Raica sara na lewena

Raica na lewenivola

 ULUTAGA LEVU | AGILOSI​—ERA BULA DINA? VUNA MO KAUAI KINA

E Tiko na Agilosi e Dau Taqomaki Iko?

E Tiko na Agilosi e Dau Taqomaki Iko?

E sega ni kaya na iVolatabu ni tiko na agilosi e taqomaka na tamata yadua. A kaya o Jisu ena dua na gauna: “Dou kua gona ni beca e dua vei ira na lalai qo [tisaipeli i Karisito], au tukuna vei kemudou ni nodra agilosi mai lomalagi era dau tu ga ena mata i Tamaqu mai lomalagi.” (Maciu 18:10) Ia a sega ni vakaibalebaletaka e keri o Jisu ni tiko na agilosi e taqomaka na tamata yadua. A kaya tiko ga nira dau kauaitaki ira yadua nona tisaipeli na agilosi. Era na sega gona ni biuti ira ena ituvaki leqataki na lotu vaKarisito dina se cakava e dua na ka lialia, nira nanuma era na veitaqomaki na agilosi ni Kalou.

Ia me kua ni nanumi nira sega ni dau vukei keda na agilosi. (Same 91:11) Era vakabauta mai vu ni lomadra eso ni a taqomaki se dusimaki ira na Kalou ena vukudra na agilosi. Dua vei ira qori o Kenneth a cavuti ena imatai ni ulutaga. Sega ni dodonu meda vakalewai koya ni rawa ni dina na nona nanuma. Era dau vakadinadinataka vakalevu na iVakadinadina i Jiova na veivuke ni agilosi ena nodra cakacaka vakavunau. Nira tawarairai na agilosi, eda sega ni vakadeitaka na ituvaki cava soti e dau vakayagataki ira kina na Kalou mera vukei keda. Ia me kua ni tarova qori noda dau vakavinavinakataka na veitokoni ni Kalou Kaukaua Duadua.​—Kolosa 3:15; Jemesa 1:17, 18.