Raica sara na lewena

Raica na lewenivola

 ULUTAGA NI VULI 25

Mo Nuitaki Jiova ni o Lomabibi

Mo Nuitaki Jiova ni o Lomabibi

“[Au] rui lomabibi.”—1 SAM. 1:15.

SERE 30 Tamaqu, Noqu Kalou, Noqu iTokani

KA ENA VULICI *

1. Na cava meda rogoca kina na ivakasala nei Jisu?

E PAROFISAITAKA o Jisu me baleta na iotioti ni veisiga: “Dou qarauni kemudou de bibi na lomamudou ena . . . lomaocaocataki ni bula [oya, “na lomaocaocataki ni cakacaka; lomaleqataki ni bula ena veisiga.”].” (Luke 21:34) E bibi meda rogoca na ivakasala qori. Na vuna? Nida sotava tale ga na veika dredre me vakataki ira na vo ni lewenivanua.

2. Na veika dredre cava era sotava na tacida?

2 Eso na gauna eda na leqataka tiko e vica vata na ka ena dua ga na gauna. Dikeva mada e vica na ivakaraitaki. E dua na tacida o Jale, * e tauvi koya na mateniua. Dua na ka nona rarawa ni biuti koya o watina, sa 19 na yabaki nodrau bula vakawati. Oti rau vakanadakui Jiova tale ga na luvena yalewa. Ia e duatani na ka erau sotava na veiwatini o Peni kei Lina. Rau vakacegui mai na nodrau cakacaka, vesu tale ga na nodrau vale. Sa qai ikuri ga ni leqa ni laurai vei Lina na mateniuto ena rawa ni mate kina, sa tekivu vakaleqa tale ga na sotia ni yagona e dua tale na mate.

3. Me vaka e tukuni ena Filipai 4:6, 7, na cava meda nuidei kina?

3 Eda nuidei ni kila vinaka na noda lomabibi o Jiova na Dauveibuli, e Tamada dauloloma tale ga. E vinakata me vukei keda meda vosota. (Wilika Filipai 4:6, 7.) E tu ena iVolatabu e levu na ivakaraitaki ni nodra vosota na veika  dredre na nona dauveiqaravi kei na sala e vukei ira kina. Meda dikeva mada e vica na ivakaraitaki.

ILAIJA—“E TAMATA GA VAKATAKI KEDA”

4. Na ituvaki dredre cava e sotava o Ilaija? Cava nona rai me baleti Jiova?

4 E qaravi Jiova o Ilaija ena gauna e levu kina na leqa kei na ituvaki dredre. E bula donuya na veiliutaki nei Tui Eapi e dua na tui tawayalodina e Isireli, na wati Jesepeli na marama ca e dau qaravi Peali. Erau uqeta mera qaravi Peali na lewenivanua qai vakamatea e levu na parofita i Jiova. E mani dro o Ilaija, e vosota rawa na dausiga levu ni nuitaki Jiova. (1 Tui 17:2-4, 14-16) E nuitaki Jiova tale ga o Ilaija nira saqati koya na parofita nei Peali kei ira na qaravi koya. E uqeti ira na Isireli mera qaravi Jiova. (1 Tui 18:21-24, 36-38) E vakadinadinataka vakavica o Ilaija ni tokoni koya o Jiova ena gauna dredre qori.

E tala o Jiova e dua na agilosi me vakaukauataki Ilaija (Raica na parakaravu 5-6) *

5-6. Me vaka e tukuni ena 1 Tui 19:1-4, na cava e vakila o Ilaija? E vakaraitaka vakacava o Jiova ni lomani Ilaija?

5 Wilika 1 Tui 19:1-4. E rere o Ilaija ena gauna e via vakamatei koya kina o Ranadi Jesepeli. E mani dro ina yasayasa o Pieri-sepa. Ena levu ni nona yalolailai “e mani kerea me mate.” Na cava e va kina qori nona rai? E sega ni uasivi o Ilaija ni “tamata ga vakataki keda.” (Jeme. 5:17) De dua e lomabibi vakalevu, e oca tale ga. A rairai nanuma ni sa tawayaga nona sasaga me uqeta na sokalou  savasava, sa sega ni laurai na veisau e Isireli, sega tale ga ni dua e qaravi Jiova tiko o koya duadua ga. (1 Tui 18:3, 4, 13; 19:10, 14) Eda na rairai sega ni vakabauta me va qori nona rai na parofita yalodina qo. Ia e kauaitaka o Jiova na ivakarau ni lomana.

6 O Jiova e sega ni cudruvi Ilaija ena vuku ni ka e tukuna, e vukei koya ga me kaukaua tale. (1 Tui 19:5-7) Toso na gauna, e veisautaka vakamalua na ivakarau ni rai nei Ilaija ni vakaraitaka vua na nona kaukaua levu. Sa qai tukuna vua o Jiova ni se vo tiko e Isireli e 7,000 era sega ni via qaravi Peali. (1 Tui 19:11-18) Qori gona eso na sala e vakaraitaka kina o Jiova ni lomani Ilaija.

SALA E VUKEI KEDA KINA O JIOVA

7. Na cava eda vakadeitaka ena nona vukei Ilaija o Jiova?

7 Vakacava o lomabibitaka tiko e dua na ituvaki? E veivakacegui dina ni kila vinaka o Jiova na ivakarau ni loma i Ilaija! Eda vakadeitaka gona ni kila vinaka tale ga na veika eda lomabibitaka, ni vakaiyalayala na ka eda rawata, e kila mada ga noda ivakarau ni rai kei na lomada. (Same 103:14; 139:3, 4) Ke da nuitaki Jiova me vakataki Ilaija, ena vukei keda meda vosota na veika eda lomabibitaka.—Same 55:22.

8. Ena vukei iko vakacava o Jiova mo vosota na lomabibi?

8 E rawa ni cala nomu rai ni o lomabibi, o na yalolailai tale ga. Ke yaco qori, nanuma tiko ni na vukei iko o Jiova mo vosota. Ena sala cava? E vinakata mo talaucaka vua na ka o leqataka. Ena rogoca na nomu tagi ni kere veivuke. (Same 5:3; 1 Pita 5:7) Mo dau masulaka gona vei Jiova na nomu leqa. Ena sega ni vosa mai vei iko me vaka e cakava vei Ilaija, ena vakayagataka ga na nona Vosa na iVolatabu kei na nona isoqosoqo. Na italanoa o wilika ena iVolatabu ena vakacegui iko, ena uqeti iko mo kua ni soro. Era na vakayaloqaqataki iko tale ga na mataveitacini.—Roma 15:4; Iper. 10:24, 25.

9. Ena vukei keda vakacava na noda itokani nuitaki?

9 E tukuna vei Ilaija o Jiova me lesia na itavi vei Ilaisa. E vakarautaka gona o Jiova e dua nona itokani nuitaki, e macala ni a vakacegui koya ena gauna e yalolailai kina. Nida talaucaka tale ga na lomada vua noda itokani nuitaki, ena vakacegui keda nida yalolailai. (2 Tui 2:2; Vkai. 17:17) Ke o nanuma ni sega ni tiko e dua mo talaucaka vua na lomamu, masulaka vei Jiova mo kila e dua na lotu vaKarisito matua ena vakayaloqaqataki iko.

10. E vakayaloqaqataki keda vakacava na ivakaraitaki nei Ilaija? Ena uqeti keda vakacava na ka e yalataki ena Aisea 40:28, 29?

10 O Jiova e vukei Ilaija me vosota nona lomabibi, me qaravi koya ena yalodina me vica vata na yabaki. E veivakayaloqaqataki dina na ivakaraitaki nei Ilaija. Ena so na gauna e dau vakamalumalumutaki keda na levu ni noda lomabibi, eda yalolailai tale ga. Ia ke da nuitaki Jiova, ena vakaukauataki keda meda qaravi koya tiko ga.—Wilika Aisea 40:28, 29.

NUITAKI JIOVA O ANA, TEVITA, KEI “ESAFA”

11-13. Na cava e yaco ni ratou lomabibi e tolu na dauveiqaravi ni Kalou?

11 Era lomabibi tale ga vakalevu eso era volai ena iVolatabu. Kena ivakaraitaki o Ana, e maduataka nona sega ni vakaluveni kei na veivakalialiai nei Penina, na  ikarua ni wati Elikana. (1 Sam. 1:2, 6) E rarawa ena levu ni nona lomabibi, e sorova na tagi qai sega ni via kana.—1 Sam. 1:7, 10.

12 Ena so na gauna, e lomabibi vakalevu o Tui Tevita. Vakasamataka na veika dredre e sotava. E vakayalolailaitaki koya na levu ni nona cala. (Same 40:12) E saqati koya o Apisalome na luvena lomani, lai tini mate kina. (2 Sam. 15:13, 14; 18:33) E liumuritaki Tevita tale ga e dua nona itokani voleka. (2 Sam. 16:23–17:2; Same 55:12-14) E laurai ena levu na same e vola o Tevita na nona yalolailai kei na dei ni nona nuitaki Jiova.—Same 38:5-10; 94:17-19.

Na cava e cakava na daunisame me qaravi Jiova tale ena marau? (Raica na parakaravu 13-15) *

13 E muri, e dua tale na daunisame e vuvutaka na nodra ivakarau ni bula na tamata ca. De dua e kawa i Esafa na Livai, e veiqaravi tale ga ena “itikotiko tabu lagilagi ni Kalou.” E yalolailai na daunisame qo, e rarawa qai sega ni lomavakacegu. E vakatitiqataka mada ga na veivakalougatataki ni qaravi Kalou.—Same 73:2-5, 7, 12-14, 16, 17, 21.

14-15. Na cava eda vulica ena tolu na ivakaraitaki qo me baleta noda nuitaki Jiova?

14 Eratou nuitaki Jiova kece na nona dauveiqaravi qori. Eratou talaucaka vua na nodratou leqa. Eratou sega ni vunitaka vei Jiova na vuna eratou lomabibi kina. E sega tale ga ni cegu nodratou lako ina vanua e sokaloutaki kina o Jiova.—1 Sam. 1:9, 10; Same 55:22; 73:17; 122:1.

15 E kauaitaki ratou yadudua o Jiova qai vukei ratou ena yalololoma. Kena ivakaraitaki, e lomavakacegu o Ana. (1 Sam. 1:18) E vola o Tevita: “E levu na [ka] dredre e vakila na yalododonu,  ia o Jiova e vakabulai koya mai na ka kece qori.” (Same 34:19) E vakila tale ga na daunisame ni a ‘taura tiko na ligana imatau’ o Jiova qai vakasalataki koya ena yalololoma. E lagata: “Vei au, e vinaka noqu toro voleka vua na Kalou. Au sa vakaruru ga vei Jiova na Turaga Cecere Duadua.” (Same 73:23, 24, 28) Na cava eda vulica ena nodratou ivakaraitaki? Eda na lomabibi ena so na gauna ni dredre na ituvaki. Ia eda na vosota ke da vakasamataka vakatitobu na nona dau vukei ira nona dauveiqaravi o Jiova, meda masu qai nuitaki koya tiko ga, meda talairawarawa tale ga ena ka e vinakata.—Same 143:1, 4-8.

NUITAKI JIOVA MO VOSOTA

A via tawasei koya e dua na tacida yalewa, ia e veisau na kena ituvaki ni saga me vukea eso tale (Raica na parakaravu 16-17)

16-17. (a) Na cava meda kua kina ni tawasei keda? (b) Eda na vakaukauataki vakacava?

16 E dua tale na ka bibi eda vulica ena tolu na ivakaraitaki qori, oya meda kua ni tawasei keda mai vei Jiova kei ira nona tamata. (Vkai. 18:1) E dua na tacida yalewa o Nancy, e lomabibi sara ga ni biuti koya o watina. E kaya: “Levu na gauna au sega ni via vosa vua e dua se meu raica e dua. Ia na levu ga ni noqu tawasei au, na levu tale ga ni noqu rarawa.” E veisau qori ena gauna e  saga kina o Nancy me vukea eso tale. E kaya: “Au dau vakarorogo vinaka nira talaucaka nodra leqa. Au vakadinadinataka kina e dua na ka, niu dau kauaitaki ira eso tale au sega ni vakasamataka vakalevu na noqu leqa.”

17 Eda na vakaukauataki nida lako ina soqoni. Nida tiko kina, eda vakaraitaka vei Jiova nida vinakata nona ‘veivuke kei na veivakacegui.’ (Same 86:17) Ena vakaukauataki keda o Jiova ni vakayagataka nona yalo tabu, nona Vosa kei ira nona tamata. Na soqoni e gauna vinaka meda “veivakayaloqaqataki” kina. (Roma 1:11, 12) E kaya e dua na tacida yalewa o Sophia: “Au vosota rawa ena veivuke i Jiova kei ira na mataveitacini. E bibi meu dau tiko ena soqoni kece. Au raica ni rawarawa meu vosota na lomabibi se veika au leqataka niu vakaogai au ena ivavakoso kei na cakacaka vakaitalatala.”

18. Na cava e rawa ni cakava o Jiova nida yalolailai?

18 Nida yalolailai, meda nanuma tiko ni yalataka o Jiova ni na vakaotia vakadua na lomabibi ena vuravura parataisi, ena vakacegui keda tale ga ena gauna qo. Ena sega ni vakaukauataki keda ga nida “vinakata” nona veivakacegui, ena vukei keda tale ga ena ka meda “cakava” meda vosota kina na lomabibi kei na yalolailai.—Fpai. 2:13.

19. Na veivakadeitaki cava e tukuni ena Roma 8:37-39?

19 Wilika Roma 8:37-39. E vakadeitaka na yapositolo o Paula ni sega ni dua na ka ena tawasei keda mai na loloma ni Kalou. Eda na vukei ira vakacava na tacida mera vosota na lomabibi? Eda na dikeva ena ulutaga tarava na sala meda vakatotomuri Jiova kina nida vakaraitaka na veinanumi kei na veitokoni nira lomabibi na tacida.

SERE 44 Nodra Masu na Yalomalua

^ para. 5 Nida lomabibi vakalevu se lomabibi vakadede, ena rawa ni vakamalumalumutaki keda, vakayalolailaitaki keda tale ga. Ena vukei keda vakacava o Jiova? Eda na veivosakitaka na sala e vukei Ilaija kina me vosota nona lomabibi. Eda na vulica tale ga ena so na ivakaraitaki vakaivolatabu na ka meda cakava me tokoni keda kina o Jiova.

^ para. 2 Sa veisau eso na yaca ena ulutaga qo.

^ para. 53 IVAKAMACALA NI IYALOYALO: E vakayadrati Ilaija vakamalua na agilosi i Jiova qai solia vua na madrai kei na wai.

^ para. 55 IVAKAMACALA NI IYALOYALO: E marau na daunisame e rairai kawa i Esafa ni vola same tiko qai lagasere kei na rua tale na Livai.