Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Ena gauna qo, e vakaibalebaletaki Jisu Karisito na tagane e taura tiko na ileu ni iqi nei vunivola, me vakatakilakilataki ira na bula

Taro na Dauwiliwili

Taro na Dauwiliwili

O cei e vakatayaloyalotaka na tagane e taura na ileu ni iqi nei vunivola kei na ono na tagane eratou taura na iyaragi ni ravuravu e vakamacalataki ena raivotu i Isikeli?

Qori na mataivalu vakalomalagi a vakaitavi ena kena vakarusai o Jerusalemi, ena vakaitavi tale ga ena vakarusai ni ituvaki ca i Setani ena Amaketoni. Na cava e veisau kina na ivakamacala qo?

Ni raica o Isikeli na ka ca e yaco ena koro vukitani o Jerusalemi ni bera na 607 B.G.V., e raivotutaka sara na ka ena yaco ni bera na kena vakarusai. E raica e ono na tagane ratou taura tu na iyaragi ni ravuravu. E raica tale ga e dua na tagane e “vakaisulu lineni” qai taura tu e dua na “ileu ni iqi nei vunivola.” (Isik. 8:6-12; 9:2, 3) A tukuni vua na tagane qo: “Mo lako ena lomanikoro, . . . mo vakatakilakilataka na yadredra era rarawataka, era vutugutaka na ka vakasevaki kece e vakayacori tiko ena koro.” Oti sa qai tukuni vei ratou na tagane ratou taura tu na iyaragi ni ravuravu me ratou vakamatei ira kece era sega ni vakatakilakilataki. (Isik. 9:4-7) Na cava eda vulica ena raivotu qo? O cei na tagane e taura tu na ileu ni iqi nei vunivola?

E parofisaitaki qori ena 612 B.G.V., qai vakayacori taumada ena nodra vakarusai Jerusalemi na mataivalu ni Papiloni—qori ni oti ga e lima na yabaki na kena parofisaitaki. Era lotu butobuto na kai Papiloni era veivakarusai, ia e vakayagataki ira o Jiova mera nona dauveivakamatei. (Jere. 25:9, 15-18) E vakayagataki ira o Jiova me totogitaki ira na nona tamata vukitani. Ia era sega ni vakarusai kece na lewenivanua. Era sega ni vakarusai vata na yalododonu kei na tamata ca. E vakarautaka vakayalololoma o Jiova e dua na ituvatuva mera vakabulai kina na Jiu era sega ni taleitaka na veika vakasisila e yaco tiko e Jerusalemi.

E sega ni vakaitavi o Isikeli ena nodra vakatakilakilataki na lewenivanua se na nodra vakarusai. Era veidusimaki sara ga na agilosi ena vakatauci ni lewa. E vaka ga eda sarava tu na ka e yaco ena gauna ya, se na ka e caka ena itikotiko vakalomalagi. E vakaroti ira na agilosi o Jisu mera tuvanaka nodra vakarusai na tamata ca, mera tawasei ira tale ga na yalododonu era na bula. *

E dau kilai tu e liu ni vakatayaloyalotaki ira na ivovo ni lumuti na tagane e taura tu na ileu ni iqi nei vunivola. A dau nanumi tu nira na vakatakilakilataki mera bula o ira na rogoca noda itukutuku vinaka. Ena vica ga na yabaki qo, e vinakati me vakamatatataki na ivakamacala qo. Me salavata kei na Maciu 25:31-33, o Jisu ga e lewai ira na tamata. Ena tauca nona iotioti ni lewa ena veivakararawataki levu, me tawasei ira era vaka na sipi mera na bula, kei ira era vaka na me mera na rusa.

Na cava eda vulica ena raivotu i Isikeli? E lima na ka eda vulica kina:

  1.  Ni vakarau vakarusai o Jerusalemi, a lesi o Isikeli me ivakatawa kei Jeremaia, me vaka ga a cakava e liu o Aisea. Nikua, e vakayagataka tiko o Jiova e dua na ilawalawa lailai era lumuti me vakani ira nona tamata qai veivakasalataki ni bera na veivakararawataki levu. Era veivakasalataki tale ga na lewenivale kece i Karisito.—Maciu 24:45-47.

  2.  E sega ni vakaitavi o Isikeli ena nodra vakatakilakilataki na bula, eda sega tale ga ni vakaitavi na dauveiqaravi ni Kalou nikua. Eda vakatetea ga na itukutuku i Jiova, e tiki ni cakacaka vakavunau era veidusimaki kina na agilosi.—Vkta. 14:6.

  3.    Ena gauna i Isikeli, sega ni dua e vakatakilakilataki na yadrena. E va tale ga qori nikua. Na cava mera cakava na tamata mera vakatakilakilataki mera bula? Bibi mera ciqoma na cakacaka vakavunau e vakayacori tiko nikua, mera bucina na itovo vaKarisito, mera yalataki ira vei Jiova ra qai tokona ena yalodina na taci i Karisito. (Maciu 25:35-40) Ke ra cakava qori, era na vakatakilakilataki mera vakabulai ena veivakararawataki levu sa roro tiko mai.

  4.  Ena gauna qo, e vakaibalebaletaki Jisu Karisito na tagane e taura tiko na ileu ni iqi nei vunivola, me vakatakilakilataki ira na bula. Era na vakatakilakilataki na isoqosoqo levu ena gauna era sa lewai kina mera sipi ena veivakararawataki levu. Qo ena rawa kina nira bula tawamudu e vuravura.—Maciu 25:34, 46. *

  5.  Ena gauna qo, na ono na tagane ratou taura tu na iyaragi ni ravuravu e vakaibalebaletaka na mataivalu vakalomalagi e kena iliuliu o Jisu. Sa voleka qo mera vakarusai ira na veimatanitu kei na veika ca.—Isik. 9:2, 6, 7; Vkta. 19:11-21.

Noda kila na tikina bibi e vakamacalataki mai cake ena uqeti keda qori meda nuitaki Jiova ni na sega ni vakarusai ira vata na yalododonu kei na tamata ca. (2 Pita 2:9; 3:9) Eda uqeti tale ga meda raica vakabibi na cakacaka vakavunau. Io, dodonu mera rogoca kece na lewenivanua na ivakasala qori ni bera na icavacava!—Maciu 24:14.

^ para. 6 E vakabulai o Peruki (na vunivola i Jeremaia), Epetimeleki na kai Iciopea, kei ira na kai Rekapaiti, ia e sega ni dua na ivakatakilakila e toka e yadredra. (Jere. 35:1-19; 39:15-18; 45:1-5) E ivakatakarakara ga nodra vakatakilakilataki.

^ para. 12 Ena sega ni vinakati mera vakatakilakilataki mera bula na lumuti yalodina. Ia era na dregati ena iotioti ni gauna ni bera nira takali se gauna e tekivu kina na veivakararawataki levu.—Vkta. 7:1, 3.