Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Bucina Mo Lomana na “Tamata Kece Ga”

Bucina Mo Lomana na “Tamata Kece Ga”

NA GAUNA e vakavulici ratou kina na nona tisaipeli o Jisu ena vunautaki ni itukutuku vinaka, e kila ni na sega ni taleitaki ena so na gauna na itukutuku ni Matanitu ni Kalou. (Luke 10:3, 5, 6) Ena cakacaka vakaitalatala, de dua eda na sotava eso era dau cudru se kaukaua na nodra ivalavala. Qori e dau vakadredretaka noda lomani ira.

O koya e dau loloma e dau veikauaitaki, ena kauaitaka na nodra leqa qai vukei ira. Ke sa seavu tiko yani na noda lomani ira ena yalava, ena rawa tale ga ni seavu na noda gugumatua kei na maqosa ni noda cakacaka. Ia ke da bucina na loloma, ena vaka ga nida iriva na buka me caudre, meda gumatua tiko ga ena cakacaka vakaitalatala!—1 Ces. 5:19.

Ni dredre mada ga na ituvaki, eda na bucina vakacava na loloma? Meda dikeva mada e tolu na ivakaraitaki eda rawa ni muria, o Jiova, Jisu, kei na yapositolo o Paula.

VAKATOTOMURIA NA LOLOMA I JIOVA

Sa vica vata na udolu na yabaki nona vosota tiko o Jiova na kena vakarogocataki na yacana. Ia e dau “yalovinaka . . . vei ira na sega ni dau vakavinavinaka kei ira na daucaka ca.” (Luke 6:35) E laurai na nona yalovinaka ena nona dau vosota. E vinakata o Jiova me bula na “tamata kece ga.” (1 Tim. 2:3, 4) E cata na veika ca, ia e talei vua na noda bula, e sega ni vinakata me rusa e dua.—2 Pita 3:9.

E kila vinaka o Jiova na mana ni nona vakamatabokotaki ira na sega ni vakabauti koya o Setani. (2 Kor. 4:3, 4) Levu era vakavulici ena vakabauta kei na rai e sega ni dodonu nira se gone, e vakadredretaka mera ciqoma na ka dina. E vinakata o Jiova me vukei ira qori. Eda kila vakacava?

Raica mada na rai i Jiova me baleti Ninive makawa. E voravora na nodra ivalavala, ia e kaya vei Jona: “Meu kua ni lomani Ninive na koro vakaitamera era tiko kina e 120,000 vakacaca na lewenivanua, era sega mada ga ni kila na ka e donu mai na ka e cala?” (Jona 4:11) O Jiova e raici ira na kai Ninive nira lecaika vakayalo, e vakaroti Jona kina me vakasalataki ira ni lomani ira.

Me vakataki Jiova, eda na raici ira na lewenivanua mera ka talei. Eda na vakatotomuri koya nida gumatua ni vukei ira na rawa ni vakarorogo, ke ra sega mada ga ni kauai.

VAKATOTOMURIA NA LOLOMA I JISU

E ucui Tamana o Jisu ena nona lomani ira na lewenivanua era walokai tu vakayalo. “Ni raici ira na ilala levu, e lomani ira nira suivotu qai biu wale tu me vaka na sipi e sega na kena ivakatawa.” (Maciu 9:36) E kila o Jisu na veika kece; e kila ni o ira na lako yani mera rogoca na ka e tukuna era vakavulici ena ka lasu, era vakalolomataki tale ga vei ira na iliuliu ni lotu. E kila ni levu na ka ena vakalatilati ena nodra taleitaka na itukutuku vinaka, ia e “levu sara na ka e vakavulici ira kina.”—Mari. 4:1-9.

Kua ni cudru ni sega ni kauai e dua

Dau veisau na keda ituvaki, e veisau tale ga nona rai e dua me baleta na ka dina

Nira sega ni kauaitaka e levu na itukutuku eda kacivaka, e vinakati meda kila na ituvaki  kece da qai taroga se cava e va kina ya na nodra rai. Eso e rairai cala nodra rai me baleta na iVolatabu se baleta na lotu ena nodra ivakaraitaki ca o ira na tukuna tiko nira lotu vaKarisito. Eso tale era rogoca na itukutuku lasutaki me baleta noda vakabauta. Era rairai vakasewasewani ena vanua era tiko kina se vei ira na lewe ni nodra vuvale nira rogoci keda.

De dua era sega ni veiciqomi eso ena cakacaka vakaitalatala ena veika rarawataki era sotava. E kaya o Kim, e dua na tacida yalewa daukaulotu: “Ena dua na neitou yalava, levu era bula donuya mai na ivalu mani vakarusai kece na ka era taukena. Sa sega tale ni dua na ka era vakanuinui kina. Era lomaleqa, era sega tale ga ni nuitaka e dua. Ena vanua qo keimami dau sotavi ira na sega ni taleitaka na noda itukutuku. Dua na gauna au vakarerei niu vunau tiko.”

E vakaraitaka tiko ga vakacava o Kim na nona loloma ena ituvaki qori? E kaya: “Niu vakacacani, au dau vakasamataka na Vosa Vakaibalebale 19:11, e kaya: ‘Na nona yalomatua na tamata e berabera kina ni cudru.’ Niu vakasamataka tiko na kedra ituvaki ena neitou yalava, e uqeti au meu lomani ira. Era sega ni ca kece o ira na tiko ena yalava,  eso mada ga era tataleitaki.”

Eda rawa ni taroga, ‘Keu tiko ena yalava, cava au na cakava niu rogoca na itukutuku vinaka?’ Kena ivakaraitaki, vakacava ke dau tukuni vei au na itukutuku lasutaki me baleti ira na iVakadinadina i Jiova? De dua eda na sega tale ga ni kauai, ena vinakati meda lomani. Nida vakasamataka na ivakaro i Jisu meda cakava ga na ka eda vinakata me caka vei keda, eda na loloma tiko ga ni dredre na ituvaki.—Maciu 7:12.

VAKATOTOMURIA NA LOLOMA I PAULA

Na yapositolo o Paula e dau lomani ira na dauveitusaqati voravora. Na vuna? Ni qori sara ga na ka e dau cakava. E kaya: Au “dau vosabeca na Kalou, au dau veivakacacani, au qai dau veibeci. Ia au lomani baleta niu a lecaika, au vakayacora na ka kece qori niu a se sega ni vakabauta.” (1 Tim. 1:13) E kila ni rau lomani koya vakalevu o Jiova kei Jisu. E raica sara ga na nona itovo makawa vei ira e vunau kina.

Ena so na gauna, e raica o Paula eso na ivakarau sa vakawakana tu. Na cava e cakava? E volatukutukutaki ena Cakacaka 17:16 ni tiko mai Aceni o Paula, “e votivoti sara ga vua ni raica na sinai ni koro ena matakau.”  Ia e vakayagataka o Paula na ituvaki qori me vunau kina vakavinaka. (Caka. 17:22, 23) E veisautaka na iwalewale ni nona vunau me ganita na kedra ituvaki na duikaikai me rawa ni “bau vakabula kina eso.”—1 Kor. 9:20-23.

Eda rawa ni vakatotomuri Paula nida kila na rai cala kei na ivakavuvuli lasutaki eda dau rogoca, da qai maqosataka ni wasea na “itukutuku vinaka ni ka vinaka.” (Aisea 52:7) E kaya e dua na tacida o Dorothy: “Ena neitou yalava, levu era vakabauta ni sega ni dauloloma na Kalou, e dau veivakalewai. Au vakacaucautaki ira ena dei ni nodra vakabauta na Kalou, oti au dusimaki ira sara ena ka e tukuna na iVolatabu me baleti Jiova ni dauloloma kei na veika e yalataka ena gauna se bera mai.”

“RAWA TIKO GA NA CA ENA VINAKA”

Nida bula tu ena “iotioti ni veisiga,” meda namaka ni na “qai torosobu ga” na nodra ivalavala o ira eda vunau kina. (2 Tim. 3:1, 13) Ia me kua ni vakaseavutaka na noda marau se na noda loloma. Ena vakaukauataki keda o Jiova meda “rawa tiko ga na ca ena vinaka.” (Roma 12:21) E kaya e dua na painia o Jessica: “Au dau sotava e levu era sega ni yalomalumalumu, era beci keda kei na noda itukutuku. E dau votivoti sara ga. Niu tekivuna na veivosaki, au dau masu lo vei Jiova qai kerea me tiko vei au na nona rai me baleti koya keirau veivosaki. E uqeti au qori meu kua ni kauaitaka ga na ivakarau ni lomaqu, ia meu vakasamataka na sala meu vukei koya kina.”

Eda vaqarai ira tiko ga na yalomalumalumu era muria na sala ni bula tawamudu

Era taleitaka eso na noda sasaga mera vukei vakayalo

E dodonu meda vakasamataka tale ga na sala meda vakayaloqaqataki ira kina eda cakacaka vata. E kaya o Jessica: “Ke sega ni vinaka na ituvaki, au sega ni via vakasamataka tiko ga. Au dau veitalanoataka eso na ulutaga veiuqeti me vaka na veika vinaka ena cakacaka vakaitalatala nira sega mada ga ni kauai eso.”

E kila vinaka o Jiova na veika dredre eda sotava ena cakacaka vakaitalatala. Sa na marau mada ga nida vakatotomuria na nona dauloloma! (Luke 6:36) Ena sega ni loloma tu ga o Jiova me tawamudu. Eda nuidei ni kila vinaka na gauna donu me vakarusa kina na ituvaki ca qo. Me yacova na gauna ya, se vakatotolotaki tiko ga na noda vunau. (2 Tim. 4:2) Meda gumatua mada ga ena noda ilesilesi da qai lomani ira na “tamata kece ga.”