Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Dau Vakaraitaka na Lewadodonu me Vakataki Jiova?

O Dau Vakaraitaka na Lewadodonu me Vakataki Jiova?

“Niu na kacivaka na yaca i Jiova. . . , e Kalou yalodina, e sega vakadua ni lewacala.”​—VKRU. 32:3, 4.

SERE: 5, 46

1, 2. (a) Na cava e yaco vei Nepoci kei na luvena? (b) Na cava na rua na itovo eda na vulica ena ulutaga qo?

VAKASAMATAKA mada qo. E beitaki vakailasu e dua na turaga ena cala bibi. Dua na ka nodra kurabui kei na nodra rarawa na lewe ni vuvale kei ira na itokani ni beitaki ena itukutuku lasu era tukuna o ira na tagane macawa. Dua na ka nodra rarawa o ira na dau taleitaka na lewadodonu nira vakadinadinataka na nona vakamatei na turaga qori kei na luvena. Qo na italanoa dina. A yaco vua na dauveiqaravi yalodina i Jiova o Nepoci, a bula donuya na nona veiliutaki tiko e Isireli o Tui Eapi.​—1 Tui 21:11-13; 2 Tui 9:26.

2 Eda na dikeva ena ulutaga qo na ka e sotava o Nepoci, kei na nona vakatulewa cala e dua na qase ni ivavakoso yalodina ena imatai ni senitiuri. Nida vulica na ivakaraitaki qori, eda na raica kina ni bibi na yalomalumalumu ke da via tokona na lewadodonu i Jiova. Eda na vulica tale ga meda vakaraitaka na rai nei Jiova me baleta na lewadodonu, ena noda dau yalorawarawa meda veivosoti ni yaco na ka tawadodonu ena ivavakoso.

 NI VAKATANITAKI NA LEWADODONU

3, 4. Na cava e kilai kina o Nepoci, cava e sega ni via volitaka kina nona loganivaini vei Tui Eapi?

3 A yalodina vei Jiova o Nepoci ena gauna era muri Tui Eapi tiko kina kei na watina ca o Ranadi Jesepeli na lewe i Isireli. Era qaravi Peali, ra qai sega ni dokai Jiova se taleitaka nona ivakatagedegede. Ena yasana adua, e mareqeta nona veiwekani kei Jiova o Nepoci, e ka wale tale vua nona bula.

4 Wilika 1 Tui 21:1-3. Ni via volia o Eapi na loganivaini i Nepoci se solia vua e dua na ka e vinaka sara, e bese o Nepoci. Na vuna? E kaya ena veidokai: “Au na sega tu ga ni solia vei kemuni na nodra ivotavota na tukaqu ni vakatabuya sara ga o Jiova.” Na ka e cakava qori o Nepoci e yavutaki ena lawa i Jiova vei ira na Isireli, ni vakatabui kina na kena volitaki na ivotavota ni dua na yavusa. (Vunau 25:23; Tiko 36:7) E matata kina ni vakabibitaka na rai nei Jiova o Nepoci.

5. A vakaitavi vakacava o Jesepeli ena nona vakamatei o Nepoci?

5 Na ka e cakava qori o Nepoci, a yavalati Tui Eapi kina kei watina me rau nakicataki koya. Me rawata na loganivaini qori me nei watina, e tuvanaka o Jesepeli me beitaki vakailasu o Nepoci, qai tini vakamatei kina kei na luvena. Na cava ena cakava o Jiova ena veika tawadodonu qori?

NONA LEWADODONU NA KALOU

6, 7. E vakaraitaka vakacava o Jiova nona tokona na lewadodonu, era vakacegui vakacava na wekai Nepoci kei ira na nona itokani?

6 E totolo ga nona talai Ilaija o Jiova me tarogi Eapi. E donu vinaka nona vakataulewataki Eapi o Ilaija ni daulaba qai daubutako. Na cava na lewa i Jiova ena ka e yaco qori? Ena sotava o Eapi, o watina kei ira na luvena na ka vata ga a yaco vei Nepoci kei na luvena.​—1 Tui 21:17-25.

7 Era rarawa na wekai Nepoci kei ira na nona itokani ena ka e cakava o Eapi, ia era lomavakacegu nira vakadeitaka ni kila tiko o Jiova na ka tawadodonu qori qai cakava kina vakatotolo e dua na ka. A rairai vakatovolei nodra yalomalumalumu kei na nodra nuitaki Jiova ena dua na ka e vakarau yaco.

8. Na cava e cakava o Eapi ena itotogi e tauca vua o Jiova, cava e yaco kina?

8 Ni rogoca o Eapi na itotogi ena tauca vua o Jiova, “e dresulaka na nona isulu, e vakaisulutaga, e lolo, e davo tiko ga ena isulutaga qai veilakoyaki voli ena lomabibi.” E laurai vua na yalomalumalumu! Cava e qai yaco? E tukuna vei Ilaija o Jiova: “Ni vakamalumalumutaki koya vei au, au na sega ni kauta mai na ka ca ena nona gauna. Au na qai kauta ga mai na ka ca ina nona vuvale ena gauna i luvena.” (1 Tui 21:27-29; 2 Tui 10:10, 11, 17) Ni dau “dikeva na lomada” o Jiova, e yalololoma kina vei Eapi.​—Vkai. 17:3.

ITATAQOMAKI NA YALOMALUMALUMU

9. Na cava e itataqomaki kina vei ira na wekai Nepoci kei ira na nona itokani na yalomalumalumu?

9 Na cava na nodra rai eso me baleta na vakatulewa e tau vei Eapi nira kila vinaka na ka vakadomobula e cakava? Na kena sega ni tau na itotogi, e rairai vakatovolei sara ga kina na nodra vakabauta na wekai Nepoci kei ira na nona itokani. Ia ena taqomaki ira na yalomalumalumu, mera tomana tiko ga ena yalodina  nodra sokalou vei Jiova, mera vakadeitaka tale ga ni dau lewadodonu tu ga na Kalou. (Wilika Vakarua 32:3, 4.) Ni sa vakaturi ira na yalododonu o Jiova, ena qai raica o Nepoci, na luvena, kei ira na wekana na nona lewadodonu. (Jope 14:14, 15; Joni 5:28, 29) Na tamata yalomalumalumu ena nanuma tiko ni “lewa na Kalou dina na cakacaka kece, wili kina na ka kece e caka lo, e vinaka se ca.” (Dauv. 12:14) O Jiova e dau yavutaka nona vakatulewa ena so na ka eda sega sara tu ga ni kila. Na yalomalumalumu tale ga e itataqomaki vei ira na sega ni cala mera kua ni malumalumu vakayalo.

10, 11. (a) Na ituvaki cava e dau vakatovolei kina na noda rai me baleta na lewadodonu? (b) Ena taqomaki keda vakacava na yalomalumalumu?

10 Ena vakacava nomu rai ke ra vakatulewataka na qase e dua na ka o lomatarotarotaka se sega ni duavata kina? Kena ivakaraitaki, na cava o na cakava ke dua drau veivolekati sa sega tale ni lesi ena itavi? Vakacava ke vakasivoi o watimu se luvemu, se nomu itokani voleka, o qai sega ni duavata kina? Vakacava ke o nanuma ni sega ni dodonu nona lomani e dua e cakacala? Na veika va qori e dau vakatovolei kina noda vakabauti Jiova kei na ituvatuva ena nona isoqosoqo. Ke  yaco qori, ena taqomaki iko vakacava na yalomalumalumu? Vakasamataka e rua na sala qo.

Ena vakacava nomu rai ke ra kacivaka na qase e dua na vakatulewa o sega ni duavata kina? (Raica na parakaravu 10, 11)

11 Kena imatai, nida yalomalumalumu eda na ciqoma na vakatulewa e caka nida sega ni kila na dina ni ka taucoko e yaco. Se mani vakacava sara na levu ni ka eda kila me baleta e dua na ituvaki, o Jiova ga e kila na lomada. (1 Sam. 16:7) Ena uqeti keda qori meda dau yalomalumalumu, meda kila na vanua eda yala kina, me veisau tale ga noda rai. Kena ikarua, na yalomalumalumu ena vukei keda meda talairawarawa da qai yalovosovoso ni waraki Jiova me vakadodonutaka na ka tawadodonu. Me vaka ga e vola e dua na turaga vuku: “Ni na vinaka sara nodra bula o ira era doka na Kalou dina . . . , ia ena sega sara ni vinaka nona bula na daucaka ca, se na vakabalavutaka na nona siga.” (Dauv. 8:12, 13) Io, e yaga ena noda bula kece vakayalo meda dau cakava na ka ena yalomalumalumu.​—Wilika 1 Pita 5:5.

IVAKARAITAKI NI VEIVAKAISINI

12. Na ituvaki cava eda na dikeva, na vuna?

12 A yaco e dua na ituvaki e Siria Anitioki qai vakatovolei kina nodra yalomalumalumu kei na nodra yalorawarawa ni veivosoti na lotu vaKarisito ena imatai ni senitiuri. Meda dikeva mada na veika a yaco, da qai raica se sala cava ena vukei keda kina. Oti meda dikevi keda me baleta na noda dau veivosoti, kei na noda kila vinaka sara ni sema tiko na veivosoti kei na rai nei Jiova me baleta na lewadodonu.

13, 14. Na itavi dokai cava e vakacolati kina o Pita, e vakaraitaka vakacava nona doudou?

13 E dua na qase ni ivavakoso kilai levu o Pita. Rau veitokani voleka sara ga kei Jisu, e vakacolati tale ga ena so na itavi bibi. (Maciu 16:19) Kena ivakaraitaki ena 36 G.V., e nona itavi dokai o Pita me tukuna na itukutuku vinaka vei Konilio kei na nona vuvale. E vakasakiti dina na veika e yaco kina baleta ni kai Veimatanitu tawacili o Konilio. Ni sobuti Konilio kei na nona vuvale na yalo tabu, e kaya o Pita: “Vakacava ena dua e bureitaka na wai mera kua kina ni papitaiso o ira qo ni sa sobuti ira na yalo tabu me vakataki keda ga?”​—Caka. 10:47.

14 Era sota na yapositolo kei ira na qase ena 49 G.V. e Jerusalemi, me veivosakitaki ke vinakati mera cili na kai Veimatanitu era sa tavuki mera lotu vaKarisito. A vosa ena doudou o Pita ena bose qori, qai tukuna vei ira na tacina mera nanuma tiko ni vica na yabaki e liu a sobuti ira tale ga na kai Veimatanitu tawacili na yalo tabu. Na nona vakaraitaka o Pita na ivakadinadina qori e vukei ratou sara ga na lewe ni ilawalawa dauvakatulewa ena imatai ni senitiuri me ratou vakatulewa. (Caka. 15:6-11, 13, 14, 28, 29) Era taleitaka na Jiu kei na lotu vaKarisito kai Veimatanitu na nona doudou o Pita ni tukuna na veika qori. Sa na rawarawa sara me nuitaki e dua na turaga matua vakayalo va qori!​—Iper. 13:7.

15. E lewacala vakacava o Pita ni tiko mai Siria Anitioki? (Raica na imatai ni iyaloyalo.)

15 Ni oti ga vakalailai na bose ena 49 G.V., e veisiko sara e Siria Anitioki o Pita. Ni tiko e kea, e veimaliwai voleka sara kei ira na tacina vakayalo era lewe ni Veimatanitu. Macala ga ni yaga vakalevu vei ira na nona matua kei na nona kila. Ia raitayaloyalotaka mada na nodra kurabui ni sa sega tale ni qai kana vata kei ira o Pita. Era vakamuai cala tale ga eso na Jiu ena ivavakoso mera muri koya, wili sara mada ga kina o  Panapasa. Na cava e cakava kina qori e dua na qase ni ivavakoso lotu vaKarisito, ni rawa ni tawasei ira na lewe ni ivavakoso? Na cava gona eda rawa ni vulica ena ivakaraitaki i Pita nida rarawataka na ka e kaya se cakava e dua na qase?

16. A vakadodonutaki vakacava o Pita, taro cava e basika kina?

16 Wilika Kalatia 2:11-14. E rawai o Pita ni rerevaka na tamata. (Vkai. 29:25) E kila vinaka tu o Pita na rai ni Kalou me baleta na tikina qori, ia e rerevaka ga na nodra rai na Jiu era sa cili era lewe ni ivavakoso e Jerusalemi. A tiko tale ga na yapositolo Paula ena bose qori e Jerusalemi ena 49 G.V., qai vakadodonutaki Pita kina, e vakavotuya nona veivakaisini. (Caka. 15:12; Kala. 2:13) Na cava era na cakava na kai Veimatanitu lotu vaKarisito ena nona lewacala o Pita? Era na tarabe kina? Vakacava ena kau tani vua na itavi dokai e vakacolati tu kina?

DAU VEIVOSOTI

17. E yaga vakacava vei Pita nona dau veivosoti o Jiova?

17 E yalomalumalumu o Pita qai rogoca nona veivakadodonutaki o Paula. E sega ni tukuni ena dua na vanua ena iVolatabu ni kau tani vua nona itavi. Ia e kilai ga ni qai uqeti vakalou me vola e rua na ivola ena iVolatabu. Laurai ena ikarua ni ivola i Pita nona cavuti Paula me “tacida lomani.” (2 Pita 3:15) A rairai vakararawataki ira na kai Veimatanitu era lewe ni ivavakoso na lewacala i Pita, ia se vakayagataki koya tiko ga na ulu ni ivavakoso o Jisu. (Efeso 1:22) E rawa gona nira vakatotomuri Karisito kina kei Tamana na lewe ni ivavakoso mera dau veivosoti. Nuitaki nida na sega ni vakatara meda tarabe ena nona ivalavala ca e dua tale.

18. Na ituvaki cava meda vakaraitaka kina na nona rai o Jiova me baleta na lewadodonu?

18 Me vaka ga na imatai ni senitiuri, era sega tale ga ni uasivi nikua na qase ni ivavakoso nida “dau tarabe kece.” (Jeme. 3:2) De dua eda sa kila vinaka tu qori, ia eda dau vakatovolei sara ga ena nodra malumalumu eso na tacida tagane. Ni yaco qori, vakacava eda na vakasamataka ga na rai nei Jiova me baleta na lewadodonu? Kena ivakaraitaki, vakacava ke o rogoca ni veivakaduiduitaki e dua na qase ena vuku ni ka e tukuna? O na vakatara mo tarabe ena nona sega ni vakasamataka vakayalomatua na ka e kaya qai vakararawataki iko se o cudru kina? O na yalototolo ni tinimaka ni sega ni ganiti koya me qase tale tiko, se o na yalovosovoso ga ni waraki Jisu, na ulu ni ivavakoso? Vakacava o na saga me kua ni qiqo nomu rai, mo raica tiko ga na dede ni gauna sa veiqaravi tu kina na tacimu qori? Ke valavala ca vei iko e dua na tacimu, qai tomana tiko ga nona veiqaravi vaqase ni ivavakoso se vakacolati tale vua eso na itavi bibi, o na marau vata kei koya? Na nomu yalorawarawa ni veivosoti ena vakaraitaka sara ga nomu vakatotomuria na rai nei Jiova me baleta na lewadodonu.​—Wilika Maciu 6:14, 15.

19. Na cava meda vakadeitaka?

19 Era sa waraki Jiova sara tiko ga na dau taleitaka na lewadodonu me vakaotia vakadua na lewacala e vakalolomataki keda tu kina o Setani kei na nona ituvaki ca. (Aisea 65:17) Me yacova na gauna qori, meda vakatotomuria tiko ga nona rai o Jiova me baleta na lewadodonu, nida yalomalumalumu ni kila na vanua meda yala kina kei na noda dau yalorawarawa ni vosoti ira na valavala ca vei keda.