Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Bau Kila?

O Bau Kila?

E dau vakayagataki e veigauna na Lawa e vola o Mosese me wali kina na duidui e Isireli?

IO ENA so na gauna. Qo e dua na kena ivakaraitaki. E kaya na Vakarua 24:14, 15: “Mo kua ni dabuya nomu tamata cakacaka saumi e vakaloloma tu qai dravudravua, se mani tacimu se dua e tiko vulagi ena nomu vanua . . . Ke sega, ena tagicaka vei Jiova na ka o cakava, o na qai valavala ca kina.”

Na tiki ni kuro qele e volai kina na nona vakamamasu na dauteitei

Dua na ituvaki va qori e yaco ena ikavitu ni senitiuri B.G.V. E volai tu qori ena dua na tiki ni kuro qele e laurai volekati Asoto. E rairai baleta tiko e dua na dauteitei a sega ni kumuna rawa e dua na iwase ni covuata. E volai ena kuro qele: “Ni oti nona kumuna na nomuni dauveiqaravi [o koya e kerekere] na ka e tamusuki ena vica na siga sa oti, e lako mai o Hoshayahu na luvei Shobay me kauta na nona isulu na nomuni dauveiqaravi. . . . Era na vakadinadinataka qori o ira kece na noqu itokani keimami tatamusuki vata tiko ena todra ni siga . . . au sega ni lasu. E sega ni dina na ka au beitaki kina. Ke nanuma na kovana ni sega ni nona itavi me raica me vakasukai mai nona isulu na nomuni dauveiqaravi, ia moni cakacaka ga ena dela ni loloma! Moni kua ni galu tiko ga ni sa sega tu na nona isulu na nomuni dauveiqaravi.”

E kaya na Daunitukutuku makawa o Simon Schama ni vakamamasu qo “e vakabibitaka ga vei keda na levu ni nona vinakata na dauveiqaravi me vakasukai na nona isulu,” e tomana: “E vakaraitaka tale ga ni rairai kila na dauveiqaravi qo na lawa vakaivolatabu, vakauasivi ena ivola na Vunau ni Soro kei na Vakarua me baleta na nodra vakalolomataki na dravudravua.”