Ena vakacava tu mada na bula e vuravura ke sega na matanisiga? E solia na matanisiga na kaukaua ina vunikau me vakadrauna, vakavuana, sereka mai na sena kei na sorena. E vakavuna tale ga me domica na wai mai na wakana ina drauna, lai vakavuna sara me cawa.

E iloloma talei ni Kalou na uca ni vakavuna me vuataka na vuravura na kakana meda kania. E vakatauca na uca mai lomalagi, qai vakarautaka na gauna vinaka ni tatamusuki me vakamamautaki keda ena kakana kei na lomada ena marau.

Levu na tama era dau lomaocaocataka mera vakarautaka na kakana kei na isulu vei ira nodra vuvale. Dikeva mada na ka e kaya na iVolatabu: “Raici ira mada vakavinaka na manumanuvuka ni lomalagi, era sega ni teitei, tatamusuki, se kumuna na kedra ena lololo, ia e vakani ira na Tamamudou vakalomalagi. Vakacava, dou sega ni yaga vakalevu vei ira?”—Maciu 6:25, 26.

“Dou vuli mai na nodra tubu na lili ni veikau . . . , ia au kaya vei kemudou, na iukuuku kece i [Tui] Solomoni e sega ni bau yacova na kedra totoka. O koya gona, ke vakasuluma na Kalou na co ni veikau . . . , me qai sega vakacava ni vakasulumi kemudou?”—Maciu 6:28-30.

Ke sa vakarautaka vei keda na Kalou na kakana kei na isulu, eda nuidei ni na vukei keda ena so tale na ka meda bula kina. Nida vakaliuca gona na inaki ni Kalou, ena vakalougatataka noda sasaga meda tea na keda se vaqara cakacaka meda volia kina na ka e yaga vei keda.—Maciu 6:32, 33.

Nida vakasamataka na veika e bulia na Kalou me vaka na matanisiga, na uca, manumanuvuka kei na senikau, e tiko gona na vuna vinaka meda lomani koya kina. Eda na dikeva ena ulutaga e tarava na sala e vosa kina vei keda na Dauveibuli.