Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA NI NONA BULA

Vulica na ka Dina ena iVolatabu e Dua na Turaga Ligamudu

Vulica na ka Dina ena iVolatabu e Dua na Turaga Ligamudu

Ni o tataivatia, o na via kukube ena dua na ka. Au sega ni rawa ni cakava qori niu ligamudu. A vinakati me kau tani ruarua na ligaqu niu se qai yabaki vitu, ke sega au na mate.

Au sucu ena 1960 ni se qai yabaki 17 o tinaqu, qai biuti keirau na veitinani o tata niu se buketetaki voli. Keirau mani lai tiko kei rau na itubutubu nei nana e Burg, dua na tauni ena tokalau kei Jamani. Me vakataki ira e levu na lewenivanua, keitou sega ni vakabauta vakavuvale na Kalou. E sega ni tiki ni neitou bula e dua na ka me baleta na Kalou.

Dua na ka nona kauaitaki au o tutu ena gauna au tubucake tiko kina. Au dau taleitaka tale ga meu vukei koya ena veika e cakava, me vaka na musu tabanikau. Au marautaka tu noqu bula qai sega ni dua na ka au leqataka.

VEISAU VAKADUA NOQU BULA

A yaco e dua na ka vakadomobula niu yabaki vitu. E se qai ikarua ga ni yabaki ya na noqu vuli. Au a kabata e dua na duru ni livaliva niu lesu tiko i vale ena dua na siga. Ni sa rauta ni 8 na mita na yawa ni vanua au kabata, e qai kati au na wanilivaliva. Au sega tale ni vakila e dua na ka ni oti ya, au qai lai yadra ga e valenibula. Au sega ni yavalata rawa na ligaqu ruarua ni sa kama sara ga vakaca. Sa rui vakadomobula na noqu mavoa, mani vinakati me musu ruarua na ligaqu me kua ni curumi gaga noqu dra. Eratou rarawa sara ga o nana, bubu, kei tutu. Ia niu se gone ena gauna ya, au sega tu ni kila se na vakacava noqu bula ena veiyabaki e muri niu sa na ligamudu.

Au a lesu i vuli niu suka mai valenibula. Era vakalialiai au na gone, biliraki au, era vakaviriki au nira kila au na sega ni cakava rawa e dua na ka. E dau veibeci qai mosimosi na vosa era tauca. Au mani kau ina nodra koronivuli na lokiloki ra qai curuibure na kena gonevuli. Ni yawa sara mai vale na koronivuli, ratou sega ni sikovi au rawa kina o nana, bubu, kei tutu. Keitou dau sota ga ena gauna ni sereki. E tini na yabaki na neitou tu veiyawaki vakavuvale.

NIU TUBUCAKE TIKO

Niu ligamudu, au sa vakayagataka vakalevu ga na yavaqu. Vakasamataka mada me taura toka na iqaqaloniyavamu na icula se na sepuni ni o kana. Qori sara ga na ka meu vakamatauni au kina. Au vulica tale ga meu vakayagataka na yavaqu niu barasi se seruta na uluqu. Niu veitalanoa mada ga kei ira eso  tale, au dau matanataka na ka au kaya ena yavaqu. Io, sa cakava na cakacaka ni ligaqu na yavaqu.

Gauna au sa itabagone kina, au dau taleitaka na ivola vakasaenisi. Au diva ena so na gauna me dua na ligaqu vakalivaliva meu cakava kina na ka au vinakata. Au tekivu vakatavako niu yabaki 14 niu nanuma ena oti kina noqu beci au, au na tautauvata kina kei ira eso tale. E vaka ga meu kaya tiko: ‘Io, au rawa ni cakava tale ga qori. Era dau vakatavako na uabula, ligamudu se sega.’

Levu na ka au cakava meu vakaogai au tu kina. Au lai lewena e dua na nodra isoqosoqo na itabagone e Jamani, au qai digitaki meu kena vunivola. Au lewena tale ga e dua na ilawalawa ni lagasere, vola serekali, kei na nodra isoqosoqo ni qito na lokiloki. Oti na noqu vuli cakacaka, au lai cakacaka sara ena dua na kabani ena tauni au susu kina. A qai caka e dua na ligaqu vou, sega vakadua ni luva na liga vou qori niu vinakata me taucoko na kequ ituvaki.

VULICA NA IVOLATABU

A golevi au yani e dua na turaga niu wawa sitimanivanua tiko meu lai cakacaka. E kaya ni na rawa ni solia lesu vei au ena dua na gauna na Kalou na ligaqu ruarua. Au kurabui sara ga niu vinakata dina me vakasukai mai na ligaqu dina, ia au sega ni vakabauta ni rawa ni yaco ya! Au sega tale ga ni vakabauta ni bula tiko na Kalou. Keirau sega tale ni sota kei na turaga keirau a veitalanoa ya.

Dua na gauna e muri, a sureti au ina nodratou vale e dua na noqu itokani vakacakacaka. Rau vakamacalataki koya sara na Kalou o Jiova na nona itubutubu ni keitou sa gunu kofi toka. Se qai vakadua meu rogoca ni tiko na yaca ni Kalou. (Same 83:18) Ia au kaya e lomaqu: ‘Se mani o cei na yacana, e sega na Kalou. Au na vakaraitaka vei ratou na vuvale qo ni cala nodratou rai.’ Au vakadonuya me keitou veitalanoa vakaivolatabu niu kila e donu na noqu nanuma. Ia kila na cava, au sega ni vakadinadinataka rawa ni sega ni bula tiko na Kalou.

A tekivu veisau vakamalua noqu rai me baleta na Kalou ni keitou sa dikeva na parofisai ena iVolatabu. Era yaco dina e levu na ka e parofisaitaki ni se vo tu e vica vata na drau se vica vata na udolu na yabaki me qai vakayacori. Dua na gauna keitou veidutaitaka na ituvaki kei vuravura nikua kei na parofisai ena Maciu wase 24, Luke wase 21, kei na 2 Timoci wase 3. Me vaka ga nona dikeva o vuniwai e levu na ivakatakilakila me kila kina na vu dina ni nona tauvimate e dua, na veisemati tale ga ni parofisai au dikeva e vakadeitaka vei au nida sa bula tu qo ena gauna e vakatoka na iVolatabu me “iotioti ni veisiga.” * Dua na ka noqu kidroa, niu raica sara tu ga na vakayacori ni parofisai ya.

Au vakadeitaka ni dina na veika au vulica. Au sa masu vua na Kalou o Jiova, au muduka tale ga na vakatavako au bobula tu kina ena dua na gauna balavu. Oti e dua na yabaki noqu vulica na iVolatabu, au qai papitaiso ena dua na tavu ni sisili  ena 27 Epereli, 1986. A sega ni kilai noqu papitaiso ni a vakatabui tu ena gauna ya na nodra cakacaka na iVakadinadina i Jiova ena tokalau kei Jamani.

SOLI KA

Keimami sega ni dau soqo vakalelevu ena vuku ni vakatatabu, au sega kina ni kilai ira e levu keimami lotu vata. Au kurabui nira vakadonuya na vakailesilesi ni matanitu meu gole ina ra kei Jamani, e sega ni vakatabui tu kina nodra cakacaka na iVakadinadina i Jiova. Qori na imatai ni gauna meu tiko kina ena dua na nodra soqo na iVakadinadina i Jiova, meu sotavi ira tale ga kina e vica vata na udolu keimami lotu vata. Dua na gauna guiguilecavi dredre vei au ya.

A laveti na vakatatabu ni sa kau laivi na ilati a dau wasei rau tu na tokalau kei na ra kei Jamani. Sa sega ni dua na ka me vakataotaka na neimami qarava na Kalou o Jiova. Au via vakalevutaka noqu gauna ni vunau, au ririkotaka ga noqu sotavi ira keimami sega ni veikilai. E dau vakayalolailaitaki au na ituvaki ni yagoqu, kei na gauna dede au tu kina ena nodra koronivuli na lokiloki. Ia au saga ena 1992 meu vunau me 60 na aua ena dua na vula. Dua na ka noqu marau ni rawa vinaka noqu sasaga. Au mani vakatulewataka meu vunau me 60 na aua e veivula, au qai cakava toka qori me tolu na yabaki.

Au sega ni dau guilecava na ka e kaya na iVolatabu: “O cei e malumalumu meu sega ni malumalumu kina?” (2 Korinica 11:29) E tu vinaka noqu vakasama, au rawa tale ga ni vosa. Au saga gona meu cakava na ka kece e rawa ena kequ ituvaki meu vukei ira kina eso tale. Au dau nanumi ira vakalevu e vakaleqai na tikiniyagodra me vakataki au. Au saga meu vakayaloqaqataki ira qori niu kila vinaka ni tu e levu na ka keimami via cakava, ia e sega ni rawa ena vuku ni keimami ituvaki. Dua na ka noqu marau niu soli ka vei ira eso tale.

Au dau marautaka noqu vunautaka na itukutuku vinaka

VUKEI AU O JIOVA E VEISIGA

Au dau yalolailai ena so na gauna niu vinakata me vinaka kece na veitikiniyagoqu. E levu na ka au rawa ni cakava ga vakataki au, ia sa bau va ga ya noqu sasaga qai kania vakalevu na gauna. E dau noqu ibole e veisiga: “Au rawata na ka kece ena vuku i koya e vakaukauataki au.” (Filipai 4:13) Na veika au cakava rawa e veisiga e vakaukauataki au kina o Jiova. Au via qaravi koya tiko ga ni sega vakadua ni vakanadakui au.

E vakalougatataki au o Jiova ena dua na vuvale, na ka sara ga au diva tu niu se gone. E marama yalovinaka na watiqu o Elke, e dauloloma qai veinanumi. Era lewe tale ga ni noqu vuvale e vica vata na milioni na iVakadinadina i Jiova e vuravura raraba.

Kei na watiqu o Elke

E veivakacegui dina na yalayala ni Kalou me baleta na Parataisi, ena ‘vakavoutaka kina na ka kece,’ wili kina na ligaqu. (Vakatakila 21:5) Au vakadeitaka ni na yaco dina na yalayala qori niu vakasamataka na veika e cakava o Jisu ni se bula e vuravura. Kena ivakaraitaki, a vakabula na turaga e mate e dua na ligana, kei na turaga a taya cavuka e dua na daligana. (Maciu 12:13; Luke 22:50, 51) E vakadeitaka vei au na yalayala i Jiova kei na cakamana i Jisu ni na taucoko na ituvaki ni yagoqu ena dua na gauna lekaleka ga qo.

Ia au marautaka vakalevu duadua noqu mai kila na Kalou e tamaqu qai noqu itokani, o Jiova. E dau vakacegui au qai vakaukauataki au. Au duavata kei na ka e vola o Tui Tevita: “O Jiova e noqu kaukaua . . . Au sa ciqoma na nona veivuke, qai marau vakalevu na lomaqu.” (Same 28:7) Qori na ka dina au sa mai kila, au na vakamareqeta tale ga ena noqu bula taucoko veitalia ga niu ligamudu.

^ para. 17 Ena ikuri ni ivakamacala me baleta na ivakatakilakila ni iotioti ni veisiga, raica na wase 9, “Eda sa Bula tu ena ‘iOtioti ni Veisiga?” ena ivola Na Cava Mada e Kaya na iVolatabu? tabaka na iVakadinadina i Jiova, sa tu tale ga ena internet ena www.jw.org.