Rau vakaitikotiko e Curaçao o Kenneth kei Filomena. Dua na Vakarauwai rau lai sikovi rau qori e dua na veiwatini ratou dau vuli iVolatabu vata.

E kaya o Kenneth: “Ni keirau yaco yani, e sogosogo tu na vale, keirau sega tale ga ni raica na motoka. Ia vaka ga e tukuni vei au meu qirita na nona talevoni o radinivale.”

E vakabula mai o radinivale qai kaya ni lai cakacaka tu o watina. Gauna e rogoca kina ni rau sa tu e matanivale o Kenneth kei Filomena, e lai dolava na katuba qai kacivi rau i vale.

Erau kidava na veiwatini ni matatagitagi tu o radinivale. Ni masu o Kenneth me tekivu nodratou vuli, e sorova na tagi o radinivale. Rau mani tarogi koya o Kenneth kei Filomena se cava e leqa.

E kaya o radinivale ni a nanuma me sa vakamatei koya ena yakavi ya. Ni vola tiko e dua na ivola vei watina, sa qiri yani o Kenneth. E kaya o radinivale ni lomabibi, rau mani wilika vua o Kenneth kei Filomena eso na tikinivolatabu veivakacegui. E vakayaloqaqataki koya dina qori, e veisautaka sara ga nona rai.

E kaya o Kenneth: “A vinakata dina o radinivale na veivuke. Keirau vakavinavinaka kina vei Jiova ni dusimaki keirau ena vukuna e dua na agilosi se na yalona tabu me keirau qiriti koya me rawa ni vukei!” *

Vakacava e donu nodrau rai o Kenneth kei Filomena ni veivuke na Kalou ena vukuna e dua na agilosi kei na yalona tabu? Se a vakacalaka ga nona qiriti radinivale o Kenneth?

E sega ni vakadeitaki qori, eda kila ga ni dau vakayagataki ira na nona agilosi na Kalou mera vukei vakayalo kina na lewenivanua. Kena ivakaraitaki, e kaya na iVolatabu ni veidusimaki na Kalou ena vukuna e dua na agilosi, me gole na daukaulotu o Filipi me lai vukea vakayalo na matanivanua ni Iciopea.​—Cakacaka 8:26-31.

Era vakavulica e levu na lotu ni tu vei ira na kabula vakayalo na kaukaua vuni. Eso na kabula qori e tukuni nira dauloloma ra qai dau cakava na loma ni Kalou se nodra itavi mera dau veitaqomaki. Era vakabauta e levu nira bula dina tiko na agilosi, qai tiko na sala era dau veivuke kina ena nodra bula. Ia eso tale era sega sara ga ni vakabauta nira bula tiko na agilosi.

Era bula dina tiko na agilosi? Ke ra bula dina tiko, era vu mai vei? Cava meda kila me baleti ira na agilosi? Vakacava era dau veivuke? Meda sauma mada e vica na taro qori.