Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Ena Muduki Vakacava o Mate?

Ena Muduki Vakacava o Mate?

NA NODRAU talaidredre o Atama kei Ivi e vakavuna meda ivalavala ca, meda mate tale ga. Ia e sega ni veisautaka qori na inaki ni Kalou me baleti keda. E vakadeitaka wasoma ena nona vosa na iVolatabu ni sega ni veisau nona inaki.

  • “O ira na yalododonu era na taukena na vuravura, era na qai bula tawamudu kina.”Same 37:29.

  • “Ena tiloma vakadua o koya na mate, ena qusia na Turaga Cecere Duadua o Jiova na wainimata mai na matadra kece.”Aisea 25:8.

  • “Na iotioti ni meca me vakamalumalumutaki o mate.”1 Korinica 15:26.

  • “Sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”Vakatakila 21:4.

Na cava na ibalebale ni na ‘tilomi mate vakadua’ na Kalou, se “vakawabokotaki” na meca qo o mate? E vakamatatataka na iVolatabu ni o ira na “yalododonu . . . era na qai bula tawamudu.” Ia e tukuni tale ga kina ni “sega ni dua na tamata yalododonu e vuravura me vakayacora tiko ga na ka vinaka.” (Dauvunau 7:20) Me muduki o mate, vakacava ena veisautaka na Kalou nona ivakatagedegede mera rawa ni vakabulai na tamata ivalavala ca? Sega! Ena sega ni cakava qori ni ‘sega ni lasu rawa na Kalou.’ (Taito 1:2) Cava gona ena cakava na Kalou me vakayacora kina na inaki ni nona buli keda?

NA KALOU “ENA TILOMA VAKADUA . . .  NA MATE.”—AISEA 25:8

MUDUKI O MATE ENA VUKU NI ISORO

E vakarautaka vakayalololoma na Kalou o Jiova na ivoli meda vakabulai kina. E veiganiti vinaka na ivoli qori me bokoci kina na veika ca e yaco, se na kena vakayacori na lewadodonu. Eda ivalavala ca kece, eda na mate tale ga. E kaya kina na iVolatabu: “E sega ni bau dua vei ira e rawa ni volia lesu na tacina se solia vua na Kalou na kena ivoli, (sa rui talei na ivoli ni nodra bula oya na vuna era na sega tu ga kina ni rawata).”—Same 49:7, 8.

Ni dua na tamata ivalavala ca e mate, ena bokoci ga kina na itotogi ni nona ivalavala ca, ena sega ni sauma se vakarautaka na ivoli me baleta tale e dua. (Roma 6:7) Eda vinakata gona e dua e uasivi qai sega nona cala me solia nona bula ena vuku ni noda ivalavala ca.—Iperiu 10:1-4.

Qori na ka e tuvanaka na Kalou me vakayacora. A bula tu mai lomalagi na Luvena o Jisu, qai talai koya mai vuravura me bula uasivi vakatamata. (1 Pita 2:22) O Jisu e “solia tale ga na nona bula me kedra ivoli na le levu.” (Marika 10:45) E cakava qori me muduka kina na keda meca o mate me rawa nida vakabulai.—Joni 3:16.

ENA MUDUKI NINAICA O MATE?

Sa vakayacori tiko nikua na parofisai vakaivolatabu ni na “vakilai . . .  e levu na ka dredre,” me ivakadinadina nida bula tu ena “iotioti ni veisiga” ni ituvaki ca kei vuravura qo. (2 Timoci 3:1) Ena cava na iotioti ni veisiga qori ena “siga ni lewa mera vakarusai kina o ira na sega ni doka na Kalou.” (2 Pita 3:3, 7) Ia o ira na lomana na Kalou era na vakabulai, era na “bula tawamudu” tale ga.—Maciu 25:46.

O Jisu e “solia tale ga na nona bula me kedra ivoli e le levu.”—Marika 10:45

Era na rawa ni bula tawamudu e vica vata na milioni era vakaturi mai na mate. E vakaraitaka o Jisu na veivakaturi ena gauna e sikova kina na siti o Neini. A mate na luvena tagane duadua ga e dua na yada, nona “lomani koya” o Jisu e vakaturi luvena tale. (Luke 7:11-15) E kaya tale ga na yapositolo  o Paula: “Au nuitaka na Kalou . . . nira na vakaturi mai na yalododonu kei ira na sega ni yalododonu.” Na inuinui dei qori e vakadinadinataka kina na Kalou na titobu ni nona lomani keda.—Cakacaka 24:15.

E vica vata na bilioni era rawa ni rai vakanamata mera bula tawamudu. E kaya na iVolatabu: “O ira na yalododonu era na taukena na vuravura, era na qai bula tawamudu kina.” (Same 37:29) Era na qai raica na kena vakayacori na veika e vola na yapositolo o Paula ena 2,000 na yabaki sa oti: “O iko mate, i vei na nomu qaqa? O iko mate, i vei na nomu bati gaga?” (1 Korinica 15:55) Sa na muduki vakadua na keda meca o mate!