Raica sara na lewena

Raica na lewenivola

 VAKATOTOMURIA NODRA VAKABAUTA | TEVITA

“[E] Nei Jiova na iValu”

“[E] Nei Jiova na iValu”

ERA drigiti Tevita na sotia nira sa veicicivi, qai waqa na matadra ena levu ni nodra domobula. O ira na sotia qori era dro mai na bucanivalu. Na cava era domobulataka? E rogoca o Tevita nira cavuta tiko e dua na yaca. Qori na yaca i Koliaci, na turaga qaciqacia e duri tu ena buca. De dua e se qai bau raica vakadua o Tevita e dua na tamata vakaitamera me vakataki Koliaci.

Sa qai taura rawa o Tevita na vuna era rere kina na sotia. Ke cokoti vata na kedrau bi e rua na tamata lelevu, e rairai sega mada ga ni yacova na bi kei Koliaci. Io, e turaga kaukaua qai dauvala qaqa o Koliaci, e vakaiyaragi vinaka tale ga ni ivalu. E lalata na veidelana na domona bi ni vakalialiai ira na sotia ni Isireli kei na nodra tui o Saula. E bolei ira voli na Isireli se o cei e via vala kei koya!​—1 Samuela 17:4-10.

Sega ni dua vei ira na Isireli e bole me vala kei Koliaci, o Tui Saula mada ga e rere. Sa qai kila o Tevita ni sa dua na vula vakacaca na kena yaco tiko na ituvaki ya! Era veiraici tu ga na lewe ni mataivalu ruarua ni veivakalialiai voli o Koliaci e veisiga. E rarawa o Tevita qai madua ni vakasamataka na nona rere na tui Isireli, o ira na nona sotia, kei ratou na tuakana! Ena rai nei Tevita, e vakamadualaka na mataivalu ni Isireli o Koliaci qai vosa vakacacataka na nodra Kalou o Jiova! Ia na cava ena bau cakava rawa na cauravou o Tevita? Ena yaga vakacava vei keda nikua na vakabauta i Tevita?​—1 Samuela 17:11-14.

“LUMUTI KOYA, O KOYA GA QO!”

Na cava e kilai me baleti Tevita? E dau vakatawana na sipi nei tamana ena veidelana volekati Peceliema ni se itabagone. E cauravou damudamu, matavinaka, qai musudonu. E taleitaka me qiria na api ena nona gauna ni vakacegu, e kenadau sara kina ni dau vakatovotovo vakalevu. E dau marautaka tale ga me sarava na ibulibuli ni Kalou era tu wavoliti koya. Ni vakatawa sipi tiko ena dua na yakavi, e talatala yani o tamana ni via raici koya.​—1 Samuela 16:12.

Ni yaco i vale o Tevita, e raica ni rau veitalanoa toka kei na dua na qase na tamana o Jese. Qori na parofita yalodina o Samuela, e talai koya yani o Jiova me lai lumuta e dua na luvei Jese me tui Isireli! Sa sotavi ratou oti na vitu na tuakai Tevita o Samuela, ia e tukuna vei Samuela o Jiova ni sega ni digitaka e dua vei ratou ya. Ia ni yaco yani o Tevita, e kaya vei Samuela o Jiova: “Lumuti koya, o koya ga qo!” Eratou rai tu na tuakai Tevita ni dolava o Samuela na ileu e tawa tu kina na waiwai, qai sova vakalailai e ului Tevita. Sa veisau sara ga na bula i Tevita ena gauna e lumuti kina. E kaya na iVolatabu: “E tekivu vakaukauataki Tevita na yalo i Jiova mai na siga oya me lako yani.”​—1 Samuela 16:1, 5-11, 13.

Lagiti Jiova o Tevita ena nona vakamatea na laione kei na bea

E sega ni bau nanuma o Tevita me sa veiliutaki sara vakatui. A waraka ga na yalo tabu i Jiova me qai dusimaki koya ena kena gauna donu. Me yacova na gauna ya, e tomana voli ga o Tevita na nona vakatawa sipi. E dau makututaka na cakacaka  qori, qai sotava kina na veika dredre ena so na gauna. Kena ivakaraitaki, rau via vaqara kakana yani vei ira na qelenisipi e dua na laione kei na bea. A sega ni cemuri rau wale ga na manumanu qori o Tevita. E vakamatea ruarua sara ga na laione kei na bea mera taqomaki kina na sipi nei tamana!​—1 Samuela 17:34-36; Aisea 31:4.

Ni rogoca o Tui Saula na italanoa kei Tevita, e talatala me gole yani vua o Tevita. E se dua tiko ga na dauvala qaqa o Saula, ia sa sega ni vakadonui koya o Jiova ni talaidredre ina nona ivakaro. Ni sa kauta tani vua o Jiova na veitokoni ni yalona tabu, levu na gauna e sa dau yaloca na tui, cudrucudru, kasami, qai voravora. Na ivakatagi ga e dau vakacegui Saula ena gauna e curumi koya kina na yalo ca. Era tukuna vei Saula eso na nona dauveiqaravi ni kenadau ena qiriqiri o Tevita qai dauvala. E mani kacivi o Tevita me lai dua vei ira na dau qiriqiri ena vale vakatui i Saula, me dau cola tale ga nona iyaragi.​—1 Samuela 15:26-29; 16:14-23.

Ena yaga vakalevu vei ira na itabagone na ivakaraitaki i Tevita. Na ka e digia me cakava ena nona gauna ni vakacegu e vakavolekati koya vei Jiova. E saga me kenadau ena so na ka ena yaga ena nona bula, qai vakarawarawataka nona kunea e dua na cakacaka. E dau muria tale ga na veidusimaki ni yalo tabu i Jiova. Qori na ka eda vuli kece kina!​—Dauvunau 12:1.

“ME KUA SARA NI VAKAYALOLAILAITAKA E DUA O KOYA”

Ni veiqaravi tiko ena vale i Saula o Tevita, e dau lesu i vale me lai vakatawa sipi qai dede nona lako tu ena so na gauna. Dua na gauna va qori e gole kina i vale o Tevita, a kerei koya o tamana me lai raici ratou na tuakana eratou lewe ni mataivalu i Saula. E mani gole o Tevita, qai kauta eso na iyaya vei ratou na tuakana ena Buca o Ela. A lai donuya e keri na ituvaki e vakamacalataki ena itekivu ni ulutaga qo. Erau veiraici toka ga na mataivalu ni Filisitia kei Isireli mai na yasa ni ulunivanua erau dui keba toka kina.​—1 Samuela 17:1-3, 15-19.

E vosovosota dredre o Tevita na veika e raica ena buca. E sega ni vakabauta nira dro na mataivalu ni Kalou bula o Jiova ena levu wale ga ni nodra domobulataka e dua e lotu butobuto. Ena rai nei Tevita, na nona veivakalialiai o Koliaci e beci kina o Jiova. E lai vakatarogi ira sara eso na sotia o Tevita se rawa ni vakabalei vakacava o Koliaci. Ni raica qori o Iliapi, e cudruvi Tevita na tacina qai kaya me kua ni siova na veika e yaco tiko ena bucanivalu. Ia e kaya vua o Tevita: “Na cava au cakava? Au taro wale tiko ga!” E tukuna wavoki sara o Tevita ni rawa ni vakabalei Koliaci. Ni rogoca qori o Saula, e talatala sara me kau yani vua o Tevita.​—1 Samuela 17:23-31.

Ni rau sota kei Saula, e kaya vua ena nuidei o Tevita me baleti Koliaci: “Me kua sara ni vakayalolailaitaka e dua o koya.” E vakamalumalumutaki Saula kei ira na nona sotia na nodra rerevaki Koliaci. Me vaka ga e kena ivakarau vei keda na tamata, era rairai vakatauvatani ira na Isireli vei Koliaci. Nira raica na vakaitamera kei Koliaci kei na kedra ka lalai o ira, sa ra nanuma ga nira na sega ni vakabalea rawa na tuwawa e duri tu e matadra. Ia e duatani na rai nei Tevita me baleta  na leqa era sotava tu qo na Isireli, e mani bole me vala kei Koliaci.​—1 Samuela 17:32.

E kaya o Saula: “O na sega ni valuta rawa na kai Filisitia qo ni o se gone ga, e dauvala o koya mai na gauna se cauravou kina.” De dua e se sega ni yacova o Tevita na yabaki me curu kina ena mataivalu, e rairai gone tale ga. Ia e sega ni gonelailai o Tevita ni sa rairai volekata toka na yabaki 20, sa vakaraitaka oti tale ga ena so na ituvaki ni dauvala.—1 Samuela 16:18; 17:33.

E talanoataka tale vei Saula o Tevita na veika e cakava vei rau na laione kei na bea. E sega ni vakalevulevui koya o Tevita ni kila vinaka tu ni a sega ni qaqa ena nona kaukaua ga. A kaya: “O Jiova a vakabulai au mai na liga ni laione kei na bea, o koya ga ena vakabulai au mai na ligana na kai Filisitia qo.” E vakacegui Saula na vosa qori, mani kaya: “Mo lako, me tokoni iko mada ga o Jiova.”​—1 Samuela 17:37.

Vakacava o vinakata me vakataki Tevita na nomu vakabauta? Dua na ka me nanumi tiko, a sega ni rawata vakacakamana o Tevita na vakabauta. Na nona vakabauta na Kalou e yavutaki ena kilaka kei na veika e sotava ena nona bula. E vakadeitaka e keri ni dauloloma o Jiova, e dau veitaqomaki, qai dau dina ena nona yalayala. Me vakataki Tevita ga, eda rawa ni bucina na vakabauta ke da vulica tiko ga na veika me baleta na Kalou ena iVolatabu. Nida bulataka na ka eda vulica da qai vakila na kena yaga ena noda bula, sa na qai dei ga na noda vakabauta.​—Iperiu 11:1.

“ENA SOLI IKO E LIGAQU O JIOVA”

E solia nona iyaragi o Saula me dara o Tevita. E via vaka ga na isulunivalu i Koliaci, e caka mai na kopa qai veitaqataqai tu kina na veleti kaukamea lalai. Ia e voleka ni sega ni toso rawa o Tevita ena levu ni iyaragi sa dara tu, e kila ni na sega ni vala vinaka kina. E sega ni matau vua na iyaragi ni mataivalu ni sega ni sotia o koya. Ni tamata balavu duadua tale ga ena matanitu o Isireli o Saula, ena sega ni rauti Tevita kina na nona isulunivalu! (1 Samuela 9:2) E mani luvata kece o Tevita na iyaragi, qai dara ga na kote ni nona vakatawa sipi.​—1 Samuela 17:38-40.

E kauta na nona ititoko ni vakatawa sipi, nona kato, kei na irabo. Ke mani ka lailai mada ga, e iyaragi vinaka tale ga na irabo vakabibi vua e dua na ivakatawanisipi. Na irabo e rua na kena wa leca qai semai rau e dua na taga. Ena biuta na daurabo na vatu ena taga qori, wiricaka vakaukaua, qai sorova e dua na kena wa. E vakadomobula na ka e rawa ni cakava na vatu qori ni sa lauta na takete. Ena so na mataivalu, e dua sara ga nodra iwasewase na daurabo. Qori e vakaraitaka ni iyaragi mana tale ga na irabo.

Ni raica o Tevita ni sa tu kece na ka e vinakata, sa qai golevi Koliaci. De dua e masu vakavica o Tevita ni vaqara toka e uciwai e lima na vatu dravia me vakayagataka. Oti sa qai gole ena bucanivalu!

Cava e nanuma o Koliaci ni raici Tevita? E kaya na iVolatabu: “E beci koya sara ga ni gone damudamu qai musudonu.” E kailavaka o Koliaci: “O yau na koli, ni o taura tu ga mai na kau mo mai valuti au?” Kena irairai ni raica ga o Koliaci na ititoko e taura tu o Tevita, e sega ni raica na irabo. E vosavakacacataki Tevita o Koliaci ena yaca ni nodra kalou na kai Filisitia. E kaya ni na vakamatei koya qai solia na yagona vei ira na manumanuvuka ni lomalagi kei na manumanu ni vanua.​—1 Samuela 17:41-44.

Na ka e tukuna o Tevita e vakaraitaka na dei ni nona vakabauta. E kacivaka vei Koliaci: “O mai valuti au ena iseleiwau kei na rua na moto, ia au lai valuti iko ena yaca i Jiova ni lewe vuqa, na nodra Kalou na mataivalu ni Isireli o bolea.” E kila o Tevita ni sega ni dua na ka na kaukaua se na iyaragi i Koliaci. Ena sauma vua o Jiova na nona veibeci. Sa qai vakadeitaka qori o Tevita ena nona kaya ni “nei Jiova na ivalu.”​—1 Samuela 17:45-47.

E sega ni vakalaiva o Tevita me vakayalolailaitaki koya na vakaitamera kei Koliaci se na nona iyaragi. E sega tale ga ni vakatauvatani koya vei Koliaci me vaka e cakava o Saula kei ira na nona sotia. Ia e vakatauvatani Koliaci kei Jiova. E sega ni dua na ka vua na Turaga Cecere ni lomalagi kei  vuravura na 2.9 na mita na balavu kei Koliaci. Ke mani balavu duadua mada ga vei ira na tu ena bucanivalu, e se somidi ga o Koliaci e mata i Jiova. Sa na vakarau raica qo na ka ena cakava o Jiova me vakawabokotaki koya kina!

E cici voleka yani o Tevita ena vanua e duri tu kina o Koliaci. E taura mai na taga e dua na vatu, biuta ena irabo, qai wiricaka vakaukaua. Sa toso volekati Tevita yani ena gauna qori o Koliaci, e liu toka vua o koya e cola tu nona isasabai. Ia sa balavu sivia tale o Koliaci, ena dredre kina vua na sotia me laveta cake na isasabai me taqomaka na ului Koliaci. Qori sara ga na vanua e taketetaka o Tevita.​—1 Samuela 17:41.

Vakabauta o Tevita ni somidi tale ga ena mata i Jiova na tuwawa

Ni sorova o Tevita na wa ni irabo, e cawi na vatu qai lauta na takete. E vukei Tevita o Jiova me rawa ni rabotaka ga e dua na vatu. E dua ga na vatu ya e lauta vinaka na yadrei Koliaci, mani bale vakatoboicu ena qele na tuwawa! A rairai dro o koya e dau cola na isasabai nei Koliaci ena levu ni nona rere. E cici o Tevita ena vanua e davo tu kina o Koliaci, taura nona iseleiwau qai musuka na domona.​—1 Samuela 17:48-51.

Sa qai yaloqaqa o Saula kei ira na nona sotia nira raica na ka sa yaco. Era kaila ra qai cicivi ira na kai Filisitia. A yaco dina na ka e tukuna o Tevita vei Koliaci: “[O] Jiova . . . ena soli kemuni kece ina liga i keimami.”​—1 Samuela 17:47, 52, 53.

Era se vala ga ena gauna makawa na tamata ni Kalou, gauna qo sa sega. (Maciu 26:52) Ia e se bibi ga meda vakatotomuria na vakabauta i Tevita. Meda vakabauta ni bula dina tiko o Jiova, ni o koya tale ga na Kalou duadua ga meda qarava qai rokova. De dua eda nanuma ena so na gauna nida na sega ni taqea rawa na levu ni leqa eda sotava. Ia na noda leqa qori e somidi sara ni vakatauvatani kei na kaukaua tawavakaiyalayala i Jiova. E sega ni dua na ka meda leqataka ke da digi Jiova me noda Kalou, da qai vakabauti koya me vakataki Tevita. E tu vei Jiova na kaukaua me veivuke ena leqa se ituvaki cava ga eda sotava!