Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 15

Vakatotomuri Jisu Mo Vakila Tiko ga na Vakacegu

Vakatotomuri Jisu Mo Vakila Tiko ga na Vakacegu

“Ena qai taqomaka na lomamuni . . . na vakacegu ni Kalou e uasivia na vakasama kece.”—FPAI. 4:7.

SERE 113 Rawati ni Vakacegu

KA ENA VULICI *

1-2. Na cava e nuiqawaqawataka o Jisu?

E NUIQAWAQAWA o Jisu ena iotioti ni siga ni nona bula e vuravura. Sa vakarau me vakararawataki, era na vakamatei koya tale ga na tamata ca. Ia e dua tale na ka e kauaitaka vakabibi o Jisu. E lomani Tamana vakalevu qai via vakamarautaki koya. E kila ni na vakarokorokotaki na yaca i Jiova ke yalodina tiko ga ena veivakatovolei e vakarau sotava. E lomani ira tale ga na tamata o Jisu, e kila nira na bula tawamudu ga ke yalodina me yacova ni mate.

2 E nuiqawaqawa vakalevu o Jisu ia e vakila tiko ga na vakacegu. E tukuna mada ga vei ratou nona yapositolo: “Au solia vei kemudou na noqu vakacegu.” (Joni 14:27) E vakila o Jisu “na vakacegu ni Kalou,” na vakacegu e vakila e dua ni vinaka nodrau veiwekani kei Jiova. Qori e taqomaka nona vakasama kei na lomana me kua ni lomaleqa.—Fpai. 4:6, 7.

3. Na cava eda na vulica ena ulutaga qo?

3 Eda na sega ni vakararawataki sara me vakataki Jisu, ia eda na vakatovolei kece nida nona imuri. (Maciu 16:24, 25; Joni 15:20) Me vakataki Jisu, eda na nuiqawaqawa ena so na gauna. Na cava meda cakava meda kua kina ni lomaocaoca vakalevu da qai vakila tiko ga na vakacegu? Eda na vulica qo e tolu na ka e cakava o Jisu ena nona cakacaka vakaitalatala e vuravura kei na sala meda vakatotomuri koya kina nida vakatovolei.

 E MASU WASOMA O JISU

Eda na vakila tiko ga na vakacegu nida masu (Raica na parakaravu 4-7)

4. Nida vakasamataka tiko na 1 Cesalonaika 5:17, tukuna eso na ivakaraitaki ni nona masu wasoma o Jisu ena iotioti ni siga ni nona bula e vuravura?

4 Wilika 1 Cesalonaika 5:17. E masu wasoma o Jisu ena iotioti ni siga ni nona bula e vuravura. Ni tauyavutaka na ivakananumi ni nona mate, e masulaka na madrai kei na waini. (1 Kor. 11:23-25) Ni bera ni biubiu mai na vanua ratou soqova kina kei na nona tisaipeli na Lakosivia, eratou masu vata. (Joni 17:1-26) Ni yaco yani ena Ulunivanua ni Veiolive kei ratou nona tisaipeli ena bogi qori, e masu tale vakavica. (Maciu 26:36-39, 42, 44) Ni bera mada ga ni cavuka nona icegu, e masu tale o Jisu. (Luke 23:46) E masulaka vei Jiova na ka kece e yaco ena iotioti ni siga ni nona bula e vuravura.

5. Na cava eratou sega ni yaloqaqa kina na yapositolo?

5 Dua na vuna e vosota kina o Jisu na veivakatovolei oya ni nuitaki Tamana, e kilai qori ena nona masu wasoma. Ia ratou sega ni gumatua ena masu nona yapositolo ena bogi ya. Eratou sega kina ni yaloqaqa ni ratou vakatovolei. (Maciu 26:40, 41, 43, 45, 56) Nida vakatovolei, eda na yalodina ga ke da muria na ivakaraitaki nei Jisu nida “masu tiko ga.” Na cava meda masulaka?

6. E yaga vakacava na vakabauta meda vakila tiko ga kina na vakacegu?

6 Eda rawa ni masulaka vei Jiova me ‘vakalevutaka noda vakabauta.’ (Luke 17:5; Joni 14:1) E bibi na vakabauta ni o Setani ena vakatovolei ira kece na imuri i Jisu. (Luke 22:31) Ena yaga vakacava na vakabauta meda vakila tiko ga kina na  vakacegu ni veitaravi na veivakatovolei? Nida sa cakava kece na ka eda rawata meda vosota na veivakatovolei, na vakabauta ena uqeti keda meda kua tale ni lomaleqa. Na vuna? Eda nuidei ni na qai walia qori o Jiova ena sala vinaka duadua, ena gauna veiganiti tale ga.—1 Pita 5:6, 7.

7. Na cava o vulica ena ivakamacala nei Robert?

7 E bibi na masu meda vakila tiko ga kina na vakacegu ke mani dredre na ituvaki. Dikeva na ivakaraitaki nei Robert, e dua na qase ni ivavakoso yalodina sa yabaki 80 vakacaca. E kaya: “E yaga vakalevu na Filipai 4:6, 7 meu vosota kina e levu na veivakatovolei ena noqu bula. Au a leqa vakailavo. Au vakacegui tale ga mai na noqu itavi vaqase ena dua na gauna lekaleka.” Ia e vakila tiko ga vakacava o Robert na vakacegu? E kaya: “Au dau masu ena gauna au lomaocaoca kina. Au kila na levu ga ni noqu masu vagumatua, na levu tale ga ni noqu vakacegu.”

E GUMATUA ENA VUNAU O JISU

Eda na vakila tiko ga na vakacegu nida vunau (Raica na parakaravu 8-10)

8. Me vaka e tukuni ena Joni 8:29, na cava e dua tale na vuna e vakila tiko ga kina o Jisu na vakacegu?

8 Wilika Joni 8:29. E vakila tiko ga o Jisu na vakacegu ni vakararawataki ni kila ni vakamarautaki Tamana. E talairawarawa tiko ga ke mani dredre mada ga. E lomani Tamana qai vakaliuci koya ena ka kece. Ni se tu mai lomalagi, a “matai ligamaqosa” i Jiova. (Vkai. 8:30) Ni bula e vuravura, e gumatua ni vakavulica  na veika me baleti Tamana. (Maciu 6:9; Joni 5:17) E marautaka vakalevu o Jisu na cakacaka qori.—Joni 4:34-36.

9. E rawa vakacava nida vakacegu tiko ga nida ogaoga ena vunau?

9 Eda rawa ni vakatotomuri Jisu nida “vakaitavi vakalevu ena cakacaka ni Turaga.” (1 Kor. 15:58) Nida “ogaoga” ena cakacaka vakavunau, ena donu noda rai me baleta na veika dredre eda sotava. (Caka. 18:5) Kena ivakaraitaki, e rawa ni dredre sara na kedra ituvaki ena yalava. Ia nira vulica mera lomani Jiova mera muria tale ga nona ivakasala, e vinaka nodra bula ra qai mamarau. Ena veigauna eda raica kina qori, eda nuidei ni kauaitaki keda o Jiova. Nida nuitaki Jiova, eda na vakila tiko ga na vakacegu. Qori na ka e vakadinata e dua na tacida yalewa e dau yalolailai qai lomabibi. E kaya: “Niu ogaoga ena cakacaka vakaitalatala, e donu tiko ga noqu rai, au mamarau. Vaka meu veivolekati sara ga kei Jiova niu cakacaka vakavunau tiko.”

10. Na cava o vulica ena ivakamacala nei Brenda?

10 Dikeva nona ivakaraitaki e dua na tacida yalewa o Brenda. E tauvimate bibi kei luvena yalewa. E rawa ni veitosoyaki ga ena nona idabedabe qiqi ni sa sega ni taubale rawa. E vunau ena so na gauna e veivale, ia e levu na gauna sa dau vola ivola ga. E kaya: “Na gauna au sa kila kina na kequ mate qai ciqoma ni na sega ni wali rawa, au sa kauaitaka ga vakalevu na cakacaka vakaitalatala. Niu dau vunau, au sega ni lomaocaocataka e dua na ka. E uqeti au ga meu kauaitaka na nodra vukei o ira ena yalava ni neitou ivavakoso. E dei tale ga ena noqu vakasama na noqu inuinui ena veigauna se bera mai.”

E CIQOMA O JISU NODRA VEITOKONI NA ITOKANI

Eda na vakila tiko ga na vakacegu nida maliwai ira na itokani vinaka (Raica na parakaravu 11-15)

11-13. (a) Eratou vakaraitaka vakacava na yapositolo kei na so tale nira itokani dina nei Jisu? (b) Era tokoni Jisu vakacava nona itokani?

11 Eratou vakaraitaka na yapositolo yalodina i Jisu ni ratou itokani dina ena gauna kece ni nona cakacaka vakavunau. Eratou cakava sara ga na ka e tukuni ena Vosa Vakaibalebale 18:24, e kaya: “E tiko na itokani eda veivolekati sara, e yawa na tacida dina.” E mareqeti ratou nona itokani o Jisu. O iratou mada ga na tacina dina, ratou sega ni vakabauti koya ena gauna kece ni nona cakacaka vakavunau. (Joni 7:3-5) Dua na gauna, era kaya na wekana ni sa leqa nona vakasama. (Mari. 3:21) Ia e kaya o Jisu vei ratou nona yapositolo yalodina ena bogi ni bera nona mate: “O kemudou ga dou sa dau tiko vata kei au niu sotava na veika dredre.”—Luke 22:28.

12 Eso na gauna eratou vakararawataki Jisu na nona yapositolo, ia e raibaleta nodratou cala qai kauaitaka ga ni ratou se vakabauti koya tiko. (Maciu 26:40; Mari. 10:13, 14; Joni 6:66-69) Ena iotioti ni bogi ni bera ni vakamatei, e kaya o Jisu vei ratou na tagane yalodina qori: “Au sa kacivi kemudou mo dou noqu itokani, baleta na ka kece au rogoca vei Tamaqu au vakatakila vei kemudou.” (Joni 15:15) E macala ga ni ratou dau vakayaloqaqataki Jisu vakalevu na nona itokani. E vakamarautaki koya sara ga ni ratou dau tokoni koya ena cakacaka vakaitalatala.—Luke 10:17, 21.

13 Era itokani tale ga nei Jisu eso na tagane kei na yalewa era tokoni koya ena cakacaka vakavunau kei na so tale na sala. Eso era sureti koya ina nodra vale  me lai kana. (Luke 10:38-42; Joni 12:1, 2) Eso tale era veitomani ena nona ilakolako ra qai wasea vua na nodra iyau. (Luke 8:3) Era dau tokoni Jisu na nona itokani nira kila ni na tokoni ira tale ga. E caka vinaka vei ira, ia e sega ni namaka vakasivia vei ira na ka. E uasivi o Jisu, ia e mareqeta nodra veivuke nona itokani sega ni uasivi. E macala nira tokoni koya me vakila tiko ga na vakacegu.

14-15. Eda na vakaitokani vinaka vakacava? Era na tokoni keda vakacava?

14 O ira na itokani vinaka era na vukei keda meda yalodina tiko ga vei Jiova. Na sala vinaka duadua mo vakaitokani vinaka kina oya mo itokani vinaka. (Maciu 7:12) Kena ivakaraitaki, e uqeti keda na iVolatabu meda vakayagataka noda gauna kei na igu meda vukei ira eso tale, vakabibi o ira na “leqa tu.” (Efeso 4:28) Vakacava o rawa ni vakasamataka e dua ena ivavakoso mo vukea? O rawa ni veivuke ena volivoli vua na tacida e sega ni rawa ni veilakoyaki? O rawa ni vakarautaka na kedratou na vuvale eratou leqa vakailavo? Ke o kila na ivakavakayagataki ni jw.org® kei na JW Library®, o rawa ni vukea eso ena ivavakoso mera kila tale ga? Nida gumatua ni veivuke, eda na mamarau.—Caka. 20:35.

15 Era na tokoni keda na noda itokani nida sotava na veika dredre, meda vakila tiko ga kina na vakacegu. Me vaka ga nona rogoci Jope o Ilaiu ni vakamacalataka nona leqa, era na rogoci keda tale ga noda itokani nida talaucaka noda leqa. (Jope 32:4) Meda kua  ni namaka mera vakatulewa ena vukuda, eda na yalomatua ke da rogoca nodra ivakasala vakaivolatabu. (Vkai. 15:22) Me vaka ga nona rogoci ira nona itokani o Tevita nira veivakadodonutaki, meda yalomalumalumu tale ga ni rogoca nodra veivuke na noda itokani. (2 Sam. 17:27-29) E macala ga ni o ira na itokani qori era iloloma nei Jiova vei keda.—Jeme. 1:17.

VAKILA TIKO GA NA VAKACEGU

16. Me vaka e tukuni ena Filipai 4:6, 7, na sala cava duadua ga eda na vakila kina na vakacegu? Vakamacalataka.

16 Wilika Filipai 4:6, 7. Na cava e tukuna kina o Jiova nida na vakila nona vakacegu “ena vuku i Karisito Jisu”? Na vuna oya ni na dei ga na vakacegu ni lomada kei na noda vakasama ke matata vei keda na itavi nei Jisu ena inaki i Jiova, meda vakabauta tale ga. Kena ivakaraitaki, e vosoti ga noda ivalavala ca kece ena vuku ni isoro ni ivoli i Jisu. (1 Joni 2:12) Qori e veivakacegui dina! Ni Tui ni Matanitu ni Kalou o Jisu, ena vakaotia kece na rarawa e vakavuna o Setani kei na nona vuravura. (Aisea 65:17; 1 Joni 3:8; Vkta. 21:3, 4) Eda vakanamata sara ga ena inuinui totoka qori! E sega ni rawarawa na itavi e lesia vei keda o Jisu, ia ena tokoni keda tiko ga me yacova na ivakataotioti ni veika vakavuravura qo. (Maciu 28:19, 20) E veivakayaloqaqataki dina qori! Io, e bibi na vakacegu, na inuinui kei na yaloqaqa meda lomavakacegu tiko ga.

17. (a) Ena vakila tiko ga vakacava na lotu vaKarisito na vakacegu? (b) Me vaka e yalataki ena Joni 16:33, na cava eda na cakava rawa?

17 O na vakila tiko ga vakacava na vakacegu ni vakasama ni o nuiqawaqawa? Mo muria na ka e cakava o Jisu. Kena imatai, masu, me wasoma tale ga. Kena ikarua, talairawarawa vei Jiova qai gumatua ena vunau ke mani dredre mada ga. Kena ikatolu, dau ciqoma nodra veitokoni na itokani mo vosota kina na veika dredre. Ni o cakava kece qori, ena taqomaka na lomamu kei na nomu vakasama na vakacegu ni Kalou. Me vakataki Jisu, o na yalodina tiko ga ni o vakatovolei.—Wilika Joni 16:33.

SERE 41 Moni Rogoca Noqu Masu

^ para. 5 Eda dau sotava kece na leqa e vakavu nuiqawaqawa. Eda na vulica gona ena ulutaga qo e tolu na ka e cakava o Jisu me vakila tiko ga kina na vakacegu. Eda rawa ni muria qori meda lomavakacegu ke dredre mada ga na ituvaki.