Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | NA IVOLA E SEGA NI KAWABOKO RAWA

Sega ni Vuca Rawa

Sega ni Vuca Rawa

ITUVAKI LEQATAKI: Era vakayagataka vakalevu na kuta kei na kulinimanumanu na dauvola iVolatabu kei ira na lavetaka. * (2 Timoci 4:13) A rawa ni vakaleqa vakacava qori na maroroi ni iVolatabu?

E rawarawa ni kadresu na kuta, seavu na rokana, e malumalumu tale ga. Erau kaya o Richard Parkinson kei Stephen Quirke, erau dau dikeva na itukutuku makawa kei Ijipita: “E rawa ni vuca na kuta ni toso na gauna, lai vuki tale me wa se kuvu. Ke suasua na vanua e maroroi kina na kuta, e rawa ni tavukadiridiri se midra. Ke bulu na kuta, e rawa ni kania na kalavo kei na manumanu lalai tale eso.” Eso na kuta e ca totolo ni sa sivia tale na rarama se katakata ena vanua e maroroi tu kina.

E kaukaua mai na kuta na kulinimanumanu, ia e rawa ni ca ke sega ni maroroi vinaka se biu ena vanua e katakata se rarama sivia. * Era dau taleitaka tale ga na kulinimanumanu na manumanu lalai. Sa rauta mera sega ni yacova mai na noda gauna qo e levu na ivolatukutuku makawa. Ke a vakaleqa na maroroi ni iVolatabu na vica na ka eda sa raica oti, eda na sega ni wilika rawa nikua na kena itukutuku.

MAROROI NI IVOLATABU: E vakaroti na tui ena nodra lawa na Jiu me “vola vakataki koya ena dua na ivola na ilavelave ni Lawa qo,” oya na imatai ni lima na ivola ena iVolatabu. (Vakarua 17:18) Na levu ni ivolavivigi era lavetaka na kenadau, e kune kina na iVolatabu ena valenisoro e Isireli taucoko ena imatai ni senitiuri  G.V., yaco sara ina veivanua yawa me vakataki Masitonia! (Luke 4:16, 17; Cakacaka 17:11) Era maroroi vakacava eso na ivolavivigi makawa me yacova mai na noda gauna qo?

A tawa ena saqa qele qai biu ena qaravatu ena dua na vanua mamaca na ivolavivigi ni Waitui Mate, a maroroi tu kina me vica vata na senitiuri

E kaya e dua na dauvakadidike ni Veiyalayalati Vou o Philip W. Comfort: “Era kilai na Jiu ena nodra dau maroroya ena saqa na ivolavivigi ni iVolatabu.” Era tomana voli mai na lotu vaKarisito na ivakarau qori. Sa rauta mera kune eso na ivolavivigi makawa ni iVolatabu ena vanua mamaca, saqa qele, rumu buto, kei na qaravatu.

KENA YAGA: Sa tu nikua e vica vata na udolu na ivolavivigi ni iVolatabu, eso sa sivia na 2,000 na yabaki na kena maroroi voli mai. Sega tale ni dua na ivola makawa me maroroi vakadede tu na kena ivolavivigi.

^ para. 3 Na kuta e dua na iyaya ni volavola e caka ga mai na kau e vakayacani kina.

^ para. 5 Kena ivakaraitaki, a volai ena kulinimanumanu na Yavu ni Vakavulewa ni matanitu o Merika. Oti e rauta ni 250 na yabaki, voleka ni sega ni wiliki rawa tale ni sa siawa na rokana.