Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 23

“Qarauna de Dua e Tagavi Kemuni Bulabula”!

“Qarauna de Dua e Tagavi Kemuni Bulabula”!

“Ni qarauna de dua e tagavi kemuni bulabula ena vuku vakavuravura kei na vosa ni veicavilaki e yavutaki ena ivakavuvuli vakatamata.”—KOLO. 2:8.

SERE 96 Vosa ni Kalou​—iYau Talei

KA ENA VULICI *

1. Me vaka e cavuti ena Kolosa 2:4, 8, e saga vakacava o Setani me rawai keda?

E VINAKATA o Setani meda talaidredre vei Jiova. Me rawata na nona inaki, e taketetaka na noda vakasama, oya me vesumonataki keda meda talairawarawa vua. E saga me veivakacalai se temaki keda ni vakayagataka na noda gagadre se ka eda vinakata.—Wilika Kolosa 2:4, 8.

2-3. (a) Na cava meda muria kina na ivakasala ena Kolosa 2:8? (b) Cava eda na veivosakitaka ena ulutaga qo?

2 Vakacava e rawarawa ni vakacalai keda o Setani? Io! Nanuma ni sega ni vola o Paula na ivakasala ena Kolosa 2:8 vei ira na tawavakabauta. E vola vei ira na lotu vaKarisito era lumuti ena yalo tabu. (Kolo. 1:2, 5) E leqataki na nodra bula na lotu vaKarisito qori ena gauna ya, sa qai leqataki sara o keda nikua. (1 Kor. 10:12) Na vuna? Sa kolotaki sobu mai vuravura o Setani, e saga me vakacalai ira na qaravi Jiova ena yalodina. (Vkta. 12:9, 12, 17) Kena ikuri, eda bula tiko qo ena gauna “era na qai torosobu ga” kina na daucaka ca kei ira na dauveidabui.—2 Tim. 3:1, 13.

3 Na cava eda na veivosakitaka ena ulutaga qo? Nona vakayagataka o Setani na “vosa ni veicavilaki” me vakacala na noda vakasama se ivakarau ni rai. Eda na dikeva e tolu na nona “ivadi qaseqase.” (Efeso 6:11) Eda na qai veivosakitaka ena ulutaga tarava na sala meda valuta kina na rai cala e uqeta o Setani. Meda veivosakitaka mada na ka eda vulica ena iwalewale e vakacalai ira kina na Isireli  o Setani nira butuka na Vanua Yalataki.

TEMAKI MERA QARAVI MATAKAU

4-6. Me vaka e cavuti ena Vakarua 11:10-15, e veisau vakacava na iwalewale ni nodra teitei na Isireli nira butuka na Vanua Yalataki?

4 E qaseqasetaka o Setani nona temaki ira na Isireli mera qaravi matakau. E cakava vakacava? E kila ni bibi mera kana mani vakayagataka qori me temaki ira. Nira butuka na Isireli na Vanua Yalataki, e vinakati mera veisautaka na iwalewale ni nodra teitei. Nira tu mai Ijipita, era dau vakasuasuataka na nodra iteitei ena wai mai na Naile. Ia e duatani ena Vanua Yalataki, era na sega ni taki wai ena uciwai, era na waraka na uca kei na tegu. (Wilika Vakarua 11:10-15; Aisea 18:4, 5) E vinakati gona mera vulica na Isireli na ivakarau vou ni teitei. Ena sega ni rawarawa qori nira sa mate e levu na dauteitei ena vanua talasiga.

E veisautaka vakacava o Setani na nodra rai na dauteitei ni Isireli? (Raica na parakaravu 4-6) *

5 Sa vakamacalataka oti o Jiova vei ira na nona tamata ni sa veisau na kedra ituvaki. Sa qai vakamacalataka tale na ivakaro qo, e kena irairai ni sega ni veisemati kei na teitei: “Qarauna me kua ni bacani na lomamuni moni gole tani kina, moni lai qarava na kalou tale eso qai cuva vei ira.” (Vkru. 11:16, 17) Na cava e veivakaroti kina o Jiova mera kua ni qarava eso tale na kalou ni vakamacalataka na kena vulici na iwalewale vou ni teitei?

6 E kila vinaka o Jiova nira na temaki na Isireli mera vulica eso na iwalewale ni teitei vei ira na lotu butobuto era tiko voleka. Era kenadau ena teitei ni vakatauvatani kei ira na Isireli, e rawa gona nira vulica na Isireli eso na iwalewale yaga. Ia e tiko na kena leqa. Na cava ya? Era qaravi Peali na dauteitei ni  Kenani. Era vakabauta ni o Peali e lewa na maliwalala, dau vakarautaka tale ga na uca. E sega ni vinakata o Jiova mera rawai na nona tamata ena vakabauta lasu qori. Ia levu na gauna era digia na Isireli mera qaravi Peali. (Tiko 25:3, 5; Dvei. 2:13; 1 Tui 18:18) Vakacava o raica rawa na sala e rawai ira kina na Isireli o Setani?

TOLU NA IVADI E TAGAVI IRA KINA NA ISIRELI O SETANI

7. E vakatovolei vakacava na nodra vakabauta na Isireli?

7 Na imatai ni ivadi e vakayagataka o Setani nona uqeta na ka era vinakata na Isireli, oya mera raica ni tau na uca. E sega ni tau vakalevu na uca ena Vanua Yalataki ena icavacava ni Epereli ina Seviteba e veiyabaki. Na nodra bula na Isireli kei na vuavuaivinaka ni nodra itei e vakatau ena uca e dau tau ni voleka na Okotova. E rawai ira na Isireli o Setani mera nanuma ni na vinaka na nodra bula ke ra muria na nodra ivakarau na tiko voleka. Era vakabauta na lotu butobuto ni na vakatauca na nodra kalou na uca ke ra muria eso na ivakarau ni sokalou. O ira na Isireli era sega ni nuitaki Jiova era nanuma ni qori ga na sala ena oti kina na lauqa balavu. Era mani muria eso na ivalavala ni sokalou me rokovi kina na kalou lasu o Peali.

8. Na cava na ikarua ni ivadi e vakayagataka o Setani? Vakamacalataka.

8 Na cava na ikarua ni ivadi e vakayagataka o Setani? E uqeta na nodra gagadre ca. Era qarava na veimatanitu na nodra kalou nira vakaitavi ena ivalavala vakasisila, okati kina na tagane kei na yalewa saqamua ni valenisoro. Era vakadonuya tale ga na veimoceri vakayalewa se vakatagane kei na so tale na ivakarau ni veiyacovi tawadodonu, era nanuma ni sega na kena ca! (Vkru. 23:17, 18; 1 Tui 14:24) Era vakabauta na lotu butobuto ni ivakarau ni sokalou qori ena uqeti ira na nodra kalou mera vakabulabulataka na qele. Levu na Isireli era taleitaka na ivakarau ni nodra sokalou vakasisila na lotu butobuto, ra mani rawai mera qarava na kalou lasu. Ia na kena dina, e tagavi ira bulabula o Setani.

9. Me salavata kei na Osea 2:16, 17, e vakabuawataka vakacava o Setani na nodra rai na Isireli me baleti Jiova?

9 E vakayagataka o Setani na ikatolu ni ivadi. E vakabuawataka na nodra rai na Isireli me baleti Jiova. Ena gauna e bula kina na parofita o Jeremaia, e kaya o Jiova nira vakavuna na parofita lasu mera guilecava na nona tamata na yacana “ena vuku i Peali.” (Jere. 23:27) Kena irairai nira sa sega ni vakayagataka na yaca i Jiova, era sosomitaka ena yaca i Peali, e kena ibalebale “iTaukei” se “Turaga.” Qo e vakadredretaka mera kila na Isireli na kedrau duidui o Jiova kei Peali. E rawarawa gona mera bosoka vata na sokalou vei Peali kei na sokalou vei Jiova.—Wilika Osea 2:16, 17 kei na ivakamacala e ra.

IVADI I SETANI NIKUA

10. Na ivadi cava e vakayagataka nikua o Setani?

10 E vakayagataka tale ga o Setani na ivadi qori nikua. E veivakacalai vakalevu ni uqeta na ka eda vinakata, uqeta na veiyacovi tawadodonu, e vakabuawataka tale ga na nodra rai e levu me baleti Jiova. Meda veivosakitaka mada e liu na ikatolu ni ivadi.

11. E vakabuawataka vakacava o Setani na nodra rai e levu me baleti Jiova?

 11 E vakabuawataka o Setani na nodra rai e levu me baleti Jiova. Ni ratou sa mate na yapositolo i Jisu, era vakatetea na ivakavuvuli lasu eso era tukuna nira lotu vaKarisito. (Caka. 20:29, 30; 2 Ces. 2:3) O ira na vukitani qori era vakabuawataka na ka e kilai kina na Kalou dina duadua ga. Kena ivakaraitaki, era sa sega ni vakayagataka na yaca ni Kalou ena nodra iVolatabu, era sosomitaka ena “Turaga.” Nira bokoca na yaca ni Kalou ra qai sosomitaka ena “Turaga,” era vakadredretaka mera kila na dau wili iVolatabu ni duatani o Jiova vei ira na vo ni “turaga” e cavuti ena iVolatabu. (1 Kor. 8:5) Era vakayagataka na vosa vata ga qori vei Jiova kei Jisu, e dredre kina me kilai ni duidui o Jiova vei Luvena, e duidui tale ga na nodrau itutu. (Joni 17:3) Qori e basika kina na ivakavuvuli ni Letoluvakalou, e sega ni laurai ena iVolatabu. Oya na vuna era nanuma kina e levu ni dredre mera kila na Kalou. E veivakacalai dina!—Caka. 17:27.

E vakayagataka vakacava o Setani na lotu lasu me uqeta na ivalavala vakasisila? (Raica na parakaravu 12) *

12. Na cava e uqeta o lotu lasu? Me vaka e vakamacalataki ena Roma 1:28-31, cava na kena itinitini?

12 E uqeta o Setani na gagadre ca. Ena nodra gauna na Isireli makawa, e vakayagataka o Setani na lotu lasu me uqeta na ivalavala vakasisila. Qori tale ga na ka e cakava tiko nikua. E vakadonuya o lotu lasu na itovo vakasisila, e uqeta tale ga. Levu gona era kaya nira qarava na Kalou era sega ni muria na nona ivakatagedegede matata me baleta na itovo savasava. E vakamacalataka na yapositolo o Paula ena nona ivola vei ira e Roma na kena itinitini. (Wilika Roma 1:28-31.) E okati ena “ka e sega ni vinaka” na ivakarau ni veiyacovi tawadodonu kece, wili kina na veimoceri vakatagane se vakayalewa. (Roma 1:24-27, 32; Vkta. 2:20) E bibi dina meda dei tiko ga ena ivakatagedegede matata ena iVolatabu!

13. Na cava e dua tale na ivadi e uqeta o Setani?

13 E uqeta o Setani na ka eda vinakata. Eda vinakata kece meda vulica na cakacaka meda qaravi keda kina kei ira na  noda vuvale. (1 Tim. 5:8) Levu na gauna eda vulica qori e koronivuli, eda vuli tale ga vakaukaua. Ia e vinakati meda qaqarauni. Na tabana ni vuli ena levu na matanitu e sega wale ga ni vakavulici ira na gone ena vuli tara, e vakavulica tale ga na vuku vakatamata. Era uqeti na gonevuli mera vakatitiqataka ni bula dina tiko na Kalou, mera beca tale ga na iVolatabu. Era vulica na gone nira vakabauta kece na tamata vuku ni tekivu na bula ena bula vakaidewadewa. (Roma 1:21-23) Na ivakavuvuli qori e veisaqasaqa kei na ‘vuku ni Kalou.’—1 Kor. 1:19-21; 3:18-20.

14. Na cava e uqeta na vuku vakatamata?

14 Na vuku vakatamata e beca se veisaqasaqa kei na ivakatagedegede dodonu i Jiova. E sega ni uqeta na vua ni yalo tabu, e uqeta ga na “vua ni itovo vakayago.” (Kala. 5:19-23) Oya na dokadoka kei na qaciqacia. Sa rauta mera “lomani ira ga” e levu. (2 Tim. 3:2-4) Na itovo qori e veibasai ni yalomalumalumu kei na yalomalua, na itovo e vinakata vei keda na Kalou. (2 Sam. 22:28) Eso na lotu vaKarisito era sasagataka na vuli ena univesiti era rawai ena rai vakatamata, sega ni rai ni Kalou. Meda raica mada e dua na kena ivakaraitaki.

E vakacala vakacava na noda rai na vuku vakatamata? (Raica na parakaravu 14-16) *

15-16. Na cava o vulica vua e dua na tacida yalewa?

15 E kaya e dua na tacida yalewa e veiqaravi vakatabakidua me 15 vakacaca na yabaki: “Niu iVakadinadina i Jiova, au dau rogoca au wilika tale ga na rerevaki ni  vuli torocake, ia au sega ni kauaitaka. Au nanuma ni sega ni ganiti au na ivakasala qori.” Na cava e qai sotava? E kaya: “Au vakayagataka e levu na gauna kei na igu ena vuli kei na vuli lesoni, sa sega mada ga na gauna meu masu vei Jiova me vaka e liu, au sa oca mada ga meu veivosakitaka na iVolatabu, meu vakavakarau tale ga ena soqoni. Vinaka niu kidava ni sa vakaleqa na noqu veiwekani kei Jiova na noqu vuli torocake, au mani vakatulewataka meu sa cegu na vuli.”

16 E veisautaka vakacava nona rai na vuli torocake? E kaya: “Au madua meu tukuna ni vuli au sasagataka e uqeti au meu vakalewai ira eso tale, vakabibi o ira na mataveitacini, meu namaka vakasivia vei ira na ka, meu yawaki ira tale ga. E taura na gauna meu veisautaka noqu rai. Au vulica kina ni rerevaki meu vakawalena na ivakasala e vakarautaka na Tamada vakalomalagi ena nona isoqosoqo. O Jiova e kilai au vinaka sara. Keu a vakarorogo ga vua!”

17. (a) Na cava me nomu inakinaki? (b) Cava ena veivosakitaki ena ulutaga e tarava?

17 Na cava me nomu inakinaki? Me kua ni rawai iko na “vuku vakavuravura kei na vosa ni veicavilaki” ena vuravura i Setani. Mo qarauna tiko ga na nona ivadi. (1 Kor. 3:18; 2 Kor. 2:11) Me kua sara ni vakabuawataka o Setani na nomu rai me baleti Jiova. Mo muria na ivakatagedegede cecere i Jiova. Me kua mada ga ni vakacalai iko o Setani mo vakawalena na ivakasala ni Kalou. Ia vakacava ke o siqema ni sa rawai iko tiko na rai ni vuravura? Ena veivosakitaki ena ulutaga e tarava na sala ena talaraka kina na Vosa ni Kalou na “veika sa vakawakana tu” ena noda vakasama kei na itovo.—2 Kor. 10:4, 5.

SERE 49 Vakamarautaka na Loma i Jiova

^ para. 5 E kenadau o Setani ena veivakacalai. E lawakitaki ira e levu mera nanuma nira galala, ia na kena dina ni lewai ira tu. Eda na veivosakitaka ena ulutaga qo e vica na iwalewale se ivadi e vakayagataka o Setani me veivakacalai kina.

^ para. 48 IVAKAMACALA NI IYALOYALO: Era veimaliwai na Isireli kei ira na kai Kenani, era temaki mera sokaloutaki Peali, mera veiyacovi vakasisila tale ga.

^ para. 51 IVAKAMACALA NI IYALOYALO: E vakadonuya e dua na lotu na veimoceri vakatagane se vakayalewa.

^ para. 53 IVAKAMACALA NI IYALOYALO: E vuli torocake e dua na tacida yalewa itabagone. E rawai kei ira na lewe ni nona kalasi ena ka e vakavulica na nodra qasenivuli ni iwali duadua ga ni leqa ni kawatamata na veika vakasaenisi kei na iyaya vovou. Ni tiko ena Vale ni Soqoni, e sega ni taleitaka na ka e rogoca, e vakalelewa tale ga.