Raica sara na lewena

Raica na lewenivola

Na iRairai Dina kei Jisu

Na iRairai Dina kei Jisu

E sega ni dua vei keda e kila na irairai dina kei Jisu ni a sega ni bau taba se caka na kena ivakatakarakara. A qai tekivu caka na droini kei Jisu ena vica na senitiuri sa oti kei na noda gauna qo.

Era sega mada ga ni kila na daudroini na irairai dina kei Jisu. Na nodra droini e vakatau ena itovo vakavanua, vakabauta vakalotu, kei na ka era vinakata o ira na volia na droini. Na droini qori se ivakatakarakara e rawa ni veisautaka se vakabuawataka nodra rai na tamata me baleti Jisu kei na nona ivakavuvuli.

E ulu balavu qai vakumi o Jisu ena so na droini. Na kena irairai e vaka me malumalumu se matararawa. E vaka na kabula vakayalo ena so tale na droini qai serau tu e uluna na matanisiga. E laurai tale ga ena kena irairai ni sega ni dau veikauaitaki. Vakacava qori na irairai dina kei Jisu? Eda na kila vakacava na kena irairai dina? E vinaka meda dikeva na iVolatabu ni rawa ni vakamacalataka vei keda eso na ka me baleta na irairai kei Jisu. Ena vukei keda qori me donu noda rai me baleti koya.

“ONI VAKARAUTAKA VEI AU E DUA NA YAGO”

Qori na qaqanimasu e rairai cavuta o Jisu ena gauna e papitaiso kina. (Iperiu 10:5; Maciu 3:13-17) Na yago cava e vakaibalebaletaka tiko o Jisu? Ni se vo tu e rauta ni 30 na yabaki me papitaiso o Jisu, e kaya vei Meri na agilosi o Keperieli: “O na bukete, o na vakasucuma tale ga e dua na gonetagane, . . . na Luve ni Kalou.” (Luke 1:31, 35) E uasivi o Jisu me vakataki Atama ga ena gauna a buli kina. (Luke 3:38; 1 Korinica 15:45) De dua e bulicaki vinaka na yagoi Jisu, e rairai ucuya tale ga na tinana o Meri.

E vakumi o Jisu, qori e dua na ivakarau e vakaduiduitaki ira na Jiu kei ira na kai Roma. E ivalavala vakaturaga qai rakorako mera vakumi na Jiu, ia e sega ni balavu se sakuca. E macala gona ni dau vakavuruvuru na kumi Jisu qai koti vinaka na uluna. O ira ga na Nasaraiti me vakataki Samisoni era sega ni kotiva na uludra.—Tiko Voli Mai na Lekutu 6:5; Dauveilewai 13:5.

Ena 30 na yabaki ni nona cakacaka vakamatai voli o Jisu, a se sega kina na iyaya vakamatai era sa tu nikua. (Marika 6:3) Sa rauta me kaukaua o Jisu. Dua na ka a cakava duadua ena itekitekivu ni nona cakacaka vakaitalatala. A “cemuri ira tani kece mai na valenisoro na sipi kei na bulumakau vaka kina na kedra ivakatawa, e sova nodra ilavo na dauveisauilavo qai vakatoboicutaka na nodra teveli.” (Joni 2:14-17) Ena cakava rawa ga qori e dua e kaukaua. A vakayagataka o Jisu na yago e vakarautaka vua na Kalou me vakayacora kina nona ilesilesi vakalou. E kaya o Jisu me baleta na ilesilesi qori: “E dodonu meu tukuna tale ga na itukutuku vinaka ni Matanitu ni Kalou ena koro tale eso, ni qo na ka au talai mai kina.” (Luke 4:43) E vinakati me kaukaua vinaka o Jisu me rawa ni taubaletaka na veivanua e Palesitaina ena nona cakacaka vakavunau.

“NI LAKO MAI VEI AU, . . . AU NA VAKACEGUI KEMUNI”

Na nona dau matamamarau o Jisu kei na nona itovo vinaka e rairai vakavuna mera taleitaka nona veisureti o ira ‘era oca, era bikai voli ena icolacola bibi.’ (Maciu 11:28-30) Na nona dau veikauaitaki kei na nona yalololoma e vakadeitaka vei ira na vakarorogo ni na vakacegui ira dina me vaka e yalataka. O ira mada ga na gone lalai era taleitaki Jisu ni kaya na iVolatabu: “E keveti ira na gone o koya.”—Marika 10:13-16.

A veikauaitaki voli o Jisu me yacova nona vakamatei vakaloloma. Dua na gauna a veivuke ena soqo ni vakamau mai Kena ena nona vukica na wai me waini. (Joni 2:1-11) A vakavulica na lesoni guiguilecavi dredre ena so tale na soqo.—Maciu 9:9-13; Joni 12:1-8.

Koya e bibi sara, e veidusimaki o Jisu ena nona cakacaka vakavunau ena sala me rawati kina na bula tawamudu. (Joni 11:25, 26; 17:3) Dua na ka nona “marau” o Jisu nira tukuna vua na le 70 nona tisaipeli na ka era sotava ena nodra cakacaka vakavunau. E kaya: “Moni marau ga ni sa volai na yacamuni mai lomalagi.”—Luke 10:20, 21.

“MO DOU KUA NI VA YA O KEMUDOU”

Era cakava e levu na ka na iliuliu ni lotu ena gauna i Jisu mera dokai kina, mera vakaraitaka tale ga ni tu vei ira na lewa. (Tiko Voli Mai na Lekutu 15:38-40; Maciu 23:5-7) A tukuna o Jisu me ratou kua ni va ya nona tisaipeli, me ratou kua ni “dau vakacolasau” vei ira eso tale. (Luke 22:25, 26) E vakarota sara ga o Jisu: “Ni qarauni ira na vunivola nira dau via vakaraitaka wavoki nodra isulu balavu, mera kidavaki ena vanua ni veivoli.”—Marika 12:38.

E dau veimaliwai vinaka o Jisu kei ira na lewenivanua, e sega ni dau vakaraitaki koya ena so na vanua e gole kina. (Joni 7:10, 11) Ke duri tu mada ga kei ratou na 11 nona yapositolo yalodina, e rawa ni nanumi ni dua tale ga na yapositolo. Ni soli Jisu o Jutasa vei ira na ilala era na vesuki koya, a tukuna ni na reguci Jisu me “ivakatakilakila” mera kila kina o cei mera vesuka.—Marika 14:44, 45.

E sega ni vakamatailalaitaki na kena irairai o Jisu, ia eda vakadeitaka ni duidui sara na kena droini sa tu nikua. E bibi ena gauna qo meda kauaitaka na noda rai me baleti Jisu, sega ni kena irairai dina.

“SEGA NI DEDE SA NA SEGA NI RAICI AU TALE O VURAVURA”

A mate qai bulu o Jisu ni oti ga e vica na aua nona cavuta na vosa qori. (Joni 14:19) A solia nona bula “me kedra ivoli e le levu.” (Maciu 20:28) E vakaturi koya na Kalou ena ikatolu ni siga ena “yago vakayalo,” qai “vakatara me vakaraitaki koya” vei ratou eso nona tisaipeli. (1 Pita 3:18; Cakacaka 10:40) Ni vakaraitaki koya o Jisu vei ratou nona tisaipeli, sa duatani sara na kena irairai. Eratou sega mada ga ni kilai koya tale nona tisaipeli. Kena ivakaraitaki, a nanuma o Meri Makitala ni o Jisu e dua na dausasamaki. Erau nanuma na tisaipeli rau gole tiko i Emeo ni dua na vulagi o Jisu.—Luke 24:13-18; Joni 20:1, 14, 15.

Na rai cava me tiko vei keda nikua me baleti Jisu? Oti e sivia na 60 na yabaki nona mate o Jisu, a raivotutaki koya na yapositolo o Joni. A sega ni raivotutaka o Joni ni se lili tu o Jisu ena kaunirarawa, a raivotutaka ga na “nodra Tui na tui, nodra Turaga na turaga,” na Tui ni Matanitu ni Kalou. Sa voleka sara qo me vakamalumalumutaki ira na meca ni Kalou se ra mani timoni se tamata, ra qai vakalougatataki tawamudu na kawatamata ena nona veiliutaki.—Vakatakila 19:16; 21:3, 4.