Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | O NA KUNEA E VEI NA VAKACEGU?

Eda Vinakata Kece na Vakacegu

Eda Vinakata Kece na Vakacegu

O a bau lutu ni o se gone? De dua a mavoa kina na ligamu se drakusi na durumu o qai tagi ena kena mosi. E mani gole yani o nomu Na, e mokoti iko, e vosa vakayalovinaka ni savata qai vadretitaka na nomu mavoa. A rairai malumu sara ga na mosi ena ka e cakava ya o nomu Na, o qai vakila na vakacegu. Io, e dau rawarawa noda kunea na vakacegu nida se gone.

Ia ni basika na ituvaki vereverea ni toso na gauna da qai sotava na leqa lelevu, sa kunekunei dredre na vakacegu. Na leqa eda sotava nida sa uabula sa sega ni rawa ni wali ena ivadreti se na nona mokoti keda o tinada. Raica mada e vica na ivakaraitaki qo.

  • O sa bau vakacegui mai na nomu cakacaka ena dua na gauna? E kaya o Julian ni kurabui qai yalolailai ena gauna e vakacegui kina mai na nona cakacaka. A veinanuyaka tale ga, ‘Au na qarava vakacava na noqu vuvale? Sa maumau wale na vica vata na yabaki au cakacaka tu kina vakaukaua ena kabani.’

  • De dua o rarawataka voli na kavoro ni nomu vakawati. E kaya e dua na yalewa o Raquel: “Dua na ka noqu rarawa ni biuti au vakasauri o watiqu ena dua vakacaca na yabaki sa oti. Au kavoro sara ga. Au sega ni tukuna rawa na mosi au vakila. Dua dina na gauna dredre ya.”

  • Vakacava ke o tauvimate bibi? O na rairai duavata ena so na gauna kei na ka e kaya o Jope: “Au sa cata noqu bula, au sega ni via bula tiko.” (Jope 7:16) E kaya e dua na turaga o Luis, sa yabaki 80 vakacaca: “Au vinakata ena so na gauna meu sa mate ga.” De dua e dau va tale ga qori na nomu rai.

  • Dua tale na ituvaki o na vinakata kina na vakacegu, oya ni takali e dua na wekamu. E kaya o Robert: “E yali sara ga na yaloqu niu rogoca ni sa mate o luvequ tagane ni voca na waqavuka a vodo tiko kina. Na mosi au vakila e vaka ga na mosi e tukuna na iVolatabu ni vakilai ni curu basikati iko e dua na iseleiwau balavu.”​—Luke 2:35.

Eratou rarawa o Robert, Luis, Raquel, kei Julian, ia eratou vakila na vakacegu, qai vakacegui ratou sara ga na Kalou Kaukaua Duadua. Vakacava o na vinakata me vakacegui iko tale ga? Na sala cava soti e dau veivakacegui kina na Kalou?