Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Na Yaga ni Veikidavaki

Na Yaga ni Veikidavaki

“BULA! Vakacava tiko?”

Macala ga ni o sa vakayagataka vakalevu na vosa ni veikidavaki qori. De o na lululu se drau veimoko sara kei koya o kidavaka. Ena duidui na ivakarau ni veikidavaki ena dui vanua, ia e tautauvata tiko ga na kena ibalebale. Ke da sega ni veikidavaki se da sauma nona veikidavaki mai e dua, e rawa ni raici me tawayalololoma se ivakaraitaki ni itovo ca.

Sega ni tamata kece era dau taleitaka na veikidavaki. Eso era dau mamadua se ra beci ira. So tale e dredre ga mera kidavaki ira na duikaikai se duatani nodra itovo, nodra itutu, yabaki, se isususu. Ia na veikidavaki leleka mada ga e rawa ni yaga.

Mo taroga: ‘Na cava na yaga ni veikidavaki? Na cava au vulica ena Vosa ni Kalou me baleta na veikidavaki?’

KIDAVAKI IRA NA “TAMATA KECE”

O Konilio na imatai ni turaga sega ni Jiu me lewe ni ivavakoso lotu vaKarisito, na gauna gona e kidavaki koya kina na yapositolo o Pita e kaya: “[E] sega ni dau veivakaduiduitaki na Kalou.” (Caka. 10:34) E qai vola tale ga o Pita ni “vinakata” na Kalou “moni veivutuni kece.” (2 Pita 3:9) Eda rawa ni vakaibalebaletaka na rua na tikinivolatabu qori vua e dua e vulica tiko na ka dina. Ia e uqeti ira tale ga na lotu vaKarisito o Pita: “Rokova na tamata kece, lomani ira na mataveitacini kece.” (1 Pita 2:17) Vakacava sega ni vakaraitaka qo ni dodonu ga meda kidavaki ira kece na duikaikai, ira e duatani nodra itovo, se isususu? Nida cakava qori, eda sa vakaraitaka sara tiko ga nida rokovi ira, eda lomani ira tale ga.

E uqeti ira ena ivavakoso na yapositolo o Paula: “Moni dau veiciqomi me vaka ga nona ciqomi keda o Karisito.” (Roma 15:7) O Paula e cavuti ira sara ga na tacina era “dau vakayaloqaqataki” koya. Sa qai wacava nodra vinakata na tacida nikua mera vakayaloqaqataki ni vakacacani keda tiko vakaukaua o Setani.—Kolo. 4:11, vmr; Vkta. 12:12, 17.

E vakamacalataki ena iVolatabu ni levu sara na yaga ni veikidavaki, sega ni vakilai ga na veikauaitaki.

VEIVAKADEITAKI, VEIUQETI, LOLOMA

Ni sa kena gauna me tokitaki kina na nona bula na Luve ni Kalou ina katonigone i Meri, e tala mai o Jiova e dua na agilosi me vosa vua. E kaya na agilosi: “Bula vinaka, sa vakadonui iko o Jiova, e tiko vata tale ga kei iko.” ‘E lomaleqa vakalevu’ o Meri ni sega ni kila na vuna e vosa tiko kina vua e dua na agilosi. Ni raica qori na agilosi e kaya sara: “Kua ni rere Meri, sa vakadonui iko na Kalou.” E vakamacalataka ni inaki ni Kalou me vakasucuma na Mesaia. Oti kina nona lomaleqa o Meri, mani sauma lesu ena talairawarawa: “Raica! Au yalewa dauveiqaravi i Jiova! Me yaco mada ga vei au na nomuni vosa.”—Luke 1:26-38.

E ilesilesi dokai vua na agilosi qori me vakasavuya na itukutuku i Jiova, ia e sega ni bau nanuma me ka lolovira na nona vosa vua e dua na tamata ivalavala ca. E tekivu vosa ena nona veikidavaki. Vakacava eda rawa ni vuli ena ivakaraitaki qori? Meda dau tu vakarau ni veikidavaki da qai veivakayaloqaqataki. Ena vica ga na vosa, eda rawa ni vukea eso tale, nida vakadeitaka vei ira nira maliwai ira dina tiko na dauveiqaravi i Jiova.

E levu sara ena ivavakoso e kila o Paula e Esia Lailai kei Urope. E vola ena nona ivola e levu na vosa ni veikidavaki e baleti ira vakatabakidua eso. Eda raica qori ena Roma wase 16. A vakauta o Paula e levu na nona iloloma vei ira na itokani lotu vaKarisito. E cavuti Fipi, “na tacida yalewa” qai uqeti ira na mataveitacini  mera “ciqomi koya ena vuku ni Turaga me vaka na [nodra] dau ciqomi ira na yalosavasava, [mera] vakarautaka vua na ka e gadreva.” E kidavaki Virisila kei Akuila o Paula qai “vakavinavinaka vei rau, o yau kei na ivavakoso kece ni veimatanitu.” E bau kidavaka mada ga eso era sega ni kilai levu nikua—me vakataki koya na nona “itokani lomani o Epinito” vaka kina o “Taraivina kei Taraivosa, erau marama gugumatua ena cakacaka ni Turaga.” Io, o Paula e dau kidavaki ira na mataveitacini.—Roma 16:1-16.

Vakasamataka mada na nodratou marau ni ratou nanumi vinaka tu. Eratou lomani Paula sara ga kina vakalevu! E uqeti ira tale ga na vo ni lotu vaKarisito na veikidavaki qori, e vukei ira me dei tiko ga nodra vakabauta. Io na veikidavaki e caka ena inaki ni veikauaitaki dina kei na veivakacaucautaki e vaqaqacotaka na veitokani, vakaduavatataki ira tale ga na tamata yalodina ni Kalou.

Ni yaco o Paula ena ikelekele ni waqa e Putioli, me lako sara i Roma, era lako na mataveitacini lotu vaKarisito mera tavaki koya. Ni raici ira toka mai vakayawa o Paula, “e vakavinavinakataka sara ga na Kalou, e vakayaloqaqataki tale ga.” (Cakacaka 28:13-15) Ena so na gauna, eda rawa ni matadredredre ga se yaloyalo nida veikidavaki. Qori mada ga e rawa ni uqeta e dua e rairai yalolailai tiko se rarawa voli.

KA EDA DUVATA KINA

E vinakati me veivakasalataki vakaukaua na tisaipeli o Jemesa. Eso na lotu vaKarisito era sa veibutakoci tiko vakayalo nira veitokani kei vuravura. (Jeme. 4:4) Ia rogoca mada na itekitekivu ni nona ivola:

“O yau o Jemesa, na dauveiqaravi ni Kalou kei na Turaga o Jisu Karisito, vei kemuni na yavusa e 12 oni veiseyaki tu: Ni bula!” (Jeme. 1:1) E rawarawa nodra ciqoma na nona ivakasala o ira na wilika na nona ivola nira raica ena nona veikidavaki nira duavata ga ena mata ni Kalou. Io, na veikidavaki e vakayacori ena yalomalumalumu e rawa ni veivosakitaki kina na veika bibi.

Me rawa ni yaga na veikidavaki, ke lekaleka mada ga, e dodonu me dina qai vu sara ga mai lomada, ke sega mada ga ni laurai levu. (Maciu 22:39) E yaco yani ena soqoni e dua na tacida yalewa mai Ailadi ni se qai vakarau tekivu sara ga. Ni vakusakusa i loma, e raivuki mai e dua na tacida tagane, e matadredredre qai kaya: “Bula. Vinaka na yaco mai.” E lai dabe ga na tacida qori.

ti tale e vica na macawa, e gole na tacida yalewa qori vua na tacida tagane ya qai vakamacalataka ni sa dua toka na gauna nona vosota tiko e dua na ituvaki dredre mai vale. E kaya: “Dua na ka noqu rarawa ena bogi ni siga qori, voleka sara niu sega ni gole rawa mai ena Vale ni Soqoni. Sega ni levu na ka au nanuma ena soqoni ya, ia au sega ni guilecava na nomu kidavaki au. Au vakila niu kauaitaki. Vinaka vakalevu.”

A rairai sega sara ni vakasamataka tu na tacida tagane qori na yaga ni vica na vosa ni veikidavaki e cavuta. E kaya: “Gauna e tukuna kina vei au na tacida yalewa ya ni tarai koya na vica na vosa au cavuta, au marau niu cakava qori. E vakacegui au tale ga.”

E vola o Solomoni: “Mo biuta na kemu madrai ena delaniwai, ni oti e vica na siga o na raica tale.” (Dauv. 11:1) Nida kauaitaka na yaga ni noda veikauaitaki, vakabibi vei ira na tacida lotu vaKarisito, eda vu ni veivakalougatataki vei ira, vaka kina vei keda. Meda kua gona ni vakawalena na yaga ni veikidavaki.