Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E iloloma uasivi duadua ni Kalou na ivoli, ni na rawati kina na bula tawamudu

 ULUTAGA LEVU | NA CAVA NA ILOLOMA VINAKA DUADUA?

Na Cava na iLoloma Vinaka Duadua?

Na Cava na iLoloma Vinaka Duadua?

“Na iloloma vinaka kece kei na isolisoli uasivi kece e vu mai cake, e solia mai na Tama ni rarama vakalomalagi.” (Jemesa 1:17) E laurai votu ena tikinivolatabu qori na nona lomasoli na Tamada vakalomalagi, na Kalou o Jiova. E levu na ka vinaka e solia vei keda na Kalou, ia na cava nona iloloma uasivi duadua? E saumi qori ena vosa kilai levu i Jisu ena Joni 3:16: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”

Na nona soli Luvena duabau ga na Kalou e iloloma uasivi duadua me bau soli vei keda. Eda rawa ni sereki kina mai na ivalavala ca, bula vaqase, kei na mate. (Same 51:5; Joni 8:34) Eda na sega ni rawata ga vakataki keda na veisereki qori se mani kaukaua vakacava noda sasaga. A mani vakarautaka na Kalou na sala meda sereki kina ni lomani keda vakalevu. Era rawa ni bula tawamudu na kawatamata talairawarawa ena vuku ni nona soli Luvena duabauga na Kalou me ivoli. Ia na cava sara mada na ivoli? Na cava e vakarautaki kina? Ena yaga vakacava vei keda?

Na ivoli e rawa ni vakaibalebaletaka na ka e soli me voli lesu kina na ka e yali se sereki kina e dua na bobula. E kaya na iVolatabu ni rau uasivi na vuda o Atama kei Ivi ena gauna rau buli kina. A rawa sara ga ni rau bula tawamudu ena parataisi e vuravura kei ira na nodrau kawa. (Vakatekivu 1:26-28) Ia ka ni rarawa ni rau vakayalia na inuinui qori kei na bula uasivi ni rau digia me rau talaidredre vua na Kalou. Cava tale e qai yaco? E kaya na iVolatabu: “Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” (Roma 5:12) A vakayalia tale ga na bula uasivi o Atama ena vukudra na nona kawa ni vakadewa vei ira na ivalavala ca kei na mate.

Ni vakarautaki na ivoli, na ka e soli e dodonu me veirauti vinaka kei na ka e voli lesu. A valavala ca o Atama ni nakita me talaidredre vua na Kalou, mani kau laivi vua na bula uasivi. E kaya na iVolatabu ni nona talaidredre e vakabobulataki ira kina nona kawa ina ivalavala ca kei na mate. Ni uasivi tale ga o Jisu, e veiganiti vinaka na nona cabora vakaisoro na nona bula me veisereki. (Roma 5:19; Efeso 1:7) Na nona vakarautaka gona vakayalololoma na Kalou na ivoli e rawa nida marautaka tale kina na inuinui rau vakayalia o Atama kei Ivi. Qori na inuinui ni bula tawamudu ena parataisi e vuravura.—Vakatakila 21:3-5.

E iloloma uasivi duadua ni Kalou na ivoli ni rawa nida nuitaka kina na bula tawamudu. A vakamacalataki ena ulutaga sa oti eso na ka meda vakasamataka nida vaqara iloloma. E vinaka meda raica se muri vakacava e vica na tikina qori ena vakarautaki ni ivoli, meda kila kina na talei ni “isolisoli uasivi” qo.

Ka eda vinakata. Eda vinakata meda bula tu ga. (Dauvunau 3:11) Eda na sega ni rawata ga vakataki  keda qori, ena rawati ga ena ivoli. E kaya na iVolatabu: “Na isau ni ivalavala ca na mate, ia na iloloma ni Kalou na bula tawamudu ena vuku i Karisito Jisu na noda Turaga.”—Roma 6:23.

Ganita vinaka na keda ituvaki. E sega ni rawa ni vakarautaka na tamata na ivoli. E kaya na iVolatabu: “Sa rui talei na ivoli ni nodra bula oya na vuna era na sega tu ga kina ni rawata.” (Same 49:8) Dua na ituvaki vakaloloma eda tu kina. Eda na sereki ga mai na veivakabobulataki ni ivalavala ca kei na mate ena veivuke ni Kalou. E ganita vinaka gona na keda ituvaki na nona vakarautaka na Kalou ‘na ivoli i Karisito Jisu me veisereki.’—Roma 3:23, 24.

Vakarautaki ena gauna veiganiti. E kaya na iVolatabu: “[E] mate na Karisito ena vukuda nida se ivalavala ca tu.” (Roma 5:8) Nona vakarautaka na Kalou na ivoli “nida se ivalavala ca tu” e vakaraitaka na levu ni nona lomani keda. E vakadeitaka tale ga vei keda qori nida na sega ni sotava tu ga na revurevu ni ivalavala ca. E levu na ka totoka eda rawa ni vakanamata kina ena veigauna se bera mai.

Vinaka na inaki. E kaya na iVolatabu me baleta na inaki ni nona soli Luvena na Kalou me ivoli: “E kilai na loloma ni Kalou ena ka e yacovi keda ni tala mai vuravura na Kalou na Luvena e duabau ga e vakatubura, meda vakabulai kina ena vukuna. Na loloma qo e sega ni vakatau ena noda lomana na Kalou, o koya ga e lomani keda.”—1 Joni 4:9, 10.

O rawa ni vakaraitaka vakacava ni o vakamareqeta na iloloma uasivi duadua? Nanuma tiko ni kaya o Jisu ena Joni 3:16 nira na bula ga o ira “na vakaraitaka nodra vakabauti koya.” E kaya tale ga na iVolatabu ni vakabauta e kena ibalebale noda “vakadeitaka e lomada ni na yaco dina na ka eda nuitaka.” (Iperiu 11:1) E sega ni tu tu ga ena yaco qori, e vinakati na kilaka dodonu. O uqeti gona mo vulica na veika me baleta na Kalou o Jiova, e solia mai na “isolisoli uasivi” qo. Mo vulica tale ga na ka mo cakava mo marautaka kina na bula tawamudu e rawa ga ena vuku ni ivoli i Jisu.

O rawa ni vulica qori ena ivakamacala vakaivolatabu ena www.jw.org. Era na marau tale ga na iVakadinadina i Jiova mera vukei iko. Ni o vulica qai vakila na yaga ni iloloma uasivi duadua qo, o na kaya tale ga: “Me vakavinavinakataki na Kalou ena vuku i Jisu Karisito na noda Turaga!”​—Roma 7:25.