Raica sara na lewena

Raica na lewenivola

ULUTAGA NI VULI 28

Sa tu na Matanitu!

Sa tu na Matanitu!

“Na matanitu kei vuravura sa mai Matanitu ni noda Turaga kei na nona Karisito.”—VKTA. 11:15.

SERE 22 Sa tu na Matanitu—Me Yaco Mai!

KA ENA VULICI *

1. Na cava eda vakadeitaka? Na vuna?

 NI O raica na levu ni leqa e vuravura nikua, vakacava e dredre mo vakabauta ni na vinaka tale na ituvaki? Kena ivakaraitaki, levu na lewenivuvale sa ra sega ni veilomani. Levu na lewenivanua era sa qai voravora ga, era nanumi ira ga, era cudrucudru. Levu tale e dredre mera nuitaki ira na veiliutaki. Ia na ka kece qori e vakadeitaka vei iko ni na vinaka tale na ituvaki. Na vuna? Era vakaraitaka sara tiko ga na lewenivanua na ka e tukuni ena dua na parofisai vakasakiti me baleta na “iotioti ni veisiga.” (2 Tim. 3:1-5) E sega ni dua e rawa ni vakalasuya na kena vakayacori na parofisai qo. Na kena vakayacori e vakaraitaka ni sa veiliutaki tiko vakatui ni Matanitu ni Kalou o Karisito Jisu. Ia qo e dua ga vei ira na parofisai me baleta na Matanitu ni Kalou. Nida dikeva eso tale na parofisai sa vakayacori ena veiyabaki sa sivi, ena vaqaqacotaka sara ga na noda vakabauta.

Me vaka ga na kena tuvani na tikitiki ni droini me dua na iyaloyalo, ni biu vata na parofisai ena ivola i Taniela kei na Vakatakila eda na kila kina na vanua eda tu kina ena ituvatuva i Jiova (Raica na parakaravu 2)

2. Na cava eda na veivosakitaka ena ulutaga qo? Na vuna? (Vakamacala ena iyaloyalo ena waqana.)

2 Eda na veivosakitaka ena ulutaga qo: (1) na parofisai eda na kila kina na gauna e tauyavu kina na Matanitu ni Kalou, (2) eso tale na parofisai eda na kila kina ni sa veiliutaki tawarairai o Jisu ena Matanitu ni Kalou, kei na (3) e vica na parofisai e vakaraitaka na sala era na vakarusai kina na meca ni Matanitu ni Kalou. Na parofisai qori e vaka tiko na kena tuvani na tikitiki ni droini me dua na iyaloyalo me vakaraitaka na vanua eda tu kina ena nona ituvatuva o Jiova.

KILAI NA GAUNA E TAUYAVU KINA NA MATANITU NI KALOU

3. Na cava e tukuna vei keda na parofisai ena Taniela 7:13, 14 me baleta na Tui ni Matanitu ni Kalou?

3 E tukuna vei keda na parofisai ena Taniela 7:13, 14 ni ganiti Karisito Jisu sara ga me Tui ni Matanitu ni Kalou. Era na marau o ira mai na veimatanitu kece mera “qaravi koya,” ena sega tale ga ni dua me sosomitaki koya. E tukuna e dua tale na parofisai ena ivola i Taniela ni na tekivu veiliutaki o Jisu ena Matanitu qori ni cava na vitu na gauna vakaparofisai. Vakacava e rawa nida kila na gauna marautaki qori?

4. E vukei keda vakacava na Taniela 4:10-17 meda cakacakataka na yabaki ena Tui kina o Karisito. (Raica tale ga na ivakamacala e ra.)

4 Wilika Taniela 4:10-17. Na “vitu na gauna” e dusia e 2,520 na yabaki. E tekivu ena 607 B.G.V., nira kauta tani na kai Papiloni na iotioti ni tui mai na idabedabe vakaturaga i Jiova e Jerusalemi. E mai cava ena 1914 G.V., ni buli Jisu o Jiova me Tui ni Matanitu ni Kalou. * O Jisu ga “e dodonu me nona.”—Isik. 21:25-27.

5. Ena yaga vakacava noda kila na parofisai me baleta na “vitu na gauna”?

5 E yaga vakacava vei keda na parofisai qo? Nida kila na parofisai me baleta na “vitu na gauna” eda vakadeitaka kina ni na vakayacora o Jiova na nona vosa ni yalayala ena kena gauna donu. Me vaka ga ni a lokuca na gauna me tauyavu kina na nona Matanitu, ena raica tale ga me vakayacori na vo ni parofisai ena nona gauna lokuci. Io, “ena sega ni bera” na siga i Jiova!—Apak. 2:3.

SALA EDA KILA KINA NI SA TUI O KARISITO

6. (a) Na cava eda raica e vuravura e vakaraitaka ni sa veiliutaki tawarairai tiko na Karisito? (b) E vakadeitaki vakacava qori ena parofisai ena Vakatakila 6:2-8?

6 Ni vakarau cava nona cakacaka vakaitalatala e vuravura o Jisu, e tukuna ni na yaco eso na ka e veiyasa i vuravura era na kila kina na nona imuri ni sa tekivu veiliutaki mai lomalagi. Eso na ka e cavuta qori, oya na ivalu, dausiga kei na uneune. E tukuna tale ga ni na veitauvi na matedewa se veimataqali mate “ena levu na vanua,” dua na kena ivakaraitaki na COVID-19. Na ka kece qo e okata na iVolatabu me “ivakatakilakila” ni nona tiko o Karisito. (Maciu 24:3, 7; Luke 21:7, 10, 11) Ni oti e sivia ni 60 na yabaki nona mate o Jisu kei na nona lesu i lomalagi, e vakaraitaka vei Joni na raivotu me vakadeitaka ni na yaco na veika qori. (Wilika Vakatakila 6:2-8.) E yaco na ka kece qori ni sa veiliutaki o Jisu ena Matanitu ni Kalou ena 1914.

7. Na cava e levu kina na rarawa e vuravura ni tekivu veiliutaki o Jisu?

7 Na cava e torosobu kina na ituvaki kei vuravura ni sa Tui o Jisu? E tukuni ena Vakatakila 6:2 e dua na tikina bibi. Na imatai ni ka e cakava o Jisu ni sa veiliutaki vakatui oya me vala. E vala kei cei? O Setani kei ira na nona timoni. E tukuni ena Vakatakila wase 12 ni druka o Setani ena ivalu qori mani kolotaki sobu i vuravura kei ira na nona timoni. E cudru vakalevu o Setani, e tekivu vakararawataki keda na kawatamata, ya na vuna e “rarawa [kina] na vuravura.”—Vkta. 12:7-12.

Eda sega ni marautaka na itukutuku ca, ia eda nuidei ni sa tu na Matanitu ni Kalou nida raica na kena vakayacori na parofisai vakaivolatabu (Raica na parakaravu 8)

8. E yaga vakacava vei keda noda raica na vakayacori ni parofisai me baleta na Matanitu ni Kalou?

8 E yaga vakacava vei keda na parofisai qo? Na veika e yaco tiko e vuravura kei na veisau ni nodra itovo na lewenivanua eda na kila kina ni sa Tui o Jisu. Meda kua gona ni rarawataka nira nanumi ira ga na lewenivanua, era cudrucudru tale ga, eda kila ni sa vakayacori tiko na parofisai ena iVolatabu. Sa tu na Matanitu! (Same 37:1) Meda namaka ni na levu tale na rarawa e vuravura ni sa voleka sara na Amaketoni. (Mari. 13:8; 2 Tim. 3:13) Eda vakavinavinakataka vakalevu na Tamada vakalomalagi dauloloma ni vukei keda tiko meda kila na vuna e levu kina na leqa e vuravura.

SALA ERA NA VAKARUSAI KINA NA MECA NI MATANITU NI KALOU

9. E vakamacalataki vakacava ena Taniela 2:28, 31-35, na iotioti ni matanitu qaqa? E basika ena gauna cava?

9 Wilika Taniela 2:28, 31-35. Eda raica nikua na vakayacori ni parofisai qo. Na tadra nei Nepukanesa e dusia na ka ena yaco ena “iotioti ni gauna” ni tekivu ga na veiliutaki i Karisito. Na kena meca o Jisu e vuravura ena okati kina na iotioti ni matanitu qaqa e parofisaitaki ena iVolatabu, e dusia na “yava . . . kaukamea kei na qele.” Sa veiliutaki tiko na matanitu qaqa kei vuravura qo. E basika ena iMatai ni iValu Levu ni rau cakacaka vata o Peritania kei Merika, na matanitu tovata. Na matakau ena tadra nei Nepukanesa e tukuni tale ga kina e rua na ka me baleta na matanitu qaqa qo ena duidui kina vei ira na matanitu sa veiliutaki oti.

10. (a) Na cava eda raica nikua ena matanitu tovata o Peritania kei Merika e parofisaitaki ena Taniela? (b) Cava meda qarauna? (Raica na kato “ Qarauna na Qele!”)

10 Kena imatai, na matanitu tovata o Peritania kei Merika e sega ni vaka na vo ni matanitu qaqa e cavuti ena raivotu. E sega ni kaukaua me vaka na koula se siliva, ia e dusia ga ni wakivata na kaukamea kei na qele. Na qele e dusia na “luvedra na kawatamata,” se o ira na tauvanua. (Tani. 2:43, vmr.) Me vaka e laurai vinaka nikua, era vakaitavi ena veidigidigi, era valataka na nodra dodonu, era tayabe vakailawalawa, era kudruvaka tale ga na nodra dodonu na tamata cakacaka, qori e dredre kina ni vakayacora na matanitu qaqa qo na ka e vinakata.

11. E vaqaqacotaka vakacava noda vakabauta nida sa bula tiko ena gauna ni icavacava ni rau veiliutaki tiko na matanitu tovata?

11 Kena ikarua, na matanitu tovata o Peritania kei Merika e vakaibalebaletaka na yava ni matakau levu e iotioti ni matanitu qaqa kei vuravura e parofisaitaki ena iVolatabu. Ena sega ni dua na matanitu vakatamata ena taravi koya. Ia na Matanitu ni Kalou ena vakarusa na matanitu qo kei na vo ni matanitu vakatamata ena Amaketoni. *Vkta. 16:13, 14, 16; 19:19, 20.

12. Na ivakadinadina cava tale e tukuni ena parofisai i Taniela e vakacegui keda, eda nuidei tale ga kina?

12 E yaga vakacava vei keda na parofisai qo? Na parofisai i Taniela e vakarautaka eso tale na ivakadinadina nida sa bula tu qo ena gauna ni icavacava. Ena sivia ni 2,500 na yabaki sa oti, e parofisaitaka o Taniela ni oti na matanitu o Papiloni, ena veiliutaki e va tale na matanitu qaqa kei vuravura ena vanua era tu kina na tamata ni Kalou. E vakaraitaka tale ga ni iotioti ni Matanitu Qaqa kei Vuravura o Peritania kei Merika. Qo e vakacegui keda, eda nuidei tale ga kina ni sa voleka qo me vakarusa kece na veiliutaki vakatamata na Matanitu ni Kalou me qai lewa mai na vuravura taucoko.—Tani. 2:44.

13. Na cava na “ikawalu ni tui” kei na “tini na ileu,” e tukuni ena Vakatakila 17:9-12? E vakayacori vakacava na parofisai qo?

13 Wilika Vakatakila 17:9-12. Na vakacaca ni iMatai ni iValu Levu e vakayacori kina e dua tale na parofisai vakaivolatabu me baleta na iotioti ni veisiga. Era vinakata na veiliutaki me sautu o vuravura. Koya gona ena Janueri 1920, era tauyavutaka na Matabose Makawa kei Vuravura, toso na gauna sa qai sosomitaka na Matabose kei Vuravura ena Okotova 1945. Na isoqosoqo qo e vakatokai me “ikawalu ni tui.” Ia e sega ni matanitu qaqa kei vuravura. Na kena kaukaua kei na lewa e vakatau tiko ena nodra veitokoni na matanitu vakapolitiki. E vakatoka na iVolatabu na veimatanitu qori me “tini na tui.”

14-15. (a) Na cava e tukuni ena Vakatakila 17:3-5 me baleti “Papiloni na Ka Levu”? (b) Cava era cakava o ira na dau tokoni lotu lasu?

14 Wilika Vakatakila 17:3-5. Ena dua na raivotu e vakatakilai vei Joni, e raica e dua na saqamua, o “Papiloni na Ka Levu,” e vakaibalebaletaka na lotu lasu kece kei vuravura. E vakayacori vakacava na raivotu qori? Dua na gauna balavu e cakacaka veivolekati kina na isoqosoqo ni lotu lasu kei na isoqosoqo vakapolitiki ni vuravura, e tokona mada ga. Ia sa voleka qo me uqeta na lomadra na Kalou o Jiova “mera cakava na nona inaki.” Na cava na kena itinitini? O ira na isoqosoqo vakapolitiki qori, ya na “tini na tui,” era na ravuta na isoqosoqo ni lotu lasu qai vakarusa.—Vkta. 17:1, 2, 16, 17.

15 Eda kila vakacava ni sa vakarau vakarusai o Papiloni na Ka Levu? Me saumi na taro qori, e vinaka meda nanuma tiko ni koro makawa o Papiloni e dua na kena itataqomaki na Uciwai na Uferetisi. Na ivola na Vakatakila e vakatauvatani ira na vica vata na milioni era tokoni Papiloni na Ka Levu me vaka na veitaqomaki ni “wai.” (Vkta. 17:15) E vakaraitaka tale ga ni na “maca vakadua” na wai qori, e dusia ni na oti yani nodra veitokoni e levu vei lotu lasu kece kei vuravura. (Vkta. 16:12) Sa vakayacori tiko nikua na parofisai qori, nira vakanadakuya e levu na lotu lasu ra qai vaqaqara ena so tale na vanua me wali kina na nodra leqa.

16. E yaga vakacava noda kila na parofisai ni kena basika na Matabose kei Vuravura, kei na nona vakarusai o Papiloni na Ka Levu?

16 E yaga vakacava vei keda na parofisai qo? Na kena basika na Matabose kei Vuravura kei na nodra sega ni via tokona e levu na lotu lasu, e dua tale na ivakadinadina nida sa bula tiko ena iotioti ni veisiga. Levu era na sega ni tokoni Papiloni na Ka Levu, ia ena sega ni rusa ena sala qori. Me vaka sa tukuni oti mai, o Jiova ena uqeta na lomadra na “tini na tui,” qori na isoqosoqo vakapolitiki era tokona na Matabose kei Vuravura “mera cakava na nona inaki.” Ena totolo wale ga nodra vakarusai lotu lasu na veimatanitu qori, ena kidroa kina o vuravura. * (Vkta. 18:8-10) Ena yavalati vuravura nona vakarusai o Papiloni na Ka Levu, ena rawa ni vakavuna na rarawa. Ia e rua na vuna era na marau kina vakalevu na tamata ni Kalou. Ni dua na gauna balavu e saqati Jiova tu kina o lotu lasu, sa na vakarusai vakadua, sa voleka tale ga meda vakabulai mai na ituvaki ca ni vuravura qo!—Luke 21:28.

NUIDEI NI NA VEITAQOMAKI O JIOVA

17-18. (a) Eda na vaqaqacotaka tiko ga vakacava na noda vakabauta? (b) Cava eda na veivosakitaka ena ulutaga e tarava?

17 E parofisaitaka o Taniela ni na “vakalevutaki” na “kilaka dodonu.” Io, e sa vakalevutaki! Eda sa kila na ibalebale ni parofisai me baleta na noda gauna. (Tani. 12:4, 9, 10) E donu vinaka na veiparofisai qori, e uqeti keda meda dokai Jiova vakalevu kei na nona Vosa. (Aisea 46:10; 55:11) Koya gona meda vaqaqacotaka tiko ga na noda vakabauta, nida vulica vagumatua na iVolatabu qai vukea eso tale mera veiwekani voleka kei Jiova. Ena maroroi ira era dau ravi vua, ena “vakacegui ira tiko ga.”—Aisea 26:3.

18 Ena ulutaga tarava, eda na veivosakitaka na parofisai me baleta na ivavakoso vaKarisito ena gauna ni icavacava. Eda na raica ni parofisai qori e vakaraitaka tale ga nida sa bula tiko ena iotioti ni veisiga. Eda na veivosakitaka eso tale na ivakadinadina ni liutaki ira tiko na nona imuri yalodina na noda Tui o Jisu.

SERE 61 Ni Yaloqaqa na iVakadinadina!

^ Eda bula tu qo ena gauna vakairogorogo duadua! Sa tauyavu oti na Matanitu ni Kalou me vaka e tukuni ena levu na parofisai ena iVolatabu. Ena veivosakitaki ena ulutaga qo eso na parofisai qori me vaqaqacotaka noda vakabauti Jiova, me uqeti keda meda kua ni lomaleqa, meda nuidei tale ga ena gauna qo kei na veigauna se bera mai.

^ Raica na lesoni 32 poidi 4 ena ivola Marau me Tawamudu!, sarava tale ga ena jw.org na vidio Tekivu Veiliutaki na Matanitu ni Kalou ena 1914.

^ Me ikuri ni ivakamacala ena parofisai i Taniela, raica na Vale ni Vakatawa June 15, 2012, t. 14-19.

^ Mo kila eso tale na ka me baleta na veigauna se bera mai, raica na wase 21 ni ivola Sa Veiliutaki na Matanitu ni Kalou!