Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Vakavinavinakataka na Loloma Soli Wale ni Kalou

Vakavinavinakataka na Loloma Soli Wale ni Kalou

‘Eda rawata na ka kece ena loloma soli wale e vakaikuritaki tiko ga.’—JONI 1:16.

SERE: 95, 13

1, 2. (a) Vakamacalataka na vosa vakatautauvata i Jisu me baleti koya na itaukei ni werenivaini. (b) E laurai vakacava ena vosa vakatautauvata qo na lomasavu kei na loloma soli wale?

E LAKO ena matakacaca na dautei vaini ina makete me vaqara tamata cakacaka ena nona loganivaini. Eso vei ira qori era vakadonuya na isau e lavaka, ra qai gole sara mera cakacaka. Se vinakati tiko ga me so tale na tamata cakacaka, mani lesu ina makete me qara eso qai lavaka na isau vata ga a lavaka vei ratou na kena imatai. Ni sa yakavi e kumuni ira kece na tamata cakacaka qai saumi ira vakatautauvata se ra mani cakacaka ena dua na aua se sivia. Era kudru na imatai ni ilawalawa nira rogoca na ka e cakava na itaukei ni cakacaka. E tukuna vei ira na dautei vaini: ‘E vakacava dou sega ni duavata ena isau au solia? Au lewa ga na noqu iyau, se vakacava? Dou matacataki au ena vuku ni noqu lomasoli?’—Maciu 20:1-15.

2 Na vosa vakatautauvata qo nei Jisu eda nanuma kina e dua na itovo talei i Jiova e cavuti wasoma ena iVolatabu, oya na nona “loloma soli wale.” [1] (Wilika 2 Korinica 6:1.) E sega ni ganiti ira na cakacaka ena dua na aua na isau ni dua na siga. E cakava ga qori na itaukei ni cakacaka ena levu ni nona  lomani ira. Dau vakadewataki vakalevu ena iVolatabu na “loloma soli wale” me “caka vinaka.” E vola e dua na dauvakadidike: “Na ibalebale ni vosa qo, oya ni soli na iloloma vua e dua e sega sara ga ni ganiti koya na iloloma ya.”

NONA LOMASAVU O JIOVA

3, 4. Na cava e vakaraitaka kina o Jiova na nona loloma soli wale, ena sala cava?

3 E vakamacalataki ena iVolatabu na “loloma soli wale ni Kalou.” (Efeso 3:7) Na cava e vakarautaka kina o Jiova na “loloma soli wale”? Sala cava e cakava kina qori? Ke uasivi noda muria na ivakatagedegede i Jiova ena qai ganiti keda nona loloma. Kena seva nida sega ni rawata qori. E vola kina na tui vuku o Solomoni: “E sega ni dua na tamata yalododonu e vuravura me vakayacora tiko ga na ka vinaka qai sega ni valavala ca.” (Dauv. 7:20) E tukuna tale ga na yapositolo o Paula: “Ni sa valavala ca na tamata kece, qai sega ni yacova rawa na lagilagi ni Kalou” qai “isau ni ivalavala ca na mate.” (Roma 3:23; 6:23a) Qori e ganiti keda vinaka.

4 Se mani cava ga, e sega ni vakatauvatani rawa na loloma soli wale i Jiova vei keda na kawatamata ivalavala ca. E solia na “Luvena e duabau ga e bulia” me mate ena vukuda, me vakaraitaka na levu ni nona loloma. (Joni 3:16) E vola kina o Paula me baleti Jisu “ni vakaisalataki ena lagilagi kei na vakarokoroko ena vuku ni nona vakamatei. E mate ena vukuda na tamata kece ena levu ni loloma soli wale ni Kalou.” (Iper. 2:9) Io, “na iloloma ni Kalou na bula tawamudu ena vuku i Karisito Jisu na noda Turaga.”—Roma 6:23b.

5, 6. Na cava e yaco ni liutaki keda na (a) ivalavala ca? (b) loloma soli wale?

5 Eda mai ivalavala ca vakacava na kawatamata da qai mate? E tukuni ena iVolatabu ni: “Veiliutaki me vaka na tui” vei ira na kawa i Atama “o mate ena vuku ni nona ivalavala ca e le dua ga na tamata [o Atama].” (Roma 5:12, 14, 17) E ka ni marau nida rawa ni digia me kua ni liutaki se lewai keda na noda ivalavala ca. Nida vakaraitaka noda vakabauta na isoro ni veivoli i Karisito eda na liutaki kina ena loloma soli wale i Jiova. Ena sala cava? “Ni sa levu na ivalavala ca, sa qai levu sara na loloma soli wale. Cava na kena inaki? Me vaka na nona veiliutaki voli vakatui o ivalavala ca kei mate, ena veiliutaki tale ga vakatui ena yalododonu na loloma soli wale, me rawati kina na bula tawamudu ena vuku i Jisu Karisito na noda Turaga.”—Roma 5:20, 21.

6 Eda se ivalavala ca tiko ga, ia me kua ni lewai keda qori. Nida cakacala meda kerea nona veivosoti o Jiova. E vakasalataki keda na lotu vaKarisito o Paula: “E sega ni dodonu me lewai kemuni na ivalavala ca ni oni sega ni vauci ena lawa, oni vauci ga ena loloma soli wale.” (Roma 6:14) Eda vauci gona ena veiliutaki ni loloma soli wale. Na cava na kena yaga? E vakamacalataka o Paula: “Na loloma soli wale ni Kalou . . . e vakavulici keda meda biuta na ka kece e sega ni salavata kei na loma ni Kalou kei na gagadre ca vakavuravura, e vakavulici keda tale ga meda yalomatua, meda yalododonu, meda qarava na Kalou nida tu ena vuravura qo.”—Taito 2:11, 12.

“LEVU NA SALA” NI LOLOMA SOLI WALE

7, 8. Na cava e tukuni kina ni “levu na sala” e vakaraitaka kina o Jiova nona loloma soli wale? (Raica na imatai ni iyaloyalo.)

7 E vola na yapositolo o Pita: “Na isolisoli oni dui rawata, ni vakayagataka ena nomuni veiqaravi me vaka ni oni dauniyau vinaka ni loloma soli wale ni Kalou e  vakaraitaki ena levu na sala.” (1 Pita 4:10) Na cava na kena ibalebale ya? Se mani dredre sara vakacava na keda ituvaki, ena vukei keda o Jiova meda vosota. (1 Pita 1:6) Ena veiganiti vinaka na nona loloma kei na keda ituvaki.

8 Levu na sala e vakarautaka kina o Jiova na nona loloma soli wale. E vola na yapositolo o Joni: “Na ka kece eda rawata, eda rawata ena uasivi ni nona yalololoma, ya na loloma soli wale e vakaikuritaki tiko ga.” (Joni 1:16) Eda vakalougatataki ena sala e vakaraitaka kina o Jiova nona loloma. Na cava soti eda vakalougatataki kina?

9. E yaga vakacava na loloma soli wale i Jiova, eda na vakavinavinakataka vakacava?

9 Vosoti noda ivalavala ca. E vosoti noda ivalavala ca ena vuku ni nona loloma soli wale o Jiova. E rawa ga qo nida veivutuni dina da qai vorata tiko ga noda malumalumu. (Wilika 1 Joni 1:8, 9.) E dodonu meda vakavinavinakataka nona yalololoma na Kalou, me uqeti keda tale ga meda vakalagilagi koya. E vola kina o Paula vei ira na nona itokani lumuti lotu vaKarisito: “[O Jiova] e vakabulai keda mai na lewa ni butobuto qai kauti keda ina matanitu i Luvena lomani, ena vukuna eda sereki kina ena ivoli, me rawa ni vosoti na noda ivalavala ca.” (Kolo. 1:13, 14) Eda na vakalougatataki vakalevu ni vosoti na noda ivalavala ca.

10. Na cava eda marautaka ena vuku ni loloma soli wale ni Kalou?

10 Veiyaloni kei na Kalou. Nida sucu ivalavala ca, tekivu mai na gauna qori eda sa meca ni Kalou. E tukuna kina vakadodonu o Paula: “Eda a veimecaki tu kei na Kalou, eda sa mai veiyaloni kei koya ena mate i Luvena.” (Roma 5:10) Noda veiyaloni qo, eda sa bucina kina e dua na veiwekani vinaka kei Jiova. E cavuta vata na ka dokai qo o Paula kei na nona loloma soli wale o Jiova ni kaya: “Qo nida sa okati [na taci Karisito lumuti] meda yalododonu ena vuku ni vakabauta, meda saga sara meda veiyaloni tiko ga kei na Kalou ena vuku ni noda Turaga o Jisu Karisito. Na noda vakabauti koya tale ga eda rawa ni torova kina na Kalou me sobuti keda na nona loloma soli wale eda sa mai vakila tiko ena gauna qo.” (Roma 5:1, 2) Qo e dua dina na ka ni veivakalougatataki!

iVakaraitaki ni loloma soli wale ni Kalou: Noda rogoca na itukutuku vinaka (Raica na parakaravu 11)

11. E rawa vakacava vei ira na lumuti mera vukei ira na ‘so tale na sipi’ mera yalododonu?

11 Eda rawa ni yalododonu ena mata ni Kalou. Ena gauna ni ivakataotioti qo, e parofisaitaka na parofita o Taniela ni o “ira na yalomatua,” ya o ira na ivovo ni lumuti, era na “vukea e levu mera yalododonu.” (Wilika Taniela 12:3.) Na nodra cakacaka vakavunau kei na nodra veivakavulici era vukei kina na milioni na ‘so tale na sipi’ mera yalododonu ena mata i Jiova. (Joni 10:16) E rawa ga qori ena vuku ni loloma soli wale i Jiova. E vakamacalataka kina o Paula: “E okati ira na Kalou mera yalododonu ni sereki ira na ivoli i Karisito Jisu. Qo na isolisoli ni Kalou ena vuku ni nona loloma soli wale.”—Roma 3:23, 24.

Na isolisoli ni masu (Raica na parakaravu 12)

12. E sema vakacava na masu ina loloma soli wale ni Kalou?

12 Torova na idabedabe vakatui ni Kalou ena masu. Dua na sala e vakalougatataki keda kina o Jiova ena vuku ni nona loloma soli wale, oya na noda masu vua. E vakatoka na idabedabe vakatui i Jiova o Paula me “idabedabe vakaturaga ni loloma soli wale” qai sureti keda tu ‘meda doudou ni masuti koya.’ (Iper. 4:16a) E solia vei keda o Jiova na itavi dokai qo ni vakayagataki Luvena, “ena vukuna, eda galala kina meda vosa, eda doudou tale ga meda torova na Kalou  ena noda vakabauti Jisu.” (Efeso 3:12) E totoka dina nida rawa ni doudou ni masu vei Jiova ena vuku ni nona loloma soli wale.

Vukei ena kena gauna (Raica na parakaravu 13)

13. Ena vukei keda vakacava na loloma soli wale “ena gauna eda gadreva kina”?

13 Vukei ena kena gauna. E uqeti keda o Paula meda doudou na masuti Jiova, “me sobuti keda tale ga na nona loloma soli wale ena gauna eda gadreva kina na veivuke.” (Iper. 4:16b) Se mani gauna cava ga e yacovi keda kina na ka dredre se vaka me veilecayaki noda bula, meda cikeva na veivuke i Jiova. Dina ni sega ni ganiti keda, e dau rogoci keda o Jiova ni vakayagataki ira na tacida vaKarisito. “O koya gona, meda yaloqaqa da qai kaya: ‘E dau vukei au o Jiova, au na sega ni rere. Cava ena cakava rawa vei au na tamata?’”—Iper. 13:6.

14. E yaga vakacava ina lomada na loloma soli wale i Jiova?

14 Ena vakacegui na lomada. Dua na ka ni veivakalougatataki eda vakila ena vuku ni nona loloma soli wale na Kalou, oya noda vakacegui ni vusolo na lomada. (Same 51:17) E vola o Paula vei ira na lotu vaKarisito mai Cesalonaika era vakararawataki tiko: “Na noda Turaga o Jisu Karisito kei na Kalou na Tamada, o koya e lomani keda, e dau vakacegui keda me tawamudu, e vakarautaka vei keda na inuinui ena vuku ni loloma soli wale, me vakaceguya mada ga na lomamuni, me vakayaloqaqataki kemuni tale ga.” (2 Ces. 2:16, 17, vmr.) E veivakacegui dina nida kila ni kauaitaki keda o Jiova ena vuku ni nona loloma soli wale!

15. Na inuinui cava e rawati ena loloma soli wale ni Kalou?

15 Rawati na bula tawamudu. Eda na sega ni rawata ga vakataki keda na inuinui nida tamata ivalavala ca. (Wilika Same 49:7, 8.) Ia e vakarautaka vei keda o Jiova na inuinui totoka. O Jisu e yalataka vei ira na nona imuri: “Qo na loma i  Tamaqu, me bula tawamudu o koya yadua e raica na Luvena qai vakaraitaka ni vakabauti koya.” (Joni 6:40) Io, e ivakaraitaki ni nona loloma soli wale na Kalou na inuinui ni bula tawamudu. E vakavinavinakataka na tikina qo o Paula ni kaya: “Sa vakatakilai mai na loloma soli wale ni Kalou mera vakabulai kina na tamata kece.”—Taito 2:11.

KUA NI RAICA VAKAMAMADA NA LOLOMA SOLI WALE NI KALOU

16. Era vakatanitaka vakacava eso na lotu vaKarisito taumada na loloma soli wale ni Kalou?

16 Dina ni vakalougatataki keda o Jiova ena vuku ni nona loloma soli wale, meda kua ga ni vakatanitaka meda nanuma ni donu vua na itovo kece. Eso na lotu vaKarisito ena gauna makawa era ‘vakatanitaka na loloma soli wale ni Kalou me ulubale ni nodra ivalavala vakasisila.’ (Juta 4) Era nanuma sara ga na lotu vaKarisito tawayalodina qo nira rawa ni cakacala me qai vosoti ira o Jiova. Koya e ca sara nira saga mera temaki ira na tacidra mera tomani ira ena nodra ivalavala veidabui. Ena gauna mada ga qo ke dua e cakava ya “e vakacudruya . . . na yalo ni Kalou e salavata kei na nona loloma soli wale.”—Iper. 10:29.

17. Na cava e vakabibitaka o Pita?

17 Nikua e veivakacalai o Setani mera nanuma kina eso na lotu vaKarisito ni na lomani ira tiko ga o Jiova ke ra mani cakacala. E dau tu vakarau o Jiova me vosoti ira na veivutunitaka na nodra cala, ia e namaka meda vorata tiko ga na noda malumalumu. E uqeti Pita kina me vola: “O koya gona kemuni na wekaqu lomani, ni oni sa kila rawa qo, moni qarauna de oni vakasesei vata kei ira ena nodra veivakacalai na dau murilomadra, oni qai sega ni tudei. Me kua sara, ia me sobuti kemuni mada ga vakalevu na loloma soli wale kei na nomuni kila na noda Turaga, na noda iVakabula o Jisu Karisito.”—2 Pita 3:17, 18.

SALAVATA KEI NA ITAVI NA LOLOMA SOLI WALE

18. Ena vuku ni nona loloma soli wale o Jiova, na cava e noda itavi?

18 Ni lomani keda vakalevu o Jiova, e dodonu meda vakayagataka na isolisoli e votai vei keda meda rokovi koya kina, me yaga tale ga vei ira na wekada. Ena sala cava? E sauma o Paula: “O koya gona, e duidui na isolisoli e votai vei keda me salavata kei na loloma soli wale. . . . Ke cakacaka vakaitalatala, meda gumatua sara ena noda cakacaka vakaitalatala, se o koya e veivakavulici, me gumatua sara ena nona veivakavulici, se o koya e veivakauqeti, me gumatua ena nona veivakauqeti, . . . o koya e yalololoma, me cakava ena marau.” (Roma 12:6-8) Ena vuku ni loloma soli wale i Jiova eda na vakaitavi tiko ga kina ena cakacaka vakaitalatala, veivakavulici, veiuqeti vakaveitacini da qai veivosoti ke da vakacudrui.

19. Na cava eda na veivosakitaka ena ulutaga tarava?

19 Nida vakavinavinakataka nona lomasavu na Kalou, eda na “vunautaka vakavinaka sara na itukutuku vinaka ni loloma soli wale ni Kalou” ena noda vinaka taucoko. (Caka. 20:24) Eda na qai dikeva ena ulutaga tarava na noda qarava na itavi qo.

^ [1] (parakaravu 2) Raica na “Loloma soli wale” ena “iVakamacala ni Vosa ena iVolatabu” ena Vakadewa ni Vuravura Vou.