Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | AGILOSI​—ERA BULA DINA? VUNA MO KAUAI KINA

Sala Era Veivuke Kina na Agilosi

Sala Era Veivuke Kina na Agilosi

Era kauaitaki keda vakalevu na agilosi yalodina, era dau gumatua tale ga ni cakava na loma i Jiova. Gauna e bulia kina na Kalou na vuravura, era “kaila vata ena marau” na agilosi “qai tekivu kaila ena vakasausau o ira kece na luve ni Kalou.” (Jope 38:4, 7) Dua na gauna balavu nodra “via kila” voli na agilosi na parofisai me baleta na veika ena yaco e vuravura ena gauna se bera mai.​—1 Pita 1:11, 12.

E kaya na iVolatabu nira veitaqomaki ena so na gauna na agilosi vei ira na dausokalou dina me vakayacori kina na loma ni Kalou. (Same 34:7) Kena ivakaraitaki:

  • Gauna e vakarusa kina o Jiova na koro vakasisila o Sotoma kei Komora, erau vukea na turaga yalododonu o Loti kei na nona vuvale e rua na agilosi me ratou dro.​—Vakatekivu 19:1, 15-26.

  • Eratou totogitaki e tolu na cauravou Iperiu eratou kau vakavesu i Papiloni me ratou biu ena lovo bukawaqa. Ia na Kalou a “tala mai na nona agilosi me vakabulai ratou na nona tamata.”​—Taniela 3:19-28.

  • A moce bogi dua na turaga yalododonu o Taniela ena qara ni laione, qai kaya ni a bula ga ni “tala mai na . . . Kalou na nona agilosi me sogota na gusudra na laione.”​—Taniela 6:16, 22.

Sa dede nodra vukei ira voli mai na tamata yalodina na agilosi

TOKONI IRA NA LOTU VAKARISITO TAUMADA NA AGILOSI

Era vukei ira na lotu vaKarisito taumada ena so na gauna na agilosi me vakayacori kina na inaki ni Kalou. Kena ivakaraitaki:

  • A dolava na katuba ni valeniveivesu na agilosi, qai tukuna vei ratou na yapositolo eratou vesu tu me ratou vunau tiko ga ena valenisoro.​—Cakacaka 5:17-21.

  • A dusimaka na daukaulotu o Filipi na agilosi me muria na gaunisala ena vanua dravuisiga, mai Jerusalemi i Kesa. A vunau e keri vua na matanivanua ni Iciopea a gole me lai sokalou e Jerusalemi.​—Cakacaka 8:26-33.

  • Gauna e vinakata kina na Kalou mera sa lotu vaKarisito o ira na sega ni Jiu, a rairai ena raivotu e dua na agilosi vua na turaganivalu ni Roma o Konilio. A tukuna vua na agilosi me talatala vua na yapositolo o Pita me gole yani ena nona vale.​—Cakacaka 10:3-5.

  • A rairai tale ga e dua na agilosi vua na yapositolo o Pita, qai sereki koya mai valeniveivesu.​—Cakacaka 12:1-11.

 RAWA NI VUKEI IKO NA AGILOSI

E sega na ivakadinadina ni se vakayagataki ira tiko ga na agilosi na Kalou ena gauna qo, mera vukei ira vakacakamana na lewenivanua me vaka na gauna vakaivolatabu. Ia e kaya o Jisu me baleta na noda gauna: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” (Maciu 24:14) O bau kila nira vakayacora tiko na tisaipeli i Karisito na cakacaka qori ena nodra veidusimaki na agilosi?

Veitokoni na agilosi ena cakacaka vakavunau e vuravura

E vakamacalataki ena Vakatakila nira na gumatuataka na agilosi nodra vukei na lewe i vuravura, mera kila na Kalou o Jiova kei na nona inaki me baleta na kawatamata. A vola na yapositolo o Joni: “Au qai raica e dua tale na agilosi ni vuka voli e macawa, e kacivaka tiko na itukutuku vinaka tawamudu vei ira na tiko e vuravura, vei ira na veimatanitu, na veiyavusa, na duivosavosa, kei na tamata kece. E kaya tiko ena domolevu: ‘Moni rerevaka na Kalou, moni vakalagilagi koya, ni sa yaco mai na aua me veilewai kina o koya, moni qaravi koya gona e bulia na lomalagi, na vuravura, na wasawasa, kei na ivurevure ni wai.’” (Vakatakila 14:6, 7) Nodra italanoa e levu nikua e vakadinadinataka nira veitokoni tiko na agilosi ena vunautaki ni itukutuku vinaka ni Matanitu ni Kalou e veiyasa i vuravura. Io, “era na marau . . . na agilosi ni Kalou” ni veivutuni e dua na tamata ivalavala ca qai lesu vei Jiova.​—Luke 15:10.

Cava ena yaco ni sa vakacavari na cakacaka vakavunau? O ira na agilosi era lewe ni “mataivalu ni lomalagi,” era na tokoni Jisu nodra Tui na tui ena nona ravuravu ena “ivalu ni siga levu ni Kalou Kaukaua Duadua” na Amaketoni. (Vakatakila 16:14-16; 19:14-16) O Jisu ena “totogitaki ira na . . . sega ni talairawarawa ina itukutuku vinaka ni noda Turaga o Jisu.” Era na veivuke ena gauna qori na agilosi ena kena vakatauci na lewa ni Kalou.​—2 Cesalonaika 1:7, 8.

E dodonu gona meda nuidei nira kauaitaki keda yadua na agilosi. Nira kauaitaki ira vakalevu era via qarava na Kalou, levu na gauna e dau vakayagataki ira na agilosi o Jiova mera veivakaukauataki qai veitaqomaki vei ira na nona tamata yalodina e vuravura.​—Iperiu 1:14.

Dua na taro bibi meda na dui taroga. Vakacava eda na rogoca qai talairawarawa ina itukutuku vinaka e kacivaki tiko nikua e veiyasa i vuravura? Ke o via kila na ka mo cakava mera vukei iko kina na agilosi kaukaua ni Kalou, era na marau na iVakadinadina i Jiova ena nomu yasayasa mera vukei iko.