Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA NI NONA BULA

Keirau Kunea na “Mataniciva Saulevu”

Keirau Kunea na “Mataniciva Saulevu”

ERAU veiqaravi tiko o Winston kei Pamela (Pam) Payne ena valenivolavola ni tabana e Ositerelia. Erau marautaka nodrau bula, ia erau sotava tale ga eso na ka dredre. Oya me rau vakamatauni rau ena vanua rau veiqaravi kina, rau vosota tale ga na lutudole ni luvedrau. Ena gauna kece qori, rau lomani Jiova tiko ga kei ira na nona tamata, rau marautaka tale ga nodrau cakacaka vakaitalatala. Me rau talanoataka mada.

Winston, vakamacalataka mada nomu vakasaqara na Kalou.

Au susu e Kuinisiladi, Ositerelia, ena vanua ni tei witi. Eratou sega ni daulotu na noqu vuvale. Ni yawa na neitou itikotiko, e sega ni dua meu gade kina, vakavo ga o ratou na noqu vuvale. Niu sa yabaki 12, au tekivu vakasaqara na Kalou. Au masu, au kerea me vakatakila vei au na ka dina me baleti koya. Toso na gauna, au biubiu mai vale, e dua sara noqu cakacaka e Adelaide, ena ceva kei Ositerelia. Niu yabaki 21, au sotavi Pam niu gade tiko e Serene. E talanoataka vei au na isoqosoqo ni lotu na British-Israel, era tukuna ni o ira na kai Peritania era kawa ni yavusa e Isireli era sa yali. Qori na tini na yavusa ena matanitu ena vualiku era kau vakavesu ena ikawalu ni senitiuri B.G.V. Niu lesu i Adelaide, au talanoataka sara na ulutaga qori vua e dua keirau cakacaka vata e vuli iVolatabu tiko kei ira na iVakadinadina i Jiova. E vica na aua neirau veitalanoataka na ka era vakabauta na iVakadinadina i Jiova. Au qai liaca ni sa rogoci na ka au masulaka niu se gone. Au sa kila na ka dina me baleta na Dauveibuli kei na nona Matanitu! Au sa kunea na “mataniciva saulevu.”—Maciu 13:45, 46.

Pam, o vaqara tale ga na mataniciva ya ni o se gone. O qai kunea vakacava?

Au susu ena tauni o Coffs Harbour, e New South Wales. Eratou daulotu na noqu vuvale. Erau vakabauta na noqu itubutubu na ivakavuvuli ni isoqosoqo na British-Israel, vaka kina o rau na itubutubu nei tinaqu. E vakavulici vei keitou vakaveitacini ni Kalou e vakadonui ira ga na tikitiki  Peritania, e vakavulici tale ga qori vei ratou na tavalei keitou. Au sega ni duavata kina, au sega tale ga ni lomavakacegu. Niu yabaki 14, au Iai lotu ena vica na valenilotu, na Lotu Jaji, Baptist kei na Kavitu. Ia era sega ni vukei au meu kila na Kalou.

Keitou toki sara vakavuvale i Serene, keirau sota kina kei Winston ni gade tiko. Me vaka sa vakamacalataka oti, neirau veitalanoataka na lotu e lai vulica kina na iVolatabu kei ira na iVakadinadina i Jiova. Oti keirau veivolavolai, levu nona ivola sa tikinivolatabu ga! Meu tukuna vakadodonu, vaka meu lomaleqa, au cudru tale ga. Toso na gauna, au sa qai kila ni qori na ka dina.

Ena 1962, au toki i Adelaide meu voleka vei Winston. E tuvanaka meu lai tiko vua e dua na veiwatini iVakadinadina i Jiova, o Thomas kei Janice Sloman, rau daukaulotu tu mai Papua Niu Kini. Dua na ka nodrau kauaitaki au. Au se qai yabaki 18, ia rau vukei au meu kila eso tale na ka me baleta na Kalou. Au mani vulica na iVolatabu, au vakadeitaka niu sa kunea na ka dina. Ni keirau vakamau oti kei Winston, keirau marautaka neirau veiqaravi. Keirau sotava tale ga na veika dredre, ia keirau mareqeta tiko ga na mataniciva saulevu keirau sa kunea.

Winston, talanoataka mada na itekitekivu ni nomu veiqaravi.

A. Na mape ni vanua keirau dau sikova

B. Na sitaba ni vica na yanuyanu. Dau kilai o Kiribati kei Tuvalu me yanuyanu o Gilbert kei Ellice

C. Na yanuyanu totoka o Funafuti e Tuvalu. Keirau dau veisiko kina ni bera nira gole yani na daukaulotu

Ni keirau vakamau oti ga kei Pam, e dolava vei keirau o Jiova e levu na “katuba” ni cakacaka. (1 Kor. 16:9) Na imatai ni katuba, e uqeti keirau kina o Brother Jack Porter na ivakatawa ni tabacakacaka e dau sikova mai na neitou ivavakoso. (Nikua sa lewe ni Komiti ni Tabana e Ositerelia.) E uqeti keirau o Jack kei na watina o Roslyn, me keirau painia tudei. Keirau mani painia me lima na yabaki. Niu sa yabaki 29, au kerei meu veiqaravi vakaivakatawa ni tabacakacaka ena veiyanuyanu ena Sauca Pasifika, me vakataki Samoa, American Samoa, Kiribati, Nauru, Niue, Tokelau, Toga, Tuvalu, kei Vanuatu, era vakarurugi ena valenivolavola ni Tabana e Viti ena gauna ya.

Ena gauna qori, era dau lomatarotarotaka na noda vakabauta na iVakadinadina i Jiova o ira na lewe ni vica na yanuyanu yawa qori, ia e vinakati me keirau qaseqase, me keirau yalomatua tale ga. (Maciu 10:16) Era lewe lailai ga na ivavakoso, eso era sega ni vakaicilitaki keirau rawa. Keirau mani kere icili vei ira na lewenikoro, dua na ka nodra veikauaitaki.

Winston, o dau taleitaka na cakacaka ni vakadewa. E tekivu vakacava?

E Samoa, veivakavulici ena nodra vuli na qase ni ivavakoso

Ena gauna qori, e tiko vei ira na mataveitacini ena yanuyanu o Toga e vica ga na tikidua kei na ivola lalai ena vosa vakaToga, e vosa vakaPolinisia. Ena cakacaka vakaitalatala, era veivakavulici na tacida ena ivola ni vuli vakavalagi The Truth That Leads to Eternal Life (Na ka Dina sa Basika ki na Bula Tawamudu). Ena va na macawa ni nodra vuli na qase ni ivavakoso, eratou duavata e tolu na qase me ratou vakadewataka na ivola qori ena vosa vakaToga ni ratou bau kila toka na vosa vakavalagi. E taipataka o Pam na ka e vakadewataki, e vakau sara i Merika me lai tabaki. E vakaoti na itavi qori ena rauta ni walu na macawa. E sega ni taucoko sara na vakadewa, ia era mai vulica kina na iVolatabu e levu era vosa vakaToga. Keirau sega ni daunivakadewa kei Pam, ia na ituvaki qori e uqeti keirau me keirau taleitaka na cakacaka qo.

Pam, vakacava na bula e yanuyanu ni vakatauvatani kei Ositerelia?

Neirau icili ena dua na neirau veisiko

E duidui sara! E vakatau ena vanua keirau tiko kina, ena so na vanua e levu kina na namu, kalavo, katakata se tunumaka na draki, keirau tauvimate, eso na gauna e lailai na kakana. Ia ni cava e dua na siga, keirau dau marau ni sarava na wasawasa mai na neirau fale, qo na yaca ni nodra vale e Samoa, e doka draunikau,  sega ni vakalalaga. Eso na bogi ni cila na vula, e laurai vinaka sara na vuniniu, e taliva tale ga ena delaniwai na rarama ni vula. E uqeti keirau na gauna marautaki va qori me keirau dau masu, vakasamataka tale ga vakatitobu na veika vinaka, me keirau kua ni kauaitaka na veika e veivakayalolailaitaki.

Keirau dau taleitaki ira na gone nira dau mamarau ra qai via kila na ka nira raica ni keirau kaivalagi. Ni keirau sikovi Niue, e tara na ligai Winston e dua na gonetagane lailai qai vakila ni vutivutia. E kaya, “Au taleitaka na ligamu, e vaka na vuti ni manumanu.” E kilai sara ga ni se qai raica vakadua na yago vutivutia, e sega ni kila me vakamacalataka vakacava!

E tubu neirau loloma ni keirau raica na dredre ni bula kei na bula dravudravua ena koro. E totoka na yanuyanu, ia e sega ni vinaka na veiqaravi vakavuniwai, e lailai tale ga na wainigunu. Era sega ni lomaleqa na tacida ni sa matau vei ira na ivakarau ni bula qori. Era marau tu ga nira tiko voleka na nodra vuvale, nodra vanua ni sokalou, e rawa tale ga nira vakacaucautaki Jiova. E uqeti keirau na nodra ivakaraitaki me keirau vakaliuca na veika bibi, me rawarawa tale ga neirau bula.

Pam, e duatani na taki wai kei na vakasaqa e yanuyanu, o cakava vakacava?

E Toga, savasava tiko o Pam

Au vakavinavinaka ni vakavulici au vinaka o Ta. Levu na ka e vakavulici au kina, me vaka na vakawaqa buka, vakasaqa, kei na ka meu cakava ni lailai na ka e tu. Dua na neirau veisiko i Kiribati, keirau vakaicili ena dua na bure lailai, e lalaga bitu, e sova na lase me kena fuloa. Meu vakasaqa, au na kelia e dua na qara me matadravu, au vakayagataka na qanibulu me buka. Meu lai taki wai, au na yatuni kei ira na vo ni marama ena toevu. Era dau takiva mai na wai ena toevu nira vakayagataka e dua na tolonikau e ono na mita, vesu i muana na dali qai vesu kina na tini. Ena vaka tu na irairai ni kau ni siwa. Keimami na lako yadudua, ni viritaki na dali, keimami na dreta totolo mai me rawa ni vakatatiki na tini me tawa na wai. Au nanuma ni rawarawa, ia na gauna meu lako kina, e dredre toka. Au viritaka vakavica na kau, ia e vude tu ga na tini! Era veidredrevaki, oti e qai mai vukei au e dua na marama. Era dau veivuke na lewenivanua, era veikauaitaki tale ga.

Drau taleitaka vakalevu na nomudrau ilesilesi e yanuyanu. Drau via talanoataka eso na ka e guiguilecavi dredre?

Winston: E taura na gauna me keirau matau ena so na nodra ivakarau. Kena ivakaraitaki, nira vakarau kakana, era dau biuta kece mai. Keirau sega ni kila ni dodonu me keirau vakavoca eso me kedra. Keirau mani kania kece na ka e vakarautaki! Ni keirau qai kila ni sega ni dodonu me va qori, keirau vakavoca eso. E laurai na neirau sakasaka, ia e donu tu ga nodra rai na mataveitacini. Era dau vakanamata ena neirau veisiko yani ena veiyaono na vula se sivia. E sega tale ni dua na iVakadinadina i Jiova e dau lako yani ena yanuyanu, o keirau ga.

E Niue, e liutaka na cakacaka vakavunau

E dua tale ga na ivakadinadina levu na neirau veisiko yani. Era nanuma na lewenikoro nira tauyavutaka ga nodra lotu na mataveitacini. Ia ni keirau veisiko yani vakaveiwatini, era qai kila nira lewena na mataveitacini e dua na isoqosoqo e dauveikauaitaki, era drukataka sara ga.

Pam: Au sega vakadua ni guilecava na ka e yaco mai Kiribati. Ena dua na ivavakoso, e vica ga na mataveitacini era tiko kina. E dua ga na qase ni ivavakoso o Itinikai Matera, e dau qaravi keirau vinaka. Dua na siga e kauta mai e dua na sova e tiko e loma e dua ga na yaloka. E kaya, “Qo me kemu.” E tutu yadua meda kana yaloka ena gauna ya. E tarai keirau sara ga nona veikauaitaki na tacida qori.

 Pam, oti e vica na yabaki e lutudole na luvemudrau. O vosota vakacava na ituvaki qori?

Au bukete ena yabaki 1973 ni keirau se tiko ena Sauca Pasifika. Keirau vakatulewataka me keirau lesu i Ositerelia. Oti tale e va na vula sa lutudole na luvei keirau. E rarawa tale ga vakalevu o Winston. E vusolo tu ga na lomaqu, e qai oti ga ni keirau wilika na Vale ni Vakatawa ni Epereli 15, 2009 ena “Taro na Dauwiliwili.” E tarogi kina: “Ke mate e dua na gone ni bera ni sucu, e tiko beka nona inuinui me na vakaturi?” E vakacegui keirau na ulutaga qori ni o Jiova e dau caka dodonu, e nona tale ga na vakatulewa. Ena vakacegui keda mai na levu ni rarawa e tarai keda tu ena ituvaki ca qo, ena qai dusimaki Luvena me “vaqeavutaka na cakacaka ni Tevoro.” (1 Joni 3:8) E uqeti keirau tale ga na ulutaga qori me keirau mareqeta vakalevu na “mataniciva” talei eda mai kila nida iVakadinadina i Jiova! Eda kalougata dina nida kila na inuinui e vakarautaka na Matanitu ni Kalou.

Oti qori keirau veiqaravi tale vakatabakidua. Keirau veiqaravi me vica na vula ena Peceli e Ositerelia, toso na gauna keirau veiqaravi tale vakaivakatawa ni tabacakacaka. E va na yabaki neirau veisiko ena taudaku kei New South Wales kei Serene. Ena yabaki 1981, keirau kacivi tale i Peceli e Ositerelia, keirau veiqaravi kina me yacova mai nikua.

Winston, vakacava e yaga ena nomu itavi ena Komiti ni Tabana nomu veiqaravi tu ena veiyanuyanu ena Sauca Pasifika?

Io, ena levu na sala. A dau qarava tu o Ositerelia na cakacaka e Samoa kei American Samoa. Oti sa qai cokovata na valenivolavola ni tabana e Niusiladi kei Ositerelia. Nikua, na valenivolavola ni tabana e Ositerelia e qaravi Ositerelia, American Samoa, Samoa, Yatu Kuka, Niusiladi, Niue, Timor-Leste, Tokelau, kei Toga. Au dau sikova e levu na vanua qori niu mata mai na valenivolavola ni tabana. E yaga dina noqu cakacaka vata kei ira na mataveitacini yalodina ena veiyanuyanu qori niu sa qaravi ira tiko ena gauna qo ena valenivolavola ni tabana.

O Winston kei Pam ena valenivolavola ni tabana e Ositerelia

Meu tinia, keirau vakadinata kei Pam nira sega ni vakasaqara ga na Kalou na uabula. Era vinakata tale ga na gone na “mataniciva saulevu” qori, ke ra sega mada ga ni kauai na lewe ni nodra vuvale. (2 Tui 5:2, 3; 2 Vei. 34:1-3) E Kalou dauloloma o Jiova, e vinakata mera bula na gone kei na qase!

Ni keirau vakasaqara na Kalou kei Pam ena 50 vakacaca na yabaki sa oti, keirau sega ni kila na vanua keirau na tini kina. Na ka dina ni Matanitu ni Kalou e vaka na mataniciva talei, e sega ni vakatauvatani rawa! Keirau na mareqeta tiko ga!