Raica sara na lewena

Raica na lewenivola

“Me . . . Vakayacora Kece na Nomu Lalawa”

“Me . . . Vakayacora Kece na Nomu Lalawa”

“Mo rekitaki Jiova, ena qai solia vei iko na veika e gadreva na lomamu.”​—SAME 37:4.

SERE: 135, 81

1. Na cava mera vakatulewataka na itabagone me baleta nodra gauna se bera mai? Cava mera kua kina ni yalolailai? (Raica na imatai ni iyaloyalo.)

RA ITABAGONE, oni na rairai kila ni ka vakayalomatua moni lalawataka vinaka na ka moni cakava ni bera ni oni vakatulewa. Na nomuni bula e vaka e dua na ilakolako, e vinaka gona moni vakatulewa ni oni se itabagone. Ia ena sega ni ka rawarawa qori. E tukuna e dua na goneyalewa o Heather: “E sega ni rawarawa baleta ni o na vakatulewataka na ka mo cakava ena vo ni nomu bula taucoko.” Ia kua ni yalolailai, ni kaya o Jiova vei ira nona tamata: “Kua ni taqaya niu nomu Kalou. Au na vakaukauataki iko, io, au na vukei iko.”​—Aisea 41:10.

2. O kila vakacava ni vinakata o Jiova mo lalawataka nomu veigauna e se bera mai?

2 E kerei kemuni o Jiova moni lalawataka vinaka nomuni veigauna se bera mai. (Dauv. 12:1; Maciu 6:20) E vinakata moni marau. E vakadinadinataki qori ena veika totoka e bulia, na ka eda rogoca, kei na ka eda tovolea. Vakasamataka tale ga na nona dau veikauaitaki kei na nona vakavulici keda ena sala vinaka duadua ni bula. Ia e kaya o Jiova vei ira na cata nona veivakavulici: “Oni digia na ka au sega ni taleitaka. . . . Raica!  Era na marau na noqu tamata, oni na madua. Raica! Era na kaila ena marau na noqu tamata ni vinaka na lomadra.” (Aisea 65:12-14) E vakalagilagi o Jiova nida vakatulewa vinaka.​—Vkai. 27:11.

LALAWA ENA VAKAMARAUTAKI IKO

3. Na cava e vinakata o Jiova mo cakava?

3 Na cava e vinakata o Jiova mo cakava? E buli keda meda marautaka noda kilai koya, kei na noda qaravi koya ena yalodina. (Same 128:1; Maciu 5:3) E duidui sara ni vakatauvatani kei na manumanu e bulia, nira kana ga, gunu ra vakaluveni. E sega ni vinakata na Kalou mo lalawataka na veika era dau marautaka na manumanu. Nanuma ni “Kalou dauloloma” na Dauveibuli, e “Kalou mamarau,” e buli keda meda ‘ucui koya.’ (2 Kor. 13:11; 1 Tim. 1:11; Vkte. 1:27) O na marau ni vakatotomuria na noda Kalou dauloloma. Macala ga ni o sa na vakadinata na tikinivolatabu qo: “E marau vakalevu o koya e solia na ka, vakalailai o koya e taura na ka.” (Caka. 20:35) Qori sara ga na ka e dau yaco ena noda bula. Koya gona, e vinakata sara ga o Jiova me laurai ena ka o na via cakava na nomu lomani ira na tamata kei na Kalou.​—Wilika Maciu 22:36-39.

4, 5. Na cava e vakamarautaki Jisu?

4 E kotora o Jisu Karisito na ivakaraitaki uasivi vei kemuni na itabagone. Ni se gone o Jisu, e dau qito, e marautaka tale ga nona bula. E tukuna na Vosa ni Kalou ni tiko “na gauna ni dredre . . . kei na gauna ni meke.” (Dauv. 3:4) E toro volekati Jiova tale ga o Jisu ena nona vulica na iVolatabu. Ni se qai yabaki 12, era kurabuitaka na qasenivuli e valenisoro na “ka e kila kei na nona isaunitaro” ena ka e vauca na veika vakayalo.​—Luke 2:42, 46, 47.

5 E marau tale ga o Jisu ni sa uabula. Cava e vakamarautaki koya? E kila ni vinakata na Kalou me ‘vunautaka na itukutuku vinaka vei ira na dravudravua ra qai rai na mataboko.’ (Luke 4:18) E vakamarautaki koya nona cakava na ka e tukuna vua na Kalou. E vakaraitaka na lomana ena Same 40:8: “Na noqu Kalou, au marautaka vakalevu meu cakava na lomamuni.” E taleitaka tale ga o Jisu me vakavulici ira na tamata me baleta na Tamana vakalomalagi. (Wilika Luke 10:21.) Dua na gauna ni vakavulica tiko o Jisu e dua na marama me baleta na sokalou dina, e kaya vei ratou nona tisaipeli: “Na qau kakana meu cakava na loma i koya e talai au mai, meu vakaotia tale ga nona cakacaka.” (Joni 4:31-34) Io, e vakamarautaki Jisu nona lomana na Kalou kei ira na so tale. E rawa tale ga ni vakamarautaki iko qori.

6. Na cava e vinaka kina mo veitalanoataka kei ira na matua vakayalo na ka o na via cakava?

6 E levu na lotu vaKarisito era marautaka nodra bula vakaitabagone nira painia. Vakacava mo veitalanoataka kei ira na ka o na via cakava? “E seva na ka e nanumi ni sega na veivosaki.” (Vkai. 15:22) O ira na matua vakayalo va qori, era na tukuna vei iko ni na yaga ena nomu bula taucoko na veiqaravi vakatabakidua. Ni vakavulici Jisu oti o Tamana mai lomalagi, e tomana tiko ga nona vuli ena nona cakacaka vakaitalatala e vuravura. Kena ivakaraitaki, e vulica ni ka marautaki me uqeti ira na tamata na itukutuku vinaka, e ka marautaki tale ga me yalodina tiko ga ni vakatovolei. (Wilika Aisea 50:4; Iper. 5:8; 12:2) Meda veivosakitaka mada eso na tabana ni veiqaravi vakatabakidua ena vakamarautaki iko.

MARAUTAKI NA VEIVAKATISAIPELITAKI

7. Na cava era marautaka kina e levu na itabagone na veivakatisaipelitaki?

7 E tukuna o Jisu: “Ni lako moni vakavulici ira na lewe ni veivanua kece ga  mera tisaipeli.” (Maciu 28:19, 20) Ke o nanuma mo cakava qori, o sa digia tiko na cakacaka marautaki duadua, ni na vakalagilagi kina na Kalou. Me vaka ga na vo ni cakacaka, ena taura toka na gauna mo kenadau kina. Dua na gauna wale ga qo, e kaya e dua na tacida o Timothy a tekivu painia ni se itabagone: “Au taleitaka meu qaravi Jiova ena cakacaka vakatabakidua, niu vakaraitaka kina noqu lomani koya. Ni se qai tekivu, e dredre meu kunea e dua na vuli iVolatabu, ia au sa qai toki ena dua tale na yalava, e vica vata kina noqu vuli iVolatabu ena loma ga ni dua na vula. Dua vei ira na gonevuli qori sa tekivu soqoni. Ni oti noqu vuli vula rua ena Koronivuli ni Vuli iVolatabu ni Tagane Dawai, * au ciqoma e dua na ilesilesi vou, qai tekivu tale kina e va noqu vuli iVolatabu. Au taleitaka na veivakavulici, au raica ni yalo tabu e uqeti ira mera veisau.”​—1 Ces. 2:19.

8. Na cava era cakava eso na itabagone mera vakaitavi vakalevu ena veivakatisaipelitaki?

8 E vica na itabagone lotu vaKarisito era vulica eso tale na vosa. Kena ivakaraitaki, e vola o Jacob mai na Noca Amerika: “Niu se qai yabaki vitu, e levu noqu lewenikalasi era kai Vietnam, au via tukuna vei ira na ka me baleti Jiova, au nanuma kina meu vulica nodra vosa. Levu na gauna, au veidutaitaka ga na Vale ni Vakatawa vakavalagi kei na kena ena vosa vakaVietnam. Au veitokani tale ga kei ira na tacida ena ivavakoso voleka ena vosa vakaVietnam. Au tekivu painia sara niu yabaki 18. E muri, au vuli ena Koronivuli ni Vuli iVolatabu ni Tagane Dawai. E vukei au qori ena noqu cakacaka vakapainia nikua, niu qase ni ivavakoso duadua ena iwasewase lailai vosa vakaVietnam. Levu na kai Vietnam era qoroya niu vulica nodra vosa. Era dau sureti au, levu na gauna au vakavulici ira ena iVolatabu. Eso era toso sara mera papitaiso.”​—Vakatauvatana Cakacaka 2:7, 8.

9. Na cava eda kaya kina ni cakacaka ni veivakatisaipelitaki e vuli vinaka duadua?

9 Na cakacaka ni veivakatisaipelitaki ena vakavulici iko mo dau cakacaka, mo kenadau ena veivosaki, o na doudou vakalevu, ena vukei iko tale ga mo maqosa ena vosa. (Vkai. 21:5; 2 Tim. 2:24, vmr.) Ia e marautaki vakalevu na veivakatisaipelitaki ni o na kila vinaka kina na tikinivolatabu e yavutaki kina nomu vakabauta. O na vulica tale ga mo cakacaka vata kei Jiova.​—1 Kor. 3:9.

10. O na marautaka tiko ga vakacava na veivakatisaipelitaki ena yalava e sega ni vuavuaivinaka?

10 Ke lailai mada ga era taleitaka ena nomu yalava na itukutuku vinaka, o se rawa ga ni marautaka na cakacaka ni veivakatisaipelitaki. Me nanumi ni cakacaka qori e okati kina na cakacaka vata. Eda na gole na lewe ni ivavakoso ena yalava meda vaqarai ira na yalomalumalumu. De dua ena kune ga e dua na tataleitaki, yaco sara me tisaipeli. Ke mani kunea taudua qori e dua na tacida, eda vakaitavi kece na lewe ni ivavakoso ena vaqaqara, eda na marautaka vata. Kena ivakaraitaki, e ciwa na yabaki nona painia voli o Brandon ena yalava e sega ni vuavuaivinaka. E kaya: “Au taleitaka meu vunautaka na itukutuku vinaka ni kerei keda sara ga kina o Jiova. Au tekivu painia niu biu vuli oti ga. Au marautaka meu uqeti ira na itabagone ena ivavakoso, meu raica tale ga nodra toso vakayalo. Ni oti noqu vuli ena Koronivuli ni Vuli iVolatabu ni Tagane Dawai, au ciqoma e dua na ilesilesi vou vakapainia. Au se sega vakadua ni kunea e dua ena yalava, me yaco sara me papitaiso, ia eso tale era sa rawata. Au marau ga ni rawa niu lalawataka meu vakaitavi vakalevu ena cakacaka ni veivakatisaipelitaki.”​—Dauv. 11:6.

 YAGA NI SAUVI NA ISAUSAU

11. Na taba ni veiqaravi tabu cava era marautaka e levu na itabagone?

11 E levu na sala o rawa ni qaravi Jiova kina. Kena ivakaraitaki, levu na itabagone era bolecakacaka ena tabana ni tarataravaki. E vinakati e vica na drau na Vale ni Soqoni vou. E okati me veiqaravi tabu na tara ni vale me vakalagilagi kina na Kalou qai vu dina ni marau. Me vaka ga na vo ni veiqaravi tabu, eda na marautaka kina noda veimaliwai kei ira na tacida eda cakacaka vata. Levu tale ga na ka eda na vulica ena tarataravaki, me vaka na noda qaqarauni mai na vakacalaka, eda vulica meda daucakacaka, kei na noda tokoni ira na tacida era liutaki keda.

Era vakalougatataki vakalevu na veiqaravi vakatabakidua (Raica na parakaravu 11-13)

12. Na cava tale o rawa ni marautaka ni o painia?

12 E tukuna e dua na tacida o Kevin: “Niu se gonelailai, au dau vinakata meu qaravi Jiova vakatabakidua. Au tekivu painia niu sa yabaki 19. Me veivuke ena noqu painia, au cakacaka vagauna vua e dua na tacida e matai. Au vulica kina na kena tara na dokanivale, na kena vakacobari na luva kei na katuba. E muri au lewena na timi ni vakacoko me rua na yabaki, keimami tara tale kina na Vale ni Soqoni kei na nodra vale na tacida. Niu rogoca ni vinakati na tarataravaki e Sauca Aferika, au vakalewe fomu qai vakadonui meu gole. Ena loma ni vica ga na macawa, keimami dau tara kina e dua na Vale ni Soqoni e Aferika, oti keimami toki ina dua tale. Era vaka ga noqu vuvale o ira na lewe ni timi ni tarataravaki. Keimami tiko vata ga, keimami vulica vata na iVolatabu, qai cakacaka vata. Au marautaka tale ga meu vunau kei ira na taciqu ena vanua qo e veimacawa. Au a cakava na lalawa qori niu se gone, ia au sega ni bau tadra ni na va sara qo na noqu marau.”

13. Na cava era marautaka kina na itabagone na veiqaravi e Peceli?

13 Eso tale na itabagone era sa sauva nodra lalawa, era sa qaravi Jiova  vakatabakidua e Peceli. E marautaki na ivakarau ni veiqaravi e Peceli, ni ka o cakava e kea e baleti Jiova. Era veivuke na lewe ni vuvale e Peceli ena vakarautaki ni kakana vakayalo. E kaya o Dustin e dua na lewe ni vuvale e Peceli: “Niu se yabaki ciwa, sa noqu isausau voli meu painia niu biu vuli ga. Ni oti ga e dua veimama na yabaki, au sureti e Peceli, au vulica na kena vakayagataki na misini ni tabaivola, oti au vulica na ka e baleta na porokaramu ni kompiuta. Na ka e vinaka kina o Peceli, ni o rogoca sara ga kina e liu na toso ni cakacaka e vuravura raraba. Au marautaka na veiqaravi e ke, ni ka eda cakava e vukei ira na tamata mera toro voleka vei Jiova.”

CAVA NOMU LALAWA ENA VEIGAUNA SE BERA MAI?

14. Na cava mo cakava mo veiqaravi kina vakaitalatala vakatabakidua?

14 Na cava mo cakava mo veiqaravi kina vakaitalatala vakatabakidua? Me vuavuaivinaka nomu qaravi Jiova vakatabakidua, e bibi na itovo vakayalo. Mo vulica gona vagumatua na Vosa ni Kalou, vakasamataka vakatitobu na kena ibalebale, saga tale ga mo vakamacalataka nomu vakabauta ena soqoni vaKarisito. Ni o se vuli tiko e koronivuli, vakayagataka na gauna qori mo rawata kina na kila kei na veika ena vukei iko mo vunautaka na itukutuku vinaka. Vulica mo dau kauaitaki ira na tamata ni o taroga vakamaqosa na nodra rai qai rogoci ira. Mo vakaitavi tale ga ena samaki kei na vakavinakataki ni Vale ni Soqoni. E dau marautaka o Jiova me vakayagataki ira na yalomalumalumu ra qai yalorawarawa. (Wilika Same 110:3; Caka. 6:1-3) A sureti Timoci na yapositolo o Paula me veiqaravi vakadaukaulotu baleta ni “rogo vinaka o koya vei ira na veitacini.”​—Caka. 16:1-5.

15. O na lalawataka vakacava na ka mo bula kina?

15 E vinakati tale ga me tiko nodra ivurevure ni ilavo na via veiqaravi vakatabakidua. (Caka. 18:2, 3) De dua e tiko eso na vuli leleka e rawati kina na cakacaka vagauna ena vanua era tiko kina. Ke nomu isausau qori, mo taro ivakasala vua na nomu ivakatawa ni tabacakacaka kei ira na painia ena tabacakacaka o tiko kina. Taroga vei ira na cakacaka e yaga se veiganiti vei ira na painia. E kaya tale ga na iVolatabu, “Mo tataunaka vei Jiova na ka kece o cakava. Ena qai vakataudeitaki na nomu sasaga.”​—Vkai. 16:3; 20:18.

16. E vakarautaki iko vakacava nomu qaravi Jiova vakatabakidua ni o se gone mo qarava kina eso tale na itavi ena veigauna se bera mai?

16 Mo nuidei ni vinakata o Jiova mo marau ni “taura matua” na veigauna se bera mai. (Wilika 1 Timoci 6:18, 19.) Na nomu veiqaravi vakatabakidua o na cakacaka kina kei ira era veiqaravi tale tu ga vakatabakidua, ra qai vukei iko mo lotu vaKarisito matua. Levu tale ga era raica ni nodra qaravi Jiova vakatabakidua nira se itabagone, e vukei ira mera marautaka nodra bula vakawati. Levu era qai dau painia tale ga kei watidra.​—Roma 16:3, 4.

17, 18. E okati vakacava na lomamu ena nomu lalawa?

17 Na nomu lalawa ena okati tale ga kina na ivakarau ni lomamu. E kaya na Same 20:4 me baleti Jiova: “Me solia vei iko na ka e gadreva na lomamu.” Mo vakasamataka gona na veika o via cakava ena nomu bula. Dikeva na veika e cakava tiko o Jiova ena noda gauna kei na nomu rawa ni qaravi koya. Oti mo qai cakava na ka e vakamarautaki koya.

18 Na noda qaravi Jiova mai vu ni lomada ena vu ni veivakacegui baleta ni qori na bula e dokai kina na Kalou. Io, “mo rekitaki Jiova, ena qai solia vei iko na veika e gadreva na lomamu.”​—Same 37:4.

^ para. 7 Sa sosomitaka na Koronivuli ni iTalatala ni Matanitu.