Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

‘Na Vuna me Vakacaucautaki Kina o Ja!’

‘Na Vuna me Vakacaucautaki Kina o Ja!’

“Ni vakacaucautaki Ja! . . . E ka marautaki qai veiganiti me vakacaucautaki o koya!”​—SAME 147:1.

SERE: 59, 3

1-3. (a) Gauna cava a rairai volai kina na Same 147? (b) Na cava eda rawa ni vulica ena Same qori?

NI DUA e qarava vinaka na itavi e soli vua se laurai na totoka ni nona itovo vaKarisito, ena veiganiti me vakacaucautaki. Ke sa rawa nida cakava qori vua na tamata, sa qai wacava sara meda vakacaucautaka na Kalou o Jiova! Eda na vakacaucautaki koya ena vuku ni nona kaukaua vakaitamera, me vaka na nona ibulibuli vakasakiti se nona dau lomani keda me vaka nona vakarautaka na Luvena me isoro ni veivoli.

2 E uqeti o koya e vola na ika147 ni Same me vakacaucautaki Jiova. E uqeti ira tale ga eso mera tomani koya.​—Wilika Same 147:1, 7, 12.

3 Eda sega ni kila o koya e vola na same qo, de dua a bula tiko na daunisame qo ena gauna a vakalesui ira tale kina na Isireli o Jiova e Jerusalemi nira sereki mai Papiloni. (Same 147:2) Nodra vakalesui tale na tamata ni Kalou ina sokalou dina, e rairai uqeta na daunisame me vakacaucautaki Jiova. E tiko  eso tale na vuna e cakava kina qori. Na cava ya? Na cava mo kaya kina “Aleluya!”?​—Same 147:1, vmr.

O JIOVA E VAKABULAI IRA NA RAMUSU NA LOMADRA

4. Na cava nodra rai na Isireli ni sereki ira o Sairusi, na vuna?

4 Vakasamataka mada na nodra bula tu vakavesu mai Papiloni na Isireli. Sa ra qai veivakalialiai o ira na vesuki ira: “Lagata vei keimami e dua na sere kei Saioni.” Nira dau marautaki Jiova vakalevu ena vuku i Jerusalemi, ia ena gauna qo sa laladidi tu. (Same 137:1-3, 6) Era sega ni via lagasere na Jiu. E ramusu na lomadra, ra vinakata mera vakacegui, mera vakayaloqaqataki tale ga. E yaco dina na parofisai ni Kalou ni qai vakabulai ira o Sairusi na tui kei Perisia. E ravuti Papiloni qai kaya: “O Jiova . . . e lesi au tale ga meu tara e dua na nona vale e Jerusalemi . . . O koya ga e tiko vata kei kemuni na nona tamata, me tokoni koya mada ga o Jiova na nona Kalou, me lako cake o koya.” (2 Vei. 36:23) Qo e solia e dua na vakacegu levu vei ira na Isireli era vakaitikotiko e Papiloni!

5. Na cava e raica rawa na daunisame me baleta na kaukaua ni nona dauveivakabulai o Jiova?

5 E sega ni vakaceguya ga na matanitu o Isireli o Jiova, ia e vakacegui ira yadudua sara ga. E dina tale ga qori nikua. E vola na daunisame me baleta na Kalou: “E vakabulai ira na ramusu na lomadra, e vauca na nodra mavoa.” (Same 147:3) Io, o Jiova e kauaitaki ira na leqa tu vakayago se na ivakarau ni lomadra. Nikua, e tu vakarau o Jiova me vakacegui keda mai na rarawa ni lomada. (Same 34:18; Aisea 57:15) E solia vei keda na vuku kei na kaukaua meda vosota kina na ituvaki dredre cava ga eda sotava.​—Jeme. 1:5.

6. E yaga vakacava na kena veisau na ka e talanoataka na daunisame ena Same 147:4? (Raica na imatai ni iyaloyalo.)

6 E mani tacake e lomalagi na daunisame qai tukuna ni o Jiova e ‘wilika na levu ni kalokalo qai kacivi ira kece ena yacadra.’ (Same 147:4) Na cava sa veitalanoataki kina na veika vakalomalagi? Vakasamataka mada qo: E raica na veikalokalo na daunisame, ia e sega ni kila na kedra iwiliwili. Ena veiyabaki e tubu tiko ga na iwiliwili ni kalokalo. So era nanuma ni bilioni na kalokalo era tiko ena isoso kalokalo e vakatokai na Milky Way. Era tiko tale ga e tirilioni na isoso kalokalo ena lomalagi kei vuravura! Ia eda kila nida sega ni wilika rawa na kalokalo! O koya na Dauveibuli e kila vinaka na yacadra yadua se na vanua era tiko kina. Kena ibalebale qo ni bibi vei Jiova na kalokalo yadua. (1 Kor. 15:41) Vakacava o keda na kawatamata e vuravura? Ni kila na Kalou na kalokalo kece kei na vanua era tu kina ena dua na gauna, e kilai iko vinaka tale ga, qori na vanua o tiko kina, na ivakarau ni lomamu kei na ka o gadreva!

7, 8. (a) Na cava e dau kauaitaka o Jiova ni vakabulai ira nona tamata nira vakatovolei? (b) Vakamacalataka na yalololoma i Jiova ni vukei ira na kawatamata ivalavala ca.

7 O Jiova e sega ni kauaitaki iko wale ga, e tu tale ga vua na kaukaua me vukei iko ena nomu leqa, qai kilai iko vinaka. (Wilika Same 147:5.) O na rairai nanuma ni sa dredre sara ga na ituvaki o sotava tiko, o na sega ni taqea rawa nomu icolacola. E kila na Kalou na ka o sega ni rawata, ‘e nanuma tiko nida kuvuniqele.’ (Same 103:14) Nida sega ni uasivi, eda rawa ni sikalutu tiko ga ena noda cala makawa. Eda dau veivutunitaka ni lutu cala mai gusuda eso na ka, rawa ni basika vakalevu noda malumalumu se noda vuvutaki ira  eso tale! Ia e uasivi o Jiova; e sega ni katumi rawa se dikevi rawa na ka e kila me baleti keda!​—Aisea 40:28.

8 De dua o sa raica na veivuke ni liga i Jiova mo vosota kina eso na ka ni veivakatovolei. (Aisea 41:10, 13) Me kena ivakaraitaki o Kyoko, e dua na painia yalewa a yalolailai ni gole ena nona ilesilesi vou. E vakaraitaka vakacava o Jiova ni kila na nona leqa? E raica ena nona ilesilesi vou nira tokoni koya eso era kila na veika e tu e lomana. E vaka sara ga ni tukuna tiko vua o Jiova: “Au lomani iko, sega ni baleta ga ni o painia, ia o luvequ, o yalataki iko vei au. Au vinakata mo marautaka na bula ni o noqu iVakadinadina!” Ia e vakaraitaka vakacava vei iko o Koya e Kaukaua Duadua ni ‘sega ni katumi rawa na ka e kila’?

E VAKARAUTAKA O JIOVA NA KA EDA GADREVA

9, 10. Na cava e dau vakarautaka eliu o Jiova? Vakamacalataka.

9 De dua o na dau lomaleqataka na ka ni bula ni veisiga, me vaka na lailai ni kakana. Ia o Jiova e bulia na italetale me bula kina na kakana, e vakarautaka mada ga na kedra na reveni gone nira tagica! (Wilika Same 147:8, 9.) Ke sa rawa ni vakani ira tiko ga na reveni, mo nuidei ni na vakarautaka tale ga na veika vakayago o vinakata.​—Same 37:25.

10 Koya e bibi sara, ni vakarautaka na veika vakayalo o Jiova, eda na vakila “na vakacegu ni Kalou e uasivia na vakasama kece.” (Fpai. 4:6, 7) Me kena ivakaraitaki erau vakadinadinataka o Mutsuo kei watina nona veivakaukauataki o Jiova ni oti na ualoka e Japani ena 2011. Rau bula ga ni rau kaba e delanivale. Ena siga ya voleka ni yali kece na ka rau taukena. Rau lai tiko ena dua na rumu ena bogi batabata ena ikarua ni tabavale sa karusa tu. Ena mataka lailai rau qara na sala me rau vakayaloqaqataki kina. Na ivola ga erau kunea rawa na Yearbook of Jehovah’s Witnesses ni 2006. E lauta sara na mata i Mutsuo na ulutaga “The Deadliest Tsunamis Ever Recorded” (Na Ualoka Vakadomobula me Bau Volaitukutukutaki). E volaitukutukutaki kina na uneune a yaco e Sumatra ena 2004 qai vakavuna na ualoka vakadomobula. Rau veitagicaki o Mutsuo kei watina ni rau wilika tiko na irogo. Rau vakila na nona veikauaitaki vakayalololoma na Kalou ni vakarautaka na kakana vakayalo ena kena gauna donu. E vakarautaka tale ga vakayalololoma vei rau o Jiova na veika erau gadreva vakayago. Era vakarautaka na mataveitacini na ka ni veivuke. E qai vakayaloqaqataki rau sara vakalevu na nodra veisiko na mata era gole mai na isoqosoqo. E tukuna o Mutsuo: “Au vakila ni tiko sara ga e yasa i keirau o Jiova, qai kauaitaki keirau tiko. E veivakacegui dina!” Io, e dau vakacegui keda vakayalo eliu na Kalou, qai muri na ka vakayago.

NA KAUKAUA NI VEIVAKABULAI NI KALOU

11. Na cava e vinakati vei ira na nuitaka na kaukaua ni nona veivakabulai na Kalou?

11 E dau tu vakarau o Jiova me ‘vakaduria cake na yalomalua.’ (Same 147:6a) Ia ena yaga vakacava vei keda na nona tu vakarau ena vukuda? E dodonu me vinaka tiko ga na noda veiwekani kei koya. Me rawa qori, ena vinakati meda yalomalumalumu. (Sefa. 2:3) O ira na yalomalumalumu era na waraka ga na Kalou me vakadodonutaka na veika ca se tawadodonu e caka vei ira. Ena vakadonui ira kina o Jiova.

12, 13. (a) Me yaga vei keda na veivuke ni Kalou, na cava meda yawaka? (b) E marautaki cei o Jiova?

 12 Ena yasana adua “e bitalaka na daucaka ca ina qele” na Kalou. (Same 147:6b) E vosa kaukaua dina qori! Me yaga na dei ni nona loloma o Jiova me qai kua ni cudruvi keda, e dodonu meda cata na ka e cata. (Same 97:10) Me kena ivakaraitaki, meda cata na veiyacovi tawadodonu. Kena ibalebale qo meda yawaka na ka ena vakavuna noda caka cala, okati kina na iyaloyalo vakasisila. (Same 119:37; Maciu 5:28) Ena rairai dredre meda vorata qori, ia e yaga vakalevu noda sasaga nida na vakalougatataki kina.

13 Ena vinakati meda nuitaki Jiova ga nida vala tiko. Vakacava ena marautaka o koya nida via vakabulai keda ena “kaukaua ni ose,” oya na vanua era qara veivuke kina na tamata? Sega! Sega tale ga ni dodonu meda nuitaka “na kaukaua ni yava ni tamata,” me vaka sara ga eda rawa ni vakabulai keda, se dua tale. (Same 147:10) Meda torovi Jiova ga da qai cikeva na nona veivuke. O Jiova e sega ni tautauvata kei ira na daunivakasala nikua, e sega ni oca na rogoca noda kerekere, ke wasoma mada ga. “E dau marautaki ira na rerevaki koya o Jiova, o ira na waraka tiko na nona loloma e dei.” (Same 147:11) Eda rawa ni nuitaka na dei ni nona loloma, ena kabiti keda qai vukei keda meda vorata na gagadre ca.

14. Na cava e vakayaloqaqataki koya na daunisame?

14 E tukuna o Jiova na vuna vinaka meda vakadeitaka kina ni na vukei keda na nona tamata ena gauna eda gadreva kina. Nida vakasamataka tiko na kena vakatikori lesu o Jerusalemi, e lagata kina na daunisame me baleti Jiova: “E vakaukauataka o koya na ivakadei ni nomu matamatanikoro, e vakalougatataka na luvemu era tu vei iko. E kauta mai o koya na vakacegu ina nomu yasana.” (Same 147:13, 14) E vakanuideitaki koya na daunisame ena nona kila ni na vakaukauataka na matamatanikoro o Jiova mera taqomaki kina na nona dauveiqaravi!

Ena vukei keda vakacava na Vosa ni Kalou nida nuiqawaqawa ena vuku ni veivakatovolei? (Raica na parakaravu 15-17)

15-17. (a) Na cava eda dau vakila ena so na gauna nida vakatovolei, ia e vukei keda vakacava o Jiova ena nona Vosa? (b) Vakamacalataka e “cici vakatotolo” vakacava na ‘Vosa ni Kalou’?

15 O na rairai sotava eso na ituvaki dredre e vakavuna mo nuiqawaqawa. E rawa ni solia vei iko o Jiova na vuku mo vosota kina. E tukuna na daunisame me baleta na nona Kalou ni “tala o koya na nona ivakaro e vuravura, e cici vakatotolo na nona vosa.” E tukuna tarava me baleti Jiova ni ‘tala o koya na ucacevata, ceburaka na tegu cevata, viritaka sobu na nona ucaqereqere’ qai taroga na daunisame: “O cei ena vosota rawa na nona liliwa?” E kaya tale ni o Jiova “e tala yani o koya na nona vosa ra qai waicala.” (Same 147:15-18) Na noda Kalou vuku qai kaukaua duadua o Jiova, e lewa na uca kei na ucacevata, e rawa ni vukei keda meda vosota na ituvaki dredre kece eda sotava.

16 Nikua e dusimaki keda o Jiova ena nona Vosa na iVolatabu. E “cici vakatotolo na nona vosa” ni vakarautaka na veidusimaki vakayalo ena kena gauna donu. Vakasamataka mada na yaga ni nomu wili iVolatabu, nomu dikeva na ivola e vakarautaka “na dauveiqaravi yalodina e vuku,” na saravi ni JW Broadcasting, nomu rai ena jw.org, veivosaki kei ira na qase, vaka kina na nomu veimaliwai kei ira na mataveitacini. (Maciu 24:45) Vakacava o bau vakila na totolo ni nona veidusimaki o Jiova?

17 E vakila o Simone na kaukaua ni Vosa ni Kalou. A dau beci koya, me yacova ni sa  lai vakatitiqataka nona veivakadonui na Kalou. Ni yalolailai, e masu vagumatua ni golevi Jiova me vukei koya. E gumatua tale ga ena nona vulica na iVolatabu. E kaya, “Au dau vakila tu ga na nona kaukaua kei na nona veidusimaki o Jiova.” Qori na ka e vukei koya me donu tiko ga kina nona rai.

18. Na cava o nanuma kina ni na vakadonui iko na Kalou, cava o kaya kina me “Vakacaucautaki o Ja!”?

18 E kila na daunisame nira vakadonui na tamata ni Kalou ena gauna makawa. O ira ga qo na matanitu e soli vei ira na “vosa” ni Kalou vaka kina “nona lawa kei na lewa.” (Wilika Same 147:19, 20.) Eda kalougata nikua ni o keda ga eda vakatokayacataki vua na Kalou. Na nona kilai o Jiova kei na yaga ni nona Vosa ina noda bula, eda veiwekani vinaka kina kei koya. Me vakataki koya e vola na Same 147, e tiko tale ga na vuna vinaka mo kaya kina me “Vakacaucautaki o Ja!” qai uqeti ira tale ga kina eso tale.