1. Na cava na ivakasala i Paula vei ira na lotu vaKarisito lumuti?

“NI KUA ni muria na ivakarau ni veika vakavuravura qo.” (Roma 12:2) Qori na nona ivakasala na yapositolo o Paula vei ira na lotu vaKarisito ena imatai ni senitiuri. Era yalataki ira vua na Kalou, era lumuti tale ga ena yalo tabu. Ia na cava e vakasalataki ira kina vakadodonu?—Roma 1:7.

2-3. E saga vakacava o Setani meda talaidredre vei Jiova? Eda na talaraka vakacava na veika “sa vakawakana tu” ena noda vakasama?

² E kauai o Paula nira rawai eso na lotu vaKarisito ena rai cala kei na vuku ni vuravura e uqeta o Setani. (Efeso 4:17-19) Eda rawa tale ga ni rawai kina. E lewa tiko o Setani na vuravura qo, e levu gona na iwalewale e vakayagataka me veivakacalai kina. Kena ivakaraitaki, e rawa ni vakayagataka o Setani na noda dau via rogo meda talaidredre kina vei Jiova. E rawa tale ga ni vakayagataka na ka eda vulica ena noda isususu, e koronivuli, kei ira na noda ilala me rawai keda kina.

³ Vakacava, e rawa nida talaraka na “veika sa vakawakana tu” ena noda vakasama? (2 Kor. 10:4) Qo na ka e vola o Paula: “Keitou talaraka na nanuma cala kei na ka kece e vakacerecerei me sabaya na vuku ni Kalou, keitou  vakamalumalumutaka na nanuma kece me talairawarawa vei Karisito.” (2 Kor. 10:5) Kena ibalebale, eda rawa ni talaraka na rai cala ena veivuke i Jiova. Me vaka ga ni gaga e dua, na wainimate ena rawa ni vakaotia. E va tale ga qori na Vosa ni Kalou, ena vukei keda meda talaraka na rai cala e veivagagai ena vuravura i Setani.

4. Na veisau cava eda cakava nida mai kila na ka dina?

⁴ Na gauna o mai kila kina na ka dina, vakasamataka mada na veisau o cakava mo rawa ni qaravi Jiova. Levu vei keda eda biuta tani na itovo ca. (1 Kor. 6:9-11) Eda marautaka vakalevu na veisau eda cakava ena veivuke i Jiova!

5. Me vaka e cavuti ena Roma 12:2, na cava e rua na ka meda cakava?

⁵ E sega ni yaco ga i keri na veisau. Ni bera nida papitaiso, eda muduka na ivalavala ca bibi eda dau cakava tu. Ia e vinakati meda sasaga tiko ga meda kua ni rawai tale ena noda itovo makawa. Eda na cakava vakacava? E kaya o Paula: “Ni kua ni muria na ivakarau ni veika vakavuravura qo, me veisautaki na nomuni itovo ni vakavoui na nomuni vakasama.” (Roma 12:2) E vinakati gona meda cakava e rua na ka. Dua, meda “kua ni muria” se rawai ena vuravura qo. Rua, me “veisautaki” na noda vakasama.

6. Na cava eda vulica ena ka e tukuna o Jisu ena Maciu 12:43-45?

⁶ Ni tukuna o Paula meda veisau, e sega ni kena ibalebale me veisau ga na keda irairai. Ia me veisau kece na noda itovo. (Raica na kato “ Veisau se Vukici?”) E bibi me veisautaki na noda vakasama, okati kina na lomada, noda rai, kei na ka eda dau vinakata. Meda taroga, ‘Niu dua na  lotu vaKarisito, au sa veisau dina mai vu ni lomaqu se vakarairai ga?’ E bibi meda kila na kena duidui. E tukuna o Jisu na ka meda cakava ena Maciu 12:43-45. (Wilika.) Na cava eda vulica ena tikinivolatabu qori? Ke da cavuraka na rai cala, meda vakatawana sara ena rai i Jiova.

7. Eda na veisautaka vakacava na lomada kei na noda vakasama?

⁷ Vakacava e rawa ni veisau na igu e lewa na noda ivakarau ni vakasama? Io e rawa. E kaya na Vosa ni Kalou: “Moni qai vakavoui tiko ga ena igu e lewa na nomuni vakarau ni vakasama, ni dodonu moni tokara na tamata vou e buli me vaka na loma ni Kalou e vauci kina na yalodina kei na yalododonu.” (Efeso 4:23, 24) E dodonu gona meda veisautaka na lomada, ia e ka ni sasaga. Eda na sega wale ga ni vorata na gagadre ca se muduka na ka ca. E bibi meda veisautaka na ‘igu e lewa na ivakarau ni noda vakasama.’ Na cava e okati kina? Meda na veisautaka na ka eda vinakata, noda itovo, kei na inaki eda cakava kina e dua na ka. E vinakati tiko ga na sasaga.

8-9. Eda kila vakacava ena nona ivakaraitaki e dua na tacida ni bibi meda veisau mai vu ni lomada?

⁸ Meda raica mada na nona ivakaraitaki e dua na tacida tagane e dau voravora tu e liu, e daumateni. Ia e muduka nona itovo ca sa qai papitaiso. Qori e ivakadinadina levu vei ira ena nona itikotiko. Ni oti ga nona papitaiso, e sotava e dua na ituvaki e sega sara ga ni namaka. Ena dua na yakavi, e gole mai ena nona vale e dua na mateni qai vinakata me rau veivacu. E sega ni via cakava qori na tacida. Ia e qai vosavakacacataki Jiova na tagane qori, dua na ka nona cudru na tacida. E sega ni vosota rawa mani gole i tuba qai vaculaki koya. Na cava e cakava kina qori? Na iVolatabu e veisautaki koya me kua ni voravora na nona itovo, ia e sega ni veisautaka sara na tacida na igu e lewa na ivakarau ni nona vakasama. Kena ibalebale, ni se sega ni veisau mai vu ni lomana.

⁹ E sasaga tiko ga na tacida qori me veisau. (Vkai. 24:16) E toso vinaka nira vukei koya na qase, mani dua sara na qase ni ivavakoso. Ni oti na soqoni ena dua na yakavi, e sotava tale na ituvaki vata ga a sotava e liu. E raica e dua na mateni ni sa vakarau vacuka e dua na qase ni ivavakoso ena yasa ni Vale ni Soqoni. Na cava e cakava na tacida? E sega ni cudru, e vosa ga vakayalovinaka vua, mani malumu nona cudru o mateni. Sa qai kauti koya i nodratou. Na cava sa veisau kina na ka e cakava na tacida qo? E veisautaka na igu e lewa na ivakarau ni nona vakasama. E vu sara ga mai lomana me veiyaloni, me yalomalumalumu tale ga. E lagiti ga kina o Jiova!

10. Ena veisau vakacava na tamata e loma?

¹⁰ E sega ni tutu ga sa veisau na tacida qori, dua na ka na sasaga e cakava. De dua ena vinakati tale ga meda ‘sasaga vagumatua’ me vica vata na yabaki. (2 Pita 1:5) Ena sega ni veisautaki keda na dede ni noda tiko ena dina. E vinakati na sasaga me rawa ni veisau na tamata e loma. Eda na cakava vakacava? Meda dikeva mada e tolu na sala.

11. Ena vukei keda vakacava na masu meda veisautaka na igu e lewa na noda vakasama?

¹¹ Na imatai ni sala, e bibi na masu. A masu tale ga na daunisame, e kaya: “Ni bulia na lomaqu me savasava, kemuni na Kalou, qai biuta e lomaqu e dua na yalo vou, na kena e tudei.” (Same 51:10) E bibi meda kila ni vinakati me veisau na igu e lewa na ivakarau ni noda vakasama qai kerei Jiova me vukei keda kina. Eda vakadeitaka vakacava ni na vukei keda o Jiova meda veisau? Ena vakayaloqaqataki keda na ka e yalataka vei ira na Isireli talaidredre ena gauna i Isikeli. E kaya: “Au na vakalomavatataki ira, au na tugana e lomadra e dua na yalo vou . . . au na solia vei ira na yalo malumu, [oya, o koya e muria totolo na veidusimaki ni Kalou].” (Isik. 11:19; vmr.) Na cava eda vulica? Ke tu vakarau o Jiova me vukei ira na Isireli mera veisau, ena tu vakarau tale ga ni vukei keda.

12-13. (a) Me vaka e cavuti ena Same 119:59, na cava meda vakasamataka vakatitobu? (b) Na taro cava meda dikevi keda kina?

¹² Na ikarua ni sala, e bibi na vakasama vakatitobu. Nida wilika e veisiga na Vosa ni Kalou, e bibi me tiko tale ga na gauna meda dau vakasama kina vakatitobu me rawa nida kila na ka meda veisautaka ena noda vakasama kei na noda itovo. (Wilika Same 119:59; Iper. 4:12; Jeme. 1:25) E bibi meda kidava ke sa malele na lomada kei na noda vakasama ina vuku vakavuravura. Meda vakadinata tale ga ni tiko noda malumalumu da qai saga vakaukaua meda cavuraka laivi.

¹³ Kena ivakaraitaki, mo taroga: ‘Se laurai tiko vei au na veiqati kei na vuvu?’ (1 Pita 2:1) ‘Au dau dokadoka ena vuku ni noqu isususu, rawaka vakavuli se vakailavo?’ (Vkai. 16:5) ‘Au dau beci ira na sega ni rawaka se o ira na kaitani?’ (Jeme. 2:2-4) ‘Au dau taleitaka na ka e tu ena vuravura i Setani?’ (1 Joni 2:15-17) ‘Au dau taleitaka na ka ni veivakamarautaki vakasisila qai voravora?’ (Same 97:10; 101:3; Emosi 5:15) Ni o sauma na taro qori, de dua o na kila na ka mo vakavinakataka. Nida talaraka na veika “sa vakawakana tu” e lomada, ena marau na Tamada vakalomalagi.—Same 19:14.

14. Na cava e bibi kina meda digia na itokani vinaka?

¹⁴ Na ikatolu ni sala oya meda digia na itokani vinaka. Meda nanuma tiko ni dau rawarawa sara meda muria nodra itovo na noda ilala. (Vkai. 13:20) Nida lai vuli se cakacaka, de dua eda na maliwai ira e sega ni vakalou na nodra rai. Ia eda na kunei ira na noda itokani vinaka ena gauna ni soqoni vaKarisito. Qori na vanua eda na uqeti kina “ena loloma kei na caka vinaka.”—Iper. 10:24, 25.

15-16. E saga vakacava o Setani me veisautaka na noda vakasama?

¹⁵ Dua na ka meda nanuma tiko oya ni o Setani e saga me veisautaka na noda vakasama. E vakayagataka na veimataqali ivakavuvuli me vakaleqa na ka dina eda sa kila ena Vosa ni Kalou.

¹⁶ E se vakayagataka tiko ga nikua o Setani na taro vata ga a vakacalai Ivi kina ena were o Iteni: “E kaya sara ga na Kalou . . . ?” (Vkte. 3:1) Eda dau rogoca tale ga eso na taro va qori nikua e  vakavuna meda vakatitiqa. Kena ivakaraitaki: ‘E vakatabuya sara ga na Kalou na veiwatini vakatagane se vakayalewa? E cata sara ga na Kalou mo marautaka na Kirisimasi kei na siganisucu? E vinakata sara ga na nomu Kalou mo kua ni tauri dra? E vinakata sara ga na Kalou dauloloma mo kua ni vakailala kei ira na wekamu era vakasivoi?’

17. Na cava meda cakava ke da lomatarotarotaka na noda vakabauta? Me vaka e cavuti ena Kolosa 2:6, 7, ena yaga vakacava vei keda qori?

¹⁷ E bibi meda vakadeitaka ni dina na ka eda vakabauta. Ke da lomatarotarotaka tiko ga eso na ka eda vakabauta, eda na rawa ni vakatitiqa. Qori ena veisautaka noda vakasama, lai voca sara noda vakabauta. Na cava gona meda cakava? E kaya na Vosa ni Kalou meda veisautaka na noda vakasama meda vakadeitaka ni “vinaka, e yaga, qai uasivi na loma ni Kalou.” (Roma 12:2) Ni wasoma na noda vuli, eda na vakadeitaka ni dina na ka eda vulica ena iVolatabu. Eda na vakadeitaka tale ga ni donu na ivakatagedegede i Jiova. Me vaka na vunikau e dei na wakana, eda na ‘tudei tale ga ena vakabauta.’—Wilika Kolosa 2:6, 7.

18. Eda na qarauna vakacava na veivagagai ni vuravura i Setani?

¹⁸ O cei ena vakataudeitaka na nomu vakabauta? O iko sara ga. Koya gona, mo vakavouya tiko ga na igu e lewa na ivakarau ni nomu vakasama. Masuti Jiova wasoma, kerea na nona yalo tabu. Dau vakasama vakatitobu, dikeva tiko ga na nomu vakasama kei na inaki ni ka o cakava. Digia na itokani vinaka, veimaliwai kei ira era na vukei iko mo veisautaka na nomu rai. Ni o cakava qori, o na sega ni vagagai ena vuravura i Setani, o na talaraka tale ga “na nanuma cala kei na ka kece e vakacerecerei me sabaya na vuku ni Kalou.”—2 Kor. 10:5.