Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | NA IVOLA E SEGA NI KAWABOKO RAWA

iTukutuku e Bibi me Kilai

iTukutuku e Bibi me Kilai

Na ivola cava sa dede na kena vaqaqacotaka voli mai na vakabauta? Na ivola cava e dikevi qai vakalewai vakalevu duadua? Io, na iVolatabu. Sa rauta me sega tale ni dua na ivola ni lotu e vaka na iVolatabu.

Era nanuma eso na dauvakadidike ni duidui na iVolatabu ni gauna qo mai na kena e volai taumada. E kaya e dua na parofesa ena veika vakalotu: “Sega ni macala e donu na veika eda lavetaka mai na iVolatabu taumada se sega. Na ilavelave sa tu vei keda nikua e levu kina na cala, a vakarautaki ni sa oti e vica vata na senitiuri mai na kena volai na ilavelave taumada, qai levu na duidui e laurai.”

Eso era vakatitiqataka ni dina na iVolatabu ena vuku ni lotu era susugi kina. Dua vei ira qori o Faizal, eratou sega ni lotu vaKarisito na nona vuvale. A vakavulici me vakabauta ni iVolatabu e ivola ni lotu, ia sa vakayacori kina na veiveisau. E kaya o Faizal: “Qori na vuna au dau tu suka kina na veitalanoataka kei ira eso tale na iVolatabu. Na nodra ilavelave ni iVolatabu sa sega ni kena e volai taumada. Sa vakayacori kina na veiveisau!”

Vakacava e bibi me kauaitaki ke a vakayacori ena iVolatabu na veiveisau se sega? Vakasamataka mada qo: Ena rawarawa beka mo vakabauta na yalayala totoka ena iVolatabu, ke o sega ni vakadeitaka nira tiko tale ga na yalayala qori ena iVolatabu taumada? (Roma 15:4) Ke laurai e levu na cala ena iVolatabu sa tu nikua qai vola ga na tamata, vakacava o na yavutaka ena kena ivakavuvuli na nomu vakatulewa me baleta na cakacaka, vuvale, se sokalou?

Sa sega ni tiko vei keda nikua na iVolatabu taumada. Ia e tu e levu na ilavelave makawa e rawa ni dikevi tale, wili kina e vica vata na udolu na ivolavivigi ni iVolatabu. Na cava e sega ni vuca rawa kina na ivolavivigi qori? Na cava e guce kina nodra sasaga na dauveitusaqati, kei ira era via vakatanitaka na itukutuku ena iVolatabu? Ena vaqaqacotaka vakacava qori na nomu vakabauta ni dina na iVolatabu sa tu nikua? Wilika na kena isau ena vica na ulutaga veitaravi qo.