Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Taro na Dauwiliwili

Taro na Dauwiliwili

Vakacava eda rawa ni vakaiyaragi na lotu vaKarisito, me vaka na dakai leka se dakai balavu, me taqomaki keda vei ira na tamata?

Eda na rairai saga na lotu vaKarisito eso na sala meda taqomaki kina, ia eda na muria tiko ga na ivakavuvuli vakaivolatabu. Qo eso na ka me nanumi me baleta na kena vakayagataki me itataqomaki na iyaragi me vaka na dakai leka, dakai balavu se so tale:

E ka tabu ena mata i Jiova na bula​—vakabibi na bula ni tamata. E kila na daunisame ni “ivurevure ni bula” o Jiova. (Same 36:9) Ke nanuma e dua na lotu vaKarisito me taqomaki koya kei na ka e taukena, ena saga ena nona vinaka kece me kua ga ni vakamatea e dua se vakadavedra.​—Vkru. 22:8; Same 51:14.

Levu na iyaragi eda vakayagataka e rawa ni tini ena vakadavedra, ia na dakai e vakarawarawataka sara tu ga na veivakamatei, rawa mada ga ni vakacalaka se nakiti. * Ke vakasagai keda e dua ni sa cudru rawa tiko, ke qai raica tale nida vakaiyaragi tu, e rawa ni tini ca sara se me mate kina e dua.

Ni tukuna o Jisu ena iotioti ni bogi vei ratou nona imuri me ratou vakaiseleiwau, a sega ni vakasamataka tiko me nodratou itataqomaki qori. (Luke 22:36, 38) Ia a kaya me ratou kauta mai na iseleiwau me vakavulici ratou me ratou kua ni valavala kaukaua ni ratou vakacudrui. (Luke 22:52) Ni vakayagataka o Pita na iseleiwau vua na dauveiqaravi  ni bete levu, a vakaroti Pita o Jisu: “Daramaka tale na nomu iseleiwau ina kena taga.” Oti sa qai tukuna o Jisu na ka dina qori e ivakavuvuli vei ira nona imuri me yacova nikua: “Nira na mate ena iseleiwau o ira era vakayagataka na iseleiwau.”—Maciu 26:51, 52.

Me salavata kei na Maika 4:3, o ira na tamata ni Kalou era na “tukitukia na nodra iseleiwau me batinisiviyara.” Qo na ka era na kilai tani kina na lotu vaKarisito, e salavata kei na vosa veiuqeti ni yapositolo o Paula: “Kua ni sauma na ca e caka vei kemuni. . . . Ke rawa, saga moni veiyaloni kei ira na tamata kece.” (Roma 12:17, 18) Levu na ituvaki dredre e sotava o Paula, okati kina na kena “ririkotaki” nona bula “vei ira na daubutako,” ia e cakava sara ga na ka e kaya, e sega ni vakabibitaka nona taqomaki, e bibi ga vua me muria na ivakavuvuli vakaivolatabu. (2 Kor. 11:26) E nuitaka na Kalou kei na vuku ena nona Vosa​—na vuku e “vinaka” cake mai na “iyaragi ni ivalu.”—Dauv. 9:18.

Eda raica vakabibi na lotu vaKarisito na bula mai na iyau vakayago. “Ena sega ni vakatau na nona bula [e dua] ena veika e taukena.” (Luke 12:15) Koya gona ke ra via butako eso, dina nida sa vosa vakayalovinaka, meda muria na lotu vaKarisito na ivakasala vuku i Jisu: “Kua ni vorata na daucaka ca.” Io, ena rairai vinakati kina meda solia noda isulu e sau se veika eda taukena. (Maciu 5:39, 40; Luke 6:29) * Na iwali vinaka duadua ga na qaqarauni. Ke da qarauna se cata na ‘dokadokataki ni ka eda taukena,’ ra qai kilai keda o ira eda tiko veitikivi nida iVakadinadina i Jiova dauveiyaloni, de dua era na sega ni taketetaki keda na daubasulawa voravora.—1 Joni 2:16; Vkai. 18:10

Era doka na lotu vaKarisito nodra lewaeloma eso tale. (Roma 14:21) Ke ra kila eso na lewe ni ivavakoso ni tiko noda dakai meda taqomaki keda kina vei ira eso tale, era na rairai kurabui se tarabe. Na loloma ena uqeti keda meda vakaliuca na ka era vinakata eso tale, ke vinakati mada ga kina meda vakuai keda ena so na ka eda nanuma ni donu vakalawa.—1 Kor. 10:32, 33; 13:4, 5.

Era saga na lotu vaKarisito mera ivakaraitaki. (2 Kor. 4:2; 1 Pita 5:2, 3) Ke vakasalataki oti e dua na lotu vaKarisito qai maroroya tiko ga na dakai me taqomaki koya kina vei ira na tamata, sa na sega ni ivakaraitaki vinaka o koya. Sa na sega ni rawata na ivakatagedegede, sa na sega ni lesi ena itavi lavotaki ena ivavakoso. E dina tale ga qori vua e dua na lotu vaKarisito e vinakati me vakadakai ena nona vanua ni cakacaka. Sa na vinaka ga me qara e dua tale nona cakacaka! *

Ena vakatulewa yadua na lotu vaKarisito ena sala me taqomaki koya kina, ratou nona vuvale kei na ka e taukena, vaka tale ga kina na cakacaka e digia. E kilai mai na ivakavuvuli vakaivolatabu nona vuku na Kalou kei na nona lomani keda. Nida doka na lotu vaKarisito na nona ivakavuvuli, eda na sega ni vakayagataka se maroroya na dakai me taqomaki keda vei ira na so tale na tamata. Eda nuidei nira na vakila o ira na vakararavi vua na Kalou na veisaututaki dina qai tawamudu, qori nira muria nona ivakavuvuli vakaivolatabu.—Same 97:10; Vkai. 1:33; 2:6, 7.

Ena veivakararawataki levu, eda na nuitaki Jiova ga, eda na sega ni vala meda taqomaki keda

^ para. 3 Ena rairai vakatulewataka e dua na lotu vaKarisito me vakaiyaragi (me vaka na dakai leka se dakai balavu) me vakasasa manumanu me kakana se taqomaki koya mai na manumanu kila. Ke sega ni vakayagataki na iyaragi va qori, me kau tani na kena sicini, se me sere, me maroroi tale ga. Ke sega ni vakatarai vakalawa me taukeni na dakai, se tiko na kena vakatatabu se lawa, mera muria qori na lotu vaKarisito.—Roma 13:1.

^ para. 2 Me baleta na ka e rawa ni cakava e dua me taqomaki koya mai na kucu, raica na ulutaga “How to Prevent Rape” (iTataqomaki Mai na Kucu) ena itabataba ni Awake! ni Maji 8, 1993.

^ para. 4 Me ikuri ni ivakamacala me baleta na ciqomi se sega ni cakacaka e vinakati kina na vakadakai, raica na Vale ni Vakatawa 1 Noveba, 2005, t. 31; kei na Watchtower Julai 15, 1983, t. 25-26.