoa kei ratou nona yapositolo ni sega ni cudru, yalolailai se rarawa. E sega mada ga ni via ceuta tale mai na nodratou malumalumu, wili kina na ka ratou cakava ena bogi a vesu kina.

Kena veibasai, a vakayaloqaqataki Pita kei ratou na vo ni yapositolo. E nuitaki ratou ni vakasalataki ratou ena cakacaka bibi ni veivakavulici. E raici ratou na nona yapositolo me ratou se nona itokani tiko ga. Ratou na sega vakadua ni guilecava na nona loloma. Ratou na saga me ratou kua ni vakararawataka tale na nodratou Turaga. Io, ratou vakayacora sara vakavinaka na itavi a vakaroti ratou kina nona imuri o Jisu.​—Caka. 1:8; Kolo. 1:23.

A nanuma lesu e dua na tacida yalewa o Elvira na nodrau veileqaleqati kei na nona itokani o Giuliana. E kaya: “Dua na ka noqu madua ni tukuna vei au ni mosi sara ga vua na ka au cakava. E dina o koya. Ia e tarai au dina nona kauaitaki au, kei na ka ena yaco keu sega ni veisau. Au vakavinavinakataka vakalevu ni sega ni kauaitaka o koya na cala au cakava vua, e kauaitaka ga na leqa au rawa ni sotava kina. Au vakavinavinakataki Jiova ni vakarautaka e dua na itokani e dau vosa vakadodonu.”

Na cava gona ena cakava na itokani vinaka ni dua e cala? Ena tu vakarau me vosa vakadodonu, vakayalololoma tale ga ena gauna e vinakati kina. O koya na itokani vinaka qori e vakatotomuria na nodratou ivakaraitaki o Necani, Usai kei Jisu. Ena sala cava? O Usai kei Necani erau yalodina tiko ga ena gauna kece. O Jisu tale ga e tu vakarau ni veivosoti. Vakacava o dau cakava tale ga ya?