Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Na Cava Meda Cakava Meda Duavata Tiko ga Kina?

Na Cava Meda Cakava Meda Duavata Tiko ga Kina?

“Era sema vata vei koya na tikiniyago kece ra qai vakarautaki mera cakacaka vata.”—EFESO 4:16.

SERE: 53, 107

1. Na cava e laurai mai na ivakatekivu?

ERAU duavata o Jiova kei Jisu ena itekivu ni bulibuli. E kaya o Jisu na imatai ni bulibuli i Jiova: “Au a tiko e yasa [i Jiova] meu matai ligamaqosa. E taleitaki au vakalevu ena veisiga.” (Vkai. 8:30) Rau cakacaka vata na veitamani, rau bulia na veimataqali kabula eda raica nikua. Se laurai tiko ga nikua na cakacaka vata. Kena ivakaraitaki, eratou cakacaka vata o Noa kei na nona vuvale me ratou taya na waqa. Era cakacaka vata tale ga na Isireli mera vakaduria qai uruca na valeniveitavaki nira veilakoyaki voli ena vanua talasiga. Era duavata tale ga ena valenisoro nira sere ena vakacaucau vei Jiova ni salavata kei na ivakatagi. E rawati kece qo ena nodra cakacaka vata.—Vkte. 6:14-16, 22; Tiko 4:4-32; 1 Vei 25:1-8.

2. (a) Na cava e laurai ena ivavakoso vaKarisito taumada? (b) Na taro cava eda na veivosakitaka?

2 E laurai tale ga nira dau cakacaka vata na lotu vaKarisito taumada ena veiliutaki i Jisu Karisito. E  vakamacalataka na yapositolo o Paula ni levu na “mataqali isolisoli” e tu vei ira na lotu vaKarisito lumuti, era vakaitavi ena “levu na mataqali veiqaravi vakaitalatala,” e “levu tale ga na mataqali cakacaka,” ia era “dua ga na yago.” (Wilika 1 Korinica 12:4-6, 12.) Vakacava nikua, e rawa nida duavata ni vunautaka na itukutuku vinaka? Eda na cakacaka vata vakacava ena ivavakoso kei na vuvale?

CAKACAKA VATA ENA VUNAU

3. Na cava e raivotutaka na yapositolo o Joni?

3 Ena icavacava ni imatai ni senitiuri G.V., e raivotutaka na yapositolo o Joni e vitu na agilosi eratou uvuca nodratou biukila. Ni uvuca na ikalima ni agilosi nona biukila, e raica o Joni ni lutu mai lomalagi “e dua na kalokalo.” E soli vua na kalokalo na ki qai dolava na icurucuru ni qara e sega ni vakabotona. E kuvu cake mai na kubou vavaku qai basika mai kina na vodre. Na vodre vakaivakatakarakara qo era sega ni vakacacana na co, era vakacacani ira ga e “sega ni tiko e yadredra na ivakatakilakila ni Kalou.” (Vkta. 9:1-4) E kila vinaka o Joni nodra dau vakacaca na vodre, ni a veivakaleqai sara vakalevu e Ijipita ena gauna i Mosese. (Lako 10:12-15) Na vodre e raica o Joni e dusi ira na lotu vaKarisito lumuti era kacivaka na itukutuku ni veilewai i Jiova. Era duavata kei ira na vica vata na milioni na itokani era nuitaka na bula e vuravura. Io, na noda duavata ena vunau e vakamalumalumutaka na veiliutaki i Setani ena isoqosoqo lotu lasu kece kei vuravura!

4. Na cava e noda itavi? Eda na rawata vakacava?

4 Nikua, e noda itavi bibi meda vunautaka na “itukutuku vinaka” e vuravura taucoko ni bera na icavacava. (Maciu 24:14; 28:19, 20) Qo e okati kina noda sureti “koya yadua e karamaca” me mai “gunuva wale na wai ni bula.” (Vkta. 22:17) Me vaka nida lewe ni ivavakoso vaKarisito, eda na rawata vakacava qo? Qori ena noda ‘sema vata qai cakacaka vata.’—Efeso 4:16.

5, 6. Eda duavata vakacava nida vunautaka na itukutuku vinaka?

5 Ena vinakati me tuvanaki vakamatau noda vunau me rawa nida wasea na itukutuku vinaka ni Matanitu ni Kalou. E yaga vakalevu na veidusimaki eda rogoca ena soqoni, me vaka na soqoni ni cakacaka vakavunau. Eda kacivaka na itukutuku vinaka ena veiyasa i vuravura qai veisoliyaka e vica vata na milioni na ivola vakaivolatabu. Vakacava o dau muria na veidusimaki meda vakaitavi ena vunau lavotaki? Nida cakava qori, eda sa duavata tiko kei ira na vica na milioni nida vakarogoya na itukutuku e kacivaka tiko na “agilosi ni vuka voli e macawa” ena Vakatakila 14:6.

6 Eda marau nida wilika ena iVolaniyabaki na vua ni noda cakacaka vata! Vakasamataka tale ga noda duavata nida veisoliyaka na ivola ni veisureti ena soqo ni veiwasewase, soqo lavotaki, kei na soqo ni veimatanitu. Ena soqo va qo, eda rogoca kina na ivunau vakaivolatabu e veiuqeti, na drama kei na vakatasuasua. E uqeti keda qori meda solia noda vinaka kece vei Jiova. E vakaduavatataki keda tale ga noda vakananuma na mate i Jisu. Noda vakavinavinakataka na iloloma  soli wale ni Kalou kei na noda talairawarawa ena veidusimaki i Jisu, eda soqoni vata kina ena dua ga na tikinisiga e veiyabaki ena ika14 ni Naisani ni sa dromu na siga. (1 Kor. 11:23-26) Era sureti na tamata kece mera tiko kina. Ena macawa ni bera na iVakananumi, eda na saga meda tara taucoko na yalava ni ivavakoso nida sureti ira eso tale mera duavata kei keda ena soqo bibi qo.

7. Na cava e rawati nida cakacaka vata?

7 Ni dua na vodre e cakacaka duadua, ena sega ni levu na ka e cakava. Ena rairai ka wale tale ga nida cakacaka duadua. Nida cakacaka vata, eda rawa ni tukuni Jiova vei ira na vica vata na milioni, mera dokai koya tale ga! Ia e tiko eso tale na sala ena vakaduavatataki keda.

CAKACAKA VATA ENA IVAVAKOSO

8, 9. (a) Na ivakatautauvata cava e tukuna o Paula me uqeta kina na duavata? (b) Eda rawa ni cakacaka vata vakacava ena ivavakoso?

8 E vakamacalataka o Paula vei ira e Efeso na tuvanaki ni ivavakoso kei na kena vinakati me ‘tubucake ena ka kece.’ (Wilika Efeso 4:15, 16.) Na cava ena vukei keda meda cakava qori? E tukuna o Paula na ivakatautauvata ni yago me vakamacalataka na duavata ni ivavakoso ena veiliutaki i Karisito. E tukuna nira “vakarautaki mera cakacaka vata na isema yadua.” Eso vei keda era se gone, so era qase, so era kaukaua, so tale era malumalumu, ia ena rawa vakacava nida vakaitavi ena duavata ni ivavakoso, me bulabula vinaka tale ga vakayalo?

9 Ena vinakati meda vakamalumalumu da qai dokai ira e lesia o Jisu mera veidusimaki ena ivavakoso, ya o ira na qase. (Iper. 13:7, 17) De dua ena sega ni rawarawa meda cakava qori. Ia ena rawa ke da kerea na veitokoni i Jiova. E rawa ni dusimaki keda na yalona tabu meda tokona mai vu ni lomada na ituvatuva ni ivavakoso. Ke sega gona ni lomada meda muria na veidusimaki, e bibi meda vakasamataka ni noda cakacaka vata ena yalomalumalumu ena vakaduavatataka na ivavakoso. Kena ikuri, ena uqeti keda meda veilomani tiko ga.

10. Era veivuke vakacava na dauveiqaravi ena duavata ni ivavakoso? (Raica na imatai ni iyaloyalo.)

10 Era veivuke vakalevu na dauveiqaravi ni ivavakoso ena noda duavata. E duidui nodra yabaki ni bula, ia e yaga vei keda kece nodra veiqaravi. Kena ivakaraitaki, era vukei ira na qase me veirauti na ivola e vakayagataki ena cakacaka vakaitalatala. Kena ikuri, era dau gumatua ni samaka qai vakavinakataka na Vale ni Soqoni, era kidavaki ira tale ga na vulagi era gole mai ena soqoni. Nida cakacaka vata kei ira na tacida qo, eda sa tokona tiko na kena cicivaki vinaka na ivavakoso.—Vakatauvatana Cakacaka 6:3-6.

11. Na cava e rawa nira cakava na tacida gone mera tokona na duavata ena ivavakoso?

11 Levu na tacida matua sa vica vata na yabaki nodra veiqaravi tiko ena ivavakoso. Ia nodra yabaki ni bula sa rairai yalana na ka era cakava, e vinakati kina na veisau. Rawa nira veivuke kina na tacida tagane gone. Ena rairai vou vei ira na itavi qori, ena vinakati gona mera vakavulici. E marautaki nira via veiqaravi na tacida tagane mera  qase ni ivavakoso! (1 Tim. 3:1, 10) Eso na qase ni ivavakoso gone era sa veiqaravi vakaivakatawa dauveilakoyaki mera sikova e levu na ivavakoso. Eda marautaka dina nodra yalorawarawa ni veitokoni na tacida qo.—Wilika Same 110:3; Dauvunau 12:1.

CAKACAKA VATA ENA VUVALE

12, 13. Na cava e rawa ni vukei ira na vuvale mera cakacaka vata?

12 Eda rawa ni uqeti ira vakacava na lewe ni noda vuvale meda cakacaka vata? Levu era raica ni Sokalou Vakavuvale e veimacawa e vakaduavatataki ira na gone kei na qase. E veivosakitaki ena gauna qori na veika vakayalo, ena vakaduavatataka na vuvale. Ena vakarautaki ira vinaka na lewenivuvale ke ra dau vakatovotovotaka na ka e vauca na cakacaka vakaitalatala. Eda na veivolekati nida rogoca nodra vakamacalataka na lewenivuvale na Vosa ni Kalou kei na nodra lomani Jiova ra qai via cakava na lomana.

Na sokalou vakavuvale e vakaduavatataki ira na gone kei na qase (Raica na parakaravu 12, 15)

13 Na cava mera cakava na veiwatini me marautaka o Jiova nodra duavata? Ni rau lomani Jiova qai qaravi koya ena yalodina, erau na marau qai duavata. O Eparama kei Sera, Aisake kei Repeka, Elikana kei Ana—eratou vakaraitaka kece ni ratou lomani watidratou. Bibi meda cakava tale ga qori. (Vkte. 26:8; 1 Sam. 1:5, 8; 1 Pita 3:5, 6) Qori ena vakavolekati keda vei watida, eda veivolekati tale ga kei na Tamada vakalomalagi.—Wilika Dauvunau 4:12.

14. Ke sega ni qaravi Jiova o watimu, na cava mo cakava me dei tiko ga nomudrau vakawati?

14 Meda qarauna meda kua ni vauci vata kei ira na sega ni vakabauta. (2 Kor. 6:14) Vakacava o ira na lewenivuvale e duidui nodra vakabauta? So na tacida era qai mai kila na dina nira sa vakawati, ia e sega ni vakabauta na watidra. E bibi kina me muri na ivakavuvuli vakaivolatabu me duavata tiko ga na vuvale. Qori e okati kina nodra cakacaka vata, ia me kua ga ni beci na ivakavuvuli vakaivolatabu. De dua ena sega ni rawarawa, ia ena yaga. Ena rairai dredre tale ga me muri na ivakavuvuli vakaivolatabu ni yawaka na ivavakoso e dua vei rau na veiwatini. E yaco qo vei Mary e dua na tacida yalewa, erau qaravi Jiova vakaveiwatini. Rauta na 25 na yabaki sa oti sa sega ni tiko ena soqoni o David na watina. E yalodina ga o Mary me tiko ena soqoni kei na soqo cokovata, e muria tiko ga na ivakavuvuli vakaivolatabu qai vakavulici ratou na ono na luvena. Ni ratou sa uabula na gone qai biubiu e vale, e galili sara ga o Mary. Sa qai dau vakawilika o David na mekesini e dau biuta tu vua o Mary. Yaco na gauna me tiko tale ena soqoni o David. E dau maroroya nona idabedabe na makubuna yabaki ono, ke sega ni yaco yani o David, ena tukuna vua o makubuna, “Tutu, au nanumi iko sara ga ena soqoni nikua.” Ena gauna qo sa marautaka tiko o David nona qaravi Jiova, e marautaka tale ga o Mary ni rau qaravi Jiova vata.

15. E rawa nira vukei ira vakacava na veiwatini gone na itabaqase?

15 Nida raica na ka e cakava o Setani ena vuvale nikua, sa qai bibi ga mera cakacaka vata na veiwatini. Se mani vakacava na dede ni nomu vakawati, vakasamataka na ka o rawa ni tukuna  se cakava me dei tiko ga kina nomu vakawati. Ena ituvaki qo, rawa nira vukei ira na tacida gone ena ivavakoso na itabaqase. Ena so na gauna o rawa ni sureta e dua na veiwatini gone me tomani kemudrau ena sokalou vakavuvale. Ni o cakava qori, rau na raica ni bibi na veilomani kei na veiyaloni se mani vakacava na dede ni nomudrau vakawati.—Taito 2:3-7.

“MEDA LAI CABE CAKE INA ULUNIVANUA I JIOVA”

16, 17. Na cava era vakanamata kina na dauveiqaravi ni Kalou?

16 Raitayaloyalotaki ira mada na Isireli era gole ena valenisoro i Jerusalemi mera vakacaucautaki Jiova. Era vakarautaka na ka kece e vinakati ra qai veitokoni ena ilakolako qo. Era duavata tale ga ni vakacaucautaki Jiova ena valenisoro. E rawa kece qo ena nodra cakacaka vata. (Luke 2:41-44) Nida vakanamata ina vuravura vou, ena vinakati meda duavata da qai cakacaka vata. Ena vinakati meda sasaga tiko ga. Vakacava o rawa ni raica eso tale na sala mo cakava kina qori ena kena levu o rawata?

17 Vakasamataka na veivakalougatataki se bera mai! Eda sa biuta mai na duiyaloyalo kei na veilecayaki e kilai kina na vuravura qo. Eda sa raica qo na vakayacori ni parofisai i Aisea kei Maika, oya noda duavata na dauveiqaravi ni Kalou meda cabe cake “ina ulunivanua i Jiova.” (Aisea 2:2-4; wilika Maika 4:2-4.) Io, ena cecere na ivakarau ni noda sokalou ena “veisiga mai muri.” Sa na wacava noda marau nida bula ena gauna eda na duavata kina na kawatamata kece da qai cakacaka vata!