Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Era Yalorawarawa Mera Gole i Madagascar

Era Yalorawarawa Mera Gole i Madagascar

“NIU dau rogoca na nodra italanoa na noqu itokani era veiqaravi ena vanua e vinakati kina vakalevu na cakacaka vakaitalatala, au via vakila tale ga na marau qori,” e kaya o Sylviana, e dua na painia e yabaki 20 vakacaca. E tomana, “Ia au lomaleqataka niu na sega ni rawata na veiqaravi ena vanua qori.”

Vakacava o duavata kei Sylviana? O via veiqaravi tale ga ena vanua e vinakati kina na cakacaka, ia o qai lomalomarua tale? Kua ni yalolailai! O Jiova sa vukei ira e vica vata na udolu na tacida mera kua ni lomaleqataka e levu na ka nira via vakalevutaka na nodra cakacaka vakaitalatala. Meda raica mada qo eso na kena ivakaraitaki nida sikovi Madagascar, na ikava ni yanuyanu levu duadua e vuravura.

Ena tini vakacaca na yabaki sa oti, e sivia ni 70 na dautukutuku kei na painia gugumatua mai na 11 na matanitu * era mai veiqaravi ena vanua vuavuaivinaka qo e Aferika, era dau doka kina na iVolatabu e levu. Era sa tu vakarau tale ga e levu na dautukutuku ena vanua qori mera vakatetea na itukutuku ni Matanitu ena yanuyanu levu qo. Meda veivosakitaka mada e vica.

VALUTA NA LOMALEQA KEI NA YALOLAILAI

O Perrine kei Louis

Rau biuti Varanise o Louis kei Perrine, e dua na veiwatini yabaki 30 vakacaca me rau toki i Madagascar. Vica vata na yabaki rau vakasamataka tiko me rau lai cakacaka vakaitalatala e vanuatani, ia dau lomalomarua tiko ga o Perrine. E kaya: “Au vakasamataka vakalevu niu na lako ina vanua au sega ni kila. Au lomaleqa niu sa na biuti ira tu mai na wekaqu, ivavakoso, vale, vanua au matau kina, kei na veika au dau cakava. Qori sara ga na ka meu na valuta.” Ena 2012, sa qai yalodei o Perrine, rau mani toki kei Louis. Cava e kaya ena nodrau vakatulewa qori? “Niu rai lesu, au rawa ni kaya ni sa bau veivakaukauataki dina nona dau vukei keda o Jiova.” E kaya tale o Louis, “Vakasamataka ga neirau imatai ni iVakananumi e Madagascar, era tiko kina e tini na neirau vuli iVolatabu!”

 Na cava e vakaukauataki rau tiko ga me rau dei ena nodrau ilesilesi? Rau masuti Jiova me vakaukauataki rau me rau vosota. (Fpai. 4:13) E kaya o Louis: “Keirau vakila ni sauma o Jiova na neirau masu, e solia tale ga vei keirau na ‘vakacegu ni Kalou.’ Keirau kauaitaka ga vakalevu na neirau marautaka na veiqaravi. Era volavola, ra vakau meli tale ga mai na itokani mai vale mera vakayaloqaqataki keirau kina me keirau kua ni soro.”—Fpai. 4:6, 7; 2 Kor. 4:7.

E vakalougatataka o Jiova nodrau vosota o Louis kei Perrine. E kaya o Louis: “Keirau sureti ena Okotova 2014, me keirau tiko ena Koronivuli ni Vuli iVolatabu ni Veiwatini * e Varanise. Na iloloma i Jiova qori e guiguilecavi dredre dina.” Rau marau vakaveiwatini ni rau lesi tale i Madagascar ni oti na tuvaitutu.

“KEITOU NA TALEITAKA VAKALEVU!”

O Nadine kei Didier

Rau sa yabaki 50 vakacaca e dua na veiwatini o Didier kei Nadine ni rau biuti Varanise me rau toki i Madagascar ena 2010. E vakamacalataka o Didier: “Ni keirau se veiwatini gone, keirau painia, oti keirau susugi ratou na gone. Ni ratou sa qase keirau veivosakitaka na lai veiqaravi e vanuatani.” E vakatusa o Nadine: “Au lomalomarua niu vakasamataka noqu sa na biuti ratou mai na gone, ia ratou kaya: ‘Ke drau lai veiqaravi ena vanua e vinakati kina na cakacaka e vanuatani, keitou na taleitaka vakalevu!’ Nodratou veiuqeti gona keirau toki kina. Keirau sa yawa mai vei ratou na gone, ia keirau marau ni keitou dau veivosaki vakalevu.”

E dredre toka nodrau vulica o Didier kei Nadine na vosa vakaMalagasy. “Keirau sega ni yabaki 20 tale tiko,” e kaya ena matadredredre o Nadine. Ia erau rawata ga vakacava? Rau lewena tiko na ivavakoso vosa vakaVaranise. Gauna ga rau sa lomadei kina ni rau sa na rawa ni vulica na vosa ni vanua qori, rau toki sara ina ivavakoso vosa vakaMalagasy. E kaya o Nadine: “Era via vulica na iVolatabu e levu ena cakacaka vakavunau. Era dau vakavinavinakataka neirau veisiko yani. Au dau nanuma niu tadra tiko. Au taleitaka na painia ena yalava qo. Niu yadra na mataka nikua, au kaya lo ga, ‘U—au na lai vunau nikua!’”

E dredre o Didier ni nanuma lesu nona se qai tekivu vulica na vosa vakaMalagasy. “Gauna au vakaitavi tiko kina ena soqoni, au sega sara ga ni kila na nodra isaunitaro na mataveitacini. Au sa dau kaya tu ga, ‘Vinaka.’ Niu vakavinavinakataka oti e dua na tacida yalewa, era qai saga na dabe tiko e dakuna meu kila ni cala nona isaunitaro. Totolo ga niu digia e dua tale na tacida au nuitaka ni a tukuna mai na kena isau donu.”

E TALEITAKA NA VEISURETI

Rau a sarava ena soqo ni tikina ni 2005 e dua na veiwatini, o Thierry kei Nadia, na drama “Pursue Goals That Honor God.” E uqeti rau na drama vakaivolatabu  me baleti Timoci, rau taleitaka vakalevu me rau veiqaravi ena vanua e vinakati kina na cakacaka ni Matanitu ni Kalou. E kaya o Thierry: “Keimami vakasausau ni sa oti na drama, au tarogi watiqu sara, ‘Daru na lai veiqaravi e vei? Na ka tale ga qori a vakasamataka tiko o koya.” Sega ni dede rau sa cakava eso na veisau me rawati kina na isausau qori. E kaya o Nadia, “Keirau vakalailaitaka tiko ga na ka keirau taukena me yacova ni sa vo ga na ka e rauta e va na neirau kato!”

Ena imawi e sau: O Nadia kei Marie-Madeleine; iMatau e sau: Thierry

Rau yaco yani e Madagascar ena 2006, rau taleitaka tale ga na nodrau cakacaka vakaitalatala. E kaya o Nadia, “Keirau dau marautaki ira qori.”

Ni oti tale e ono na yabaki, rau sotava e dua na ituvaki. E lutu o tinai Nadia, o Marie-Madeleine, e tiko mai Varanise. E ramusu na ligana, mavoa tale ga na uluna. Ni rau veivosaki oti kei na nona vuniwai, rau kerei Marie-Madeleine sara me toki mai Madagascar. Sa yabaki 80, ia e taleitaka nodrau veisureti. Cava e nanuma ena nona sa mai tiko e vanuatani? E kaya: “Dau dredre ena so na gauna meu vakamatauni au, e lailai na ka au rawata, ia au kila niu sa yaga tiko ena ivavakoso. Au marautaka vakalevu na ituvatuva qo, ni rau veiqaravi tiko ga kina eke na veiwatini.”

“AU VAKILA NA VEIVUKE I JIOVA”

Vunau tiko o Riana ena vosa vakaTandroy

E yabaki 20 vakacaca e dua na tacida tagane o Riana. E susu e Alaotra Mangoro, dua na vanua bulabula ena tokalau kei Madagascar. E toso vinaka nona vuli, via vuli torocake tale ga. Ia ni vulica oti ga na iVolatabu, sa veisau na lomana. E kaya: “Au saga meu vakaotia totolo noqu vuli ena sekeneri, au yalataka vei Jiova, ‘Keu rawata noqu veitarogi levu, au na painia.’” Qori sara ga na ka e qai cakava ni tuvaitutu oti. Erau lai vale vata kei na dua na tacida tagane e painia tale ga, kune e dua nona cakacaka vagauna, tekivu painia sara. E kaya, “E vakatulewa vinaka duadua meu cakava.”

Era lomatarotarotaka na wekana nona sega ni via cakacaka vinaka. E kaya: “Ratou uqeti au o tamaqu, tata lailai kei na taci tinai tamaqu meu vuli torocake. Ia au sega ni vinakata e dua na ka me tarova noqu painia.” Sega ni dede e lai veiqaravi o Riana ena vanua e vinakati kina vakalevu na cakacaka. Na cava e uqeti koya? E kaya: “Ra curuma yani neirau vale na daubutako, butakoci kina e levu na noqu iyaya. Qori e vakavuna meu vakasamataka vakabibi na vosa i Jisu me baleta na kumuni ni ‘iyau mai lomalagi.’ Au vakatulewataka meu gumatua ga ena kumuni ni iyau vakayalo.” (Maciu 6:19, 20) E toki sara ena yasayasa e kovuti kina vakalevu na ceva ni vanua qori—na vanua dravuisiga e 1,300 na kilomita na kena yawa mai na nona itikotiko. Era tiko kina na yavusa na Antandroy. Na cava e lako kina vei ira?

Dua na vula ni bera na butako, a vuli iVolatabu tiko o Riana kei na rua na turaga mai na yavusa qori. E vulica kina e vica na nodra vosa, vakasamataki ira tale ga vakalevu na kena vo era se bera ni rogoca na itukutuku ni Matanitu. E kaya, “Au masuti Jiova me tokoni au ena noqu toki vei ira na tiko ena yasayasa era vosa vakaTandroy.”

E toki sara o Riana, ia dua na ituvaki tawanamaki e sotava. E dredre me kunea e dua na cakacaka. Tukuna vua e dua na turaga: “Cava o mai cakava eke? Era lai vaqara cakacaka yani na tiko eke ena vanua o lako mai kina!” Oti e rua na macawa, e biuta mai na vanua qori o Riana me tiko ena dua na soqo ni veiwasewase, ia sa lailai na nona ilavo, mani vakasamataka tiko na ka me cakava. Ena iotioti sara ga ni siga ni soqo e biuta e dua na tacida tagane ena taga ni nona kote e dua na ka. Qori na ilavo e rauta vinaka nona ilakolako lesu e Antandroy, me lai tekivuna tale ga e dua na bisinisi ni volitaki yogurt. Kaya o Riana: “Au vakila sara ga na veivuke i Jiova ena gauna donu. Au rawa kina ni vukei ira tiko ga na se bera ni rogoci Jiova!” Levu tale ga na itavi me qaravi ena ivavakoso. E kaya tale o Riana: “Au dau lesi ena ivunau soqovi levu ni oti ga e vica na macawa. E vakayagataka o Jiova na nona isoqosoqo meu vuli kina.” Nikua se tukuna tiko ga o Riana na itukutuku vinaka ni Matanitu vei ira na vosa vakaTandroy era via kilai Jiova.

 “VAKALOUGATAKI KOYA NA KALOU DINA”

E vakadeitaka o Jiova ni “o koya e kerea me vosa vakalougatataki e vuravura ena vosa vakalougatataki koya na Kalou dina.” (Aisea 65:16) Nida cakacaka vakaukaua meda valuta kina na veika e vakalatilati ena noda vakalevutaka na noda cakacaka vakaitalatala, ena vakalougatataki keda o Jiova. Vakasamataki Sylviana mada, a tukuni ena itekivu ni ulutaga qo. A nanuma ni sega ni ganiti koya me veiqaravi ena vanua e vinakati kina na cakacaka. Na vuna? E vakamacalataka: “E leka tiko na yavaqu imawi ena 9 na sedimita. Au dau gera vakalevu, vakavuna meu wawale.”

O Sylviana (imawi) kei Sylvie Ann (imatau) kei Doratine ena siga e papitaiso kina

Ia ena 2014 rau cakacaka vata o Sylviana kei Sylvie Ann, e dua na painia gone ena nona ivavakoso, rau toki ina dua na koro lailai e 85 na kilomita mai na nona itikotiko. E yaco dina ga na veika e dau tatadrataka tu o Sylviana, e levu na ka dredre e sotava kina ia e ka ni veivakalougatataki vua! E kaya: “Ni oti ga e dua na yabaki noqu veiqaravi ena noqu ilesilesi, a papitaiso ena soqo ni tabacakacaka o Doratine, e dua na tina gone keirau vuli iVolatabu tiko.”

“AU NA VUKEI IKO”

Na ka era tukuna o ira na veiqaravi ena vanua e vinakati kina na cakacaka me baleta nodra vakabauta, kei na noda saga meda valuta na leqa e vakalatilati ena noda cakacaka vakaitalatala, eda vakadeitaka kina na dina ni nona yalayala o Jiova vei ira na nona dauveiqaravi: “Au na vakaukauataki iko, io, au na vukei iko.” (Aisea 41:10) Ena qaqaco kina noda veiwekani kei Jiova. Noda yalorawarawa tale ga ni soli keda ena vanua eda tiko kina se i vanuatani ena vakarautaki keda ena cakacaka vakalou sa waraki keda tiko ena vuravura vou. Me vaka e tukuna o Didier, sa tukuni oti mai, “na noda veiqaravi ena vanua e vinakati kina na cakacaka e vakarautaki keda vinaka me baleta na veigauna se bera mai!” Mera yalorawarawa mada ga e levu tale mera vakarautaki ira va qori!

^ para. 4 Era mai veiqaravi ena vanua e vinakati tu kina na cakacaka o ira mai Kenada, Czech Republic, Varanise, Jamani, Guadeloupe, Luxembourg, New Caledonia, Suwiteni, Suwitisiladi, Peritania, kei Merika.

^ para. 8 Sa Koronivuli ni iTalatala ni Matanitu tiko ena gauna qo. Ke ra rawata na kena ivakatagedegede o ira na veiqaravi tu vakatabakidua e vanuatani, e rawa nira vuli ena kena e vakayacori ena nodra vanua, se dua na vanua e vakayagataki kina nodra vosa.