Raica sara na lewena

Raica na lewenivola

ULUTAGA NI VULI 7

“Mo Rogoca na Nodra Vosa na Vuku”

“Mo Rogoca na Nodra Vosa na Vuku”

“Mo vagolea na daligamu mo rogoca na nodra vosa na vuku.”—VKAI. 22:17.

SERE 123 Yalodina ina Veiliutaki vaKalou

KA ENA VULICI *

1. Na cava meda vakasalataki kina? Na vuna?

O KEDA kece e vinakati meda vakasalataki ena so na gauna. De dua eda na vakaliuliu meda kerea nona ivakasala e dua eda dau doka. Eso na gauna, nona nanumi keda e dua na tacida tagane ena rairai vakaraitaka nida sa voleka ni “butucala” meda cakava na ka eda na rawa ni veivutunitaka. (Kala. 6:1) Kena iotioti, de dua eda vakasalataki nida valavala ca bibi meda vakadodonutaki kina. Ke tiko na vuna eda vakasalataki kina, e bibi ga meda rogoca na ivakasala. Na vuna? Ni yaga vei keda, eda na bula kina!—Vkai. 6:23.

2. Me salavata kei na Vosa Vakaibalebale 12:15, na cava meda rogoca kina na ivakasala?

2 E uqeti keda na tikinivolatabu e yavutaki kina na vuli qo meda “rogoca na nodra vosa na vuku.” (Vkai. 22:17) E sega ni dua e kila na ka kece. E tiko eso tale e levu sara na ka era kila vei keda se ra qaseta na bula. (Wilika Vosa Vakaibalebale 12:15.) Nida rogoca gona na ivakasala, e dusia nida yalomalumalumu. E vakaraitaka tale ga ni vakaiyalayala na ka eda kila, e vinakati meda vukei meda rawata na noda isausau. E uqeti vakalou me vola na tui vuku o Solomoni: “E vakavatukana na sasaga ni levu na daunivakasala.”—Vkai. 15:22.

E vei e dau dredre mo muria? (Raica na parakaravu 3-4)

3. Eda dau vakasalataki vakacava?

3 Eso na ivakasala e rairai tukuni sara ga vakadodonu vei keda, eso tale e sega. Na cava na kena ibalebale ya? Eda rairai wilika e dua na ka ena iVolatabu se ivola vakaivolatabu da qai vakasamataka na noda ivalavala mani uqeti keda meda veisautaka. (Iper. 4:12) Qori na ivakasala e sega ni tukuni vakadodonu. Ia vakacava na kena e tukuni vakadodonu? Ena rairai vakaraitaka e dua na qase ni ivavakoso se dua na tacida matua na ka meda cakacaka kina. Qori na ivakasala e tukuni vakadodonu. Ni dua e lomani keda qai vakasalataki keda mai na iVolatabu, eda na vakavinavinakataka nida rogoca qai muria sara.

4. Me vaka e tukuni ena Dauvunau 7:9, na cava meda kua ni cakava nida vakasalataki?

4 Ena rairai dredre meda rogoca na ivakasala e tukuni vakadodonu vei keda. De dua eda na cudru. Na vuna? E dau rawarawa meda tukuna nida sega ni uasivi, ia ena dredre toka meda rogoca ni tukuni vakadodonu na noda cala. (Wilika Dauvunau 7:9.) De dua eda na soli ulubale. Eda na lomatarotarotaka na nona inaki o koya e veivakasalataki, se cata na ivakarau ni nona veivakasalataki. Eda rawa mada ga ni vakalewai koya, nida kaya: ‘Na cava mada e mai vakasalataki au kina? O koya mada ga e tiko nona malumalumu!’ Ke da cata na ivakasala, eda na rairai vakawalena se kerea na nona ivakasala e dua tale eda taleitaka.

5. Na cava eda na veivosakitaka ena ulutaga qo?

5 Eda na veivosakitaka ena ulutaga qo eso na ivakaraitaki vakaivolatabu era cata na ivakasala, vaka kina o ira na rogoca qai muria. Eda na dikeva tale ga na ka ena vukei keda meda rogoca na ivakasala kei na kena yaga.

RAU SEGA NI MURIA NA IVAKASALA

6. Na cava eda vulica ena ka e cakava o Tui Riopoami ni vakasalataki?

6 Dikeva mada na ivakaraitaki nei Riopoami. Ni sa tui Isireli, era lako yani na lewenivanua mera kerea e dua na ka. Oya me vakamamadataki na nodra icolacola a vakataqara vei ira o Solomoni na tamana. E vinaka sara ga na ka e cakava o Riopoami, e kerea na nodra ivakasala na qase ni Isireli me kila na ka me tukuna vei ira na lewenivanua. Era tukuna na qase vua na tui ke muria na ka era kerea na lewenivanua, era na tokoni koya tiko ga. (1 Tui 12:3-7) A rairai sega ni marautaka o Riopoami na ivakasala qori, mani kerea na nodra ivakasala na tagane era susu vata kei koya. De dua era yabaki 40 vakacaca, era sa qaseta toka na bula. (2 Vei. 12:13) Ia e sega ni vinaka na nodra ivakasala vei Riopoami ena gauna qori. Era tukuna vua me kuria na nodra icolacola na lewenivanua. (1 Tui 12:8-11) E rua na ivakasala e tukuni vei Riopoami, e rawa sara ga ni masuti Jiova qai kerea na ivakasala me muria. Ia e vakatulewataka me muria na ivakasala e taleitaka, ya na nodra ivakasala na tagane gone. Na cava na kena itinitini? E vakaleqai kina o Riopoami kei ira na lewe i Isireli. Vakacava o keda? De dua eda na sega tu ga ni taleitaka na ivakasala eda rogoca. Ia ke yavutaki ena Vosa ni Kalou, e bibi meda muria.

7. Na cava eda vulica vei Tui Usaia?

7 E cata o Tui Usaia na ivakasala. E curu ena yasa ni valenisoro i Jiova e dodonu mera curu ga kina na bete qai saga me vakama na ka boivinaka. Era tukuna vua na bete: “E sega ni nomuni itavi Usaia moni vakama na ka boivinaka vei Jiova! E nodra itavi ga na bete.” Na cava e cakava o Usaia? Ke a vakamalumalumu me rogoca na ivakasala qai biubiu totolo mai na valenisoro, de dua ena vosoti koya o Jiova. Ia e “cudru vakalevu o Usaia.” Na cava e beca kina na ivakasala? Me vaka ni tui, e nanuma ni rawa ni cakava ga na ka e vinakata. Ia e sega ni va qori na rai i Jiova. Ena nona dokadoka o Usaia e vukavuka kina, e “vukavuka tiko ga . . . me yacova na siga e mate kina.” (2 Vei. 26:16-21) Na cava eda vulica vua? Se mani itavi cava eda lesi kina, ena sega ni vakadonui keda o Jiova nida beca na ivakasala vakaivolatabu.

ERA ROGOCA NA IVAKASALA

8. Na cava e cakava o Jope ni vakasalataki?

8 E tukuni tale ga ena iVolatabu na nodra ivakaraitaki vinaka eso era vakalougatataki nira muria na ivakasala. Kena ivakaraitaki o Jope. E dau rerevaka na Kalou, ia e sega ni uasivi. Ni dredre na veika e sotava, e kilai ena ka e tukuna ni cala na nona rai. Na cava e yaco? E vakasalataki koya vakadodonu o Ilaiu kei Jiova. Na cava e cakava o Jope? E muria ena yalomalumalumu. E kaya: “Au a vosa gona, ia au sega ni yalomatua . . . Oya na vuna au vakasuka kina na ka au tukuna, au qai veivutuni ena kuvuniqele kei na dravusa.” E vakalougatataki Jope o Jiova ni yalomalumalumu.—Jope 42:3-6, 12-17.

9. E ivakaraitaki vinaka vakacava o Mosese ena muri ni ivakasala?

9 E ivakaraitaki vinaka o Mosese ni rogoca na veivakadodonutaki ena gauna e valavala ca bibi kina. A cudru ena dua na gauna, e sega tale ga ni dokai Jiova. Oya na vuna e sega ni vakadonui kina me butuka na Vanua Yalataki. (Tiko 20:1-13) Ni rarawataka o Mosese na vakatulewa qori, e tukuna vua o Jiova: “Kua vakadua ni vosa tale vei au me baleta na ka qo.” (Vkru. 3:23-27) A sega ni cudru tiko ga o Mosese. E muria na vakatulewa i Jiova mani vakayagataki koya tiko ga o Jiova me liutaki ira na Isireli. (Vkru. 4:1) Erau ivakaraitaki vinaka o Jope kei Mosese ni rau rogoca na ivakasala, meda vakatotomuria mada ga na nodrau ivakaraitaki. E veisautaka o Jope na nona rai, e sega ni soli ulubale. E vakaraitaka o Mosese ni rogoca na ivakasala i Jiova ni yalodina tiko ga ni kau tani mada ga vua na ka e vakanamata tu kina.

10. (a) Na cava e tukuna na Vosa Vakaibalebale 4:10-13 me baleta na yaga ni noda rogoca na ivakasala? (b) Na rai donu cava era vakaraitaka eso nira vakasalataki?

10 Ena yaga vei keda nida vakatotomuria na nodrau ivakaraitaki na turaga yalodina o Jope kei Mosese. (Wilika Vosa Vakaibalebale 4:10-13.) Levu na tacida era cakava qori. Rogoca na ka e tukuna e dua na tacida o Emmanuel mai Congo, me baleta nona vakasalataki: “Eratou kila na tacida matua ena ivavakoso niu sa voleka ni mate vakayalo, eratou vinakata sara ga me ratou vukei au. Au muria na nodratou ivakasala, e sega kina ni levu na rarawa au vakila.” * E tukuna o Megan e dua na painia mai Kenada me baleta na ivakasala: “Au sega tu ga ni dau via rogoca qori, ia e dodonu meu rogoca.” E kaya o Marko e dua na tacida tagane mai Croatia: “E kau tani na noqu itavi, ia niu railesu, au kila ni yaga vei au na ivakasala meu kaukaua tale vakayalo.”

11. Na cava e tukuna o Brother Karl Klein me baleta na kena muri na ivakasala?

11 E dua tale e yaga vua na ivakasala o Brother Karl Klein, a lewe tale ga ni iLawalawa Dauvakatulewa. E vakamacalataka o Brother Klein ena italanoa ni nona bula, ni a vakadodonutaki koya ena dua na gauna o Joseph F. Rutherford, rau dau veivolekati. E tukuna o Brother Klein ni rarawataka na ivakasala qori. E kaya: “Ni keirau sota tale kei [Brother Rutherford], e marautaki au qai kaya, ‘Bula Karl!’ Ia niu se cudru tiko ga, au sega ni sauma yani vakavinaka. E kaya mai, ‘Qarauna Karl! Ena rawai iko na Tevoro!’ Au madua sara ga, au kaya yani, ‘Au sega ni cudruvi iko, Brother Rutherford.’ Ia e kila vinaka niu cudru tiko, e tukuna tale mai, ‘Kua ni leqa. Qarauna ga. Ena rawai iko na Tevoro.’ E dina sara ga o koya! Nida rarawataka e dua na tacida, vakabibi ni dina tiko na ka e tukuna . . . , ena rawarawa sara ni rawai keda na Tevoro.” * (Efeso 4:25-27) E muria o Brother Klein na ivakasala nei Brother Rutherford, rau mani veitokani vinaka tiko ga.

NA CAVA ENA VUKEI KEDA MEDA ROGOCA NA IVAKASALA?

12. Ena vukei keda vakacava na yalomalumalumu meda muria na ivakasala? (Same 141:5)

12 Na cava ena vukei keda meda rogoca qai muria na ivakasala? E vinakati na yalomalumalumu nida nanuma tiko nida kawa ivalavala ca, eso na gauna eda cakava tu na ka lialia. Me vaka sa tukuni oti mai, o Jope mada ga e dau cala nona rai, ia e veisautaka mani vakalougatataki koya o Jiova. Na vuna? Ni yalomalumalumu. E kilai na nona yalomalumalumu ni rogoca na ivakasala nei Ilaiu, e gone sara vua. (Jope 32:6, 7) Na yalomalumalumu tale ga ena vukei keda meda muria na ivakasala ke da nanuma mada ga ni sega ni ganiti keda se vakasalataki keda e dua e gone sara. E kaya e dua na qase ni ivavakoso mai Kenada: “E duidui na noda nanuma kei na nodra rai eso tale me baleti keda, ena qai rawa vakacava nida toso ke sega ni dua e veivakasalataki?” E vinakati vei keda kece meda vakaraitaka tiko ga na vua ni yalo tabu qai gumatua ena cakacaka vakaitalatala.—Wilika Same 141:5.

13. Meda raica vakacava na ivakasala?

13 Meda raica na ivakasala me iloloma ni Kalou vei keda. E kila o Jiova na ka ena yaga vei keda. (Vkai. 4:20-22) Ni vakasalataki keda ena nona Vosa, ivola vakaivolatabu, se dua na tacida matua, e vakaraitaka ni lomani keda. E tukuni ena Iperiu 12:9, 10: “Na veivakadodonutaki e cakava na Kalou ena yaga vei keda.”

14. Na cava meda kauaitaka nida vakasalataki?

14 Kauaitaka na ivakasala, sega ni kena itautau. Nida vakasalataki ena so na gauna, eda rairai nanuma ni sega ni tau ena yalololoma. Ena saga o koya e veivakasalataki me matau na nona ivakasala me rawarawa ni muri. * (Kala. 6:1) Ia nida vakasalataki, meda kauaitaka ga na itukutuku ke da nanuma mada ga ni sega ni tau ena yalovinaka. Eda rawa ni taroga: ‘Keu sega mada ga ni taleitaka na ivakarau ni nona veivakasalataki, vakacava e dina na ka e tukuna? Au na rawa ni vosota na nona malumalumu na tacida e veivakasalataki qai vuli ena ka e tukuna?’ Ena ka vakayalomatua meda vakasamataka na yaga ni ivakasala eda rogoca.—Vkai. 15:31.

E YAGA NIDA KERE IVAKASALA

15. Na cava meda dau kere ivakasala kina?

15 E uqeti keda na iVolatabu meda dau kere ivakasala. E kaya na Vosa Vakaibalebale 13:10: “O ira na qara ivakasala era vuku.” Io, e dina qori! Era na matua totolo vakayalo o ira na qara ivakasala ra qai sega ni waraka me dua e vakasalataki ira ni vakatauvatani kei ira na sega ni qara ivakasala. Meda vakaliuliu gona ni kere ivakasala.

Na cava e kere ivakasala kina na tacida gone qo vua na tacida matua? (Raica na parakaravu 16)

16. Na ituvaki cava eda rawa ni kere ivakasala kina?

16 Na gauna cava eda rawa ni kerea kina nodra ivakasala na tacida? Dikeva mada e vica na ivakaraitaki qo. (1) Dua na tacida yalewa e kerea e dua na dautukutuku matua me tomani koya ena vuli iVolatabu, oti qai taroga na sala e rawa ni vakavinakataka kina nona iwalewale ni veivakavulici. (2) Dua na tacida goneyalewa e via volia eso nona itaurasese balavu, mani taroga nona nanuma e dua na tacida yalewa matua ena isulu me digia. (3) E lesi e dua na tacida tagane ena imatai ni nona ivunau soqovi levu. E kerea e dua na tacida tagane sa matau ena vosa me rogoca nona ivunau qai tukuna eso na ka me vakavinakataka. Ke dua mada ga na tacida tagane e dau vunau ena buturara me vica vata na yabaki, e vinakati tiko ga me kere ivakasala vei ira na matau ena vosa qai muria.

17. Ena yaga vakacava vei keda na ivakasala?

17 Ena veimacawa se veivula mai qo eda na vakasalataki kece. Ke da vakasalataki vakadodonu, se sega, vakasamataka sara na tikina eda veivosakitaka qo. Meda yalomalumalumu tiko ga. Kauaitaka ga na ivakasala, sega ni kena itautau. Muria sara na ivakasala qori. Eda sega ni sucu kaya mai na vuku. Ia e yalataka na Vosa ni Kalou ke da “rogoca na ivakasala” qai “muria na veivakadodonutaki,” eda na “vuku kina.”—Vkai. 19:20.

SERE 124 Dina Tiko Ga

^ para. 5 Eda kila na tamata i Jiova ni bibi meda rogoca na ivakasala vakaivolatabu. Ia e sega ni dau rawarawa meda cakava qori. Na vuna? Na cava ena vukei keda me yaga kina na ivakasala eda rogoca?

^ para. 10 Sa veisau eso na yaca.

^ para. 11 Raica The Watchtower, October 1, 1984, t. 21-28.

^ para. 14 Eda na veivosakitaka ena ulutaga tarava na sala me tau vakamatau kina na veivakasalataki.