Raica sara na lewena

Raica na lewenivola

Sa Voleka ni Vakaotia Kece na Rarawa na Kalou

Sa Voleka ni Vakaotia Kece na Rarawa na Kalou

“Me vakacava na dede ni noqu kere veivuke vei kemuni Jiova, ia oni sega ni rogoca? Me vakacava na dede ni noqu kerei kemuni moni vukei au mai na ivalavala voravora, ia oni sega ni veivakabulai?” (Apakuki 1:2, 3) Qori na vosa e cavuta o Apakuki e dua na turaga vinaka, e dau lomani koya na Kalou. Ia vakacava e laurai ena nona vakamamasu ni lailai nona vakabauta? Sega. A vakadeitaka vei Apakuki na Kalou ni sa lokuca tu na gauna me vakaotia kina na veika rarawa.—Apakuki 2:2, 3.

Ni o rarawa se ni rarawa e dua nomu itokani voleka, o na rairai nanuma ni sa rui berabera na Kalou me veivuke. De dua o na lomatarotarotaka na vuna e sega ni cakava kina e dua na ka. Ia e vakadeitaka na iVolatabu: “E sega ni dau berabera ni vakayacora nona yalayala o Jiova me vaka era nanuma eso ni berabera, ia e vosoti kemuni ga ni sega ni vinakata me rusa e dua, e vinakata ga moni veivutuni kece.”—2 Pita 3:9.

ENA YAVALA NINAICA NA KALOU?

Dua na gauna ga qo! E vakaraitaka o Jisu ni dua na itabatamata ena raica na yaco ni so na ka ena dusia na icavacava ni “veika vakavuravura.”(Maciu 24:3-42) Na kena vakayacori na parofisai i Jisu ena gauna qo e dusia ni sa voleka me cakava e dua na ka na Kalou ena ituvaki qo. *

Ena vakaotia vakacava na Kalou na veika rarawa? Ni se bula e vuravura o Jisu, e vakaraitaka na kaukaua ni Kalou me vakaotia na veika rarawa eda sotava. Dikeva mada eso na kena ivakaraitaki.

Leqa Tubukoso: Ni ratou soko tiko o Jisu kei na nona yapositolo ena Wasa o Kalili, e tataba e dua na cagi kaukaua qai voleka ni vakaluvuca nodratou waqa. E mani vakaraitaka o Jisu ni tu vei rau vakaveitamani na kaukaua me rau lewa na draki. (Kolosa 1:15, 16) E kaya o Jisu: “Mo maravu!” Na cava e qai yaco? “Mai ruru yani na cagi, e maravu tale ga na wasawasa.”—Marika 4:35-39.

Tauvimate: E kilai o Jisu ni dau vakabulai ira na mataboko, lokiloki, manumanusoni, vukavuka kei na levu tale. E “vakabulai ira kece na rarawa tu.”—Maciu 4:23, 24; 8:16; 11:2-5.

Leqa ni Kakana: E vakayagataka o Jisu na kaukaua e solia vua o Tamana me vakalevutaka na kakana ena so na gauna. E volatukutukutaki ena iVolatabu na nona vakania vakarua e vica vata na udolu na lewenivanua ena nona cakacaka vakaitalatala.—Maciu 14:14-21; 15:32-38.

Mate: E tu vei Jiova na kaukaua me vakaotia na mate. E vakadinadinataki qori ena tolu na veivakaturi i Jisu e volatukutukutaki ena iVolatabu. E dua vei ira na vakaturi e sa mate tu me va na siga.—Marika 5:35-42; Luke 7:11-16; Joni 11:3-44.

^ para. 5 Me ikuri ni ivakamacala me baleta na iotioti ni veisiga, raica na wase 9 ni ivola Na Cava Eda na Vulica ena iVolatabu? Tabaka na iVakadinadina i Jiova, rawa tale ga ni download wale ena www.jw.org.