Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 22

Vakavinakataka na iVakarau ni Nomu Vuli!

Vakavinakataka na iVakarau ni Nomu Vuli!

‘Moni vakadeitaka na veika e bibi sara.’—FPAI. 1:10.

SERE 35 ‘Vakadeitaka na Veika e Bibi Sara’

KA ENA VULICI *

1. Na cava era sega ni via vuli kina vakataki ira eso?

E LEVU nikua era cakacaka vakaukaua mera bula kina. Levu na tacida era cakacaka vakabalavu mera vakarautaka na ka me bula kina na nodra vuvale. E levu tale era vakayagataka e vica vata na aua ena veisiga mera gole i cakacaka, mera lesu tale ga i vale. Levu tale era cakava na cakacaka kaukaua mera qarava na nodra vuvale. Ni cava e dua na siga, era oca vakalevu na tacida qori! Sa na sega na igu mera vuli kina vakataki ira.

2. O dau vuli vakataki iko ena gauna cava?

2 E bibi me tiko na gauna meda vuli kina, meda vulica vakavinaka na Vosa ni Kalou kei na ivola vakaivolatabu. Ena dei kina na noda veiwekani kei Jiova, eda na rawata tale ga na bula tawamudu! (1 Tim. 4:15) Eso era yadra vakamataka e veisiga mera vuli ni se vakanomodi na vale, e bulabula tale ga na nodra vakasama. Eso tale era raica ni vakanomodi na yakavi mera vulica kina ena vica na miniti na iVolatabu kei na ivola vakaivolatabu, mera vakasamataka tale ga vakatitobu.

3-4. Na veisau cava e vakayacori? Na vuna?

3 E macala ni o duavata ni bibi me tiko na gauna meda vuli kina vakataki keda. Ia na cava meda vulica? De dua o na kaya, ‘Sa levu dina na ka meda wilika. Au na sega ni rawa ni wilika kece.’ Eso na tacida era vakayagataka vinaka na isolisoli vakayalo e vakarautaki, ia e levu tale e ka ni sasaga vei ira. E kila vinaka qori na iLawalawa Dauvakatulewa. Oya na vuna e vakatulewataka kina me vakalailaitaki na ka e tabaki kei na ka e biu ena Internet.

4 Kena ivakaraitaki, sa sega ni tabaki na iVolaniyabaki  ni iVakadinadina i Jiova ni levu na irogo veiuqeti sa tu ena jw.org® kei na porokaramu ni JW Broadcasting® e veivula. Sa tabaki ga vakatolu e veiyabaki na Yadra! kei na Vale ni Vakatawa me baleti ira na lewenivanua. E sega ni vakayacori na veisau qori meda vakayagataka e levu na gauna ena so tale na ka. E kena inaki ga meda kauaitaka na “veika era bibi sara.” (Fpai. 1:10) Meda veivosakitaka mada na sala meda kila kina na veika e bibi sara, kei na ka mo cakava me yaga kina nomu vulica vakataki iko na iVolatabu.

NA KA MEDA VAKABIBITAKA

5-6. Na cava tale meda vulica vakavinaka?

5 Na cava meda vulica e liu? Me tiko na gauna meda vulica kina e veisiga na Vosa ni Kalou. Ena soqoni ni ivavakoso ena loma ni macawa, sa vakalailaitaki na wase ni iVolatabu me wiliki me rawa ni levu na gauna meda vakasama kina vakatitobu, meda vakekeli tale ga. Me kua ni noda inaki meda wilika tu ga me rawa na wase ni iVolatabu qori, ia me uqeta na lomada kei na noda vakasama, meda toro volekati Jiova kina.—Same 19:14.

6 Na cava tale meda vulica vakavinaka? Eda via vakarautaka vinaka na ulutaga ni Vale ni Vakatawa e vulici, na Vuli iVolatabu ni iVavakoso kei na vo tale ni ka meda vulica ena soqoni ena lomanimacawa. Meda wilika tale ga na ilavelave yadua ni Vale ni Vakatawa kei na Yadra!

7. Vakacava meda yalolailai nida sega ni vakayagataka kece na veika e vakarautaki ena noda website kei na JW Broadcasting?

7 O na rairai tukuna, ‘Vakacava na ulutaga kei na vidio ena noda website na jw.org, kei na porokaramu ena JW Broadcasting? Sa sega ni caka rawa!’ Meda vakatauvatana mada: Dua na ka na levu ni kakana vakatitiweli e vakarautaki ena dua na valenikana. O ira na lai kana yani, ena sega ni rawa nira tovolea kece na ka e vakarautaki. Era digitaka ga e vica na kena mataqali. E va tale ga qori nomu sega ni rawa ni wilika kece na ka e vakarautaki ena Internet, kua ni yalolailai. Wilika se sarava ga na ka o rawata. Meda veivosakitaka mada na veika e vauci ena vuli kei na kena yaga.

KA NI SASAGA NA VULI!

8. O na vakarautaka vakacava na Vale ni Vakatawa? Ena yaga vakacava?

8 Nida vuli, meda vakasamataka vinaka na ka eda vulica me yaga vei keda. Kua ni wilika ga me rawa qai makataka na kena isau. Kena ivakaraitaki, ni o vakarautaka na Vale ni Vakatawa vulici, wilika mada na ka ena vulici ena itekitekivu ni ulutaga. Oti wilika qai vakasamataka na ulutaga levu, ulutaga lalai, kei na taro ni railesuvi. Oti, wilika vakamalua na lewe ni ulutaga, wilika tale ga vakavinaka. Vakasamataka na imatai ni yatuvosa kece ena veiparakaravu, e vakabibitaka na ka e vakamacalataki ena parakaravu. Ni o wilika na ulutaga taucoko, vakasamataka na veisemati ni parakaravu yadua kei na ulutaga lalai, kei na ulutaga levu. Vola na vosa kei na tikina e sega ni matata mo vakekeli kina.

9. (a) Na cava meda wilika kina na veitikinivolatabu ena Vale ni Vakatawa? Eda na cakava vakacava? (b) Me vaka e cavuti ena Josua 1:8, na cava tale meda cakava?

9 Nida vulica ena ivavakoso na Vale  ni Vakatawa, eda na kila vinaka kina na iVolatabu. Meda wilika gona na veitikinivolatabu, vakabibi na kena me wiliki ena gauna ni vuli. Mo kauaitaka na vosa se matavosa ena tikinivolatabu e tokona na tikina bibi ena parakaravu. Me kena ikuri, vakasamataka vakatitobu na tikinivolatabu o wilika kei na sala mo bulataka kina.—Wilika Josua 1:8.

Ra itubutubu, vakavulici ira na luvemuni ena iwalewale ni vuli (Raica na parakaravu 10) *

10. Me vaka e cavuti ena Iperiu 5:14, na cava mera vakavulici kina na gone ena sokalou vakavuvale na sala mera vuli kina vakataki ira kei na vakekeli?

10 Era dau vinakata na itubutubu mera marautaka na gone na nodra Sokalou Vakavuvale e veimacawa. Era dau lalawataka na itubutubu na ka me veivosakitaki, ia e sega ni tukuni me caka sara eso na ka lelevu e veimacawa. E rawa ni saravi na JW Broadcasting e veivula, se dou cakava eso na ka me vaka na ivakatakarakara ni waqa i Noa. Ia e bibi mera vakavulici na gone mera vuli vakataki ira. Kena ivakaraitaki, e bibi mera kila na sala mera vakavakarau kina ena soqoni, se mera vakekeli ena dua na taro se ituvaki e basika e koronivuli. (Wilika Iperiu 5:14.) Ke ra vakayagataka na gauna mera vakekeli kina e vale, ena rawarawa sara nira kila na veika e vulici ena soqoni, soqo ni tabacakacaka, kei na soqo ni veiwasewase ena rairai sega ni vakaraitaki kina na vidio. Na balavu ni vuli ena vakatau ena nodra yabaki kei na nodra ivakarau.

11. Na cava e bibi kina meda vakavulici ira na vuli iVolatabu ena iwalewale ni vuli vakataki ira?

11 E bibi tale ga mera kila na vuli iVolatabu na iwalewale ni vuli vakataki ira. Nira tekivu vuli, eda marau nida raica mera makataka na isaunitaro ena nodra ivola ni vuli se ivola ni soqoni. Ia e bibi meda vakavulici ira ena iwalewale ni vakekeli kei na sala mera vuli kina vakataki ira. Nira sotava e dua na ituvaki, ena sega ni totolo sara nodra taroga eso tale ena ivavakoso, era na kila na ka mera cakava nira vakekeli ena noda ivola.

ME VAKAINAKI NOMU VULI

12. Na cava me inaki ni noda vuli?

12 Ke o sega ni dau taleitaka na vuli, kena ibalebale o na sega ni marautaka na vuli vakataki iko? Sega, o rawa ni marautaka. Mo vuli ga vakalekaleka ni o tekivu, toso na gauna sa rawa ni balavu. Vakasamataka na inaki ni nomu vuli. Na kena inaki levu meda veivolekati kei  Jiova. Eso na gauna eda na vuli me rawa nida sauma nona vakatataro e dua, se vakekeli ena dua na ituvaki eda sotava tiko.

13. (a) Na cava e rawa ni cakava e dua na itabagone me vakamacalataka nona vakabauta e koronivuli? (b) O na muria vakacava na ivakasala ena Kolosa 4:6?

13 Kaya mada ke o itabagone. Era vakabauta na lewe ni nomu kalasi na bula vakaidewadewa. O na via vakamacalataka na ivakavuvuli vakaivolatabu, ia o sega ni kila na ka mo tukuna. E vinakati kina na vakekeli! E rua na vuna mo cakava kina: (1) mo vakadeitaka nomu vakabauta ni bulia na Kalou na ka kece, (2) mo vakamacalataka vakavinaka na ka dina. (Roma 1:20; 1 Pita 3:15) O na rairai taroga, ‘Na cava era vakabauta kina na lewe ni noqu kalasi na bula vakaidewadewa?’ Vakayagataka na ivola vakaivolatabu mo vakekeli kina vakavinaka. De dua o na vakadinata ni sega soti ni dredre mo vakamacalataka na nomu vakabauta. Era vakabauta e levu na bula vakaidewadewa nira rogoca vua e dua era doka. Ke o raica e dua se rua na tikina mo vakamacalataka, de dua ena lomavakacegu sara ga o koya e taro, ni via kila tiko na ka dina.—Wilika Kolosa 4:6.

KILA VINAKA

14-16. (a) Na cava o rawa ni cakava mo kila vinaka kina na ivola ena iVolatabu e sega ni matata vei iko? (b) Vakamacalataka na yaga ni tikinivolatabu e sega ni lavetaki mo kila vinaka kina na ivola i Emosi. (Raica tale ga na kato “ Raitayaloyalotaka na ka o Vulica ena iVolatabu!”)

14 Kaya mada ke tuvanaki ena soqoni ni ivavakoso tarava meda wilika qai veivosakitaka na ka e vola e dua na parofita lailai, rairai e dua o sega ni kila vinaka sara. De dua na imatai ni ka mo cakava oya mo kila vinaka na ka e vola na parofita qori. O na cakava vakacava?

15 Kena imatai, o na taroga: ‘Na cava au kila me baleti koya e vola na ivola qo? O cei o koya, e vakaitikotiko e vei, na cava e dau cakava?’ Nida vulica eso tale na ka me baleta na parofita qori, eda na rawa ni kila vinaka na vuna e vakayagataka kina eso na vosa, se vosa vakatautauvata. Ni o wilika na iVolatabu, raica na matavosa e kilai kina na nona itovo o koya e vola.

16 Kena ikarua, ena yaga tale ga mo kila na gauna e volai kina na ivola qori. Ena rawarawa sara ni o raica na “Veitaravi ni iVola ena iVolatabu” ena daku ni Vakadewa ni Vuravura Vou. O rawa tale ga ni raica na iyaloyalo me baleti ira na parofita kei na tui ena iKuri A6. Ke ivola vakaparofisai na ivola o vulica tiko, ena vinaka mo dikeva tale ga na nodra ivakarau ni bula na lewenivanua ena gauna e volai kina. Na itovo ca se ivakarau cava e vinakati me lai vakadodonutaka na parofita? O cei tale na dauvola iVolatabu e bula tiko ena gauna ya? Mo kila vinaka qori, de dua ena vinakati mo raica eso tale na ivola ena iVolatabu. Kena ivakaraitaki, mo kila vinaka na ka e yaco tiko ena gauna e bula kina na parofita o Emosi, ena yaga sara ni o raica eso tale na tikinivolatabu ena ivola na 2 Tui kei na 2 Veigauna, e tiko ena idusi ni tikinivolatabu ena Emosi 1:1. Kena ikuri, o rawa ni raica na ka e vola o Osea, e rairai bula donuya na gauna i Emosi. Ke o rai ena vica na ivola qori, o na kila vinaka na ituvaki ena gauna i Emosi.—2 Tui 14:25-28; 2 Vei. 26:1-15; Osea 1:1-11; Emosi 1:1.

 KAUAITAKA NA VEIKA MATAILALAI

17-18. O na marautaka nomu vuli vakataki iko ni o kauaitaka na veika matailalai ena iVolatabu. Tukuna na ivakaraitaki ena parakaravu se dua tale o vakelia mai.

17 Nida wili iVolatabu, e bibi meda kila eso tale na ka. Kaya mada ni o wilika tiko na Sakaraia wase 12, na parofisai me baleta nona mate na Mesaia. (Saka. 12:10) Ni o donuya na tikina e 12, o wilika nira na osivaki koya “na vuvale ena mataqali nei Necani.” Kua ni wiliwili tu ga, cegu mada qai taroga: ‘E veisemati vakacava na mataqali nei Necani kei na Mesaia? Au na kila vakacava?’ Mo vakekeli. E tiko ena idusi ni tikinivolatabu na 2 Samuela 5:13, 14, o wilika kina ni o Necani e dua na luvei Tui Tevita. Na ikarua ni idusi ni tikinivolatabu na Luke 3:23, 31, e vakaraitaka ni kawa i Necani o Jisu mai vei Meri. (Raica “Josefa, na luvei Ili,” ivakamacala ni vosa ena Luke 3:23.) Qori e uqeti iko mo via kila tale eso na ka! O kila ni parofisaitaki ni kawa i Tevita o Jisu. (Maciu 22:42) Ia o Tevita mada ga e 20 vakacaca na luvena tagane. Sa rauta me vakamatatataka o Sakaraia ni ratou na tagicaka na mate i Jisu na vuvale nei Necani.

18 Raica tale mada e dua na ivakaraitaki. Ena Luke wase 1, eda wilika ni sikovi Meri na agilosi o Keperieli qai tukuna ni na vakasucuma e dua na gonetagane: “Ena dokai o koya, ena vakatokai me Luvei koya e Cecere Duadua, ena solia vua na Kalou o Jiova na idabedabe vakaturaga i Tevita na tamana, ena lewa vakatui ena vuvale i Jekope me tawamudu.” (Luke 1:32, 33) De dua sa matau ga meda vakabibitaka na imatai  ni ka e tukuna o Keperieli, oya ni na vakatokai o Jisu me “Luvei koya e Cecere Duadua.” Ia e parofisaitaka tale ga o Keperieli ni o Jisu ena “lewa vakatui.” De dua eda na vaqaqa se cava ena nanuma o Meri ena itukutuku i Keperieli. Vakacava e nanuma ni o Jisu ena sosomitaki Tui Eroti se dua tale e tarava na tui me iliuliu e Isireli? Ke tui o Jisu, ena vakatokai o Meri me marama, eratou na bula ena valenitui na nona vuvale. Ia e sega ni volatukutukutaki ni a tukuna qori o Meri vei Keperieli; se da wilika ni a kerea o Meri e dua na itutu ena Matanitu ni Kalou me vaka erau cakava na tisaipeli i Jisu. (Maciu 20:20-23) Qori e vakadeitaka ni dua dina na marama yalomalumalumu o Meri!

19-20. Me vaka e cavuti ena Jemesa 1:22-25 kei na 4:8, na cava na inaki ni noda vuli?

19 Na cava na inaki ni noda vulica na Vosa ni Kalou kei na noda ivola vakaivolatabu? Meda veivolekati kei Jiova. Meda kila tale ga se da “mataqali tamata vakacava” kei na veisau meda cakava meda vakamarautaka kina na Kalou. (Wilika Jemesa 1:22-25; 4:8.) Nida vakarau vuli, meda kerea na yalo tabu i Jiova. Meda kerea me vukei keda me yaga na itukutuku eda vulica, meda kila tale ga na veisau meda cakava.

20 Meda vaka mada ga na tamata yalodina ni Kalou e vakamacalataka na daunisame: “E marautaka na lawa i Jiova, qai wilika e ra na nona lawa ena siga kei na bogi. . . . Na ka kece e cakava ena vuavuaivinaka.”—Same 1:2, 3.

SERE 88 Vakatakila Vei Au na Nomuni Sala

^ para. 5 Ni dau lomasavu o Jiova, e vakarautaka kina e levu na ka meda sarava, wilika, meda vulica tale ga. Na ulutaga qo ena vukei iko mo vakatulewataka na ka mo vulica, e tiko tale ga kina e levu na vakatutu me yaga kina nomu vuli.

^ para. 61 IVAKAMACALA NI IYALOYALO: Rau vakaraitaka na itubutubu vei rau na gone na kena vakarautaki na Vale ni Vakatawa e vulici e veimacawa.

^ para. 63 IVAKAMACALA NI IYALOYALO: E vakekeli e dua na tacida me kila na itukutuku me baleti Emosi na dauvola iVolatabu. Na iyaloyalo e dakuna e dusia na ka e raitayaloyalotaka ni wili iVolatabu qai vakasama vakatitobu.