Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Buca o Ela

Tevita kei Koliaci​—Rau a Vala Dina?

Tevita kei Koliaci​—Rau a Vala Dina?

Era lomatarotarotaka eso ke rau a vala dina o Tevita kei Koliaci se itukuni wale ga. Ke va tale ga qori nomu rai ni o wilika na ulutaga sa oti, dikeva mada e tolu na taro qo.

1 | E rawa ni lai yacova sara na 2.9 na mita na kena balavu e dua?

E kaya na iVolatabu ni balavu kei Koliaci e “ono na kiupiti, dua na ivakarau ni iqaqalo.” (1 Samuela 17:4) Na ono na kiupiti e tautauvata kei na 44.5 na sedimita, na dua na ivakarau ni qaqalo e tautauvata kei na 22.2 na sedimita. Na kedrau isoqoni na rua na fika qori e 2.9 na mita. Era vakatitiqataka eso ni va qori na balavu kei Koliaci. Ia vakasamataka mada, na tamata balavu duadua e bau volatukutukutaki ni bula ena noda gauna e 2.7 na mita na kena balavu. Vakacava e se dredre ga me vakabauti ke veisivi toka ga ena rauta na 20 na sedimita se sivia na kedrau balavu kei Koliaci? E cavutu mai o Koliaci ena nodra yavusa na Refeimi, era kawa ni tamata yagolevu. E tukuna e dua na ivola mai Ijipita ena ika13 ni senitiuri B.G.V., ni so na tamataivalu ena yasayasa o Kenani e 2.4 na mita na kedra balavu. Ke mani dredre mada ga me vakabauti, e rawa dina ni 2.9 na mita na balavu kei Koliaci.

2 | Vakacava a bula dina o Tevita?

E dredre me vakabauti na nodra kaya eso na dauvakadidike ni a sega ni bula dina o Tui Tevita. Na vuna? Era kunea na dauvakekeli eso na ka mai na gauna makawa e ceuti tu kina na matavosa “mataqali i Tevita.” O Jisu mada ga e vakabauta ni bula dina o Tevita, ya na vuna e cavuti koya kina. (Maciu 12:3; 22:43-45) E laurai tale ga ena iyatukawa e basika mai kina na Mesaia o Jisu ni o koya e kawa i Tui Tevita. (Maciu 1:6-16; Luke 3:23-31) Kena ibalebale a bula dina o Tevita.

3 | A dua dina na vanua na buca o Ela e tukuni ni rau vala kina o Tevita kei Koliaci?

E tukuna na iVolatabu ni rau vala ena Buca o Ela o Tevita kei Koliaci. E kaya tale ga nira keba toka na kai Filisitia ena dua na delana ena tadrua ni tauni o Soko kei Aseka. O ira na Isireli era keba ena dua tale na delana ena tai kadua ni buca. Vakacava era vanua dina qori?

E kaya e dua a sikova na yasayasa ya: “E sega ni daulotu na turaga e dauveivakasarasarataki, qai kauti keimami ina Buca o Ela. Keimami cabeta e dua na delana. Ni keimami raica sobu tu na buca, e tukuna me keimami wilika na 1 Samuela 17:1-3. Oti e dusi ena tai kadua ni buca qai kaya: ‘Na irusarusa kei Soko e toka ena imawi. Ena imatau e toka kina na irusarusa kei Aseka. Era keba toka na kai Filisitia ena tadrua ni tauni e rua, dua na yasa ni delana eda raica tu yani qori. De dua eda duri tu qo ena vanua era keba kina na Isireli.’ Au raitayaloyalotaki Tevita sara kei Koliaci ni rau duri tu e kea. Keimami siro mai delana, keimami lai takosova e dua na uciwai sa maca tu, sa bini tu ga kina na vatu. E vaka ga au raici Tevita toka ni tomika e lima na vatu dravia, dua na vatu ya a qai vakamatei Koliaci kina.” Dua na ka nona qoroqoro na turaga a talanoa toka ya kei na levu tale era lai sarasara, ni dina na veika e volatukutukutaki ena iVolatabu.

Io, e dodonu me vakabauti na veika e volatukutukutaki ni yaco ena gauna makawa. Na tamata kei na vanua era cavuti kina e sega ni buli se itukuni wale ga. E sega ni dodonu me vakatitiqataki na ivolatukutuku va qori ni volai sara tu ga ena Vosa ni Kalou, na nona ivola na Kalou daudina e “sega ni lasu rawa.”​—Taito 1:2; 2 Timoci 3:16.