Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

“Tagi Vata kei Ira Era Tagi”

“Tagi Vata kei Ira Era Tagi”

“Moni veivakayaloqaqataki tiko, moni veivakauqeti.”​—1 CES. 5:11.

SERE: 90, 111

1, 2. Na cava meda veivosakitaka kina na sala mera vakacegui kina na lolosi tu? (Raica na imatai ni iyaloyalo.)

E TUKUNA o Susi: “Ni oti e dua na yabaki na takali ni luvei keirau tagane, keirau sa qai vakila na mosi.” E tukuna e dua tale na lotu vaKarisito ni gauna e takali vakasauri kina o watina, e “sega ni tukuni rawa na vusolo ni lomana.” Ka ni rarawa nira vakila tale tu ga qori e levu. Levu na tacida era rairai sega ni namaka me yaco qori ni bera na Amaketoni. Ke sa takali e dua o daulomana se o kila ni lolosi tiko e dua, o na rairai vaqaqa: ‘Era na vakacegui vakacava o ira na lolosi tiko?’

2 De dua eda sa rogoca ni na oti ga na lolosi ni toso na gauna. Vakacava e dina qori? E kaya e dua na yada, “Au raica ni veivuke vakalevu na ka e cakava e dua ni toso na gauna.” Me vaka ga na mavoa, ena seavu vakamalua na mosi ni lomada ke kauaitaki vakayalololoma. Era na vakacegui vakacava na lolosi tu?

 O JIOVA​—“NA KALOU E DAU VAKACEGUI KEDA ENA KA KECE”

3, 4. Na cava eda nuidei kina ni kila vinaka o Jiova nodra vinakata na lolosi tu mera vakacegui?

3 O Jiova duadua ga na Tamada vakalomalagi e vu ni vakacegu dina. (Wilika 2 Korinica 1:3, 4.) E ivakaraitaki vinaka duadua ni yalololoma o Jiova, me vaka e vakadeitaka vei ira nona tamata: “O yau ga au na vakacegui kemuni.”​—Aisea 51:12; Same 119:50, 52, 76.

4 Na Tamada dauloloma qo e vakila tale ga na nodra takali eso e daulomana, me vakataki Eparama, Aisake, Jekope, Mosese kei Tui Tevita. (Tiko 12:6-8; Maciu 22:31, 32; Caka. 13:22) E vakadeitaka na Vosa ni Kalou ni vakanamata tu o Jiova ena gauna ena vakaturi ratou tale kina, ni qori na ka sara ga e via cakava tu. (Jope 14:14, 15) Eratou na marau qai bulabula vinaka. Me nanumi tale ga ni a mate vakaloloma na Luvena lomani na Kalou e dau ‘taleitaka vakalevu.’ (Vkai. 8:22, 30) E sega ni vakamacalataki rawa na nona rarawa o Jiova.​—Joni 5:20; 10:17.

5, 6. Ena vakacegui keda vakacava o Jiova?

5 Eda nuidei ni na vukei keda o Jiova. Meda kua gona ni tusuka ni talaucaka na ka eda lolositaka tiko vua ena masu. E veivakacegui dina ni kila o Jiova na noda rarawa, ena vakarautaka tale ga na veivakacegui eda vinakata! Ia e cakava vakacava qori?

6 Dua na sala oya nona vakayagataka na “veivakacegui ni yalo tabu.” (Caka. 9:31) Na yalo tabu e dua dina na ivurevure levu ni vakacegu. E yalataka o Jisu ni na “solia” na Tamana vakalomalagi “na yalo tabu vei ira era kerea vua.” (Luke 11:13) E kaya o Susi a tukuni taumada: “Levu na gauna keitou dau tekiduru ena masu me vakacegui keitou o Jiova. Na gauna taucoko qori, e taqomaka na loma i keitou kei na neitou vakasama na vakacegu ni Kalou.”​—Wilika Filipai 4:6, 7.

O JISU​—NA BETE LEVU DAULOLOMA

7, 8. Na cava eda nuidei kina ni na vakacegui keda o Jisu?

7 Na nona dauveikauaitaki vakayalololoma o Jiova e vakavotui vinaka sara ga ena loloma i Luvena o Jisu, kei na ka e cakava ni tiko e vuravura. (Joni 5:19) E talai mai me vakacegui ira “na vusolo na lomadra” kei ira “kece na tagi.” (Aisea 61:1, 2; Luke 4:17-21) E kilai o Jisu ena levu ni nona dauloloma—nona veinanumi qai kila vinaka nodra rarawa na tamata, kei na nona via vakacegui ira sara ga mai vu ni lomana.​—Iper. 2:17.

8 Ni se cauravou lailai o Jisu, de dua a takali eso na lewe ni nona vuvale se o ira nona veikilai. A rairai takali o Josefa na tamana vakacabecabe ni se gone. * Vakasamataka mada na nona lolosi na gonetagane dauloloma o Jisu ni se itabagone se yabaki 20 vakacaca, vaka kina o tinana, ratou na tacina kei na ganena.

9. E vakaraitaka vakacava o Jisu na loloma ni sa mate o Lasarusa?

 9 Ni gole ena cakacaka vakaitalatala, e dau vakaraitaka na yalomatua kei na veinanumi. Kena ivakaraitaki ni mate na nona itokani voleka o Lasarusa. A kila o Jisu ni na vakaturi Lasarusa, ia e vakila na nodrau rarawa o Meri kei Marica. Na levu ni nona loloma, e luluvu sara ga kina qai tagi.​—Joni 11:33-36.

10. Na cava eda nuidei kina ni na lomani keda nikua o Jisu?

10 E yaga vakacava vei keda nikua na vosa ni veivakacegui i Jisu kei na nona loloma? E vakadeitaka na Vosa ni Kalou ni “dua tu ga o Jisu Karisito enanoa, nikua, me tawamudu.” (Iper. 13:8) E kila vinaka “na iLiuliu Levu ni bula” na ka e yaco nida lolosi, “e rawa ni vukei ira eso tale nira vakatovolei.” (Caka. 3:15; Iper. 2:10, 18) Eda nuidei gona ni dau tarai Karisito na noda rarawa, e kila noda lolosi, e vakacegui keda tale ga ‘ena kena gauna.’​—Wilika Iperiu 4:15, 16.

“VAKACEGUI MAI NA VEIKA E VOLAI ENA IVOLATABU”

11. Na tikinivolatabu cava e dau vakacegui iko?

11 Na italanoa ni nona rarawa o Jisu ni mate o Lasarusa e dua wale ga na ivakaraitaki e kune ena vosa ni veivakacegui ni Kalou. Sa rauta ni “ka kece e volai e liu e volai meda vakavulici kina, me noda na inuinui e rawati mai na noda vosota kei na noda vakacegui mai na veika e volai ena iVolatabu.” (Roma 15:4) Ke o lolosi tiko, e rawa tale ga ni vakacegui iko na veitikinivolatabu qo:

  • “E voleka o Jiova vei ira sa ramusu na lomadra.”​—Same 34:18, 19.

  • “Ni bikai au na nuiqawaqawa, oni vakacegui au [Jiova] qai vakayaloqaqataki au.”​—Same 94:19.

  • “Na noda Turaga o Jisu Karisito kei na Kalou na Tamada, o koya e lomani keda, e dau vakacegui keda me tawamudu, e vakarautaka vei keda na inuinui ena vuku ni loloma soli wale, me vakaceguya mada ga na lomamuni, me vakataudeitaki [iko].”​—2 Ces. 2:16, 17. *

NA IVAVAKOSO​—IVUREVURE VINAKA NI VEIVAKACEGUI

12. Na cava e dua na sala eda rawa ni vakacegui ira kina eso tale?

12 Dua tale na ivurevure ni veivakacegui na ivavakoso vaKarisito. (Wilika 1 Cesalonaika 5:11.) O rawa vakacava ni vu ni veivakaukauataki kei na vakacegu vei ira na “yalorarawa”? (Vkai. 17:22) Me nanumi ni tiko na “gauna ni tikolo kei na gauna ni vosa.” (Dauv. 3:7) E tukuna e dua na yada o Dalene: “Mera kua ni kinoca nodra rarawa na lolosi tu. Bibi gona meda vakarogoci ira, meda kua ni muduka koso nodra ivakamacala.” E tukuna o Junia a vakamatei koya ga o tacina: “O na rairai sega ni kila vinaka sara nodra lolosi tiko, bibi ga ni o via kila na ivakarau ni lomadra.”

13. Na cava meda nanuma tiko ni lolosi e dua?

13 Meda nanuma tale ga ni duidui na sala eda dau vakaraitaka kina noda lolosi. Ena so na gauna era na kinoca tiko ga na vusolo ni lomadra, dredre kina mera talaucaka. E kaya na Vosa ni  Kalou: “Na loma ni tamata e kila na nona rarawa, e sega ni dua na vulagi erau marau vata.” (Vkai. 14:10) Ke talaucaka mada ga na lomana e dua, ena dredre me kilai na ka e via tukuna tiko.

14. E rawa ni veivakacegui vakacava na ka eda tukuna vei ira na lolosi?

14 Sa rauta meda dau sega ni kila na ka meda kaya vei ira na lolosi tiko. Ia e kaya na iVolatabu ni “yamedra na vuku e veivakabulai.” (Vkai. 12:18) Levu e vakacegui ira nodra wilika na brochure Ni Mate e Dua na Wekamu Voleka. * Ena levu na gauna, ena veivuke vakalevu meda “tagi vata kei ira era tagi.” (Roma 12:15) E kaya o Gaby: “Sa ivakarau tu ga ni noqu bula na tagi. Dau veivakacegui nira tagi vata kei au na noqu itokani. Au sega kina ni galili niu lolosi tiko.”

15. Ni dredre meda tukuna e dua na ka, na cava tale eda rawa ni cakava? (Raica tale ga na kato “ Vosa ni Veivakacegui.”)

15 Ke dredre mo tukuna e dua na ka, de rawarawa cake mo vakauta ga vua e dua na kad, imeli, vakauitukutuku ena talevoni se ivola. O rawa ni vola e dua na tikinivolatabu veivakacegui, nona itovo talei se ka e dau kilai tu kina o koya sa takali, se ka marautaki o nanuma me baleti koya. E kaya o Junia: “E dau veiuqeti sara ga vakalevu na itukutuku leleka va qori se nodra veisureti na tacida. Na veivosa qori au vakila kina niu lomani, au kauaitaki tale ga.”

16. Na cava e yaga duadua nida veivakacegui?

16 Kua ni nanuma ni sega ni yaga  na nomu masulaki koya e lolosi tiko se nomudrau masu vata. De dua ena dredre nida masu ena gauna rarawataki va qori, ia nomu masulaki koya mai vu ni lomamu, de tuturu na wai ni matamu ni o luluvu salavata kei na ninini ni domomu, qori e rawa ni iwali vinaka ni lolosi. E nanuma lesu o Dalene: “Eso na gauna nira dauvakacegui au na taciqu yalewa, au dau kerei ira ke rawa nira masu. E dredre toka nira se qai tekivu masu, ia ni vakacagau tiko, sa qai dei na domodra, e vu tale ga mai lomadra. E veivakayaloqaqataki na dei ni nodra vakabauta, loloma kei na nodra veikauaitaki.”

VEIVAKACEGUI TIKO GA

17-19. Na cava e vinakati tiko ga kina na veivakacegui?

17 E dau duidui na balavu ni nona lolosi e dua. Meda tu vakarau gona ni veivakacegui, sega ni oti ga e vica na siga nira se tiko na itokani kei na weka, ia me caka tiko ga qori ena vica na vula e tarava nira sa dui tomana tale na kena vo na nodra cakacaka ni veisiga. “Na itokani dina e loloma ena veigauna, e tacida ena gauna ni rarawa.” (Vkai. 17:17) Ena balavu ni gauna e lolosi tiko kina e dua, e rawa sara ga nira ivurevure vinaka ni veivakacegui na lotu vaKarisito.​—Wilika 1 Cesalonaika 3:7.

18 Me nanumi ni tiko na ka e dau vakavuna nodra lolosi, me vaka na ivakananumi ni so na ka era dau cakava vata, so na sere, itaba, ka era dau marautaka vata, se so mada ga na iboi, rorogo se dua na gauna ena loma ni yabaki. Ke vakawati ena mosimosi nona gole duadua o isa ni vakawati ina soqo ni tabacakacaka se soqo ni iVakananumi. E kaya e dua na tacida tagane: “Au namaka ni na sega ni marautaki na imatai ni yabaki meu vakananuma taudua kina na neirau vakawati, e sega ni rawarawa dina. Ia era tuvanaka eso na tacida e dua na soqo lailai, era sureti ira na noqu itokani voleka, meu kua kina ni vakananuma duadua.”

19 Me nanumi tiko mera kua ni qai vakayaloqaqataki ga na lolosi ni caka e dua na soqo va qori. E kaya o Junia: “E dau yaga vakalevu na veivuke kei na veitokoni ena so tale na gauna. Na gauna va qori e talei qai dau veivakacegui dina.” Macala ga nida sega ni rawa ni kauta laivi vakadua nodra lolosi se vakaisosomitaka nodra galili, ia eda rawa ni vakacegui ira ga, qai vakauqeti ira ena ka eda cakava. (1 Joni 3:18) E nanuma lesu o Gaby: “Au vakavinavinakataki Jiova ena vukudra na qase ni ivavakoso dauloloma, era vukei au ena gauna dredre kece. Era vukei au meu vakila na liga loloma i Jiova.”

20. Na cava e veivakacegui kina na yalayala i Jiova?

20 E veivakacegui dina noda kila ni o Jiova e Kalou ni vakacegu ena vakaotia vakadua na lolosi kece, qai vakarautaka na vakacegu dina nira ‘rogoca na domo i Jisu o ira kece na tu ena ibulubulu nanumi!’ (Joni 5:28, 29) E yalataka na Kalou ni na “vakaotia vakadua o koya na mate, ena qusia na Turaga Cecere Duadua o Jiova na wainimata mai na matadra kece.” (Aisea 25:8, vmr.) Sa da na sega ni “tagi vata kei ira era tagi,” ni o ira kece na lewe i vuravura era na “marau vata kei ira era marau.”​—Roma 12:15.

^ para. 8 Na iotioti ni gauna e cavuti kina o Josefa ni se qai yabaki 12 o Jisu. E sega tale ga ni cavuti na yacana ena imatai ni nona cakamana o Jisu ni vukica na wai me waini, vaka kina na veika e qai yaco tarava. Ni rube tu ena kaunirarawa, e tataunaki Meri vua na yapositolo o Joni, ena sega ni cakava qori ke se bula tiko o Josefa.​—Joni 19:26, 27.

^ para. 14 Raica tale ga na ulutaga “Vakacegui Ira na Lolosi, me Vaka a Cakava o Jisu,” ena ilavelave ni Vale ni Vakatawa ni 1 Noveba, 2010.