Raica sara na lewena

Raica na lewenivola

O na Walia na Duidui Qai Uqeta na Veiyaloni?

O na Walia na Duidui Qai Uqeta na Veiyaloni?

NA KALOU o Jiova e uqeti keda na lotu vaKarisito meda vakamareqeta na veiyaloni, me tiki ni noda bula. Nida veiyaloni, eda na duavata vakalevu na dausokalou dina. Qo ena vakavuna mera doka e levu na ivavakoso vaKarisito, vakabibi vei ira era sega ni taleitaka na tiko yavavala.

Kena ivakaraitaki, e dua na daucakaisausau kilailevu e Madagascar e dau vakaraica voli na nodra duavata na iVakadinadina i Jiova. E kaya e lo ga, ‘Keu lewena e dua na lotu, au sa lewena ga qo.’ Ni toso na gauna, e muduka nona vakatevoro, e taura e vica na vula me muria na ivakatagedegede vakaivolatabu ni bula vakawati, oti e qaravi Jiova sara na Kalou ni veiyaloni.

Me vaka ga na turaga qori, e veiyabaki e vica vata na udolu era vakila ena ivavakoso vaKarisito na veiyaloni era vaqara voli mai. Ia e vakamatatataka na iVolatabu ni rawa ni vakaleqa na veitokani, e vakavu leqa tale ga ena ivavakoso na “vuvu kei na veileti.” (Jeme. 3:14-16) Ia eda kalougata ni vakarautaka na iVolatabu na ivakasala yaga meda qarauna kina na leqa qori kei na sala me qaqaco kina noda veiyaloni. Me rawa qori, e vinaka meda dikeva mada eso na ituvaki e dau yaco dina.

LEQA KEI NA KENA IWALI

“Au sega ni dau veimaliwai vinaka kei na dua na tacida keirau cakacaka vata. Dua na gauna ni katakata sara tu ga na neirau veivosaki, rau gole mai e rua na tagane rau qai raica tu na neirau veiba.”—CHRIS.

“Keirau dau veitomani kei na dua na tacida yalewa ena cakacaka vakavunau, ia e tinia vakasauri. Sa sega sara ga ni vosa vei au, au sega tale ga ni kila na vuna.”—JANET.

“Keitou veivosaki tiko ena talevoni. E vakamoce e dua vei rau na tacida, au nanuma ni sa bokoca nona talevoni. Au mani tukuni koya vakaca vua e dua tale na tacida e se vakarorogo tiko mai, ia au sega ni kila ni tacida e vakamoce ya e se vakarorogo vinaka tu.”—MICHAEL.

“Ena neitou ivavakoso, erau sega ni veimaliwai vinaka e rua na painia. E vosataki kina vakaca e dua vei rau. E veivakayalolailaitaki na nodrau veiba.”—GARY.

De dua o nanuma ni duidui lalai toka ga qori. Ia e rawa ni vakamosi yalo, rawa tale ga ni veivakaleqai vakayalo. Eda marau nira qai veiyaloni tale na tacida qo nira muria na idusidusi vakaivolatabu. Na idusidusi vakaivolatabu cava o nanuma nira muria?

 “Dou kua ni veicudruvi e gaunisala.” (Vkte. 45:24) E tauca na ivakasala qori o Josefa vei ratou na tuakana eratou lesu tiko vei tamadratou. Sa bau yaga dina na ivakasala qori! Ni sega ni lewa rawa e dua na lomana qai cudru totolo, e rawa ni vakacudrui ira eso tale. E liaca o Chris ni nona malumalumu na dokadoka, e sega ni dau ciqoma na veivakadodonutaki. Ni vinakata me veisau, e kere veivosoti vua na tacida rau veiba qai sasaga me lewa vinaka nona cudru. Ni raica na itokani vakacakacaka na sasaga i Chris me veisau, e cakava tale ga na veiveisau. Nikua rau sa marautaka tiko nodrau qaravi Jiova.

“E seva na ka e nanumi ni sega na veivosaki.” (Vkai. 15:22) E liaca o Janet ni dodonu me muria na ivakavuvuli ya. E mani nanuma me rau “veivosaki.” Ni rau veitalanoa, e maqosataka nona kerea me tukuna mai vakadodonu na tacida ya na vu ni nona cudru. E via kaukaua vakalailai ni itekivu na nodrau veivosaki, ia ni toso tiko nodrau veitalanoataka nodrau leqa, sa lai malumu sara. E qai kila na tacida yalewa qori ni a sega ni okati o Janet ena ituvaki e nanuma cala. E kere veivosoti, gauna qo rau sa duavata ni qaravi Jiova.

“O koya gona, ke o kauta na nomu isoro ina icabocabonisoro o qai nanuma ni beitaki iko na tacimu ena dua na ka, biuta tu na nomu isoro ena mata ni icabocabonisoro, lako drau lai veivakameautaki mada kei tacimu.” (Maciu 5:23, 24) De dua o nanuma lesu na ivakasala i Jisu ena Ulunivanua ni Veiolive. Dua na ka nona rarawataka o Michael nona nanumi koya ga kei na nona tawayalololoma. E vinakata sara ga me uqeta tale na veiyaloni. E gole vua na tacida e vakacudruya qai yalomalumalumu ni kere veivosoti. Na cava e yaco? E kaya o Michael: “E vosoti au dina o taciqu.” Erau veiyaloni tale.

“Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.” (Kolo. 3:12-14) Me baleti rau na rua sa dede nodrau painia voli mai, e vukei rau e dua na qase ni ivavakoso me rau vakasamataka na taro qo: ‘E tiko vei kedaru na dodonu me daru vakararawataki ira na vo ni mataveitacini ena nodaru veileqaleqati? Na yavu cava daru sega ni rawa ni veivosoti kina, me daru qaravi Jiova ena veiyaloni?’ Rau ciqoma na nona ivakasala na qase ni ivavakoso, rau muria sara. Rau sa veimaliwai vinaka tale ni rau vunautaka na itukutuku vinaka.

Ena yaga vakalevu noda muria na  ivakasala vakaivolatabu ena Kolosa 3:12-14, ke dua e vakararawataki keda. Era kila e levu ni bibi na yalomalumalumu me rawa nira veivosoti, mera kua tale ni qai vakasamataka. Ke o kila ni se vinakati tiko ga me caka kina e dua na ka, vakacava me muri na ivakavuvuli ena Maciu 18:15? Na ivakasala i Jisu e ke e dusia tiko na ka meda cakava ni dua e ivalavala ca bibi vua e dua tale. Ia meda muria na kena ivakavuvuli. Mo lako vua na tacimu qai yalomalumalumu ni kerei koya mo drau veivosakitaka na leqa, drau qai walia.

Io, e vakarautaka na iVolatabu na vakatutu yaga. Ni o muria ena vukei iko na itovo e okati ena “vua ni yalo tabu na loloma, marau, vakacegu, vosovoso, yalololoma, yalovinaka, vakabauta, yalomalua, lewai koya vinaka.” (Kala. 5:22, 23) Me vaka na waiwai e vukea na cakacaka ni misini, na itovo vakalou qori ena vukea na noda saga na veiyaloni.

YAGA DINA INA IVAVAKOSO NA KA EDA DUIDUI KINA

E duidui na ka eda kilai kina, qori ena vaqaqacotaka noda veitokani. E rawa tale ga ni vakavu veisei. Qo e dua na kena ivakaraitaki e tukuna e dua na qase ni ivavakoso matua: “O koya e mamadua ena dredre ni tiko vata kei na dua e dau veimaliwai, e dau tatavosavosa. De sega ni bibi na tikina qori, ia ena rawa ni tini ena dua na leqa levu.” Vakacava o nanuma nira na sotava na leqa o ira e duatani sara ga nodra itovo? Vakasamataki rau mada na rua na yapositolo qo. E vakacava na itovo i Pita? O rairai tukuna ni dauvosa vakadodonu qai yalototolo. Vakacava o Joni? Eda na rairai tukuna ni turaga yalololoma qai laurai qori ena ka e tukuna kei na ka e cakava. De dua e tiko eso na vuna e dina kina qori. E kena irairai ni duidui na ka erau kilai kina. Ia erau cakacaka sara vakavoleka. (Caka. 8:14; Kala. 2:9) Koya gona, ke mani tiko na ka eda  duidui kina na lotu vaKarisito, e se rawa ga nida cakacaka vata vakavoleka.

Ena rairai tiko ena ivavakoso e dua na tacida e dau vakararawataki keda na nona ivosavosa se ka e cakava. Ia eda kila ni a mate tale ga o Karisito ena vukuna, bibi gona meda veilomani. (Joni 13:34, 35; Roma 5:6-8) Eda na sega ni via tinia noda veitokani kei koya se meda yawaki koya, de vinaka meda taroga: ‘Vakacava e cakava tiko o taciqu e dua na ka e cala vakaivolatabu? E nakita me vakararawataki au? Se duidui ga na neirau itovo?’ Koya e bibi sara, meda taroga: ‘Ena yaga vakacava vei au nona itovo vinaka?’

E bibi duadua na iotioti ni taro. Ke dau vosa o tacimu, o galugalu o iko, vakasamataka na rawarawa ni nona tekivutaka na veivosaki ena cakacaka vakaitalatala. O rawa ni kerei koya mo drau cakacaka vata qai raica na ka o rawa ni vulica vua. Ke dau veikauaitaki o qai mamaqi, vakacava mo raica na kena marautaki na solika vei ira na itabaqase, tauvimate kei ira na gadreva tu na veivuke? Qo na tikina me nanumi, ke duidui na noda itovo, e rawa nida veivolekati kei ira na tacida nida kauaitaka ga na ka era vinaka kina. De dua drau na sega sara ni veitokani vinaka ni o cakava qori, ia ena rawa ni drau veivolekati, drau na veiyaloni tale ga vakalevu, vaka kina ena ivavakoso.

E tiko na ka erau kilai tani kina o Uotia kei Sainitiki. Ia e uqeti rau na yapositolo o Paula me “duavata na nodrau rai ena Turaga.” (Fpai. 4:2) Vakacava o na saga tale ga na isausau qori, kei na isausau e rawati kina na veiyaloni?

ME KUA NI YACO TIKO GA NA VEISEI

Me vaka ga na co ca e tubu ena loganisenikau, eda na lomacataki ira vakalevu eso tale ke da sega ni cavuraka laivi. Ni vusolo na lomada ena noda cata e dua, ena vakaleqa na duavata ni ivavakoso. Ke da lomani  Jiova kei ira na tacida, eda na saga ena noda vinaka taucoko me kua ni vakaleqa na noda duavata na noda veileqaleqati kei na dua.

Ke o yalomalumalumu qai guta na veiyaloni, ena yaga vakalevu nomu sasaga

Nida saga meda walia na duidui se veisei qai noda inaki meda veiyaloni, eda na kurabuitaka na ka vinaka ena rawati kina. Dikeva mada na ka e sotava e dua na tacida: “Dua na tacida yalewa e dau raici au meu vaka tu ga na gone. E tarai au sara ga. Na levu ni noqu rarawa, au sa lai sega kina ni vosa vakayalovinaka vua. Au kaya lo ga, ‘Ni sega ni dokai au, au na sega tale ga ni dokai koya.’”

Sa qai vakasamataka na tacida qo na ka e cakava. “Au sa qai raica na noqu malumalumu, dua na ka noqu rarawa. Au kila ni dodonu meu veisautaka noqu rai. Niu masulaka oti vei Jiova, au volia e dua nona iloloma lailai na taciqu ya qai vola e dua na kad ni kere veivosoti ena vuku ni noqu itovo ca. Keirau veimokomoko, keirau vakadeitaka me keirau guilecava na ka e yaco. E sega tale ni keirau veileqaleqati.”

Levu era vinakata tu mera veiyaloni. Ia ni yaco eso na ituvaki era vakamaduataki kina se era vakalewai ena ka era dau sakitaka, levu era cakava na ka e vakaleqai kina na veiyaloni. Qori na ka era cakava e levu era sega ni qaravi Jiova, ia e dodonu meda veiyaloni qai duavata nida vakatokayacataki vua. E uqeti Paula me vola: “Au vakamasuti kemuni, . . . me rakorako nomuni itovo me vaka na ilesilesi oni kacivi kina, oya moni dau yalomalumalumu, ni yalomalua, ni vosovoso, me laurai tale ga na nomuni loloma ena nomuni dauveivosoti. Ni gumatua moni maroroya na duavata e vakavuna na yalo tabu, moni veiyaloni tale ga.” (Efeso 4:1-3) E ka talei na “veiyaloni” qori. Meda vaqaqacotaka tiko ga, nida saga meda walia na duidui ena rairai basika ena keda maliwa.