Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 29

‘Ni Lako Moni Vakavulici Ira Mera Tisaipeli’

‘Ni Lako Moni Vakavulici Ira Mera Tisaipeli’

“O koya gona, ni lako moni vakavulici ira na lewe ni veivanua kece ga mera tisaipeli.”—MACIU 28:19.

SERE 60 Mera na Bula

KA ENA VULICI *

1-2. (a) Ena ivakaro i Jisu ena Maciu 28:18-20, cava na nodra itavi bibi na lewe ni ivavakoso vaKarisito? (b) Na taro cava ena veivosakitaki ena ulutaga qo?

ERATOU nanamaki na yapositolo ni ratou soqoni yani ena ulunivanua. Ni vakaturi o Jisu, sa lokuca oti tu me ratou sota e kea. (Maciu 28:16) De dua qori na vanua e “rairai [kina] vei ira na 500 vakacaca na veitacini ena dua ga na gauna.” (1 Kor. 15:6) Na cava e kacivi ira kina nona tisaipeli o Jisu mera sota? Me vakaroti ira ena dua na ilesilesi marautaki: “O koya gona, ni lako moni vakavulici ira na lewe ni veivanua kece ga mera tisaipeli.”—Wilika Maciu 28:18-20.

2 Era mai lewe ni ivavakoso vaKarisito ena imatai ni senitiuri na tisaipeli era rogoca na vosa i Jisu. Na nodra itavi bibi na lewe ni ivavakoso qori mera vakavulica e levu tale mera tisaipeli i Karisito. * Nikua sa levu sara na ivavakoso era lewena na lotu vaKarisito dina e veiyasa i vuravura. E sega ni veisau na nodra ilesilesi. Ena veivosakitaki ena ulutaga qo e va na taro: Na cava e bibi kina na veivakatisaipelitaki? Na cava e okati kina? E noda itavi kece na lotu vaKarisito na veivakatisaipelitaki? Na cava e vinakati kina na vosovoso ena cakacaka qo?

 E BIBI NA VEIVAKATISAIPELITAKI

3. Me vaka e cavuti ena Joni 14:6 kei na 17:3, na cava e bibi kina na veivakatisaipelitaki?

3 Na cava e bibi kina na veivakatisaipelitaki? O ira ga na tisaipeli i Karisito era na itokani ni Kalou. Kena ikuri, era veisautaka na ivakarau ni nodra bula nikua, era na bula tawamudu tale ga ena gauna se bera mai. (Wilika Joni 14:6; 17:3.) E tataunaka gona vei keda o Jisu na itavi bibi qo, ia eda na sega ni nuitaka ga na noda kaukaua. E tukuna na yapositolo o Paula me baleti koya kei na vica na nona itokani voleka ni ratou “cakacaka vata kei na Kalou.” (1 Kor. 3:9) E dua dina na itavi dokai e lesia vei keda o Jiova kei Karisito!

4. Na cava eda vulica ena ivakaraitaki nei Ivan kei Matilde?

4 Eda dau marau nida veivakatisaipelitaki. Vakasamataka mada na nona ivakaraitaki e dua na tacida tagane o Ivan kei watina o Matilde, mai Colombia. Erau vunau vua e dua na cauravou o Davier, e tukuna vei rau: “Au via veisau ia e dredre.” E dau veivacu o Davier, dau mateni, e vakayagataka na waigaga ni veivakamatenitaki, e tiko vata tale ga kei na nona itau o Erika. E vakamacalataka o Ivan: “Keirau vulica vata kei koya na iVolatabu. E yawa toka na nona koro, keirau dau vodo basikeli me vica na aua ena gaunisala soso. Ni raica o Erika ni sa veisau na itovo kei na rai nei Davier, e vulica tale ga na iVolatabu.” Toso na gauna sa biuta o Davier na gunu, waigaga ni veivakamatenitaki kei na veivacu. Erau vakamau tale ga kei Erika. E kaya o Matilde: “Ni rau papitaiso o Davier kei Erika ena 2016, keirau nanuma sara na ka e kaya o Davier, ‘Au via veisau ia e dredre.’ Keirau luluvu sara ga ena levu ni neirau marau.” E macala gona nida dau marau vakalevu nida vukea eso tale mera tisaipeli i Karisito.

KA E OKATI ENA VEIVAKATISAIPELITAKI

5. Na cava na imatai ni ka meda cakava nida veivakatisaipelitaki?

5 Na cava na imatai ni ka meda cakava nida veivakatisaipelitaki? Meda “vakasaqarai” ira na vinakata mera vulici Jiova. (Maciu 10:11) Nida vunau vei ira kece eda sota, eda vakaraitaka nida iVakadinadina i Jiova. Eda vakaraitaka tale ga nida imuri dina i Karisito nida muria na nona ivakaro meda vunau.

6. Na cava meda cakava me vuavuaivinaka kina noda cakacaka vakavunau?

6 Eso era vinakata mera vulica na ka dina, ia e levu era sega ni kauai. De dua ena vinakati meda vakauqeti ira. Me vuavuaivinaka na noda cakacaka vakavunau, e vinakati meda vakavakarau vinaka. Digia e dua na ulutaga ena taleitaka o koya drau na sota, vakasamataka tale ga na sala mo vakamacalataka kina na ulutaga qori.

7. O rawa ni tekivutaka vakacava na veivosaki kei na dua? Na cava e bibi kina meda vakarorogo, meda veidokai tale ga?

7 Kena ivakaraitaki, o rawa ni tukuna vei itaukeinivale: “Au via kila na nomuni nanuma ena tikina qo. Levu na leqa eda sotava nikua era sotava tale ga e levu ena veiyasa i vuravura. O nanuma ni na walia na matanitu vakatamata na leqa kece qo?” Oti qai veivosakitaka na Taniela 2:44. Se o rawa ni taroga e dua tale na itaukeinivale: “Eda na vukei ira vakacava na luveda me vinaka na nodra itovo? Au  via kila na nomuni rai.” Oti qai veivosakitaka na Vakarua 6:6, 7. Ni o digia na ulutaga mo veivosakitaka, vakasamataki ira na rogoci iko. Vakasamataka na yaga ni nodra vulica na iVolatabu. Ni o vosa vei ira, e bibi mo vakarorogo, mo doka tale ga nodra nanuma. Qori ga na sala o na kilai ira vinaka kina, era na rogoci iko vinaka tale ga.

8. Na cava me wasoma kina noda veisikovi lesu?

8 Ni bera ni vakatulewataka e dua me vulica na iVolatabu, ena rairai vinakati nomu gauna kei na sasaga mo sikovi koya lesu. Na vuna? De dua era na sega ni tiko e vale nida lesu yani. Ena rairai vinakati tale ga mo lesuva vakavica e dua me qai taleitaka me vulica na iVolatabu. Nanuma tiko, ena rawa ni tubu e dua na kau ke sui wasoma. E va tale ga qori na nona toso e dua na tataleitaki. Nida veivosakitaka wasoma kei koya na Vosa ni Kalou, ena lomani Jiova vakalevu kei Jisu.

E NODA ITAVI KECE NA VEIVAKATISAIPELITAKI

Era vakaitavi kece na iVakadinadina i Jiova e veiyasa i vuravura ena nodra vaqarai na yalomalumalumu (Raica na parakaravu 9-10) *

9-10. Na cava eda kaya kina nida vakaitavi kece na lotu vaKarisito ena nodra vaqarai na yalomalumalumu?

9 E noda itavi kece na lotu vaKarisito meda vaqarai ira na yalomalumalumu. Eda rawa ni vakatauvatana na cakacaka qo kei na noda vaqara e dua na gone e yali tiko. Ena sala cava? Rogoca mada e dua na italanoa qo me baleta nona yali mai vale e dua na gone yabaki tolu. E rauta ni le 500 era vaqarai koya. Vakacava e qai kune? Io, e kunei koya e dua vei ira na vaqaqara ena loganisila ni oti e rauta ni 20 na aua nona yali. A sega ni vinakata na turaga qori me vakacaucautaki ni kunea na gone. E kaya ga: “Era  veitokoni e vica vata na drau me kune kina na gone qori.”

10 E levu nikua era vaka na gone e yali ya. E sega tu na nodra inuinui, ia e vinakati mera vukei. (Efeso 2:12) Eda cakacaka vata e sivia ni walu na milioni mera vaqarai na yalomalumalumu. De dua o na sega ni kunea e dua mo drau vulica vata na iVolatabu. Ia ni cakacaka tale yani ena yalava qori e dua tale na dautukutuku, de dua rau na sota kei na dua e via vuli iVolatabu. Nira kunea na tacida e dua me tisaipeli i Karisito, era na marau kece o ira na vakaitavi ena vaqaqara.

11. Ke sega mada ga ni dua o vakavulica tiko ena iVolatabu ena gauna qo, sala cava tale o rawa ni veivakatisaipelitaki kina?

11 Ke sega mada ga ni dua o vakavulica tiko ena iVolatabu ena gauna qo, o rawa ni veivakatisaipelitaki ena so tale na sala. Kena ivakaraitaki, o rawa ni kidavaki ira na ka vou era gole mai na Vale ni Soqoni, saga mo veitokani kei ira. Ni o cakava qori, o na vakadeitaka vei ira ni keda ivakatakilakila na lotu vaKarisito dina na loloma. (Joni 13:34, 35) Ke lekaleka mada ga na nomu isaunitaro ena soqoni, o sa vakavulici ira tiko na ka vou mera vakamacalataka na nodra vakabauta ena veidokai, me vu tale ga mai lomadra. O rawa tale ga ni veitomani kei na dua na dautukutuku vou ena cakacaka vakaitalatala qai vukei koya me vakayagataka na iVolatabu ni veivakavulici. Ni o cakava qori, o sa vakavulici koya tiko me vakatotomuri Karisito.—Luke 10:25-28.

12. Vakacava meda rawata sara e dua na ivakatagedegede ni veivakavulici meda qai veivakatisaipelitaki? Vakamacalataka.

12 E sega ni tukuni meda rawata sara e dua na ivakatagedegede ni veivakavulici meda qai veivakatisaipelitaki. Na vuna? Vakasamataka mada na ivakaraitaki nei Faustina mai Bolivia. E sega ni kila na wilivola ni sotavi ira na tacida. Qo sa kila toka vakalailai na wilivola. Sa papitaiso, e taleitaka tale ga me veivakavulici. E vakavulica e lima na vuli iVolatabu e veimacawa. E sega ni taladrodro sara nona wilivola o Faustina kei na levu na nona gonevuli, ia sa vukea e ono mera papitaiso.—Luke 10:21.

13. Na veivakalougatataki cava eda marautaka ena veivakatisaipelitaki ke da osooso mada ga?

13 Era osooso e levu na lotu vaKarisito nira qarava e levu na itavi bibi. Ia dua na ka na nodra marau ni tiko na gauna mera veivakavulici kina ena iVolatabu. Kena ivakaraitaki na tacida yalewa o Melanie mai Alaska. E itubutubu le  dua, e tiko na luvena yalewa e yabaki walu. E cakacaka saumi, e qarava tale tiko ga e dua vei rau na nona itubutubu e kenisa. O koya duadua ga na iVakadinadina i Jiova ena tauni yawa e tiko kina. E dau masu me vosota na batabata ni lai vunau, me vaqara e dua me rau vuli iVolatabu. Oti e qai sotava e dua na yalewa o Sara, e marautaka ni kila na yaca ni Kalou. Toso na gauna sa via vuli iVolatabu. E kaya o Melanie: “Au dau oca ena veibogi ni Vakaraubuka, ia keirau dau lakova vakaveitinani na vuli iVolatabu qo, e yaga sara ga vei keirau. Keirau dau taleitaka na vakelia na isaunitaro nei Sara, keirau marau ni mai veitokani kei Jiova.” E yaloqaqa o Sara me vosota na veitusaqati, e biuta nona lotu, e papitaiso tale ga.

E BIBI NA VOSOVOSO

14. (a) E tautauvata vakacava na veivakatisaipelitaki kei na qoli? (b) E uqeti iko vakacava na ka e vola o Paula ena 2 Timoci 4:1, 2?

14 Ke sega mada ga ni vuavuaivinaka nomu cakacaka vakaitalatala, kua ni soro, vaqaqara tiko ga. Nanuma tiko ni vakatauvatana o Jisu na veivakatisaipelitaki kei na qoli. Kena irairai nira cakacaka vakaukaua na dauqoli me vica vata na aua me qai rawa mai na ika. Levu na gauna era na cakacaka bogi se yadra vakamataka, eso na gauna era na soko vakayawa. (Luke 5:5) E va tale ga qori na veivakatisaipelitaki. Eso na dautukutuku era vakayagataka e vica vata na aua mera qoli kina ena duidui yalava kei na duidui gauna. Na vuna? Mera sota kina kei na levu na lewenivanua. Era vakalougatataki  o ira na gumatua nira sotavi ira na taleitaka na itukutuku eda vakasavuya. Vakacava mo vunau ena gauna kei na vanua o na rawa ni kunea kina e levu?—Wilika 2 Timoci 4:1, 2.

Mo vosovoso ni vukei gonevuli me toso vakayalo (Raica na parakaravu 15-16) *

15. Na cava e vinakati kina na vosovoso nida veivakavulici?

15 Na cava e vinakati kina na vosovoso nida veivakavulici ena iVolatabu? Dua na vuna ni vinakati na sasaga mera kila na gonevuli na ka e vakavulica na iVolatabu, mera taleitaka tale ga. Meda vukei ira tale ga mera kilai Jiova, o koya e vakavuna na iVolatabu ra qai lomani koya. Kena ikuri, meda vakavulici ira ena ka e vakarota o Jisu vei ira na nona tisaipeli, kei na sala mera muria kina na nona ivakaro. E vinakati meda vosovoso ni vukei ira nira saga tiko mera muria na ivakavuvuli vakaivolatabu. Eso na gonevuli era veisautaka totolo na nodra rai kei na itovo ena vica ga na vula. Eso tale e taura toka na gauna.

16. Na cava o vulica ena ivakaraitaki nei Raúl?

16 E vuavuaivinaka nona cakacaka e dua na daukaulotu mai Peru ni dau vosovoso. E kaya: “Keirau vulica vata kei na dua na vuli iVolatabu o Raúl e rua na ivola. E sotava tiko ga e levu na ka dredre. E leqa nona vuvale, dau vosavosa ca, ratou sega ni dokai koya na luvena. E tiko wasoma ena soqoni, au mani sikovi koya tiko ga kei na nona vuvale. Oti e tolu na yabaki sa qai vakadonui me papitaiso.”

17. Na cava eda na veivosakitaka ena ulutaga tarava?

17 E vakaroti keda o Jisu meda “lako [meda] vakavulici ira na lewe ni veivanua kece ga mera tisaipeli.” Meda vakayacora na ilesilesi qori, eda na vosa vei ira e duatani na nodra rai, wili kina o ira na sega ni lewena e dua na lotu se o ira na sega ni vakabauta na Kalou. Ena veivosakitaki ena ulutaga tarava na iwalewale meda wasea kina vei ira na itukutuku vinaka.

SERE 68 Kaburaka na iTei ni Matanitu

^ para. 5 Na itavi bibi ni ivavakoso me vukea e levu mera mai tisaipeli i Karisito. Ena veivosakitaki ena ulutaga qo eso na vakatutu meda qarava vinaka kina na noda ilesilesi.

^ para. 2 IVAKAMACALA NI VOSA: Era sega ni vulica ga na tisaipeli i Karisito na ka e vakavulica, ia era muria sara ga. Era saga mera muria voleka na weniyava i Jisu se na nona ivakaraitaki.—1 Pita 2:21.

^ para. 52 IVAKAMACALA NI IYALOYALO: E gole vagade e dua na tagane qai taura na ivola ena qiqi ena rara ni waqavuka. Ni sarasara tiko, e raica eso tale na tacida ena qiqi. Ni lesu i nona vanua, erau vunau vua na tacida.

^ para. 54 IVAKAMACALA NI IYALOYALO: E vulica sara na iVolatabu, e vakadonui me papitaiso.