Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA NI VULI 21

Mo Kua ni Rawai ena “Vuku ni Vuravura Qo”

Mo Kua ni Rawai ena “Vuku ni Vuravura Qo”

“Na vuku ni vuravura qo e ka sesewa vua na Kalou.”​—1 KOR. 3:19.

SERE 98 Na iVolatabu—Vakavuna na Kalou

KA ENA VULICI *

1. Na cava eda vulica ena Vosa ni Kalou?

O JIOVA e Dauniveivakavulici Levu, ena vakavulici keda ena ka meda cakava nida sotava na leqa. (Aisea 30:20, 21) Eda vulica ena nona Vosa na ka kece meda cakava meda “vakarautaki vinaka kina,” meda ‘tu vakarau tale ga ni vakayacora na cakacaka vinaka kece.’ (2 Tim. 3:17) Nida muria na ivakavuvuli vakaivolatabu, eda na yalomatua vakalevu vei ira na uqeta “na vuku ni vuravura qo.”—1 Kor. 3:19; Same 119:97-100.

2. Na cava eda na vulica ena ulutaga qo?

2 Eda na vulica ni dau malele na lomada ena vuku ni vuravura. Ena rairai dredre gona meda vorata na kena itovo kei na kena ivakarau ni rai. Sa rauta me tukuna na iVolatabu: “Ni qarauna de dua e tagavi kemuni bulabula ena vuku vakavuravura kei na vosa ni veicavilaki e yavutaki ena ivakavuvuli vakatamata.” (Kolo. 2:8) Eda na vulica ena ulutaga qo e rua na vosa ni veicavilaki se lasu era vakabauta e levu, e vakavulica o Setani. Eda na veivosakitaka tale ga na vuna e ka sesewa kina na vuku ni vuravura kei na vuna e cecere kina na vuku vakalou.

VEISAU NA RAI ME BALETA NA VEIYACOVI

3-4. E veisau vakacava nodra rai me baleta na veiyacovi e Merika ena itekitekivu ni ika20 ni senitiuri?

3 Ena itekitekivu ni ika20 ni senitiuri, era raica e Merika na veisau ni nodra rai e levu me baleta na veiyacovi. Ena gauna sa oti, era vakabauta e levu ni dodonu ga mera veiyacovi na veiwatini, me kua tale ga ni veitalanoataki. Ia nikua, e levu era sa veiyacovi  vakaveitalia ra qai nanuma ni sega tu ni dua na ka.

4 E kilai na yabaki 1920 ina 1929 me gauna ni tiko vinaka. Na vuna? Ni oti na iMatai ni iValu Levu, era kauaitaka vakalevu na lewenivanua na ilavo kei na marau. E veisau kina nodra itovo, veisau tale ga nodra rai me baleta na veiyacovi. E kaya e dua na dauvakadidike: ‘E laurai e levu na itukutuku me baleta na veiyacovi ena iyaloyalo, drama, ivola, itukutuku ni veivoli, rogoci tale ga ena sere.’ Ena gauna qori, e uqeta na veiyacovi na ivukivuki ni danisi, e sega tale ga ni rakorako na isulusulu. Qori na ka e parofisaitaki ena iVolatabu me baleta na iotioti ni veisiga, ni levu era na “lomana ga na marau.”—2 Tim. 3:4.

Era sega ni rawai na dauveiqaravi i Jiova ena ivakatagedegede torosobu ni vuravura (Raica na parakaravu 5) *

5. Na cava e laurai me baleta na itovo savasava me tekivu mai na veiyabaki ni 1960?

5 Ena veiyabaki ni 1960, sa takalevu na veimoceri vakatagane se vakayalewa, veisere totolo, era tiko vata tale ga e levu era sega ni vakamau. E laurai ena levu na ka ni veivakamarautaki na veiyacovi. Na cava na kena itinitini? E kaya e dua na tamata vuli ni vakavu rarawa ni sega ni muri na itovo savasava. Kena ivakaraitaki, levu na itubutubu era dui tutu, se dua vei rau e biubiu mai vale, levu era lomabibi, se ra dau sarava na iyaloyalo vakasisila. E vakavu rarawa tale ga na veidewavi ni mate ca ni veiyacovi na AIDS. Qori e vakadinadinataka ni ka sesewa na vuku ni vuravura.—2 Pita 2:19.

6. E taleitaka vakacava o Setani na rai ni vuravura me baleta na veiyacovi?

6 E taleitaka o Setani na rai ni vuravura me baleta na veiyacovi. Dua na ka nona marautaka nodra veiyacovi vakaveitalia e levu ni beci kina na iloloma ni Kalou me rau marautaka na veiwatini. (Efeso 2:2) Ni dua e veiyacovi tawadodonu, e dusia ni sega ni vakamareqeta na iloloma ni Kalou na vakaluveni, ena sega tale ga ni bula tawamudu.—1 Kor. 6:9, 10.

RAI NI IVOLATABU ME BALETA NA VEIYACOVI

7-8. E duatani vakacava na rai ni iVolatabu me baleta na veiyacovi mai na rai ni vuravura?

7 O ira na muria na vuku ni vuravura qo era vakalewa na itovo savasava ena iVolatabu, era kaya ni sa oti na kena gauna. De dua era vaqaqa, ‘Na Kalou ga e biuta e lomada na gagadre ni veiyacovi, cava ga e kaya tale kina meda qarauna?’ Era taroga  qori nira nanuma ni dodonu ga mera cakava na ka era vinakata. Ia e duatani na ka e kaya na iVolatabu, nida rawa ni lewa na noda gagadre. (Kolo. 3:5) Kena ikuri, e vakarautaka o Jiova na ituvatuva ni vakawati me vakayacori kina na veiyacovi, me dokai tale ga. (1 Kor. 7:8, 9) Erau na marautaka kina na veiwatini na veiyacovi, rau na lomavakacegu tale ga. Qori na ka era sega ni marautaka na veiyacovi tawadodonu.

8 Ni vakatauvatani kei na vuku ni vuravura, e duatani sara na ka e kaya na iVolatabu me baleta na veiyacovi. E vakaraitaka ni rawa ni marautaki. (Vkai. 5:18, 19) E kaya na iVolatabu: “Moni kila yadua na sala moni lewa kina na yagomuni, me savasava qai rokovi, moni kua ni dau kocokoco se garogaro vakasisila me vakataki ira na lewe ni veimatanitu era lecava na Kalou.”—1 Ces. 4:4, 5.

9. (a) Era uqeti vakacava na dauveiqaravi i Jiova ena itekitekivu ni ika20 ni senitiuri mera muria na vuku cecere ena Vosa ni Kalou? (b) Na ivakasala cava e tiko ena 1 Joni 2:15, 16? (c) Me vaka e cavuti ena Roma 1:24-27, na itovo vakasisila cava meda cata?

9 Ena itekitekivu ni ika20 ni senitiuri, era sega ni rawai na dauveiqaravi ni Kalou ena nodra vosa ni veicavilaki o ira na “sega tale ni qai kila na madua.” (Efeso 4:19) Era saga mera kabita dei na ivakatagedegede i Jiova. E kaya na Vale ni Vakatawa vakavalagi ni Me 15, 1926, ni “dodonu me savasava na nona vakasama kei na nona itovo na tagane kei na yalewa, vakabibi nira veimaliwai.” Se mani cava e yaco tu e vuravura ena gauna ya, era muria na dauveiqaravi i Jiova na vuku cecere ena Vosa ni Kalou. (Wilika 1 Joni 2:15, 16.) Eda vakavinavinakataka vakalevu na Vosa ni Kalou, kei na kakana vakayalo e vakarautaka o Jiova ena kena gauna donu. Na isolisoli qori e uqeti keda meda kua ni vakacalai ena vuku ni vuravura me baleta na itovo vakasisila. *Wilika Roma 1:24-27.

VEISAU NA RAI ME BALETA NODA NANUMI KEDA GA

10-11. Na cava e kaya na iVolatabu me baleta na iotioti ni veisiga?

10 E kaya na iVolatabu nira na “dau lomani ira ga na tamata” ena iotioti ni veisiga qo. (2 Tim. 3:1, 2) Sa rauta me uqeta o vuravura na yalo ni nanumi koya ga. E tukuna e dua na ivola ni tabaki vakalevu ena veiyabaki ni 1970 na ivakasala me rawati kina na marau. Eso na ivola e “uqeti ira na dauwiliwili mera cakava ga na ka era vinakata, e sega sara ga ni dua na kena leqa.” Dikeva mada na ka e volai ena dua na ivola qori: “Mo lomani iko ni o talei qai yaga vakalevu.” E kaya tale ga ni dodonu me cakava na tamata yadua na ka e vinakata, na ka e donu, e yaga vua.

11 Vakacava o sa rogoca oti qori? O Setani e uqeti Ivi me cakava na ka ga e vinakata. E kaya ni rawa ni “vaka na Kalou,” me “kila na ka vinaka kei na ka ca.” (Vkte. 3:5) Nikua, levu era nanumi ira ga, era sega ni nuitaka na Kalou me tukuna vei ira na ka e donu kei na ka ca. Kena ivakaraitaki, e laurai qori ena nodra rai e levu me baleta na vakawati.

E kauaitaka na lotu vaKarisito na ka e vinakata e dua tale—vakabibi o watina (Raica na parakaravu 12) *

12. Na cava na rai ni vuravura me baleta na vakawati?

12 Na iVolatabu e vakasalataki rau na veiwatini me rau dau veidokai, me rau dei  tale ga ena nodrau bubului. E uqeti rau na veiwatini me dei na nodrau vakawati, ni kaya: “Ena biuti tamana kina kei tinana o tagane, ena kabiti watina, erau na lewe dua ga.” (Vkte. 2:24) Ia e veibasai sara na ka era uqeta o ira na rawai ena vuku ni vuravura, era kaya ni dodonu me rau dui vakaliuca ga na veiwatini na veika rau vinakata. E tukuna e dua na ivola me baleta na veisere: “Ena so na bubului ni vakamau sa sega ni cavuti, ‘ena gauna taucoko daru bula tiko kina,’ sa cavuti ga ‘ena gauna taucoko daru veilomani tiko kina.’” Na rai qori e vakavuna me tawase e levu na vuvale, era rarawa tale ga vakalevu. Eda vakadinata ni ka sesewa na rai ni vuravura me baleta na vakawati.

13. Na cava e sevaki ira kina na dokadoka o Jiova?

13 E kaya na iVolatabu: “O ira yadua e dokadoka na lomana e sevaka o Jiova.” (Vkai. 16:5) Na vuna? O ira na vakaraitaka se uqeta na yalo ni nanumi ira ga, era dokadoka me vakataki Setani. Vakasamataka mada na ka e cakava. Ena levu ni nona dokadoka, e vinakata me cuva o Jisu me sokalou vua. Ia e kila vinaka ni Kalou e vakayagataki Jisu me bulia na veika tale eso! (Maciu 4:8, 9; Kolo. 1:15, 16) O ira gona e va qori na nodra ivakarau ni rai, era vakaraitaka ni ka sesewa vua na Kalou na vuku ni vuravura qo.

RAI NI IVOLATABU ME BALETA NA NODA NANUMI KEDA GA

14. E uqeti keda vakacava na Roma 12:3 me donu noda rai me baleti keda?

14 E vukei keda na iVolatabu me donu noda rai me baleti keda. E kaya ni sega ni ca meda lomani keda. Eda kila qori ena ka e tukuna o Jisu: “Mo lomana na kainomu me vaka nomu lomani iko.” Qori e dusia ni dodonu meda kauaitaka na ka e yaga vei keda. (Maciu 19:19) Ia e sega ni vakavulica na iVolatabu meda vakalevulevui keda. E kaya ga: “Moni kua ni cakava e dua na ka ena veileti se yalo  ni nanumi koya ga, ia moni yalomalumalumu ena nomuni okati ira na kena vo mera uasivi kemuni.”—Fpai. 2:3; wilika Roma 12:3.

15. Na cava o kaya kina ni yaga na ivakasala vakaivolatabu meda kua ni nanumi keda ga?

15 Nikua, levu na tamata vuku ni vuravura era vosabeca na ivakasala ena iVolatabu me baleta na noda nanumi keda ga. Era kaya ni o na beci ke o okati ira na kena vo mera uasivi iko, era na vakayagataki iko tale ga. Na rai qori e uqeta o Setani, ia cava na kena itinitini? Na cava o vakadeitaka me baleti ira na dau nanumi ira ga? Era dau mamarau? E mamarau na nodra vuvale? Era vakaitokani dina? E dei nodra veiwekani kei na Kalou? E macala gona ni yaga vakalevu nida muria na vuku ena Vosa ni Kalou, sega ni vuku ni vuravura.

16-17. Na cava meda vakavinavinakataka? Na vuna?

16 O ira na muria na nodra ivakasala na vuku ni vuravura, era vaka na saravanua e kerea nona veidusimaki e dua tale na saravanua ni rau sese ruarua tiko. E tukuna o Jisu me baleti ira na tamata “vuku” ena nona gauna: “O ira qori era dauveituberi mataboko. Ke tubera gona na mataboko na mataboko, erau na lutu ruarua ina qara.” (Maciu 15:14) Io, e sesewa dina vua na Kalou na vuku ni vuravura qo.

Ratou marautaka na vuvale qo na nodratou veiqaravi ni ratou muria na ivakasala vuku ena Vosa ni Kalou (Raica na parakaravu 17) *

17 Eda vakadinata ni ivakasala vuku ena iVolatabu “e yaga me veivakavulici, me veivunauci, me veivakadodonutaki, me veidusimaki ena ka e dodonu.” (2 Tim. 3:16) Eda vakavinavinaka vei Jiova ni dusimaki keda na nona isoqosoqo meda kua ni rawai ena vuku ni vuravura! (Efeso 4:14) Na kakana vakayalo e vakarautaka e vakaukauataki keda meda muria tiko ga na ivakatagedegede ena nona Vosa. Eda kalougata vakalevu ni vakarautaka o Jiova na vuku kei na veidusimaki ena nona Vosa nuitaki!

SERE 54 “Qo na Sala”

^ para. 5 E vakadeitaka vei keda na ulutaga ni vuli qo ni o Jiova ga eda na nuitaka me dusimaki keda. E vakaraitaka tale ga nida na sotava na leqa nida muria na vuku ni vuravura, ia eda na marau nida muria na vuku ena Vosa ni Kalou.

^ para. 9 Kena ivakaraitaki, raica na ivola Questions Young People Ask—Answers That Work, Volume 1, wase 24-26, kei na Volume 2, wase 4-5.

^ para. 50 IVAKAMACALA NI IYALOYALO: Rau marautaka nodrau bula vakawati e dua na veiwatini lotu vaKarisito. Rau cakacaka vakavunau ena icavacava ni yabaki 1960.

^ para. 52 IVAKAMACALA NI IYALOYALO: Ena veiyabaki ni 1980, e qaravi watina e tauvimate o tagane vakawati ni rai tiko o luvedrau.

^ para. 54 IVAKAMACALA NI IYALOYALO: Nikua ni rau railesu, dua na ka nodrau marautaka ni rau qaravi Jiova. E marau tale ga vakalevu o luvedrau yalewa kei na nona vuvale.