Raica sara na lewena

Raica na lewenivola

 ITALANOA NI NONA BULA

“O Keirau Qo! Moni Talai Keirau!”

“O Keirau Qo! Moni Talai Keirau!”

O NANUMA tiko mo toki ena dua na vanua e vinakati kina na veivuke mo vakarabailevutaka na nomu cakacaka vakaitalatala, de dua e vanuatani? Ke o vakasamataka tiko qori, ena yaga vakalevu vei iko na nodrau ivakaraitaki o Brother kei Sister Bergame.

Rau se tekivu veiqaravi vakatabakidua o Jack kei Marie-Line ena 1988. Erau dau matau ena duidui ituvaki, rau ciqoma tale ga e levu na ilesilesi e Guadeloupe kei French Guiana. E qarava tiko na vanua qori na valenivolavola ni tabana e Varanise. Meda tarogi Jack kei Marie-Line mada.

Na cava e uqeti kemudrau mo drau veiqaravi vakatabakidua?

Marie-Line: Niu se gone, au dau lai vunau kei Na ena siga taucoko e Guadeloupe, e marama gugumatua. Au dau lomani ira na tamata, ya na vuna au tekivu painia kina ena 1985 ni oti na ga na noqu vuli.

Jack: Niu se itabagone, au dau maliwai ira vakalevu na veiqaravi vakatabakidua era taleitaka na cakacaka vakaitalatala. Au dau painia veivuke ena gauna ni sereki. Ena so na gauna ena muanimacawa, keimami dau vodo basi kei ira na painia me keimami lai tara na nodra yalava. Keimami vunau ena siga taucoko, lai tini sara e matasawa. Au dau marautaka sara ga na gauna qori!

Ni oti ga vakalailai na noqu vakamau kei Marie-Line ena 1988, au kaya sara, ‛E sega sara ga ni dua na neirau icolacola, vakacava me keirau vakarabailevutaka na neirau cakacaka vakaitalatala?’ Au tomani Marie-Line sara ena veiqaravi vakapainia. Ni oti e dua na yabaki, ni oti na vuli ni painia, keirau lesi sara me keirau painia lavotaki. Keirau marautaka sara ga e levu na neirau ilesilesi e Guadeloupe, oti qori keirau sureti me keirau lai veiqaravi i French Guiana.

E veiveisau nomudrau ilesilesi ena veiyabaki sa sivi. E rawa vakacava ni donu tiko ga nomudrau rai?

Marie-Line: Eratou kila vinaka na tacida tagane ena valenivolavola ni tabana e French Guiana ni neirau tikinivolatabu taleitaki na Aisea 6:8. Ni ratou qiri mai, ratou dau veiwalitaka ena talevoni, “Drau se nanuma tiko ga na nomudrau tikinivolatabu taleitaki?” Keirau sa kidava sara ni sa vakarau veisau na neirau ilesilesi. Keirau na sauma yani, “O keirau qo! Moni talai keirau!”

 Keirau na sega vakadua ni vakatauvatana na neirau ilesilesi makawa kei na neirau ilesilesi vou. Qori ena rawa ni vakavuna me keirau sega ni marautaka. Keirau dau saga tale ga me keirau kilai ira sara vakavinaka na mataveitacini.

Jack: Ena gauna sa oti, era sega ni vinakata eso na neirau itokani me keirau toki, era mani kaya me keirau tiko ga. Ia na gauna keirau biuti Guadeloupe kina, e kaya vei keirau e dua na tacida na ka e tukuna o Jisu ena Maciu 13:38: “Na were o vuravura.” Ni veisau gona na neirau ilesilesi, ena dei tiko ga ena neirau vakasama ni keirau se veiqaravi tiko ga ena were qori se vanua cava ga keirau tiko kina. E bibi ga me dua na yalava, era tiko kina na tamata!

Ni keirau dau yaco yani ena neirau ilesilesi vou, keirau raica nira bula rawa ena vanua qori na lewenivanua, era marau tale ga. Keirau saga gona me keirau vakamatauni keirau kina. Ena rawa ni duidui na kakana, ia keirau kania na ka era kania, keirau gunuva tale ga na ka era gunuva. Ia keirau na qarauna tiko ga na neirau bula. Keirau dau saga me vinaka tiko ga na veika keirau dau tukuna me baleta na neirau ilesilesi kece.

Marie-Line: Levu sara na ka vinaka keirau vulica vei ira na mataveitacini ena vanua qori. Au vakasamataka sara na neirau se qai yaco yani e French Guiana. E bi na uca, keirau mani nanuma sara me keirau qai vunau ni sa siga. E tarogi au sara e dua na tacida yalewa, “Daru lako?” Au kurabui sara ga, au mai kaya yani, “Daru lako vakacava?” E kaya, “Kauta mai nomu iviu, me daru vodo basikeli.” Au vulica gona i keri meu taura tiko na iviu niu vodo basikeli. Keu sega ni vulica ya, au na sega tu ga ni lai vunau ni tau na uca!

Drau sa toki oti vaka15. Dua nomudrau ivakasala me baleta na toki?

Marie-Line: E sega ni rawarawa na toki. Ia se bibi tiko ga me vaqarai e dua na vale mo vakacegu vinaka kina ni o lesu mai na cakacaka vakavunau.

Jack: Au dau veiveisautaka na iboro ni lomanivale. Ena so na gauna, ni ratou kila na tacida tagane ena valenivolavola ni tabana ni keirau na sega ni dede ena dua na yalava, eratou na kaya, “Jack, kua ni boroya na vale qori!”

E dau matai sara o Marie-Line na tawa iyaya! E dau tawana kece na iyaya ena dui kateni, qai vola kina “valenisili,” “rumu ni moce,” “valenikuro,” kei na so tale. Ni keirau yaco yani ena neirau vale vou, ena rawarawa sara me keirau kila  na vanua mera biu kina na kateni. Ena vola ena kateni yadua na ka kece e tiko e loma me rawarawa na neirau vaqaqara.

Marie-Line: E totolo ga na neirau lai tomana na neirau veiqaravi ni keirau dau tuvanaka vinaka na ka.

Drau tuvanaka vakacava na nomudrau gauna mo drau ‘vakacavara vinaka kina na nomudrau cakacaka vakaitalatala’?—2 Tim. 4:5.

Marie-Line: Keirau dau vakacegu ena Moniti me keirau vakavakarau ena soqoni. Tekivu ena Tusiti, keirau dau lako ena cakacaka vakaitalatala.

Jack: E tiko na aua lavaki me keirau rawata, ia keirau sega ni vakabibitaka qori. E bibi ga vei keirau na neirau cakacaka vakaitalatala. Keirau dau saga gona me keirau vosa vei ira kece keirau sotava ni keirau biubiu mai vale me yacova na neirau lesu mai.

Marie-Line: Me kena ivakaraitaki, au na dau tawana tu ga na tikidua ni keirau lai pikiniki. Ke keirau sega mada ga ni kaya ni keirau iVakadinadina i Jiova, era dau gole ga mai eso mera mai taroga na ivola. Ya na vuna keirau dau qarauna kina neirau itovo kei na isulusulu. Era dau raica vakalevu qori na lewenivanua.

Jack: Keirau ivakaraitaki vinaka tale ga ena neirau itikotiko. Au dau tomika na pepa, kauta na benu, rekireki tale ga ena yasa ni vale. Era dau raica qori ena so na gauna o ira keimami tiko veitikivi, era dau taroga, “E tiko qori e dua na iVolatabu?”

Drau sa dau vunau ena veivanua yawa. Bau dua na ka drau sotava e guiguilecavi dredre?

Jack: E dredre eso na yalava e Guiana. Keirau dau vodo gona me 600 na kilomita e veimacawa ena gaunisala ca. Keirau na sega vakadua ni guilecava na neirau veisiko e St. Élie, ena veikauloa na Amazon. Keitou vodo lori, vodo waqa tale ga me vica vata na aua me keitou qai yaco yani. Levu vei ira i keri era dau keli koula. Era solia gona mai eso na tiki ni koula me nodra cau ena levu ni nodra vakavinavinakataka na ivola! Ena yakavi, keitou vakaraitaka vei ira e dua noda vidio. Era gole mai e levu.

Marie-Line: Ena dua na gauna se qai oti ga qo, e kerei o Jack me vunau ena iVakananumi e Camopi. Ena vinakati me keirau vodo waqa me va na aua ena Uciwai na Oyapock. Keirau marautaka dina.

Jack: E dau rerevaki ena so na gauna na kaukaua ni kui ena vanua mamatia. Kila na cava! Eda qoroqoro ga nida raica tu yani na kui qori. Me kila vinaka ga o kavetani na ka me cakava. Ia e gauna marautaki dina qori! E le ono ga na iVakadinadina i Jiova, ia e rauta ni le 50 na keimami iwiliwili na tiko ena iVakananumi, wili kina eso na itaukei kei Merika!

Marie-Line: E rawa tale ga nira marautaka na ilakolako va qori na itabagone era via vakarabailevutaka na nodra veiqaravi. Ena vinakati kina meda nuitaki Jiova, ena vaqaqacotaka na noda vakabauta. Keirau dau raica vakalevu na liga i Jiova.

Levu na vosa drau sa kila. Vakacava drau kenadau ena vuli vosa?

Jack: Sega. Au vulica ga na vosa qori meu rawa ni lai vunau, meu veivuke tale ga ena ivavakoso. Au lesi meu taura na vulici ni Vale ni Vakatawa ena vosa vakaSranantongo, * ni se bera mada ga niu lesi ena itavi ni wili iVolatabu! Au taroga e dua na tacida tagane: “Oni taura rawa na ka au tukuna?” E kaya, “So na gauna keimami sega ni taura rawa, ia e wananavu.” Era dau veivuke vakalevu na gone. Era na tukuna vei au niu cala, ia era sega ni cakava qori na uabula. Levu dina na ka au vulica vei ira na gone.

Marie-Line: Era tiko ena dua na yalava na noqu vuli iVolatabu era vosa vakaVaranise, vakaPotukali, kei na vosa vakaSranantongo. E qai kaya vei au e dua na tacida yalewa meu caka vuli iVolatabu rawa vei koya e dredre nona vosa me qai otioti duadua o koya au kila vinaka na nona vosa. Au sa qai kila na vuna e tukuna kina qori.

Dua na siga, au vuli iVolatabu kei na dua e vosa vakaSranantongo, oti meu qai vuli kei na dua e vosa vakaPotukali. Ni sa tekivu na ikarua ni vuli iVolatabu, e kaya vei au na tacida yalewa keirau  veitomani, “Marie-Line, o kidava e dua na ka?” Au sa qai vakasamataka niu vosa tiko vakaSranantongo vua na marama ni Brazil, sega ni vosa vakaPotukali!

Era taleitaki kemudrau vakalevu o ira na mataveitacini ena veivanua drau veiqaravi kina. E rawa vakacava ni drau volekati ira na mataveitacini?

Jack: E kaya na Vosa Vakaibalebale 11:25: “Na tamata lomasavu ena rawaka.” Keirau dau tu vakarau ni vukei ira na mataveitacini. Na gauna e vakavinakataki kina na Vale ni Soqoni, era kaya vei au eso na tacida tagane: “Biuta tu qori mera qai qarava na dautukutuku ena ivavakoso.” Au kaya sara: “O yau tale ga au dautukutuku. Ke vinakati me caka eso na ka, au na via vakaitavi tale ga.” Eda dau vinakata kece na gauna meda cakava ga vakataki keda eso na ka, ia keirau sega ni vinakata qori me tarova na neirau vukei ira eso tale.

Marie-Line: Keirau dau saga me keirau kila na ka era vinakata na mataveitacini. Ni keirau cakava qori, keirau kila kina na itubutubu e vinakata me dua e vakaraica na luvedrau, se me lai kau mai koronivuli. Keirau na veisautaka na neirau ituvatuva me rawa ni keirau veivuke. Ni keirau tu vakarau ni veivuke, keirau volekati ira kina na mataveitacini.

Drau vakalougatataki vakacava ni drau veiqaravi ena vanua e vinakati kina vakalevu na veivuke?

Jack: Keirau vakalougatataki dina vakalevu ni keirau veiqaravi vakatabakidua. Keirau dau marautaka na veika e bulia o Jiova. Keirau sotava na veika dredre, ia keirau lomavakacegu tu ga ni keirau raica na nodra veitokoni na mataveitacini ena vanua kece keirau lesi kina.

Niu se itabagone, au vesu e French Guiana niu tawaveitovaki. Au sega vakadua ni tadra niu na lesu tale kina ena dua na siga meu lai daukaulotu, me vakadonui tale ga meu vunau e valeniveivesu. Sa rui lomasavu o Jiova ena levu ni nona veivakalougatataki!

Marie-Line: Au marau vakalevu niu vakuai au ena vukudra eso tale. Keirau marau ni keirau qaravi Jiova vakatabakidua. Keirau veivolekati kina vakaveiwatini. So na gauna, ena tarogi au o Jack, “Rawa ni daru sureta e dua na veiwatini me tou mai kanavata, me rau vakayaloqaqataki?” Au na kaya sara, “Au vakasamataka tale tiko ga qori!” Levu na gauna e dau tautauvata na ka keirau vakasamataka.

Jack: Se qai laurai ga qo vei au na kenisa (prostate cancer). E sega ni dau via veitalanoataka qori o Marie-Line. Au kaya vua: “Watiqu, keu mate mada ga nimataka, au sega ni ‘mate niu sa qase sara.’ Ia au mate niu marautaka tu na noqu bula, niu kila niu vakayagataka vinaka na noqu bula ena qaravi Jiova, ena ka e yaga.”—Vkte. 25:8.

Marie-Line: E dolava vei keirau o Jiova na katuba ni veiqaravi keirau sega vakadua ni namaka. Keirau marautaka dina e levu na ka ena neirau bula. Se vanua cava ga e lesi keirau kina na isoqosoqo i Jiova, keirau na lako ni keirau vakadeitaka tu ni o Jiova ga ena tokoni keirau!

^ para. 32 Era tekivuna na vosa vakaSranantongo na bobula, e veicurumaki kina na vosa vakavalagi, vakaNecaladi, vakaPotukali, kei na vosa vakaAferika.