Raica sara na lewena

Raica na lewenivola

 ULUTAGA NI VULI 11

O sa tu Vakarau Mo Papitaiso?

O sa tu Vakarau Mo Papitaiso?

“Ena vakabulai kemuni tale ga . . . na papitaiso.”—1 PITA 3:21.

SERE 28 Mo iTokani i Jiova

KA ENA VULICI *

1. Na cava ena cakava rawa e dua ni bera ni tara vale?

VAKASAMATAKA mada ke dua e via tara vale. E sa kila rawa tiko na vale vakacava me tara. Vakacava, ena gole sara vakadodonu ena sitoa me volia na iyaya ni vale, me tara sara? Sega. Ni bera ni tekivu, e bibi me cakava rawa e dua na ka. Qori me cakacakataka rawa na kena isau. Na vuna? Me rawa ni kila na levu ni ilavo e tu vua me vakaotia kina na vale. Ke cakacakataka vakavinaka na kena isau, ena vakaotia vinaka na vale.

2. Me vaka e tukuni ena Luke 14:27-30, na cava mo vakasamataka vinaka ni bera ni o papitaiso?

2 Vakacava, o vakasamataka tiko mo papitaiso ni uqeti iko nomu lomani Jiova, o vakavinavinakataka tale ga na ka e cakava? Ke o nanuma tiko qori, na nomu vakatulewa ena vakai koya sara ga na tagane e via tara na nona vale. Ena sala cava? Dikeva mada na ka e tukuna o Jisu ena Luke 14:27-30. (Wilika.) E tukuna o Jisu na ka me namaka e dua e via nona tisaipeli. Meda nona imuri, e bibi meda tu vakarau ni ciqoma na “kena isau,” qori noda vosota eso na ituvaki dredre, eda na vakuai keda tale ga. (Luke 9:23-26; 12:51-53) Kena ibalebale ni bera ni o papitaiso, e bibi mo vakasamataka vinaka na ka e okati kina. Qori na sala o na vakarautaki iko vinaka kina mo qarava tiko ga na Kalou ena yalodina ni o dua na lotu vaKarisito papitaiso.

3. Na cava eda na veivosakitaka ena ulutaga qo?

3 Vakacava ena yaga ke o papitaiso mo tisaipeli i Karisito? Io! O koya e papitaiso ena vakalougatataki vakalevu ena gauna qo kei na gauna se bera mai. Meda veivosakitaka mada eso na taro bibi me baleta na papitaiso. Ena macala ena nomu isaunitaro ke o sa tu vakarau mo papitaiso se sega.

 KA MO KILA ME BALETA NA YALAYALA KEI NA PAPITAISO

4. (a) Na cava na yalayala? (b) Ni tukuni ena Maciu 16:24 meda “kua tale ni muria” na lomada, na cava na kena ibalebale?

4 Na cava na yalayala? Ni bera ni o papitaiso, e bibi mo yalataki iko rawa. Ni o yalataki iko vei Jiova ena masu, o tukuna vua mai vu ni lomamu ni o na qaravi koya me tawamudu. Kena ibalebale, mo “kua tale ni muria” na lomamu. (Wilika Maciu 16:24.) O sa nei Jiova, qori e dua dina na ka dokai. (Roma 14:8) O vakaraitaka tiko vei Jiova ni tekivu qo lako yani, o na vakaliuca na nomu qaravi koya sega ni ka ga o vinakata. Ni o yalayala, o bubului vua na Kalou. E sega ni vakasaurarataki keda o Jiova meda cakava qori. Ia nida sa yalataki keda vua, e namaka meda cakava sara.—Same 116:12, 14.

5. Na cava na duidui ni yalayala kei na papitaiso?

5 Na cava na duidui ni yalayala kei na papitaiso? Ni o yalayala, e sega ni dua tale e kila, o iko ga kei Jiova. Ia ni o papitaiso, o vakaraitaka e matanalevu ni o sa yalataki iko oti vei Jiova. * E dau vakayacori na papitaiso ena soqo ni tabacakacaka se soqo ni veiwasewase. Kena ibalebale, o vakaraitaka ena nomu papitaiso ni o lomani Jiova na nomu Kalou ena lomamu taucoko, ena nomu vinaka taucoko, ena nomu vakasama taucoko kei na nomu kaukaua taucoko. O vakadeitaka tale ga ni o na qaravi koya me tawamudu.—Mari. 12:30.

6-7. Me vaka e tukuni ena 1 Pita 3:18-22, na cava e rua na vuna e bibi kina meda papitaiso?

6 Vakacava e dodonu sara ga mo papitaiso? Dikeva mada na ka e tukuni ena 1 Pita 3:18-22. (Wilika.) Na waqa e taya o Noa e vakaraitaka na nona vakabauta. E va tale ga qori na nomu papitaiso, e vakaraitaka ni o sa yalataki iko oti vei Jiova. Ia vakacava e dodonu sara mo papitaiso? Io. E vakaraitaka o Pita e rua na vuna. Kena imatai, ena “vakabulai [iko].” Ena sala cava? Ena vakabulai keda na noda papitaiso nida vakaraitaka ena ka eda cakava nida vakabauti Jisu, eda vakabauta ni mai mate ena vukuda, sa vakaturi i lomalagi, sa tiko ena gauna qo ena “ligaimatau ni Kalou.”

7 Kena ikarua, e ‘savasava na noda lewaeloma’ nida papitaiso. Nida yalataki keda vua na Kalou qai papitaiso, eda sa bucina e dua na veiwekani talei kei koya. E vosota na Kalou na noda ivalavala ca nida veivutuni mai vu ni lomada, eda vakabauta tale ga na ivoli. Qori na sala e rawa ni savasava kina na noda lewaeloma ena mata ni Kalou.

8. Na cava me uqeti iko mo papitaiso?

8 Na cava me uqeti iko mo papitaiso? Ni o sa vulica vinaka na iVolatabu, o kila e levu na ka me baleti Jiova, na nona itovo kei na ka e dau cakava. Macala ga ni veika o vulica me baleti Jiova e tara sara ga na lomamu, e uqeti iko mo lomani koya vakalevu. Kena ibalebale, na vuna levu duadua mo papitaiso kina oya ni o lomani Jiova.

9. Me vaka e cavuti ena Maciu 28:19, 20, na cava na ibalebale ni noda papitaiso ena yaca i Tamada kei na Luvena kei na yalo tabu?

9 Dua tale na vuna o via papitaiso kina oya ni o sa mai kila na ka e tukuna na iVolatabu, o vakabauta tale ga. Dikeva mada na ka e tukuna o Jisu ni veivakaroti me baleta na veivakatisaipelitaki. (Wilika Maciu 28:19, 20.) E tukuna o Jisu ni dodonu mera papitaisotaki “ena yaca i Tamada kei na Luvena kei na yalo tabu,” o ira na papitaiso. Na cava e vakaibalebaletaka? E dodonu mo vakabauta mai vu ni lomamu na ka dina o sa mai vulica me baleti Jiova, na Luvena o  Jisu, kei na yalo tabu. E kaukaua na ka dina qori, ena tara na lomamu. (Iper. 4:12) Meda raica mada.

10-11. Na ka dina cava o sa mai kila me baleta na Tamada, o vakabauta tale ga?

10 O se nanuma tiko na gauna o vulica kina na ka dina me baleta na Tamada? Na yacana o “Jiova,” e “Cecere Duadua e vuravura taucoko,” e “Kalou dina” duadua ga. (Same 83:18; Aisea 37:16) E Dauveibuli, e dau “veivakabulai.” (Same 3:8; 36:9) E vakarautaka na sala meda vakabulai kina mai na ivalavala ca kei na mate, e vakarautaka tale ga vei keda na inuinui ni bula tawamudu. (Joni 17:3) Ni o yalataki iko qai papitaiso, e vakaraitaka ni o sa dua na iVakadinadina i Jiova. (Aisea 43:10-12) O na lewena na vuvale era qaravi Jiova e vuravura raraba era sakitaka nira vakayacani vua, era vunautaka tale ga yani na yacana.—Same 86:12.

11 E dua dina na ka dokai nida mai kila na ka e tukuna na iVolatabu me baleta na Tamada! Ni o vakabauta na ka dina qori, ena uqeti iko mo yalataki iko vei Jiova qai papitaiso.

12-13. Na ka dina cava me baleta na Luve ni Kalou o sa mai vulica, o vakabauta tale ga?

12 E uqeti iko vakacava na ka dina o vulica me baleta na Luve ni Kalou? O Jisu e taravi Jiova ena lomalagi kei na vuravura. E yalorawarawa ni solia na nona bula me keda ivoli. Nida vakaraitaka ena ka eda cakava nida vakabauta na ivoli, ena vosoti na noda ivalavala ca, eda veitokani kei na Kalou, eda na rawata tale ga na bula tawamudu. (Joni 3:16) E noda Bete Levu o Jisu. E vinakata me vukei keda meda vakila na yaga ni ivoli, meda toro voleka tale ga vua na Kalou. (Iper. 4:15; 7:24, 25) Ni Tui ni Matanitu ni Kalou, ena vakayagataki koya o Jiova me vakarokorokotaki kina na yacana, me vakaotia na veika ca, me rawati tale ga na veivakalougatataki tawamudu ena Parataisi. (Maciu 6:9, 10; Vkta. 11:15) E laiva vei keda o Jisu na ivakarau meda muria. (1 Pita 2:21) E ivakaraitaki vinaka vei keda ni vakayagataka nona bula me cakava na loma ni Kalou.—Joni 4:34.

13 Ni o vakabauta na ka e tukuna na iVolatabu me baleti Jisu, o na lomana vakalevu na luve ni Kalou mareqeti. Na loloma qori ena uqeti iko mo cakava na loma ni Kalou me vakataki Jisu. O na via yalataki iko sara ga vei Jiova qai papitaiso.

14-15. Na ka dina cava me baleta na yalo tabu o sa mai vulica, o vakabauta tale ga?

14 Na cava nomu rai ni o mai vulica na ka dina me baleta na yalo tabu? O mai kila ni sega ni tamata, ia e nona igu tawarairai na Kalou. E vakayagataka na yalo tabu o Jiova me uqeti ira na tagane era vola na iVolatabu, na yalo tabu tale ga qori e vukei keda meda kila na nona Vosa, meda muria tale ga. (Joni 14:26; 2 Pita 1:21) E vakayagataka o Jiova na nona yalo tabu meda rawata na “kaukaua e uasivia na kaukaua ni tamata.” (2 Kor. 4:7) E vakaukauataki keda na yalo tabu meda vunautaka na itukutuku vinaka, vorata na veitemaki, vosota na yalolailai kei na veivakatovolei. E vukei keda tale ga meda vuataka na itovo totoka e okati ena “vua ni yalo tabu.” (Kala. 5:22) E yalorawarawa na Kalou me solia na nona yalo tabu vei ira na gumatua ni kerea vua kei ira na nuitaki koya.—Luke 11:13.

15 E veivakacegui dina meda kila nida rawa ni nuitaka na yalo tabu meda qaravi Jiova kina! Ni o vakabauta na ka dina o sa mai vulica me baleta na yalo tabu, ena uqeti iko mo yalataki iko vua na Kalou qai papitaiso.

16. Na cava eda sa vulica mai?

 16 E dua dina na vakatulewa bibi oya mo yalataki iko vei Jiova qai papitaiso. Eda sa vulica mai ni dodonu mo tu vakarau ni ciqoma na kena isau, qori nomu vosota na ituvaki dredre kei na nomu vakuai iko. Ia ena sega ni tukuni rawa na levu ni veivakalougatataki ni vakatauvatani kei na ka o vakuai iko kina. Ena rawa ni vakabulai iko na nomu papitaiso, ena savasava kina nomu lewaeloma ena mata ni Kalou. Na vuna levu duadua mo papitaiso kina oya nomu lomani koya na Kalou o Jiova. E bibi mo vakabauta mai vu ni lomamu na ka dina o sa mai vulica me baleta na Tamada, Luvena, kei na yalo tabu. Ni o vakasamataka vinaka na ka eda vulica qori, vakacava, “O sa tu vakarau mo papitaiso?”

NA CAVA MO CAKAVA NI BERA NI O PAPITAISO?

17. Na cava eso na ka mo cakava ni bera ni o papitaiso?

17 Ke o nanuma ni o sa tu vakarau mo papitaiso, macala ga ni levu sara na ka o sa rairai cakava me vinaka kina nomu veiwekani kei Jiova. * O vulica wasoma na iVolatabu, o mai kila kina e levu na ka me baleti Jiova kei Jisu. O bucina na vakabauta. (Iper. 11:6) O nuitaka vakatabakidua na yalayala i Jiova ena iVolatabu, o vakadeitaka tale ga ni o rawa ni vakabulai mai na ivalavala ca kei na mate ni o vakabauta na isoro i Jisu. O veivutunitaka nomu ivalavala ca, o cata sara ga na veika ca o dau cakava tu e liu, o kerei Jiova kina me vosoti iko. O sa veisautaka na ivakarau ni nomu bula, o biuta na nomu itovo makawa, o muria sara na ivakarau ni bula e marautaka na Kalou. (Caka. 3:19) O doudou ni tukuna vei ira eso tale na ka o vakabauta. O vakadonui mo dua na dautukutuku bera ni papitaiso, o tekivu vunau kei ira na lewe ni ivavakoso. (Maciu 24:14) Dua na ka nona sakitaki iko o Jiova ena ka o cakava qori. O vakamarautaki koya dina.—Vkai. 27:11.

18. Na cava tale eso na ka mo cakava ni bera ni o papitaiso?

18 Na cava tale eso na ka mo cakava ni bera ni o papitaiso? Eda sa vulica mai ni dodonu mo yalataki iko vua na Kalou. Masu vua mai vu ni lomamu qai yalataka vua ni o na qaravi koya ena nomu bula. (1 Pita 4:2) Oti mo tukuna vua na kodineita ni ilawalawa qase ni o sa via papitaiso. Ena qai kerea e vica na qase mo dou veitalanoa. Yalovinaka, kua ni rere ni veitalanoa kei ratou. Nanuma tiko ni ratou kilai iko vinaka na qase ni ivavakoso qori, eratou lomani iko tale ga. Dou na veivosakitaka na ivakavuvuli vakaivolatabu o sa vulica mai. Eratou via vakadeitaka ga ni o sa kila vinaka na ivakavuvuli qori, mo kila tale ga na bibi ni yalayala kei na papitaiso. Ke ratou duavata mo sa na papitaiso, ratou na qai tukuna vei iko ni o rawa ni papitaiso ena soqo ni tabacakacaka  sa voleka se soqo ni veiwasewase.

NA CAVA MO CAKAVA NI O SA PAPITAISO OTI?

19-20. Na cava mo cakava ni o sa papitaiso oti? O na cakava vakacava?

19 Na cava mo cakava ni o sa papitaiso oti? * Nanuma tiko ni o yalataki iko vei Jiova, o bubului vua. E namaka gona o Jiova ni o na cakava sara na ka o bubuluitaka. Kena ibalebale ni oti nomu papitaiso, e bibi mo na dina ena nomu yalayala. O na cakava vakacava?

20 Kua vakadua ni biuta na ivavakoso. Ni o dua na lotu vaKarisito papitaiso, o sa mai lewe ni “mataveitacini.” (1 Pita 2:17) Era sa nomu vuvale vakayalo na mataveitacini ena ivavakoso. O na volekati ira vakalevu ke o dau tiko wasoma ena soqoni. Wilika e veisiga na Vosa ni Kalou qai vakasamataka vakatitobu. (Same 1:1, 2) Ni o wilika oti e dua na wase ni iVolatabu, cegu mada, mo vakasamataka vakatitobu na ka o wilika. Ena qai tara na lomamu na Vosa ni Kalou. “Masu tiko ga.” (Maciu 26:41) Ni o masu mai vu ni lomamu, o na volekati Jiova kina. Mo “vakaliuca tiko ga na Matanitu ni Kalou.” (Maciu 6:33) O na cakava qori ni o raica vakabibi na cakacaka vakavunau. Ni o vunau wasoma, o na vaqaqacotaka na nomu vakabauta, o na rawa ni vukea kina eso tale mera rawata na bula tawamudu.—1 Tim. 4:16.

21. Na cava ena rawati ni o papitaiso?

21 E dua dina na vakatulewa bibi mo cakava oya nomu yalataki iko vei Jiova qai papitaiso. O na vosota eso na ituvaki dredre, o na vakuai iko ena so na ka, ia o na vakalougatataki! Na veika dredre o na rairai sotava ena vuravura qo e “lekaleka qai mamada ga.” (2 Kor. 4:17) Na cava ena rawati ni o papitaiso? O na marautaka na nomu bula ena gauna qo, kei na “bula dina” e se bera mai. (1 Tim. 6:19) Yalovinaka mo vakasamataka vinaka gona qai masulaka na taro qo, “Au sa tu vakarau meu papitaiso?”

SERE 50 Noqu Yalayala ena Masu

^ para. 5 Ke o nanuma tiko mo papitaiso, e vakarautaki sara ga na ulutaga qo me baleti iko. Eda na veivosakitaka eso na taro bibi me baleta na papitaiso. Ena kilai ena isau ni nomu taro ke o sa tu vakarau mo papitaiso se sega.

^ para. 17 Raica na ivola Na Cava Eda Vulica ena iVolatabu? wase 18